1 Samuel 1

Khmer 2014 (អាល់គីតាប)

Jump to: Chapter 2 →

1មានបុរសម្នាក់ឈ្មោះអែល‌កាណា រស់នៅភូមិរ៉ាម៉ា‌ថែម-សូភីម ក្នុងតំបន់ភ្នំអេប្រា‌អ៊ីម គាត់ត្រូវជាកូនរបស់លោកយេរ៉ូ‌ហាំ ជាចៅរបស់លោកអេលី‌ហ៊ូវ ជាចៅទួតរបស់លោកថូ‌ហ៊ូវ ហើយត្រូវជាចៅលួតរបស់លោកស៊ូភ ក្នុងកុល‌សម្ព័ន្ធអេប្រា‌អ៊ីម។

2បុរសនោះមានប្រពន្ធពីរ ម្នាក់ឈ្មោះហា‌ណា និងម្នាក់ទៀតឈ្មោះពេនី‌ណា។ នាងពេនី‌ណាមានកូនច្រើន រីឯនាងហា‌ណាវិញ នាងគ្មានកូនទេ។

3រៀងរាល់ឆ្នាំ លោកអែល‌កាណាតែងតែធ្វើដំណើរពីភូមិរបស់គាត់ ទៅថ្វាយ‌បង្គំ អុលឡោះ‌តាអាឡា ជាម្ចាស់នៃពិភពទាំងមូលនៅស៊ីឡូ ព្រមទាំងធ្វើគូរបានទៀតផង។ នៅគ្រានោះ កូនប្រុសទាំងពីរនាក់របស់លោកអេលី គឺលោកហូប‌នី និងលោកភីនេ‌ហាស ធ្វើជាអ៊ីមុាំបម្រើ អុលឡោះ‌តាអាឡា នៅស៊ីឡូ។

4នៅថ្ងៃធ្វើគូរបាន លោកអែល‌កាណាមានទម្លាប់យកសាច់ទៅឲ្យនាងពេនី‌ណាជាប្រពន្ធ និងកូនប្រុសកូនស្រីទាំងអស់របស់នាងមួយចំណែកម្នាក់។

5ប៉ុន្តែ ចំពោះនាងហា‌ណាវិញ គាត់បានឲ្យមួយទ្វេជាពីរ ព្រោះគាត់ស្រឡាញ់នាងច្រើនជាង ទោះបី អុលឡោះ‌តាអាឡា បានធ្វើឲ្យនាងទៅជាស្ត្រីអារក៏ដោយ។

6នាងពេនី‌ណាជាគូវិវាទ តែងតែរុកគួនបញ្ឈឺចិត្តនាងហា‌ណា ក្នុងគោលបំណងឲ្យនាងខឹងនឹង អុលឡោះ‌តាអាឡា ដែលបានធ្វើឲ្យនាងទៅជាស្ត្រីអារ។

7នាងពេនី‌ណាធ្វើបែបនេះជារៀងរាល់ឆ្នាំ គឺនៅពេលដែលនាងហា‌ណាឡើងទៅម៉ាស្ចិទរបស់ អុលឡោះ‌តាអាឡា នៅស៊ីឡូ នាងពេនី‌ណាតែងតែរុកគួននាងជា‌និច្ច ធ្វើឲ្យនាងហា‌ណាយំ មិនព្រមបរិភោគអ្វីសោះ។

8ពេលនោះ លោកអែល‌កាណាជាប្ដី សួរទៅនាងថា៖ «ហា‌ណាអើយ ហេតុអ្វីបានជានាងយំ? ហេតុអ្វីបានជានាងមិនបរិភោគដូច្នេះ? ហេតុអ្វីបានជានាងព្រួយចិត្ត? ឬមួយខ្ញុំគ្មានតម្លៃស្មើនឹងកូនដប់នាក់ទេឬ?»។

9ក្រោយពេលគេបរិភោគ និងផឹករួចហើយ នាងហាណាក្រោកឡើង ចូលទៅម៉ាស្ជិទនៅស៊ីឡូ។ ពេលនោះ អ៊ីមុាំអេលីអង្គុយនៅមាត់ទ្វារម៉ាស្ជិទនៃ អុលឡោះ‌តាអាឡា ។

10នាងតូចចិត្តជាខ្លាំង ហើយទូរអាទៅរក អុលឡោះ‌តាអាឡា ទាំងយំហូរទឹកភ្នែករហាម។

11នាងទូរអាអង្វរអុលឡោះដោយសច្ចាថា៖ «ឱ! អុលឡោះ‌តាអាឡា ជាម្ចាស់នៃពិភពទាំងមូលអើយ! សូមមើលមកខ្ញុំ ដែលកំពុងតែមានទុក្ខព្រួយ សូមនឹកដល់ខ្ញុំ ហើយកុំបំភ្លេចខ្ញុំឡើយ។ ប្រសិនបើទ្រង់ប្រោសប្រទានឲ្យខ្ញុំមានកូនប្រុសមួយ ខ្ញុំនឹងយកកូននោះមកជូនទ្រង់ ដើម្បីឲ្យនៅបម្រើទ្រង់អស់មួយជីវិត ហើយសក់របស់វានឹងមិនត្រូវកោរ ឬកាត់ឡើយ»។

12នាងហា‌ណាទូរអាយ៉ាងយូរចំពោះ អុលឡោះ‌តាអាឡា ។ ពេលនោះ លោកអេលីសង្កេតមើលមាត់របស់នាង។

13នាងទូរអាស្ងាត់ៗ ឃើញតែបបូរមាត់កំរើកតិចៗ ឥតមានឮសូរសំឡេងទេ។ ដូច្នេះ លោកអេលីនឹកស្មានថា នាងស្រវឹងស្រា។

14លោកក៏ពោលទៅនាងថា៖ «តើនាងនៅស្រវឹងដល់អង្កាល់ទៀត ល្មមស្វាងហើយ!»។

15នាងហា‌ណាឆ្លើយតបថា៖ «ទេ លោកម្ចាស់! នាងខ្ញុំជាស្ត្រីមានទុក្ខ នាងខ្ញុំពុំបានទទួលទានស្រា ឬគ្រឿងស្រវឹងណាទេ។ នាងខ្ញុំនៅទីនេះ ដើម្បីជម្រាប អុលឡោះ‌តាអាឡា ពីទុក្ខព្រួយរបស់នាងខ្ញុំ។

16សូមកុំចាត់ទុកនាងខ្ញុំថា ជាស្ត្រីអាក្រក់ឡើយ នាងខ្ញុំទូរអាដល់ទ្រង់យ៉ាងយូរដូច្នេះ ព្រោះនាងខ្ញុំឈឺចាប់ និងមានទុក្ខកង្វល់ហួសប្រមាណ»។

17លោកអេលីនិយាយទៅកាន់នាងថា៖ «សុំអញ្ជើញទៅដោយសុខ‌សាន្ត! សូមអុលឡោះជាម្ចាស់នៃជន‌ជាតិអ៊ីស្រ‌អែល ប្រោសប្រទានឲ្យនាងបានសម្រេចតាមពាក្យរបស់នាងចុះ!»។

18នាងហា‌ណាឆ្លើយថា៖ «សូមលោកសំដែងសេចក្តីមេត្តា‌ករុណាដល់នាងខ្ញុំផង!»។ បន្ទាប់មកនាងក៏ចេញទៅ ហើយបរិភោគម្ហូបអាហារ ព្រមទាំងមានទឹកមុខស្រស់បស់ឡើងវិញ។

19លោកអែល‌កាណា និងគ្រួសារគាត់ ក្រោកពីព្រលឹមថ្វាយ‌បង្គំ អុលឡោះ‌តាអាឡា រួចនាំគ្នាត្រឡប់ទៅផ្ទះរបស់គេ នៅឯរ៉ាម៉ាវិញ។ លោកអែល‌កាណារួមរស់ជាមួយនាងហា‌ណា ជាប្រពន្ធ ហើយ អុលឡោះ‌តាអាឡា ក៏នឹកឃើញនាង។

20នៅឆ្នាំនោះនាងហា‌ណាមានផ្ទៃពោះ ហើយសំរាលបានកូនប្រុសមួយ ដែលនាងដាក់ឈ្មោះថា «សាំយូ‌អែល» ដ្បិតនាងពោលថា «ខ្ញុំបានទូរអាសូមកូននេះពី អុលឡោះ‌តាអាឡា »។

21ក្រោយមក លោកអែល‌កាណាជាប្ដី បាននាំគ្រួសាររបស់គាត់ទាំងអស់គ្នា យកគូរបានប្រចាំឆ្នាំទៅជូន អុលឡោះ‌តាអាឡា ព្រមទាំងលាបំណន់ផង។

22ប៉ុន្តែ នាងហា‌ណាពុំបានទៅជាមួយទេ ដ្បិតនាងបានប្រាប់ប្ដីថា៖ «នៅពេលដែលកូនខ្ញុំផ្តាច់ដោះ នោះខ្ញុំនឹងនាំវាទៅជូន អុលឡោះ‌តាអាឡា ហើយទុកវានៅទីនោះរហូត»។

23លោកអែល‌កាណាជាប្ដីតបវិញថា៖ «ចូរធ្វើតាមដែលនាងយល់ឃើញថាល្អចុះ។ ដូច្នេះ ចូរនៅជាមួយកូនរហូតដល់ពេលផ្តាច់ដោះ ហើយសូម អុលឡោះ‌តាអាឡា សម្រេចតាមបន្ទូលសន្យារបស់ទ្រង់»។ នាងហា‌ណាក៏នៅចាំផ្ទះ និងបំបៅកូន រហូតដល់ពេលផ្តាច់ដោះ។

24លុះនាងផ្តាច់ដោះកូនហើយ នាងក៏នាំកូនឡើងទៅ‌ម៉ាស្ទិទរបស់ អុលឡោះ‌តាអាឡា នៅស៊ីឡូ ព្រមទាំងយកគោឈ្មោលមួយក្បាលអាយុបីឆ្នាំ ម្សៅមួយថាំង និងស្រាទំពាំងបាយជូរមួយថង់ស្បែកទៅជាមួយផង។ ពេលនោះកុមារសាំយូ‌អែលនៅក្មេងណាស់។

25គេសម្លាប់គោនោះ ហើយនាំកុមារទៅជួបលោកអេលី។

26នាងហា‌ណាពោលថា៖ «លោកម្ចាស់! នាងខ្ញុំជាស្ត្រីម្នាក់ដែលឈរទូរអាអង្វរ អុលឡោះ‌តាអាឡា កាលពីមុន នៅទីនេះជិតលោក។ នេះជាការពិត ដូចលោកម្ចាស់មានជីវិតនៅសព្វថ្ងៃដែរ។

27នាងខ្ញុំបានទូរអាអង្វរ អុលឡោះ‌តាអាឡា សូមឲ្យមានកូន ហើយទ្រង់ក៏ប្រោសប្រទានតាមពាក្យរបស់នាងខ្ញុំ។

28ឥឡូវនេះ នាងខ្ញុំសូមយកកូនមកជូន អុលឡោះ‌តាអាឡា ឲ្យនៅជាមួយទ្រង់អស់មួយជីវិត»។ បន្ទាប់មក គេនាំគ្នាក្រាបថ្វាយ‌បង្គំ អុលឡោះ‌តាអាឡា ។

Jump to: Chapter 2 →