Numbers 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Oˇ htaˇ Baˍlanˍ lehˬ, Iˉsaˍreˍlaˆ chaw hui hta‸ bon na‸ piˇ tuˬGʼuiˬsha heuˆ gaˇ ve hta‸ yawˇ shiˍ la ve yoˬ. Hkʼe te leh, ponˬ laˬ htaˇ hkʼa shuˍ yawˇ Gʼuiˬsha geh ca jehˬ da‸ tuˬ maˇ kʼai-o. Heh puiˉ hkʼaw hpawˇ lo yawˇ nyi peu leh,

2Iˉsaˍreˍlaˆ chaw teˇ hpaˍ deh chehˇ taˍ ve hta‸ yawˇ gʼa mawˬ ve yoˬ. Oˇ htaˇ, Gʼuiˬsha ve Awˬ ha hpu yawˇ awˬ hkʼoˆ ya‸ la leh chi hkʼe kʼoˆ ve yoˬ.

3Mehˆ shiˍ hkʼa deh‸ nyi mawˬ leh, Gʼuiˬsha ve tawˇ hta‸ hkʼa deh‸ kaˇ puiˉ ve Beˍraˆ ve yaˇ Baˍlanˍ chi hkʼe kʼoˆ ve yoˬ.

4Awˬ ha hkʼaw kanˇ paˆ uiˍ jaˇ ve Gʼuiˬsha hta‸ ngaˬ gʼa mawˬ ve yoˬ.

5Iˉsaˍreˍlaˆ chaw hui ve fa la teˇ hpaˍ lehˬ,

6tcuhˉ pui cehˬ teˇ hpaˍ, iˉ kaˆ lawˬ pfuhˍ lo cawˬ ve hko teˇ hpaˍ, Gʼuiˬsha ti taˍ ve suhˆ hkʼaˇ cehˬ teˇ hpaˍ, leh iˉ kaˆ lawˬ paˇ lo cawˬ ve htawˇ cehˬ teˇ hpaˍ hkʼa shuˍ nyi sha jaˇ ve yoˬ.

7Yawˇ hui awˬ hkʼoˆ lo mvuhˇ yeˬ maˇ maˇ ya‸ la leh, iˉ kaˆ hkʼa deh‸ gʼa ve ti mi hkʼaw awˬ yawˇ gʼa sheˍ tuˬ yoˬ. Yawˇ hui ve jawˇmawˇ lehˬ, Aˍgaˆ a‸ kehˉ awˬ me‸ awˬ hponˇ uiˍ leh, yawˇ ve mvuhˇmiˬ uiˍ jaˇ kʼehˬ jaˇ tuˬ yoˬ.

8Gʼuiˬsha lehˬ yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ. Yawˇ lehˬ heh nuˇ hkʼa shuˍ, yawˇ hui awˬ pon ma‸ bawˆ piˇ chehˇ ve yoˬ. Canˇ paˍ teˇ hpaˍ hta‸ yawˇ hui te luˬ piˇ leh, yawˇ hui ve awˬ mu‸ ku teˇ hpaˍ leh, hkaˆ ce teˇ hpaˍ hta‸ awˉ hteh piˇ ve yoˬ.

9Yawˇ hui lehˬ, awˬ gʼaˇ uiˍ jaˇ ve laˇ caˬ shiˉ hkʼe hpeh‸ ve yoˬ. Yawˇ zuh‸ chehˇ ve teˇ yanˇ, chaw teˇ gʼaˇ kaˬ yawˇ hta‸ ca nawˍ piˇ maˇ haˆ. Iˉsaˍreˍlaˆ chaw hta‸ awˬ bon na‸ piˇ ve chaw lehˬ, awˬ bon kʼaw‸ na‸ piˇ ve hta‸ gʼa hkanˍ leh, Iˉsaˍreˍlaˆ chaw hta‸ hkeu piˇ ve chaw lehˬ, hkeu ve hta‸ gʼa kʼaw‸ hkanˍ tuˬ yoˬ, teh‸ kʼoˆ ve yoˬ.

10Oˇ htaˇ Baˍlehˆ nyi ma zuhˆ jaˇ ve hkʼaw, la‸ tsuhˆ pui tsuhˆ taˍ leh Baˍlanˍ hta‸ chi hkʼe kʼoˆ piˇ ve yoˬ. Iˉsaˍreˍlaˆ chaw hui hta‸ hkeu piˇ tuˬ ngaˬ nawˬ hta‸ ca kuˬ yuˬ taˍ ve yoˬ. Ya‸ hkʼaˇ, shehˆ pawˆ hkʼa gaˬ nawˬ yawˇ hui hta‸ awˬ bon na‸ piˇ ve yoˬ.

11Chi beu‸ nawˬ aˉ hkʼaw kʼo‸-e loˬ. Ngaˬ nawˬ hta‸ la‸ shawnˍ piˇ tuˬ kʼoˆ taˍ ve yoˬ. Ya‸ hkʼaˇ, Gʼuiˬsha lehˬ la‸ shawnˍ oˇ ve teˇ hpaˍ nawˬ hta‸ piˇ tuˬ a hkaw-anˬ maˇ pe‸ laˇ, teh‸ yawˇ hta‸ kʼoˆ piˇ ve yoˬ.

12Baˍlanˍ kʼaw‸ yaw hkʼaw‸ leh kʼoˆ ve, Nawˬ ve hawˉ yehˬ hkʼaw cawˬ ve hpu shi hkʼa peu-eˬ ngaˬ hta‸ piˇ laˇ ve htawˇ, Gʼuiˬsha ve tawˇ hta‸ ngaˬ ponˬ leuˉ maˇ hpeh‸, teh‸ nawˬ peu laˇ ve chaw teˇ hpaˍ hta‸ ngaˬ kʼoˆ piˇ taˍ peuˬ ve yoˬ.

13Gʼuiˬsha ngaˬ hta‸ kʼoˆ laˇ ve hkʼe ceh tiˉ ngaˬ kʼoˆ tuˬ yoˬ, teh‸ Baˍlehˆ hta‸ kʼoˆ piˇ ve yoˬ.

14Oˇ ve hkʼaw‸ nawˉ, Baˍlanˍ lehˬ Baˍlehˆ hta‸ chi hkʼe kʼoˆ piˇ ve yoˬ. Chi beu‸ ngaˬ aˉ hkʼaw lo kʼo‸-e tuˬ yoˬ. Ya‸ hkʼaˇ, ngaˬ maˇ kʼo‸-e sheˍ gʼuˇ suhˍ, Iˉsaˍ reˍ laˆ chaw teˇ hpaˍ nawˬ hui hta‸ hkʼaˬ hkʼe te laˇ tuˬ ve awˬ lawn a ciˉ kʼoˆ maˍ taˉ laˇ shaˍ, teh‸ yawˇ hta‸ kʼoˆ piˇ ve yoˬ.

15Hkʼe te leh yawˇ kʼoˆ ve, Mehˇ shiˍ hkʼa deh‸ nyi mawˬ leh Gʼuiˬsha ve tawˇ hta‸ hkʼa deh‸ kaˇ puiˉ ve Beˍraˆ ve yaˇ Baˍlanˍ chi hkʼe kʼoˆ ve yoˬ.

16Awˬ ha awˬ hkʼaw lo kanˇ paˆ uiˍ jaˇ ve Gʼuiˬsha hta‸ ngaˬ gʼa mawˬ leh, shiˍ puiˉ ve cuˇ yiˬ maˍ yiˍ hta‸ ngaˬ gʼa taˍ ve yoˬ.

17Laˬ tuˬ ve awˬ gʼuˇ suhˍ hpawˇ Iˉsaˍreˍlaˆ chaw hta‸ ngaˬ gʼa mawˬ ve yoˬ. Awˬ gʼeuˆ ba chehˇ ve meu‸ keu shiˍ hkʼa shuˍ, yawˇ hui awˬ hkʼoˆ jawˇmawˇ teˇ gʼaˇ tawˆ la tuˬ yoˬ. Mvuhˇ tiˉ po-e‸ hkʼa shuˍ, yawˇ lehˬ Iˉsaˍreˍlaˆ chaw awˬ hkʼaw lo tawˆ la tuˬ yoˬ. Yawˇ lehˬ, Mawˇbaˆ chaw hui ve awˬ hoˉ awˬ naˬ teˇ hpaˍ hta‸ tiˉ pehˍ leh, Sheˍtaˆ awˬ ceuˬ awˬ hkʼaˇ teˇ hpaˍ hta‸ te luˬ te sheˆ piˇ tuˬ yoˬ.

18Yawˇ lehˬ Eˇdonˍ mvuhˇmiˬ hkʼaw chehˇ taˍ ve yawˇ ve canˇ paˍ teˇ hpaˍ hta‸ te luˬ piˇ leh, yawˇ hui ve mvuhˇmiˬ hta‸ hiˉ yuˬ tuˬ yoˬ. Iˉsaˍreˍlaˆ chaw teˇ hpaˍ uiˍ la da‸ la tuˬ yoˬ.

19Iˉsaˍreˍlaˆ chaw hui lehˬ canˇ paˍ teˇ hpaˍ hta‸ naˆ nehˆ leh, teˇ gʼaˇ ka‸ maˇ cawˬ taˉ htaˇ hkʼa gaˬ, te luˬ te sheˆ piˇ tuˬyoˬ, teh‸ kʼoˆ ve yoˬ.

20Baˍlanˍ lehˬ awˬ ha hkʼaw Aˍmaˍlehˆ chaw teˇ hpaˍ hta‸ gʼa mawˬ leh, yawˇ hui awˬ lawn chi hkʼe kʼoˆ ve yoˬ. Aˍmaˍlehˆ chaw teˇ hpaˍ lehˬ, shu a‸ kehˉ awˬ gʼaˇ uiˍ jaˇ ve chaw teˇ hpaˍ hpeh‸ ve yoˬ. Ya‸ hkʼaˇ, awˬ leh teˇ nyi gaˬ kʼo, yawˇ hui co co taiˍ taiˍ gʼa luˬ gʼa sheˆ kʼai tuˬ yoˬ, teh‸ kʼoˆ ve yoˬ.

21Baˍlanˍ lehˬ, awˬ ha hkʼaw Keˍniˆ chaw teˇ hpaˍ hta‸ ka‸ gʼa kʼaw‸ mawˬ leh, yawˇ hui awˬ lawn chi hkʼe kʼoˆ ve yoˬ. Nawˬ hui ve chehˇ kuiˬ lehˬ gawˬ lehˍ cawˬ leh, haˉ hpawˇ hkʼoˆ lo te taˍ ve ngaˆ hpui ehˉ hkʼe hpeh‸ ve yoˬ.

22Ya‸ hkʼaˇ, Aˍsuˇriˆ chaw hui ca bawˆ la htaˇ, nawˬ hui Keˍniˆ chaw teˇ hpaˍ htawˇ gʼa luˬ gʼa sheˆ kʼai tuˬ yoˬ, teh‸ kʼoˆ ve yoˬ.

23Baˍlanˍ chi hkʼe kʼaw‸ kʼoˆ ve yoˬ. Awˬ na hpawˇ lo ma‸ moˍ shawˍ chehˇ ve chaw oˇ ve teˇ hpaˍ a shu le.

24Canˇ paˍ teˇ hpaˍ lehˬ, Kuˇpaˍruˆ conˇ hpawˇ lo laˬ tuˬ yoˬ. Yawˇ hui lehˬ Aˍsuˇ riˆ mvuhˇmiˬ leh Eˍbaˍ mvuhˇmiˬ hta‸ bawˆ yuˬ tuˬ yoˬ. Ya‸ hkʼaˇ, yawˇ hui htawˇ co co taiˍ taiˍ luˬ kʼai sheˆ kʼai tuˬ yoˬ, teh‸ kʼoˆ ve yoˬ.

25Yawˇ oˇ hkʼe kʼoˆ peuˬ hkʼaw‸ nawˉ, aˉ hkʼaw kʼo‸-e ve yoˬ. Baˍlehˆ htawˇ yawˇ ve yehˬ lo kʼaw‸ kʼo‸-e ve yoˬ.

← Chapter 23 Jump to: Chapter 25 →