Numbers 20

Lahu Bible Edited © Thailand Bible Society and Bible Society of Myanmar, 2010, 2020.

← Chapter 19 Jump to: Chapter 21 →

1Ha pa awˉ lawˉ peuˇ teˇ maˬ gaˬ htaˇ, Iˉsaˍreˍlaˆ chaw teˇ hpaˍ Ziˇnaˆ heh puiˉ hkʼaw lo gaˬ la leh Kaˍdeˍshaˆ teh‸ kʼoˆ ve chehˇ kuiˬ lo deh chehˇ taˍ ve yoˬ. Oˇ kaˬ lo Meˇriˆanˍ suh-e leh yawˇ hta‸ tuˍ piˇ ve yoˬ.

2Yawˇ hui deh chehˇ taˍ kuiˬ lo, iˉ kaˆ maˇ cawˬ. Hkʼe te leh, Iˉsaˍreˍlaˆ chaw teˇ hpaˍ Moˉseˍ leh Aˍronˍ geh hpawnˬ laˬ leh kʼoˆ ve,

3Ngaˬ hui ka‸ awˬ nu ve Iˉsaˍreˍlaˆ chaw hui geh teˇ geh Gʼuiˬsha ve aˉ po kʼo bon yehˬ gʼuˇ suhˍ paˍ suh-e ve hkʼe kʼo hkʼaˬ ma da‸ tuˬ le.

4Aˬ hto‸ ma pa taw nawˬ ngaˬ hui hta‸ choˬ kaˬ heh puiˉ hkʼaw lo shiˍ laˬ ve le. Ngaˬ hui ve ceˇ teˇ hpaˍ geh teˇ geh ngaˬ hui hta‸ choˬ kaˬ lo suh-e piˇ lawˬ gaˇ ve laˇ.

5Aˬ hto‸ ma pa taw, nawˬ ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, choˬ kaˬ goˇ choˆ ve mvuhˇmiˬ hkʼaw shiˍ laˬ ve le. Choˬ kaˬ lo caˬ shiˍ, maˉ nawˆ shiˍ, a pehˉ meuˇ shiˍ leh aˉ ce ku shiˍ ka‸ maˇ cawˬ ve awˬ hkʼoˆ, dawˬ tuˬ ve iˉ kaˆ ceh ka‸ maˇ cawˬ, teh‸ yawˇ huiˉ maˬ hta‸ kʼoˆ piˇ ve yoˬ.

6Moˉseˍ leh Aˍronˍ yawˇ hui geh tawˆ kʼai leh, aˉ po kʼo bon yehˬ gʼuˇ suhˍ boˆ taˍ ve yoˬ. Oˇ htaˇ, Gʼuiˬsha ve awˬ gʼeuˆ ba tawˆ la ve yoˬ.

7Gʼuiˬsha Moˉseˍ hta‸ tawˇ yaw piˇ leh kʼoˆ ve,

8Ka ti‸ shaˉ caˆ taˍ kʼoˍ gʼuˇ suhˍ lo teh taˍ ve juˇ fuiˍ taˬ hta‸ yuˬ leh, Aˍronˍ nawˬ huiˉ maˬ Iˉsaˍreˍlaˆ chaw hkʼa peu-eˬ ve hta‸ kuˬ hpawnˬ-o‸. Yawˇ hui gʼuˇ suhˍ lo cawˬ ve haˉ hpawˇ hta‸ tawˇ yaw piˇ-oˆ. Haˉ hpawˇ oˇ ve hkʼaw iˉ kaˆ tawˆ la leh, chaw yaˇ leh to nuˇ to shaˆ teˇ hpaˍ hkʼa bvuhˆ gʼa dawˬ tuˬ yoˬ, teh‸ kʼoˆ ve yoˬ.

9Moˉseˍ lehˬ Gʼuiˬsha kʼoˆ ve hkʼe juˇ fuiˍ taˬ oˇ ve hta‸ ca yuˬ ve yoˬ.

10Oˇ ve hkʼaw‸ nawˉ, Moˉseˍ leh Aˍronˍ Iˉsaˍreˍlaˆ chaw teˇ hpaˍ hta‸ haˉ hpawˇ gʼuˇ suhˍ kuˬ hpawnˬ leh, Moˉseˍ yawˇ hui hta‸ tawˇ yaw piˇ leh kʼoˆ ve, Chaw hpfuhˆ teˇ hpaˍ-oˬ, na sheˍ. Ngaˬ huiˉ maˬ nawˬ hui awˬ pon haˉ hpawˇ chi ve hkʼaw iˉ kaˆ gʼa tawˆ la piˇ tuˬ laˇ, teh‸ yawˇ hui hta‸ kʼoˆ piˇ ve yoˬ.

11Yawˇ oˇ hkʼe kʼoˆ peuˬ hkʼaw‸ nawˉ, juˇ fuiˍ taˬ oˇ ve hta‸ yuˬ leh haˉ hpawˇ hta‸ nyiˇ hkʼe jaw‸ ve yoˬ. Oˇ htaˇ, haˉ hpawˇ oˇ ve hkʼaw iˉ kaˆ tawˆ la leh, chaw yaˇ leh to nuˇ to shaˆ teˇ hpaˍ hpoˆ dawˬ ve yoˬ.

12Ya‸ hkʼaˇ, Gʼuiˬsha Moˉseˍ leh Aˍronˍ hta‸ deˇ leh kʼoˆ ve, Nawˬ huiˉ maˬ ngaˬ hta‸ hkʼa deh‸ maˇ yonˍ leh, Iˉsaˍreˍlaˆ chaw chi ma ve mehˆ gʼuˇ suhˍ lo ngaˬ hta‸ maˇ shawˍ maˇ caˆ te ve pa taw, yawˇ hui hta‸ piˇ tuˬ ngaˬ ka ti‸ te taˍ peuˬ ve mvuhˇmiˬ hkʼaw, nawˬ huiˉ maˬ yawˇ hui hta‸ gʼa shiˍ kʼai piˇ tuˬ ve maˇ heˆ, teh‸ kʼoˆ ve yoˬ.

13Hkʼe te leh chehˇ kuiˬ oˇ ve hta‸, Meˍriˇbaˆ teh‸ meh piˇ ve yoˬ. Awˬ lawn kʼo, oˇ kaˬ lo Iˉsaˍreˍlaˆ chaw teˇ hpaˍ hkʼanˇ leh, Gʼuiˬsha lehˬ yawˇ hkʼaˬ ma da‸ kehˬ jaˇ ve hta‸ hpeu‸ maˍ piˇ ve pa taw yoˬ.

14Moˉseˍ lehˬ Kaˍdeˍshaˆ teh‸ kʼoˆ ve chehˇ kuiˬ lo chehˇ taˍ leh, Eˇdonˍ jawˇmawˇ hta‸ tawˇ chi hkʼe shanˍ feu piˇ ve yoˬ. Ngaˬ hui lehˬ Iˉsaˍreˍlaˆ awˬ ceuˬ awˬ hkʼaˇ hpeh‸ ve yoˬ. Ngaˬ hui hkʼaˬ ma gʼa tu‸ gʼa hkanˍ peuˬ ve hta‸ nawˬ htawˇ gʼa shiˍ gʼa kaˇ chehˇ ve yoˬ.

15Ngaˬ hui ve awˬ puˍ awˬ pi teˇ hpaˍ Eˇjiˇtu‸ mvuhˇmiˬ lo kʼai leh, oˇ kaˬ lo awˬ yanˇ maw chaweh chehˇ taˍ ve yoˬ. Eˇjiˇtu‸ chaw teˇ hpaˍ lehˬ, ngaˬ hui ve awˬ puˍ awˬ pi leh ngaˬ hui teˇ hpaˍ hta‸ fawˉ mehˍ laˇ ve yoˬ.

16Hkʼe te leh, ngaˬ hui Gʼuiˬsha hta‸ kuˬ ve yoˬ. Yawˇ lehˬ ngaˬ hui ve kuˬ hkawˇ hta‸ na yuˬ leh, mvuhˇ naw tcuh yaˇ teˇ gʼaˇ hta‸ peu laˇ leh, ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ ve yoˬ. Chi beu‸ ngaˬ hui lehˬ, nawˬ ve miˬ tcuhˉ paˇ lo cawˬ ve Kaˍdeˍshaˆ teh‸ kʼoˆ ve chehˇ kuiˬ lo deh chehˇ taˍ ve yoˬ.

17Ngaˬ hui hta‸ nawˬ ve mvuhˇmiˬ hkʼaw lo a ciˉ hpanˍ kʼai tcuh laˇ-oˆ. Ngaˬ hui lehˬ ya‸ kʼaw hkʼaˇ suh tiˉ hteˇ lehˍ kʼai tuˬ yoˬ. Nawˬ hui ve ti mi leh a pehˉ meuˇ hko hkʼaw maˇ kʼai. Nawˬ hui ve iˉ kaˆ hta‸ htawˇ maˇ dawˬ. Nawˬ ve mvuhˇmiˬ hkʼaw ponˬ tawˆ-e htaˇ hkʼa gaˬ, ya‸ kʼaw hkʼaˇ suh tiˉ kʼai tuˬ yoˬ, teh‸ tawˇ shanˍ feu piˇ ve yoˬ.

18Ya‸ hkʼaˇ, Eˇdonˍ chaw hui kʼaw‸ yaw hkʼaw‸ leh kʼoˆ ve, Ngaˬ hui ve mvuhˇmiˬ hkʼaw nawˬ hui hta‸ hpanˍ kʼai tcuh maˇ hpeh‸. Nawˬ hui oˇ hkʼe te kʼo, ngaˬ hui gʼa bawˆ tuˬ yoˬ, teh‸ kʼoˆ ve yoˬ.

19Iˉsaˍreˍlaˆ chaw teˇ hpaˍ kʼaw‸ kʼoˆ ve, Ngaˬ hui ya‸ kʼaw hkʼaˇ suh tiˉ kʼai tuˬ yoˬ. Ngaˬ hui leh ngaˬ hui ve ceˇ teˇ hpaˍ nawˬ hui ve iˉ kaˆ hta‸ dawˬ ve kʼo, ngaˬ hui awˬ hpfuhˇ pe‸ laˇ tuˬ yoˬ. Ngaˬ hui hta‸ nawˬ hui ve mvuhˇmiˬ hkʼaw hpanˍ kʼai tcuh laˇ-oˆ, teh‸ kʼoˆ ve yoˬ.

20Oˇ htaˇ Eˇdonˍ chaw teˇ hpaˍ lehˬ, Oˇ hkʼe te maˇ hpeh‸, teh‸ kʼoˆ leh Iˉsaˍreˍlaˆ chaw hta‸ ca bawˆ la tuˬ, ma‸ moˍ shawˍ leh tawˆ la ve yoˬ.

21Eˇdonˍ mvuhˇmiˬ hkʼaw hpanˍ kʼai tuˬ a hkaw-anˬ maˇ gʼa ve pa taw, Iˉsaˍreˍlaˆ chaw teˇ hpaˍ awˬ nu ve ya‸ kʼaw teˇ caˆ hta‸ kʼaw‸ kʼai ve yoˬ.

22Iˉsaˍreˍlaˆ chaw teˇ hpaˍ Kaˍdeˍshaˆ hkʼaw tawˆ kʼai leh, Hawˇraˆ hkʼaw lo gaˬ la ve yoˬ.

23Hkʼaw oˇ ve lehˬ, Eˇdonˍ chaw hui ve miˬ tcuhˉ paˇ lo cawˬ ve yoˬ. Oˇ kaˬ lo Gʼuiˬsha Moˉseˍ leh Aˍronˍ hta‸ tawˇ yaw piˇ leh kʼoˆ ve,

24Aˍronˍ lehˬ ngaˬ Iˉsaˍreˍlaˆ chaw hui hta‸ piˇ tuˬ ka ti‸ te taˍ peuˬ ve mvuhˇmiˬ hkʼaw maˇ gʼa lo‸-e. Yawˇ gʼa suh tuˬ yoˬ. Awˬ lawn kʼo, nawˬ huiˉ maˬ Meˍriˇbaˆ teh‸ kʼoˆ ve chehˇ kuiˬ lo, ngaˬ ve tawˇ hta‸ ponˬ leuˉ ve pa taw yoˬ.

25Aˍronˍ lehˬ yawˇ ve yaˇ Eˇlaˍsaˍ hta‸ shiˍ veu leh Hawˇraˆ hkʼaw hkʼoˆ lo gʼa kʼai ve yoˬ.

26Oˇ kaˬ lo gaˬ kʼo, Aˍronˍ nawˬ deh taˍ ve paw hkuˇ ve veu‸ kʼaˇ hta‸ kʼehˆ leh, Eˇlaˍsaˍ hta‸ feuˉ piˇ-oˆ. Aˍronˍ nawˬ oˇ kaˬ lo gʼa suh-e tuˬ yoˬ, teh‸ kʼoˆ ve yoˬ.

27Moˉseˍ lehˬ, Gʼuiˬsha kʼoˆ ve hkʼe te ve yoˬ. Iˉsaˍreˍlaˆ chaw chi ma ve mehˆ gʼuˇ suhˍ, yawˇ hui Hawˇraˆ hkʼaw hkʼoˆ taˆ-e ve yoˬ.

28Oˇ kaˬ gaˬ htaˇ, Moˉseˍ lehˬ Aˍronˍ ve veu‸ kʼaˇ hta‸ kʼehˆ baˬ leh, Eˇlaˍsaˍ hta‸ kʼaw‸ feuˉ piˇ ve yoˬ. Hkʼe te leh, Aˍronˍ oˇ kaˬ lo suh-e ve yoˬ. Oˇ ve hkʼaw‸ nawˉ, Moˉseˍ leh Eˇlaˍsaˍ hkʼaw hkʼoˆ lo kʼaw‸ ya‸ la ve yoˬ.

29Aˍronˍ suh peuˬ ve awˬ lawn Iˉsaˍreˍlaˆ chaw teˇ hpaˍ gʼa shiˍ ve teˇ yanˇ, yawˇ hui 30 nyi hkʼa gaˬ dawˇ haˍ leh hawˬ chehˇ ve yoˬ.

← Chapter 19 Jump to: Chapter 21 →