Numbers 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Gʼuiˬsha Moˉseˍ hta‸ chi hkʼe kʼoˆ piˇ ve yoˬ.

2Hkiˬ tu‸ keuˆ ve chaw, maˇ da‸ ve awˬ gʼuiˬ ya‸ ve chaw, leh suh taˍ ve awˬ to hta‸ ca htawˇ ve chaw teˇ hpaˍ hta‸ fa la hkʼaw gʼa‸ kʼoˬ piˇ-oˆ.

3Ngaˬ chehˇ taˍ kuiˬ hta‸ maˇ gʼa te cha‸ chiˆ tuˬ, maˇ da‸ kehˬ ve chaw oˇ ve teˇ hpaˍ hta‸ gʼa‸ kʼoˬ piˇ-oˆ, teh‸ Moˉseˍ hta‸ kʼoˆ piˇ ve yoˬ.

4Iˉsaˍreˍlaˆ chaw teˇ hpaˍ Gʼuiˬsha ve tawˇ hta‸ na yuˬ leh, chaw oˇ hkʼe ve teˇ hpaˍ hta‸ gʼa‸ kʼoˬ piˇ ve yoˬ.

5Gʼuiˬsha Moˉseˍ hta‸ cuˇ leh Iˉsaˍreˍlaˆ chaw hui hta‸ chi hkʼe kʼoˆ piˇ ve yoˬ.

6Chaw teˇ gʼaˇ Gʼuiˬsha hta‸ ka ti‸ maˇ yeˬ leh, awˬ nu ve chaw teˇ gʼaˇ hta‸ te ya‸ ve kʼo,

7yawˇ lehˬ te ya‸ taˍ ve venˇbaˆ oˇ ve hta‸ gʼa hpeu‸ maˍ leh, gʼa lawˬ hkawˉ ve yoˬ. Yawˇ te ya‸ piˇ ve chaw oˇ ve hta‸ gʼa sheˉ piˇ leh, awˬ leuˉ htawˇ ngaˇ pun teˇ pun gʼa kʼaw‸ piˇ ve yoˬ.

8Ya‸ hkʼaˇ, yawˇ te ya‸ piˇ ve chaw oˇ ve suh-e leh, hpu oˇ ve hta‸ ha‸ yuˬ tuˬ ve awˬ viˉ awˬ nyi teˇ gʼaˇ ka‸ maˇ cawˬ ve kʼo, hpu oˇ ve paw hkuˇ hta‸ gʼa piˇ ve yoˬ. Chi hkʼoˆ ka‸, yawˇ kʼaw‸ da‸ kehˬ la tuˬ, awˬ liˇ awˬ hkʼaˇ cawˬ ve hkʼe, yawˬ ehˉ teˇ hkeh yuˬ laˬ leh gʼa tuˉ tanˇ piˇ ve yoˬ.

9Gʼuiˬsha hta‸ tanˇ piˇ ve mawˇ hkʼa peu-eˬ lehˬ, paw hkuˇ teˇ hpaˍ awˬ pon hpeh‸ ve yoˬ.

10Paw hkuˇ teˇ hpaˍ lehˬ, a shu yawˇ kanˉ te chehˇ ve awˬ yanˇ hkʼaw, gʼa ve tanˇ tuˬ teˇ hpaˍ hta‸ caˇ tuˬ a hkaw-anˬ cawˬ ve yoˬ.

11Gʼuiˬsha Moˉseˍ hta‸ cuˇ leh awˬ liˇ awˬ hkʼaˇ chi teˇ hpaˍ Iˉsaˍreˍlaˆ chaw hui hta‸ kʼoˆ maˍ piˇ ve yoˬ. Chaw teˇ gʼaˇ yawˇ ve awˬ miˇ ma shu hta‸ haˉ chawˇ ca te chehˇ ve hta‸ shiˍ ve yoˬ. Ya‸ hkʼaˇ, te‸ chiˉ shaˉ hkiˆ maˇ cawˬ.

15Chi hkʼe hpeh‸ ve kʼo, yawˇ lehˬ yawˇ ve awˬ miˇ ma hta‸ paw hkuˇ geh gʼa shiˍ kʼai ve yoˬ. Venˇbaˆ cawˬ ve kʼo, cawˬ ve hkʼe hkʼa tawˍ lehˆ tawˆ la tuˬ, yawˇ leh caˬ hkʼa meu-e teˇ panˇ hta‸ htawˇ gʼa yuˬ kʼai ve yoˬ. Ya‸ hkʼaˇ, caˬ hkʼa meu-e oˇ ve awˬ hkʼoˆ lo shaˍlonˍ chu maˇ kʼoˆ, sha hawnˉ maˇ kʼoˆ maˇ gʼa keu.

16Paw hkuˇ lehˬ, yaˇ miˇ oˇ ve hta‸ tuˉ tanˇ kuiˬ gʼuˇ suhˍ lo gʼa huˉ tcuh taˍ ve yoˬ.

17Oˇ ve hkʼaw‸ nawˉ, paw hkuˇ lehˬ da‸ kehˬ ve iˉ kaˆ hta‸ je‸ yuˬ te taˍ ve kawˆ teˇ maˬ hkʼaw keu leh, bon yehˬ hkʼaw cawˬ ve je‸ meu-e htawˇ, a ciˉgʼa hkaˆ keu ve yoˬ.

18Oˇ hkʼe te peuˬ hkʼaw‸ nawˉ, yawˇ lehˬ yaˇ miˇ ma ve uˉ hkeh mvuh hta‸ hpehˇ ya‸ leh, yawˇ ve la‸sheh hkʼaw caˬ hkʼa meu-e gʼa yuˬ keu piˇ ve yoˬ. Paw hkuˇ lehˬ, hkeu ve awˬ ceuˬ cawˬ taˍ ve kawˆ oˇ ve hta‸ yuˬ taˍ leh,

19chi hkʼe gʼa kʼoˆ ve yoˬ. Nawˬ haˉ chawˇ maˇ te taˍ ve kʼo, iˉ kaˆ chi ve hkʼaw cawˬ ve hkeu ve awˬ ceuˬ nawˬ awˬ hkʼoˆ lo gaˬ la tuˬ ve maˇ heˆ.

20Ya‸ hkʼaˇ, nawˬ haˉ chawˇ ca te taˍ ve kʼo,

21nawˬ lehˬ shu hkeu ve hta‸ gʼa hkanˍ tuˬ yoˬ. Gʼuiˬsha lehˬ nawˬ ve mawˇ hta‸ kʼaw‸ dehˬ hkʼaw‸ kʼai piˇ leh, nawˬ ve gʼoˇ peˬ hta‸ hpo‸ la piˇ tuˬ yoˬ.

22Iˉ kaˆ chi nawˬ ve gʼoˇ peˬ hkʼaw lo‸-e ve teˇ yanˇ, nawˬ ve gʼoˇ peˬ hpo‸ la leh, nawˬ ve mawˇ htawˇ kʼaw‸ dehˬ hkʼaw‸ kʼai piˇ-oˆ, teh‸ gʼa kʼoˆ ve yoˬ. Oˇ htaˇ yaˇ miˇ oˇ ve lehˬ, Nawˬ kʼoˆ ve hkʼe hpeh‸ la piˇ-oˆ, teh‸ gʼa kʼoˆ ve yoˬ.

23Oˇ ve hkʼaw‸ nawˉ, paw hkuˇ lehˬ hkeu ve tawˇ oˇ ve teˇ hpaˍ hta‸ li‸ kʼoˆ hkʼaw bvuh‸ keu leh, iˉ kaˆ oˇ ve hkʼaw gʼa tsuhˇ keu ve yoˬ.

24Hkeu ve awˬ gʼuiˬ tsuhˇ keu taˍ ve iˉ kaˆ oˇ ve yaˇ miˇ hta‸ maˇ taw piˇ sheˍ gʼuˇ suhˍ,

25paw hkuˇ lehˬ yaˇ miˇ ve la‸ sheh hkʼaw keu piˇ taˍ ve caˬ hkʼa meu-e oˇ ve hta‸ yuˬ leh, Gʼuiˬsha hta‸ chiˇ a‸ piˇ peuˬ hkʼaw‸ nawˉ, tuˉ tanˇ kuiˬ hkʼoˆ lo teh leh,

26Gʼuiˬsha hta‸ gʼa tuˉ tanˇ piˇ ve yoˬ. Oˇ hkʼe te peuˬ hkʼaw‸ nawˉ, yawˇ lehˬ iˉ kaˆ oˇ ve yaˇ miˇ hta‸ gʼa taw piˇ ve yoˬ.

27Yaˇmiˇ oˇ ve lehˬ shu hta‸ haˉ chawˇ ca te taˍ ve kʼo, yawˇ ve gʼoˇ peˍ hpo‸ la leh, yawˇ ve mawˇ htawˇ kʼaw‸ dehˬ hkʼaw‸ kʼai ve yoˬ. Yawˇ lehˬ, shu hkeu ve hta‸ gʼa hkanˍ ve yoˬ.

28Ya‸ hkʼaˇ, yawˇ shu hta‸ haˉ chawˇ maˇ ca te taˍ ve kʼo, te‸ chiˉ maˇ hpeh‸ leh yaˇ kʼaw‸ cawˬ la tuˬ yoˬ.

29Chi ve lehˬ, awˬ hpawˇ teˇ gʼaˇ yawˇ ve awˬ miˇ ma shu hta‸ haˉ chawˇ te, maˇ te ve hta‸ hkʼa deh‸ gʼa shiˍ tuˬ, chaˬ nyi ve awˬ liˇ awˬ hkʼaˇ hpeh‸ ve yoˬ. Yaˇ miˇ lehˬ tuˉ tanˇ kuiˬ gʼuˇ suhˍ lo gʼa huˉ taˍ leh, paw hkuˇ lehˬ oˇ hkʼe gʼa te chaˬ nyi ve yoˬ.

31Awˬ hpawˇ lehˬ te‸ chiˉ venˇbaˆ maˇ cawˬ. Ya‸ hkʼaˇ, awˬ miˇ ma lehˬ te ya‸ taˍ ve kʼo, ciˍ yanˍ ve hta‸ gʼa hkanˍ ve yoˬ.

← Chapter 4 Jump to: Chapter 6 →