Numbers 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Gʼuiˬsha Moˉseˍ leh Aˍronˍ hta‸ cuˇ leh Iˉsaˍreˍlaˆ chaw hui hta‸ chi hkʼe kʼoˆ piˇ ve yoˬ

2Te‸ chiˉ awˬ kuiˉ awˬ haiˇ maˇ cawˬ leh, teˇ pawˆ ka‸ kanˉ maˇ te jaw sheˍ ve nyiˉ-ehˍ ve nuˇ ma teˇ hkeh hta‸ yuˬ laˬ leh,

3paw hkuˇ Eˇlaˍsaˍ hta‸ piˇ-oˆ. Nuˇ oˇ ve hta‸ fa la awˬ baˬ hpawˇ lo yuˬ kʼai leh Gʼuiˬsha mehˆ gʼuˇ suhˍ gʼa tiˇ pehˍ ve yoˬ.

4Yawˇ lehˬ nuˇ suhˍ hkʼaw la‸ naw tuˍ keu leh, aˉ po kʼo bon yehˬ hpawˇ lo suhˍ pawˆ hkʼa gaˬ gʼa hpeh‸ peu ve yoˬ.

5Oˇ hkʼe te peuˬ hkʼaw‸ nawˉ, nuˇ shaˍ, nuˇ guiˬ kʼuˉ, nuˇ suhˍ leh awˬ gʼuˬ tehˆ hkʼa peu-eˬ hta‸ paw hkuˇ gʼuˇ suhˍ lo aˬ miˍ gʼa tuˉ baˬ ve yoˬ.

6Yawˇ lehˬ htawˇ suhˆ, huˇsoˆ teh‸ kʼoˆ ve suhˆ hpa‸, leh nyiˉ-ehˍ ve aˉ caˆ hkeh hta‸ yuˬ leh aˬ miˍ hkʼaw gʼa baˬ keu piˇ ve yoˬ.

7Oˇ hkʼe te peuˬ hkʼaw‸ nawˉ, yawˇ lehˬ veu‸ kʼaˇ gʼa kʼehˆ tsuhˇ leh, iˉ kaˆ gʼa hehˉ ve yoˬ. Oˇ ve hkʼaw‸ nawˉ, yawˇ fa la lo kʼaw‸ la hpeh‸ ve yoˬ. Ya‸ hkʼaˇ, mvuhˇ maˇ hpeu‸ sheˍ ve ceh ceh yawˇ maˇ da‸ kehˬ.

8Nuˇ oˇ ve hta‸ aˬ miˍ tuˉ baˬ ve chaw htawˇ, veu‸ kʼaˇ gʼa kʼehˆ tsuhˇ leh iˉ kaˆ gʼa hehˉ ve yoˬ. Ya‸ hkʼaˇ mvuhˇ maˇ hpeu‸ la sheˍ ve ceh ceh yawˇ htawˇ maˇ da‸ kehˬ.

9A shu yawˇ awˬ to hta‸ da‸ kehˬ tuˬ te taˍ peuˬ ve chaw teˇ gʼaˇ lehˬ, hkʼaw‸ laˉ oˇ ve teˇ hpaˍ hta‸ toˆ yuˬ leh, fa la awˬ baˬ hpawˇ da‸ kehˬ ve chehˇ kuiˬ lo gʼa teh taˍ ve yoˬ. Hkʼaw‸ laˉ oˇ ve lehˬ, Iˉsaˍreˍlaˆ chaw hui cha‸ chiˆ kʼai htaˇ, iˉ kaˆ hkʼaw keu yehˇ tuˬ leh, venˇbaˆ yuˬ baˬ piˇ tuˬ awˬ pon hpeh‸ ve yoˬ.

10Hkʼaw‸ laˉ oˇ ve hta‸ toˆ yuˬ ve chaw htawˇ, veu‸ kʼaˇ gʼa kʼehˆ tsuhˇ ve yoˬ. Ya‸ hkʼaˇ, mvuhˇ maˇ hpeu‸ la sheˍ ve ceh ceh yawˇ lehˬ maˇ da‸ kehˬ. Awˬ liˇ chi hta‸ Iˉsaˍreˍlaˆ chaw leh, yawˇ hui geh ca chehˇ la taˍ ve awˬ nu ve chaw hkʼa peu-eˬ, hkʼaˬ htaˆ ka‸ gʼa na yuˬ ve yoˬ.

11Chaw suh hta‸ htawˇ ve chaw hkʼaˬ ve teˇ gʼaˇ maˇ kʼoˆ, suhˍ nyi hkʼa gaˬ maˇ da‸ kehˬ.

12Yawˇ lehˬ shehˆ nyi teˇ nyi htaˇ, leh suhˍ nyi teˇ nyi htaˇ da‸ kehˬ ve iˉ kaˆ yuˬ leh gʼa tsuhˇ ve yoˬ. Oˇ hkʼe te ve kʼo kʼaw‸ da‸ kehˬ la ve yoˬ. Ya‸ hkʼaˇ, yawˇ lehˬ shehˆ nyi teˇ nyi leh suhˍ nyi teˇ nyi htaˇ iˉ kaˆ maˇ tsuhˇ ve kʼo, kʼaw‸ da‸ kehˬ la tuˬ ve maˇ heˆ.

13Chaw suh hta‸ ca htawˇ ve chaw hkʼaˬ ve teˇ gʼaˇ maˇ kʼoˆ, a shu yawˇ awˬ to kʼaw‸ da‸ kehˬ la tuˬ, da‸ kehˬ ve iˉ kaˆ maˇ tsuhˇ ve kʼo, yawˇ lehˬ cha‸ chiˆ kʼai peuˬ ve chaw hpeh‸ ve yoˬ. Yawˇ lehˬ Gʼuiˬsha ve aˉ po kʼo bon yehˬ hta‸ cha‸ chiˆ tuˬ te ve chaw hpeh‸ ve pa taw, yawˇ hta‸ Gʼuiˬsha ve chaw teh‸ kʼaw‸ shawˍ maˇ hpeh‸.

14Chaw teˇ gʼaˇ aˉ po kʼo bon yehˬ hkʼaw paˍ suh-e ve kʼo, bon yehˬ hkʼaw chehˇ taˍ ve chaw, maˇ heˆ kʼo yawˇ suh-e ve teˇ hkui lo‸ la ve chaw lehˬ, suhˍ nyi hkʼa gaˬ cha‸ chiˆ kʼai ve yoˬ.

15Bon yehˬ hkʼaw cawˬ ve awˬ hoˆ maˇ hoˆ taˍ ve je‸ mu‸ hkʼu hkʼa peu-eˬ htawˇ cha‸ chiˆ kʼai ve yoˬ.

16Shu tiˇ pehˍ taˍ ve chaw, maˇ heˆ kʼo yawˇ hkʼaˇ yawˇ naˬ suh-e ve chaw hta‸ ca htawˇ ve chaw, maˇ heˆ kʼo chaw mu‸ ku leh chaw tuˍ hpfuh hta‸ ca htawˇ ve chaw lehˬ, suhˍ nyi hkʼa gaˬ cha‸ chiˆ kʼai ve yoˬ.

17Cha‸ chiˆ kʼai peuˬ ve chaw hta‸ kʼaw‸ da‸ kehˬ la piˇ tuˬ, hkʼaw‸ laˉ meu-e oˇ ve hta‸ mu‸ hkʼu hkʼaw keu leh, iˉ kaˆ gʼa hpaˍ ve yoˬ.

18Bon yehˬ hkʼaw suh-e ve kʼo, a shu yawˇ awˬ to hta‸ da‸ kehˬ tuˬ te taˍ ve chaw lehˬ, huˇsoˆ teh‸ kʼoˆ ve suhˆ hpa‸ hta‸ iˉ kaˆ oˇ ve hkʼaw tuˍ keu leh, aˉ po kʼo bon yehˬ leh, bon yehˬ oˇ ve hkʼaw hkʼa cawˬ taˍ ve mawˇ hkʼa peu-eˬ ve hta‸ maˇ kʼoˆ, oˇ kaˬ lo hkʼa chehˇ taˍ ve chaw teˇ hpaˍ hta‸ maˇ kʼoˆ, gʼa hpeh‸ pfuhˍ piˇ ve yoˬ. Yawˇ lehˬ shu tiˇ pehˍ ve hta‸ gʼa hkanˍ ve chaw, yawˇ hkʼaˇ yawˇ naˬ suh-e ve chaw, chaw suh hta‸ ca htawˇ ve chaw, chaw mu‸ ku hta‸ ca htawˇ ve chaw, leh tuˍ hpfuh hta‸ ca htawˇ ve chaw teˇ hpaˍ hta‸ htawˇ gʼa hpeh‸ pfuhˍ piˇ ve yoˬ.

19Shehˆ nyi teˇ nyi leh suhˍ nyi teˇ nyi htaˇ, a shu yawˇ awˬ to hta‸ da‸ kehˬ tuˬ te taˍ peuˬ ve chaw lehˬ, maˇ da‸ kehˬ ve chaw oˇ ve hta‸ iˉ kaˆ gʼa hpeh‸ pfuhˍ piˇ ve yoˬ. Suhˍ nyi teˇ nyi htaˇ, yawˇ lehˬ chaw oˇ ve hta‸ da‸ kehˬ tuˬ gʼa te piˇ ve yoˬ. Chaw oˇ ve lehˬ, veu‸ kʼaˇ gʼa kʼehˆ tsuhˇ leh, iˉ kaˆ gʼa hehˉ ve yoˬ. Mvuhˇ hpeu‸ la htaˇ yawˇ kʼaw‸ da‸ kehˬ la ve yoˬ.

20Cha‸ chiˆ kʼai peuˬ ve chaw lehˬ, da‸ kehˬ ve iˉ kaˆ maˇ hpeh‸ pfuhˍ piˇ sheˍ ve ceh ceh maˇ da‸ kehˬ. Yawˇ lehˬ, Gʼuiˬsha ve aˉ po kʼo bon yehˬ hta‸ cha‸ chiˆ tuˬ te ve pa taw, yawˇ hta‸ Gʼuiˬsha ve chaw teh‸ shawˍ taˍ maˇ hpeh‸.

21Nawˬ hui lehˬ, awˬ liˇ chi ve hta‸ hkʼaˬ htaˆ ka‸ gʼa na yuˬ ve yoˬ. Da‸ kehˬ ve iˉ kaˆ hpeh‸ pfuhˍ piˇ ve hta‸ gʼa hkanˍ ve chaw lehˬ, a shu yawˇ ve veu‸ kʼaˇ hta‸ htawˇ gʼa kʼehˆ tsuhˇ ve yoˬ. Iˉ kaˆ oˇ ve hta‸ htawˇ ve chaw lehˬ, mvuhˇ maˇ hpeu‸ la sheˍ ve ceh ceh maˇ da‸ kehˬ.

22Cha‸ chiˆ ve chaw ca htawˇ ve mawˇ hkʼaˬ ve teˇ ceuˬ maˇ kʼoˆ, cha‸ chiˆ kʼai ve yoˬ. Mawˇ oˇ ve teˇ hpaˍ hta‸ ca kʼaw‸ htawˇ ve chaw lehˬ, mvuhˇ maˇ hpeu‸ sheˍ ve ceh ceh maˇ da‸ kehˬ.

← Chapter 18 Jump to: Chapter 20 →