Numbers 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1Hkaˍnanˍ mvuhˇmiˬ awˬ hawˉ hpawˇ teˇ tawn lo chehˇ ve jawˇmawˇ Aˍraˆ lehˬ, Iˉsaˍreˍlaˆ chaw Aˍtaˍrenˍ venˇ hpawˇ lo laˬ chehˇ ve awˬ hkawˇ gʼa kaˇ ve teˇ yanˇ, yawˇ hui hta‸ ca bawˆ leh Iˉsaˍreˍlaˆ chaw teˇ hpaˍ hta‸ hpeh gʼa ve yoˬ.

2Oˇ htaˇ, Iˉsaˍreˍlaˆ chaw teˇ hpaˍ Gʼuiˬsha hta‸ ka ti‸ te leh kʼoˆ ve, Gʼuiˬsha-oˬ, nawˬ ngaˬ hui hta‸ chaw chi teˇ hpaˍ hta‸ bawˆ gʼaˇ tcuh laˇ ve kʼo, chaw chi teˇ hpaˍ leh yawˇ hui ve venˇ teˇ hpaˍ, ngaˬ hui nawˬ hta‸ chiˇ a‸ laˇ leh oˇ ve hkʼa peu-eˬ hta‸ te luˬ te sheˆ piˇ tuˬ yoˬ, teh‸ kʼoˆ ve yoˬ.

3Gʼuiˬsha lehˬ, yawˇ hui ve tawˇ hta‸ na yuˬ leh yawˇ hui hta‸ ga piˇ ve yoˬ. Hkʼe te leh, yawˇ hui Hkaˍnaˍniˆ chaw hui hta‸ tiˇ pehˍ leh, yawˇ hui ve venˇ teˇ hpaˍ hta‸ te luˬ te sheˆ piˇ ve yoˬ. Hkʼe te leh chehˇ kuiˬ oˇ ve hta‸ Hawˇmaˍ teh‸ kʼaw‸ meh piˇ ve yoˬ.

4Iˉsaˍreˍlaˆ chaw teˇ hpaˍ Hawˇraˆ hkʼaw lo tawˆ kʼai leh, awˬ gʼuˇ suhˍ kʼai ve yoˬ. Yawˇ hui lehˬ Eˇdonˍ mvuhˇmiˬ hta‸ hpanˍ kʼai gaˇ ve pa taw, Laˇ tsuhˇ gʼuiˬ nyi hpawˇ lo caw kʼai ve yoˬ. Ya‸ kʼaw kʼaˉ lo chaw yaˇ teˇ hpaˍ nyi ma luˬ leh,

5Gʼuiˬsha hta‸ maˇ kʼoˆ, Moˉseˍ hta‸ maˇ kʼoˆ, maˇ shawˍ maˇ caˆ kʼoˆ ve yoˬ. Aˬ hto‸ ma pa taw nawˬ ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, choˬ kaˬ te‸ chiˉ caˇ tuˬ maˇ cawˬ ve mvuhˇmiˬ hkʼaw ca suh-e tcuh laˇ ve le. Ngaˬ hui Maˍnaˆ shiˍ caˇ bvuhˆ jaˇ peuˬ, teh‸ kʼoˆ ve yoˬ.

6Oˇ htaˇ, Gʼuiˬsha lehˬ yawˇ hui geh lo awˬ taw‸ ma hehnˇ jaˇ ve vuiˬ teˇ hpaˍ peu laˇ piˇ ve yoˬ. Iˉsaˍreˍlaˆ chaw maˇ maˇ vuiˬ htawˆ pehˍ ve hta‸ gʼa hkanˍ ve yoˬ.

7Hkʼe te leh, yawˇ hui Moˉseˍ geh kʼai leh kʼoˆ ve, Ngaˬ hui lehˬ, Gʼuiˬsha leh nawˬ hta‸ kʼoˆ ya‸ jaˇ peuˬ. Vuiˬ chi teˇ hpaˍ mehˉ kʼai tuˬ Gʼuiˬsha geh bon lawˬ laˇ-oˆ, teh‸ kʼoˆ ve yoˬ. Hkʼe te leh Moˉseˍ yawˇ hui awˬ pon bon lawˬ piˇ ve yoˬ.

8Oˇ htaˇ, Gʼuiˬsha Moˉseˍ hta‸ kuiˇ vuiˬ teˇ maˬ te tcuh leh, vuiˬ htawˆ ve chaw teˇ hpaˍ chiˇ nyi leh na-e la tuˬ, suhˆ hkuiˉ daw hkʼoˆ hpeh chiˇ tcuh ve yoˬ.

9Hkʼe te leh, Moˉseˍ kuiˇ vuiˬ teˇ maˬ te leh suhˆ hkuiˉ daw hkʼoˆ hpeh chiˇ taˍ ve yoˬ. Vuiˬ htawˆ ve chaw hui kuiˇ vuiˬ oˇ ve hta‸ chiˇ nyi leh kʼaw‸ na-e la ve yoˬ.

10Iˉsaˍreˍlaˆ chaw teˇ hpaˍ awˬ gʼuˇ suhˍ kʼaw‸ kʼai leh, Awˇboˆ teh‸ koˆ ve chehˇ kuiˬ lo ca kʼaw‸ deh ve yoˬ.

11Yawˇ hui oˇ kaˬ lo kʼaw‸ tu leh, Mawˇbaˆ mvuhˇmiˬ mvuhˇ nyi tawˆ hpawˇ lo cawˬ ve Aˍbaˍrenˍ teh‸ kʼoˆ ve chehˇ kuiˬ lo ca kʼaw‸ deh ve yoˬ.

12Oˇ ve hkʼaw‸ nawˉ, yawˇ hui Zaˍrehˆ lawˬ hkʼo‸ hkʼaw kʼaw‸ deh ve yoˬ.

13Yawˇ hui oˇ kaˬ lo kʼaw‸ tu leh, Aˍmawˇriˆ chaw hui ve miˬ tcuhˉ lo cawˬ ve Aˍnonˍ iˉ kaˆ lawˬ awˬ na hpawˇ lo ca kʼaw‸ deh ve yoˬ. (Aˍnonˍ iˉ kaˆ lawˬ lehˬ, Mawˇbaˆ chaw leh Aˍmawˇriˆ chaw hui ve miˬ tcuhˉ hpeh‸ ve yoˬ)

14Chi hta‸ pa taw, Gʼuiˬsha ve ma‸ bawˆ ve li‸ daw awˬ hkʼaw lo chi hkʼe bvuh‸ taˍ ve, Aˍnonˍ iˉ kaˆ lawˬ leh Vaˍhehˆ venˇ lehˬ,

15Aˍmawˇriˆ chaw leh Mawˇbaˆ chaw hui ve miˬ tcuhˉ lo cawˬ ve yoˬ, teh‸ bvuh‸ taˍ ve yoˬ.

16Yawˇ hui oˇ kaˬ lo kʼaw‸ tu leh Beˍraˆ nanˬ bawˍ lo kʼai ve yoˬ. Oˇ htaˇ Gʼuiˬsha lehˬ, Chaw yaˇ teˇ hpaˍ hta‸ teˇ geh kuˬ hpawnˬ-o‸. Ngaˬ yawˇ hui hta‸ iˉ kaˆ taw piˇ tuˬ yoˬ, teh‸ Moˉseˍ hta‸ kʼoˆ piˇ ve yoˬ.

17Hkʼe te leh, Iˉsaˍreˍlaˆ chaw teˇ hpaˍ kʼa muiˬ hkawˇ kʼa leh kʼoˆ ve, Iˉ kaˆ nanˬ bawˍ-oˬ, nawˬ ve iˉ kaˆ tawˆ la piˇ-oˆ. Ngaˬ hui kʼa muiˬ hkawˇ kʼa leh ha‸ yuˬ laˇ tuˬ yoˬ.

18Nanˬbawˍ chi ve hta‸ jawˇmawˇ leh awˬ hoˉ awˬ naˬ teˇ hpaˍ, iˉ du taˬ yuˬ duˇ taˍ ve yoˬ, teh‸ kʼoˆ ve yoˬ. Yawˇ hui oˇ kaˬ lo kʼaw‸ tu leh, Maˍtaˍnaˍ teh‸ kʼoˆ ve chehˇ kuiˬ lo kʼai ve yoˬ.

19Oˇ kaˬ lo teˇ pawˆ kʼaw‸ tu leh, Naˍhaˍleˍlaˆ lo kʼai ve yoˬ. Naˍhaˍleˍlaˆ lo kʼaw‸ tu leh Baˍmoˆ lo kʼai ve yoˬ.

20Baˍmoˆ lo kʼaw‸ tu leh Mawˇbaˆ chaw hui ve mvuhˇmiˬ hkʼaw cawˬ ve Piˉsaˍgaˍ hkʼaw hkuiˉ puiˍ lo kʼai ve yoˬ.

21Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ Aˍmawˇriˆ jawˇmawˇ Siˉhonˍ geh tawˇ chi hkʼe shanˍ feu piˇ ve yoˬ.

22Ngaˬ hui hta‸ nawˬ hui ve mvuhˇmiˬ hkʼaw hpanˍ kʼai tcuh laˇ-oˆ. Ngaˬ hui leh ngaˬ hui ve ceˇ teˇ hpaˍ lehˬ, ya‸ kʼaw lonˉ hkʼaˇ suh tiˉ kʼai tuˬyoˬ. Nawˬ hui ve ti mi leh a pehˉ meuˇ hko teˇ hpaˍ hkʼaw maˇ lo‸-e. Nawˬ hui ve iˉ kaˆ hta‸ htawˇ maˇ dawˬ. Ya‸ kʼaw lonˉ hkʼaˇ suh tiˉ hteˇ lehˍ kʼai tuˬ yoˬ, teh‸ kʼoˆ feu piˇ ve yoˬ.

23Ya‸ hkʼaˇ, jawˇmawˇ Siˉhonˍ yawˇ hui hta‸ hpanˍ kʼai tuˬ a hkaw-anˬ maˇ piˇ. Iˉsaˍreˍlaˆ chaw hui hta‸ ca bawˆ tuˬ, yawˇ ve ma‸ yaˇ teˇ hpaˍ hta‸ shiˍ veu laˇ leh Yaˍhaˆ venˇ lo laˬ ve yoˬ.

24Hkʼe te leh Iˉsaˍreˍlaˆ chaw teˇ hpaˍ yawˇ hui hta‸ tiˇ pehˍ piˇ leh, Aˍnonˍ iˉ kaˆ lawˬ hta‸ te leh Yaˍboˆ iˉ kaˆ lawˬ lo hkʼa gaˬ, yawˇ hui ve mvuhˇmiˬ hta‸ bawˆ yuˬ ve yoˬ. Yaˍboˆ iˉ kaˆ lawˬ lehˬ Aˍmawˇriˆ chaw hui ve miˬ tcuhˉ hpeh‸ leh, yawˇ hui ve miˬ tcuhˉ hta‸ yeˬ chaweh te taˍ ve yoˬ.

25Iˉsaˍreˍlaˆ chaw teˇ hpaˍ lehˬ, Aˍmawˇriˆ chaw hui ve venˇ lonˉ Heˍsaˍbonˍ venˇ hta‸ te leh awˬ nu ve venˇ hkʼa peu-eˬ hta‸ bawˆ yuˬ ve yoˬ.

26Heˍsaˍbonˍ venˇ lehˬ, Aˍmawˇriˆ jawˇmawˇ Siˉhonˍ ve venˇ lonˉ hpeh‸ ve yoˬ. Siˉhonˍ lehˬ Mawˇbaˆ jawˇmawˇ hta‸ bawˆ da‸ leh, Aˍnonˍ iˉ kaˆ lawˬ lo hkʼa gaˬ yawˇ ve mvuhˇmiˬ hta‸ bawˆ yuˬ taˍ ve yoˬ.

27Hkʼe te leh li‸ bvuh‸ paˍ teˇ hpaˍ chi hkʼe bvuh‸ taˍ ve yoˬ. Jawˇmawˇ Siˇhonˍ ve Heˍsaˍbonˍ venˇ lo laˬ-o‸. Venˇ oˇ ve kʼaw‸ gu te taˍ ve hta‸ ngaˬ hui mawˬ gaˇ ve yoˬ.

28Teˇ pawˆ htaˇ, Heˍsaˍbonˍ venˇ chi hkʼaw, Siˉhonˍ ve ma‸ yaˇ teˇ hpaˍ aˬ miˍ ha hkʼe tawˆ kʼai chehˇ ve yoˬ. Yawˇ hui lehˬ, Mawˇbaˆ mvuhˇmiˬ hkʼaw cawˬ ve Aˍraˆ venˇ hta‸ te luˬ piˇ leh, Aˍnonˍ iˉ kaˆ lawˬ awˬ na hpawˇ lo cawˬ ve hkʼaw teˇ hpaˍ hta‸ to‸ baˬ piˇ lawˬ ve yoˬ.

29Mawˇbaˆ chaw hui-oˬ, nawˬ hui hkʼaˬ ma gʼa tu‸ gʼa hkanˍ jaˇ ve le. Hkeˍmoˆ gʼuiˬsha hta‸ oˉ kʼoˍ pui chehˇ ve nawˬ hui teˇ hpaˍ lehˬ, te luˬ te sheˆ ve hta‸ gʼa hkanˍ ve yoˬ. Nawˬ hui ve gʼuiˬsha lehˬ, hawˉ hkʼaˆ paˍ teˇ hpaˍ hta‸ chaw hpaw hkʼoˇ hpeh‸ la piˇ leh, yaˇmiˇ teˇ hpaˍhta‸ Aˍmawˇriˆ jawˇmawˇ ve awˬ ceˬ hpeh‸ la piˇ lawˬ ve yoˬ.

30Ya‸ hkʼaˇ, chi beu‸ yawˇ hui ve awˬ ceuˬ awˬ hkʼaˇ teˇ hpaˍ lehˬ, te luˬ te sheˆ ve hta‸ gʼa kʼaw‸ hkanˍ chehˇ taˍ peuˬ. Heˍsaˍbonˍ venˇ hta‸ te leh Diˇbonˍ venˇ lo hkʼa gaˬ, Naˍshenˍ venˇ lo te leh Meˍdeˍbaˆ venˇ paˇ lo cawˬ ve Nawˇhpaˆ venˇ lo hkʼa gaˬ, luˬ ve sheˆ ve awˬ ceuˬ gaˬ la peuˬ, teh‸ bvuh‸ taˍ ve yoˬ.

31Hkʼe te leh, Iˉsaˍreˍlaˆ chaw teˇ hpaˍ Aˍmawˇriˆ chaw hui ve mvuhˇmiˬ hkʼaw chehˇ taˍ ve yoˬ.

32Moˉseˍ lehˬ chaw teˇ hpaˍ hta‸ hpehˇ peu leh, Yaˍzaˍ venˇ hta‸ ca bawˆ yuˬ tuˬ da‸ ve ya‸ kʼaw ca jaˆ nyi peu ve yoˬ. Hkʼe te leh, yawˇ hui venˇ oˇ ve leh awˬ nu ve venˇ teˇ hpaˍ hta‸ bawˆ yuˬ leh, Aˍmawˇriˆ chaw teˇ hpaˍ hta‸ gʼa‸ kʼoˬ piˇ ve yoˬ.

33Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ Baˍshanˍ mvuhˇ mi lo kʼai leh, jawˇmawˇ Awˇgaˆ yawˇ hui hta‸ ca bawˆ la tuˬ, Enˍdiˆ venˇ lo laˬ ve yoˬ.

34Oˇ htaˇ Gʼuiˬsha Moˉseˍ hta‸ kʼoˆ piˇ ve, Yawˇ hui hta‸ taˇ kawˆ. Ngaˬ yawˇ hui hta‸ nawˬ ve la‸ sheh hkʼaw chiˇ a‸ laˇ tuˬ yoˬ. Heˍsaˍbonˍ venˇ hta‸ uˉ peunˍ chehˇ ve Aˍmawˇriˆ jawˇmawˇ Siˉhonˍ hta‸ te piˇ ve hkʼe, jawˇmawˇ Awˇgaˆ hta‸ htawˇ oˇ hkʼe te piˇ-oˆ, teh‸ kʼoˆ piˇ ve yoˬ.

35Hkʼe te leh, Iˉsaˍreˍlaˆ chaw teˇ hpaˍ jawˇmawˇ Awˇgaˆ, yawˇ ve yaˇ teˇ hpaˍ leh yawˇ ve chaw hkʼa peu-eˬ ve hta‸ tiˇ pehˍ piˇ leh, yawˇ hui ve mvuhˇmiˬ hta‸ bawˆ yuˬ ve yoˬ.

← Chapter 20 Jump to: Chapter 22 →