Revelation 14

Kamba (MBIVILIA ŨVOO MŨSEO)

← Chapter 13 Jump to: Chapter 15 →

1Nĩnasyaisye noona Kalondu aũngyĩ Kĩĩmanĩ kya Saioni, e vamwe na ala andũ ngili ĩana na mĩongo ĩna na inya, maandĩkĩtwe ĩsyĩtwa yake na ya ĩthe wake itulyanĩ syoo.

2Nĩvo ĩndĩ neewie wasya kuma ĩtunĩ ũilyĩ ta wa kĩw'ũ kingĩ kĩtheete, na ta wa kĩtundumo kĩnene kya kĩtandalĩki. Neew'aa ta wasya wa aini makũnaa ngitaa nene.

3Andũ asu ngili ĩana na mĩongo ĩna na inya nĩmainĩte wathi mweũ me mbee wa kĩvĩla kya kĩ-ũsumbĩ kya Ngai, na mbee wa ila syũmbe inya syĩ thayũ, na mbee wa ala atumĩa. Vai mũndũ waĩ atonya kũelewa nĩ ũndũ wathi ũsu ũkwasya ate o andũ asu, nũndũ no mo maĩ ovosye kuma ĩũlũ wa nthĩ.

4Asu nĩmo andũ ala meethĩiwe na mwĩkalo mwaĩlu, malea kwĩthokoany'a na molaalai, na meeyĩkalya me atheu. Nĩmeekaa maũndũ onthe ala Kalondu wameaĩaa meke. Nĩmoovoiw'e kuma andũnĩ ala angĩ, methĩwe mailyĩ ta ũsyao wa mbee wa syĩndũ syonthe ithembeetwe Ngai na Kalondu.

5Mayaaneena ndeto sya ũvũngũ o na ĩndĩĩ; mai ĩvĩtyo o na yĩmwe.

6Nĩnoonie mũlaĩka ũngĩ aũlũkĩle kũũya ĩũlũ nzevenĩ, e na ũtũmani wa Ũvoo Mũseo wa tene na tene kuma kwa Ngai, akaũtavany'e kwa andũ onthe ĩũlũ wa nthĩ: Kwa andũ ma mbaĩ syonthe na kwa andũ ma ithyomo na ngo syĩ kĩvathũkany'o.

7Nĩwaneenie na wasya mũnene asya atĩĩ, “Mũnengei Ngai ndaĩa na kũmũkumya, nũndũ ĩvinda yake ya kũsilĩla nĩ ĩviku. Mũthaithei we ũla woombie ĩtu, nthĩ, mokanga na kw'onthe kũla kumaa kĩw'ũ.”

8Mũlaĩka ũngĩ wa kelĩ nĩwaumĩlile ayasya atĩĩ, “Nĩ mbalũku! Nĩ mbalũku vyũ ĩla ndũa nene yĩ nguma yĩtawa Mbavilonĩ, ĩla ĩnengae andũ onthe manyw'e ndivai ya mothũku, nginya makamilwa na kũkwatwa nĩ mawendi mathũku ma kĩ-mwĩĩ.”

9Mũlaĩka ũngĩ wa katatũ nĩwaumĩlile na aneena na wasya mũnene asya atĩĩ, “Mũndũ o na wĩva athaitha ĩla nyamũ na mũvw'anano wayo, na kwĩkĩwa ũvano kĩtulyanĩ kana kw'okonĩ kwake,

10akanyw'a ndivai ya ũthatu na ũsilĩlo wa Ngai. Ĩsu ĩkeethĩwa yĩ ngwatu vyũ, yusũĩte kĩkombenĩ kya ũthatu wa Ngai. Andũ ma mũthemba ũsu makathĩnw'a kwa kũvĩvw'a na mwaki wa lavuti, me mbee wa alaĩka atheu na me mbee wa Kalondu.

11Syũki ya mwaki ũla ũkamavĩvya yĩkambataa tene na tene. Vaikethĩwa ũthũmũo ũtukũ kana mũthenya kwa andũ asu mathaithaa nyamũ ĩsu na mũvw'anano wayo, na onthe ala mekĩĩtwe ũvano wa ĩsyĩtwa ya nyamũ ĩsu.”

12Kwoou ve vata wa aĩkĩĩi ala mekaa ũndũ mĩao ya Ngai ĩkwasya, na ala maĩkĩĩaa Yesũ methĩwe na wũmĩĩsyo.

13O ĩngĩ nĩnasyokie neew'a wasya kuma ĩtunĩ ũyasya atĩĩ, “Andĩka ndeto ii vandũ: Nĩ aathime ala kuma yu mekusaa me na mũĩkĩĩo nthĩnĩ wa Mwĩai!” Veva Mũtheu easya atĩĩ, “Kwa w'o nĩ aathime nĩ kana mathũmũe matie mawĩa maito, nũndũ nĩmakanengwa ĩtuvi ya meko moo maseo ala meekie.”

14O ĩngĩ nĩnoonie vaumĩla ĩtu yeũ, na ĩũlũ wayo vaĩ ũmwe wailyĩ Mwana wa Mũndũ, ekĩĩte ngovia ya thaavu ya kĩ-ũsumbĩ, na akakwata kavyũ ke ngoto koĩ ka kũketha.

15Mũlaĩka ũngĩ nĩwaumie Ĩkalũnĩ yĩla yĩ ĩtunĩ, na amwĩta na wasya mũnene ũsu ũla waĩ ĩũlũ wa ĩtu yĩu yeũ amwĩa atĩĩ, “Kwata kavyũ kaku nesa ũkethe, nũndũ ĩvinda ya kũketha nĩyavika, o nayo ngetha nĩvikĩte ĩvinda ya yo ya kũkethwa.”

16Nĩvo ĩndĩ ũsu waĩ ĩũlũ wa ĩtu yĩu yeũ wavyũlilye kavyũ kau wakwete, na aketha ngetha kuma ĩũlũ wa nthĩ.

17Mũlaĩka ũngĩ nĩwaumie Ĩkalũnĩ yĩla yĩ ĩtunĩ, o nake akwete kavyũ ke ngoto koĩ ka kũketha.

18Mũlaĩka ũngĩ ũla wĩ ũtonyi ĩũlũ wa mwaki nĩwaumie kĩthembeonĩ. Nĩweetie ũla ũngĩ wakwete kavyũ koĩ na wasya mũnene amwĩa atĩĩ, “Kwata kavyũ kaku nesa ũtile itũngo sya mũsavivũ wa nthĩ, nĩkwĩthĩwa nzavivũ syaw'o nĩ mbĩu.”

19Kwoou mũlaĩka ũsu nĩwavyũlilye kavyũ kake ĩũlũ wa nthĩ, na oombany'a nzavivũ syayo asyĩkya ĩimanĩ ĩnene ya ũsilĩlo wa Ngai vala ivivĩawa.

20Nzavivũ isu nĩsyakinyangĩiwe ĩimanĩ yĩu ya kũvivĩa nzavivũ yĩla yĩ nza wa ndũa, na nthakame mbingĩ yauma ĩimanĩ yĩu; nthakame ĩsu yatheeie ta ũsĩ wĩ na ũasa wa kĩlomita maana atatũ na ũliku wa mita ta ilĩ.

← Chapter 13 Jump to: Chapter 15 →