Revelation 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1O nĩendee kũsyaĩĩsya, nĩnoonie Kalondu oombũa ũmwe wa ala mawũmbĩĩo mũonza. Nĩvo ĩndĩ neewie kĩmwe kya ila syũmbe inya kyaneena na wasya mũnene ta wa kĩtundumo kyasya atĩĩ, “Umĩla!”

2Nĩnasyaisye na noona mbalasi nzaũ. Nĩyakuĩte ũmwe ũkwete ũta, na eekĩwa ngovia ya kĩ-ũsumbĩ. Nĩwasindĩte kaũnĩ na aumĩlile aendee na kũsinda.

3Yĩla Kalondu woombũie wũmbĩĩo wa kelĩ, nĩneewie kyũmbe kĩngĩ kya kelĩ kyasya atĩĩ, “Umĩla!”

4Nĩvaumĩlile mbalasi ĩngĩ ndune mũno. Ũla wakuĩtwe nĩyo nĩwanengetwe ũtonyi wa kwĩkĩa ũthũ katĩ wa andũ ĩũlũ wa nthĩ nĩ kana moaane. Kwoou nĩwanengiwe ũvyũ mũnene mũĩ wa kũaana.

5Yĩla woombũie wũmbĩĩo wa katatũ, nĩneewie kyũmbe kĩngĩ kya katatũ kyasya atĩĩ, “Umĩla!” O nĩsyaĩĩsye nĩvaumĩlile mbalasi nziũ, nayo ũla yakuĩte akwete kĩthimi.

6Nĩneewie kĩndũ ta wasya waumaa vala ve syũmbe isu inya syĩ thayũ ũkwasya atĩĩ, “Mũkeve ũmwe wa mũtu wa nganũ wĩthĩwe na thooa wa ĩtuvi ya mũndũ ya mũthenya ũmwe, nayo mĩkeve ĩtatũ ya mũtu wa ĩla nganũ yĩtawa mbaale ĩyĩthĩwa na thooa wa ĩtuvi ya mũndũ ya mũthenya ũmwe. Ĩndĩ ndũkatume mauta na ndivai ioleka!”

7Yĩla woombũie wũmbĩĩo wa kana, nĩneewie kĩla kyũmbe kĩngĩ kya kana kyasya atĩĩ, “Umĩla!”

8Nĩvaumĩlile mbalasi ĩngĩ yĩ na langi mũtuku, nayo ũla yakuĩte etawa Kĩkw'ũ, na akaatĩĩwa nĩ ũngĩ wĩtawa Vala maveva ma ala akw'ũ mekalaa. Nĩmanengiwe ũtonyi wa kũaa andũ ĩũlũ wa kĩlungu kĩmwe kya inya kya nthĩ yonthe, kwa nzĩa ya kaũ, nzaa, ũwau mũthũku, na nyamũ mbai sya kũũ nthĩ.

9Yĩla woombũie wũmbĩĩo wa katano, nĩnoonie ungu wa kĩthembeo maveva ma ala mooaiwe nũndũ wa kũtavany'a ndeto ya Ngai, na kũkũsĩĩa ĩũlũ wa mũĩkĩĩo ũla maĩ naw'o.

10Nĩmeetanaa na wasya mũnene mayasya atĩĩ, “Mwĩai Mwene Ũtonyi W'onthe, wĩ mũtheu na wa kũĩkĩĩwa! Wĩĩkala ĩvinda yĩana ata ũyĩsa kũsilĩla na kũtũĩvanĩsya kwa ala matũaie twĩ ĩũlũ wa nthĩ?”

11Kĩla ũmwe woo nĩwanengiwe ngũa nzaũ ndaasa, na meewa mathũmũange o vanini, nĩ kana angĩ ma athũkũmi o ta mo na aĩkĩĩi moawe, o ũndũ mo mooaĩtwe nĩ kana ũtalo wĩanĩĩe.

12Yĩla woombũie wũmbĩĩo wa thanthatũ, o nĩendee na kũsyaĩĩsya, nĩveethĩiwe kĩtetemo kĩnene mũno kya nthĩ. Syũa nĩyaalyũkile yaia ta ngũa ngaamu sya makunia, naw'o mwei watunĩva ta nthakame.

13Ndata nasyo nĩsyavalũkangile nthĩ, ũndũ mũkũyũ ũvalũkangasya makũyũ methĩ wathingithw'a nĩ kĩuutani kĩ na vinya.

14Matu nĩmavĩtie makũnzĩtwe ta ĩvuku ya ũkũnzwa yĩendee na kũkũnzwa, na iĩma syonthe na ithama syavetangwa vala syaĩ.

15Nĩvo ĩndĩ ala masumbĩkĩte ĩũlũ wa nthĩ, andũ me nguma na atongoi ma asikalĩ ma kaũ, athwii na ala me ũtonyi, na andũ ala angĩ onthe, ngombo na ala mate ngombo, maendie kwĩvitha ngunganĩ na ungu wa mavia iĩmanĩ.

16Nĩmeesũvaa iĩma na mavia asu mayasya atĩĩ, “Tũvalũkĩlei mũtũvithe tũikoneke nĩ ũla ũilyĩ kĩvĩlanĩ kya kĩ-ũsumbĩ, na kũtũsiĩĩa tũikaminwe nĩ Kalondu.

17Nũndũ mũthenya wa Ngai na wa Kalondu wa kũmina andũ nũvikie, na nũũ ũla ũtonya kũwũmĩĩsya?”

← Chapter 5 Jump to: Chapter 7 →