Numbers 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Iˉsaˍreˍlaˆ chaw teˇ hpaˍ Gʼuiˬsha piˇ tuˬ ve mvuhˇmiˬ hkʼaw gaˬ htaˇ,

2yawˇ hui te cawˇ ve awˬ liˇ awˬ hkʼaˇ chi teˇ hpaˍ Gʼuiˬsha Moˉseˍ hta‸ kʼoˆ piˇ ve yoˬ.

3Aˬ miˍ tuˉ tanˇ piˇ htaˇ, Gʼuiˬsha hta‸ ka ti‸ te leh tuˉ tanˇ piˇ htaˇ, a shu yawˇ hkʼaˇ yawˇ ha lehˬ leh Gʼuiˬsha hta‸ tuˉ tanˇ piˇ htaˇ, leh bon pawehˇ te htaˇ, nuˇ paˍ, yawˬ awˬ paˍ, maˇ heˆ kʼo aˉ che‸ awˬ paˍ hta‸ yuˬ leh Gʼuiˬsha hta‸ tuˉ tanˇ hpeh‸ ve yoˬ. Chi hkʼe ve tuˉ tanˇ tuˬ lehˬ, awˬ shaˉ hawnˉ leh Gʼuiˬsha nyi ma cawˇ ve tanˇ tuˬ hpeh‸ ve yoˬ.

4Hkʼaˬ ve chaw teˇ gʼaˇ maˇ kʼoˆ, Gʼuiˬsha hta‸ yawˬ leh aˉ che‸ ca tuˉ tanˇ la ve teˇ yanˇ,

5yawˇ lehˬ shaˍlonˍ chu hkaw‸ taˍ ve caˬ hkʼa meu-e teˇ panˇ leh, a pehˉ meuˇ gʼuiˬ teˇ kaw hta‸ htawˇ gʼa yuˬ laˬ ve yoˬ. Chi ve lehˬ, awˬ shiˍ awˬ nu tuˉ tanˇ tuˬ hpeh‸ ve yoˬ.

6Yawˬ ehˉ teˇ hkeh tuˉ tanˇ piˇ ve teˇ yanˇ, shaˍlonˍ chu teˇ kaw hkaw‸ taˍ ve caˬ hkʼa meu-e nyiˇ panˇ hta‸ yuˬ leh, Gʼuiˬsha hta‸ gʼa tanˇ piˇ ve yoˬ.

7Oˇ ve geh teˇ geh a pehˉ meuˇ gʼuiˬ teˇ kaw hta‸ htawˇ gʼa tanˇ piˇ ve yoˬ. Chi hkʼe ve tuˉ tanˇ tuˬ lehˬ awˬ shaˉ hawnˉ leh Gʼuiˬsha nyi ma cawˇ ve tanˇ tuˬ hpeh‸ ve yoˬ.

8Nuˇ paˍ lonˉ teˇ hkeh yuˬ leh aˬ miˍ tuˉ tanˇ piˇ ve, maˇ heˆ kʼo ka ti‸ teˇ ceuˬ ceuˬ te leh Gʼuiˬsha hta‸ tuˉ tanˇ piˇ ve, maˇ heˆ kʼo awˬ chawˇ te da‸ ve tuˉ tanˇ piˇ ve kʼo,

9oˇ ve geh teˇ geh awˬ shiˍ awˬ nu tuˉ tanˇ tuˬ awˬ pon shaˍ lonˍ chu nyiˇ kaw hkaw‸ taˍ ve caˬ hkʼa meu-e shehˆ panˇ leh,

10a pehˉ meuˇ gʼuiˬ nyiˇ kaw gʼa tanˇ piˇ ve yoˬ. Chi hkʼe ve tuˉ tanˇ tuˬ lehˬ awˬ shaˉ hawnˉ leh, Gʼuiˬsha nyi ma cawˇ ve tanˇ tuˬ hpeh‸ve yoˬ.

11Chi ve lehˬ, nuˇ, yawˬ, aˉ che‸ teˇ hpaˍ Gʼuiˬsha hta‸ tuˉ tanˇ piˇ htaˇ ceˇ oˇ ve teˇ hpaˍ geh aˬ hto‸ ma gʼa ga tuˉ tanˇ piˇ tuˬ maˍ laˇ ve awˬ hkʼaˇ hpeh‸ ve yoˬ.

12Ceˇ laiˉ hkeh tuˉ tanˇ piˇ ve kʼo, caˬ hkʼa meu-e leh a pehˉ meuˇ gʼuiˬ htawˇ maˇ chaweh gʼa tuˉ tanˇ piˇ ve yoˬ.

13Iˉsaˍreˍlaˆ chaw teˇ gʼaˇ le le Gʼuiˬsha hta‸ tuˉ tanˇ piˇ htaˇ, awˬ shaˉ hawnˉ ve tanˇ tuˬ chi teˇ hpaˍ gʼa tanˇ piˇ ve yoˬ.

14Nawˬ hui geh chehˇ taˍ ve awˬ nu ve chaw teˇ gʼaˇ gʼaˇ, Gʼuiˬsha hta‸ chi hkʼe awˬ shaˉ hawnˉ ve tanˇ tuˬ tuˉ tanˇ piˇ gaˇ ve kʼo, yawˇ htawˇ teh taˍ ve awˬ liˇ oˇ ve teˇ hpaˍ hta‸ hkʼa deh‸ gʼa na yuˬ ve yoˬ.

15Nawˬ hui maˇ kʼoˆ, awˬ nu ve chaw hkʼaˬ ve teˇ gʼaˇ maˇ kʼoˆ, teh taˍ ve awˬ liˇ oˇ ve hta‸ hkʼaˬ htaˆ ka‸ gʼa na yuˬ ve yoˬ. Nawˬ hui leh nawˬ hui geh ca chehˇ la ve chaw oˇ ve teˇ hpaˍ lehˬ, Gʼuiˬsha mehˆ gʼuˇ suhˍ hkʼa shuˍ hpeh‸ ve yoˬ.

16Nawˬ hui maˇ kʼoˆ, yawˇ hui maˇ kʼoˆ, teh taˍ ve awˬ liˇ hta‸ hkʼa deh‸ gʼa na yuˬ ve yoˬ.

17Iˉsaˍreˍlaˆ chaw teˇ hpaˍ Gʼuiˬsha piˇ tuˬ ve mvuhˇmiˬ lo gaˬ htaˇ,

18yawˇ hui te cawˇ ve awˬ liˇawˬ hkʼaˇ chi teˇ hpaˍ Gʼuiˬsha Moˉseˍ hta‸ kʼoˆ piˇ ve yoˬ.

19Mvuhˇmiˬ oˇ ve hkʼaw tawˆ ve awˬ shiˍ awˬ nu teˇ hpaˍ hta‸ caˇ ve teˇ yanˇ, awˬ shiˍ awˬ nu oˇ ve teˇ hpaˍ hpaˍ Gʼuiˬsha awˬ pon hkʼa deh‸ gʼa fuiˍ teh taˍ ve yoˬ.

20Nawˬ hkaoˍmonˇ te ve teˇ yanˇ, awˉ lawˉ peuˇ te ve hkaoˍmonˇ teˇ shiˍ Gʼuiˬsha awˬ pon gʼa fuiˍ teh taˍ leh yawˇ hta‸ gʼa tanˇ piˇ ve yoˬ.

21Chi hkʼe ve tanˇ tuˬ teˇ hpaˍ Gʼuiˬsha hta‸ tanˇ piˇ tuˬ, nawˬ hui hkʼaˬ htaˆ ka‸ gʼa dawˇ nawˇ taˍ ve yoˬ.

22Chaw teˇ gʼaˇ maˇ shiˍ maˇ nawˇ ve hkʼaw, Gʼuiˬsha Moˉseˍ hta‸ kʼoˆ piˇ taˍ ve awˬ liˇ awˬ hkʼaˇ chi teˇ hpaˍ hta‸ te ya‸ ve,

23maˇ heˆ kʼo Iˉsaˍreˍlaˆ chaw teˇ hpaˍ, awˬ hkʼaw‸ nawˉ awˬ liˇ chi hta‸ maˇ kʼaw‸ yehˇ kʼo,

24yawˇ hui lehˬ, awˬ shaˉ hawnˉ ve tanˇ tuˬ hpeh‸ ve nuˇ paˍ lonˉ teˇ hkeh yuˬ leh, awˬ shiˍ awˬ nu tuˉ tanˇ tuˬ, leh a pehˉ meu gʼuiˬ geh teˇ geh Gʼuiˬsha hta‸ aˬ miˍ gʼa tuˉ tanˇ piˇ ve yoˬ. Chi hkʼoˆ ka‸, yawˇ hui lehˬ venˇbaˆ hpehˇ ve tanˇ tuˬ awˬ pon aˉche‸ teˇ hkeh hta‸ htawˇ, Gʼuiˬsha hta‸ gʼa tuˉ tanˇ piˇ ve yoˬ.

25Paw hkuˇ lehˬ, chaw yaˇ teˇ hpaˍ kʼaw‸ da‸ kehˬ la tuˬ gʼa tuˉ tanˇ piˇ ve yoˬ. Oˇ hkʼe te ve kʼo, yawˇ hui venˇbaˆ gʼa ponˬ tuˬ yoˬ. Awˬ lawn kʼo, yawˇ hui maˇ shiˍ maˇ nawˇ ve hkʼaw gʼa te ya‸ leh, venˇbaˆ hpehˇ ve tanˇ tuˬ htawˇ tanˇ piˇ peuˬ ve pa taw yoˬ.

26Iˉsaˍreˍlaˆ chaw hkʼa peu-eˬ leh, yawˇ hui geh ca chehˇ la taˍ ve awˬ nu ve chaw teˇ hpaˍ ve venˇbaˆ hta‸ hpehˇ piˇ tuˬ yoˬ. Awˬ lawn kʼo, yawˇ hui hkʼa peu-eˬ te ya‸ peuˬ ve pa taw yoˬ.

27Chaw teˇ gʼaˇ maˇ shiˍ maˇ nawˇ ve hkʼaw gʼa te ya‸ peuˬ ve kʼo, yawˇ lehˬ a sha‸ teˇ hkʼaw‸ gaˬ peuˬ ve aˉ che‸ awˬ ma teˇ hkeh yuˬ leh, venˇbaˆ hpehˇ ve tanˇ tuˬ gʼa tanˇ piˇ ve yoˬ.

28Paw hkuˇ lehˬ, tuˉ tanˇ kuiˬ lo chaw oˇ ve hpaˇ venˇbaˆ ponˬ tuˬ gʼa tuˉ tanˇ piˇ ve yoˬ. Oˇ hkʼe te ve kʼo, yawˇ venˇbaˆ ponˬ tuˬ yoˬ.

29Iˉsaˍreˍlaˆ chaw maˇ kʼoˆ, awˬ nu ve chaw maˇ kʼoˆ, maˇ shiˍ maˇ nawˇ ve hkʼaw gʼa te ya‸ peuˬ ve kʼo, awˬ liˇ awˬ hkʼaˇ teh taˍ ve hkʼe, hkʼa deh‸ gʼa te ve yoˬ.

30Ya‸ hkʼaˇ, chaw teˇ gʼaˇ shiˍ taˍ leh te ya‸ ve kʼo, yawˇ lehˬ Iˉsaˍreˍlaˆ chaw hpeh‸ ve maˇ kʼoˆ, awˬ nu ve chaw hpeh‸ ve maˇ kʼoˆ, yawˇ lehˬ Gʼuiˬsha nyi ma zuhˆ tuˬ te peuˬ ve pa taw, yawˇ hta‸ gʼa tiˇ pehˍ piˇ ve yoˬ.

31Awˬ lawn kʼo, yawˇ lehˬ shiˍ taˍ ve hkʼaw Gʼuiˬsha ve tawˇ hta‸ ponˬ leuˉ ve pa taw yoˬ. Yawˇ te ya‸ ve hkʼe gʼa hkanˍ ve yoˬ.

32Iˉsaˍreˍlaˆ chaw teˇ hpaˍ heh puiˉ hkʼaw lo te toˇ chehˇ htaˇ, chaw teˇ gʼaˇ shinˉ nyi htaˇ suhˆ ca gʼawˆ toˇ chehˇ ve hta‸ yawˇ hui gʼa mawˬ ve yoˬ.

33Hkʼe te leh shu yawˇ hta‸ Moˉseˍ, Aˍronˍ leh Iˉsaˍreˍlaˆ chaw moˍ lonˉ geh shiˍ veu laˇ ve yoˬ.

34Yawˇ hta‸ hkʼaˬ hkʼe te piˇ tuˬ maˇ shiˍ ve pa taw, yawˇ hui yawˇ hta‸ hpeh taˍ ve yoˬ.

35Oˇ htaˇ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ. Chaw oˇ ve hta‸ fa la awˬ baˬ hpawˇ lo shiˍ kʼai leh haˉ pui baˬ pehˍ piˇ-oˆ, teh‸ kʼoˆ ve yoˬ.

36Hkʼe te leh, yawˇ hui yawˇ hta‸ fa la awˬ baˬ hpawˇ lo shiˍ kʼai leh, Gʼuiˬsha kʼoˆ ve hkʼe haˉ pui baˬ pehˍ piˇ ve yoˬ.

37Gʼuiˬsha Moˉseˍ hta‸ cuˇ leh Iˉsaˍreˍlaˆ chaw hui hta‸ chi hkʼe kʼoˆ piˇ tcuh ve yoˬ.

38Nawˬ hui suhˉ veˆ awˬ puˍ lu te leh, nawˉ-ehˍ ve hpa yuˬ hpeh peuˬ hkʼaw‸ nawˉ, a shu yawˇ ve aˉ po‸ meuˇ lo tawˉ nehˉ taˍ-o‸. Nawˬ hui teˇ co peuˬ teˇ co chi hkʼe gʼa te veu‸ ve yoˬ.

39Nawˬ hui suhˉ veˆ awˬ puˍ lu oˇ ve teˇ hpaˍ hta‸ gʼa mawˬ htaˇ, ngaˬ ve awˬliˇtawˇhkawˇ teˇ hpaˍ hta‸ dawˇ nawˇ leh na yuˬ chehˇ tuˬ yoˬ. Ngaˬ hta‸ baˬ taˉ leh, a shu yawˇ ve a loˍ awˬ hkʼaˇ suh te kʼai tuˬ ve maˇ heˆ.

40Nawˬ hui lehˬ, ngaˬ ve awˬliˇtawˇhkawˇ teˇ hpaˍ hta‸ dawˇ nawˇ chehˇ leh, awˬ tehˬ awˬ na ngaˬ ve chaw hpeh‸ tuˬ yoˬ.

41Ngaˬ lehˬ nawˬ hui ve Gʼuiˬsha hpeh‸ ve yoˬ. Ngaˬ nawˬ hui ve Gʼuiˬsha hpeh‸ la tuˬ, nawˬ hui hta‸ Eˇjiˇtu‸ mvuhˇmiˬ hkʼaw lo shiˍ tawˆ la piˇ taˍ ve yoˬ. Ngaˬ lehˬ Gʼuiˬsha hpeh‸ ve yoˬ, teh‸ Moˉseˍ hta‸ kʼoˆ piˇ ve yoˬ.

← Chapter 14 Jump to: Chapter 16 →