Numbers 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Iˉsaˍreˍlaˆ chaw teˇ hpaˍ awˬ gʼuˇ suhˍ kʼaw‸ kʼai leh, Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve Yeˍriˆhkoˇ venˇ paˇ lo deh chehˇ taˍ ve yoˬ.

2Mawˇbaˆ jawˇmawˇ Ziˆhpawˇ ve yaˇ Baˍlehˆ lehˬ, Iˉsaˍreˍlaˆ chaw teˇ hpaˍ Aˍmawˇriˆ chaw hui hta‸ hkʼaˬ hkʼe te piˇ peuˬ ve awˬ lawn hta‸ maˇ kʼoˆ, Iˉsaˍreˍlaˆ chaw teˇ hpaˍ oˇ kaˬ lo hkʼaˬ ma chehˇ taˍ ve awˬ lawn hta‸ maˇ kʼoˆ, gʼa kaˇ ve teˇ yanˇ,

3yawˇ awˬ to leh yawˇ ve mvuhˇmiˬ yaˇ hkʼa peu-eˬ kawˆ jaˇ ve yoˬ.

4Hkʼe te leh, Mawˇbaˆ chaw teˇ hpaˍ Meˇdiˍanˍ chaw hui hta‸ chi hkʼe kʼoˆ piˇ ve yoˬ. Chaw chi teˇ hpaˍ lehˬ, kʼaˆ caˇ chehˇ ve nuˇ paˍ lonˉ hkʼa shuˍ, hkʼa mawˬ ve awˬ ceuˬ teˇ hpaˍ hta‸ te luˬ piˇ chehˇ ve yoˬ, teh‸ kʼoˆ ve yoˬ.

5Hkʼe te leh jawˇmawˇ Baˍlehˆ lehˬ Aˍmawˍ mvuhˇmiˬ Uˇhpaˍraˆ iˉ kaˆ lawˬ paˇ lo cawˬ ve Peˍtawˍ venˇ hkʼaw chehˇ ve Bawˇraˆ ve yaˇ Baˍlanˍ hta‸ ca kuˬ tcuh leh chi hkʼe shanˍ feu piˇ ve yoˬ. Eˇjiˇtu‸ mvuhˇmiˬ hkʼaw tawˆ la taˍ ve chaw moˍ lonˉ teˇ moˍ cawˬ ve yoˬ. Chaw oˇ ve teˇ hpaˍ lehˬ, hkʼaˬ hpawˇ chi hpawˇ lo chehˇ biˇ taˍ leh, ngaˬ hui ve mvuhˇmiˬ hta‸ bawˆ yuˬ tuˬ te chehˇ ve yoˬ.

6Yawˇ hui lehˬ, ngaˬ hui a‸ kehˉ chaw maˇ jaˇ ve yoˬ. Chi hta‸ pa taw, nawˬ laˬ leh yawˇ hui hta‸ a ciˉ ca hkeu piˇ la-o. Oˇ hkʼe te ve kʼo, ngaˬ hui chaw oˇ ve teˇ hpaˍ hta‸ gʼa‸ kʼoˬ piˇ gʼa tuˬ naˍ maˇ shiˍ. Awˬ lawn kʼo, nawˬ chaw teˇ gʼaˇ hta‸ bon na‸ piˇ ve kʼo, chaw oˇ ve awˬ bon gʼa leh, nawˬ chaw teˇ gʼaˇ hta‸ hkeu piˇ ve kʼo, chaw oˇ ve luˬ kʼai ve hta‸ ngaˬ shiˍ taˍ ve yoˬ, teh‸ kʼoˆ feu piˇ ve yoˬ.

7Hkʼe te leh, Mawˇbaˆ chaw leh Meˇdiˍanˍ chaw teˇ hpaˍ la‸ shawnˍ yuˬ veu leh Baˍlanˍ geh kʼai ve yoˬ. Jawˇmawˇ ve tawˇ oˇ ve hkʼa peu-eˬ yawˇ hui yawˇ hta‸ hto piˇ ve yoˬ.

8Oˇ htaˇ, Baˍlanˍ yawˇ hui hta‸ chi hkʼe kʼoˆ piˇ ve yoˬ. Nawˬ hui ya‸ puiˉ choˬ kaˬ haˉ taˉ sheˍ. Shawˉ pawˍ kʼo, Gʼuiˬsha ngaˬ hta‸ kʼoˆ laˇ ve tawˇ teˇ hpaˍ, ngaˬ nawˬ hui hta‸ kʼoˆ maˍ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh, oˇ ve teˇ haˉ yawˇ hui oˇ kaˬ lo haˉ chehˇ taˍ ve yoˬ.

9Gʼuiˬsha Baˍlanˍ geh laˬ leh, Choˬ kaˬ nawˬ geh ca haˉ la ve chaw chi teˇ hpaˍ a shu le, teh‸ yawˇ hta‸ na nyi ve yoˬ.

10Yawˇ kʼaw‸ yaw hkʼaw‸ leh kʼoˆ ve, Chaw chi teˇ hpaˍ lehˬ, Mawˇbaˆ jawˇmawˇ Baˍlehˆ peu laˇ taˍ ve chaw teˇ hpaˍ hpeh‸ ve yoˬ.

11Eˇjiˇtu‸ mvuhˇmiˬ hkʼaw chaw teˇ moˍ tawˆ la leh, hkʼaˬ hpawˇ chi hpawˇ lo chehˇ taˍ peuˬ ve awˬ lawn ngaˬ hta‸ ca hto la ve yoˬ. Yawˇ lehˬ chaw chi teˇ hpaˍ hta‸ bawˆ gʼaˇ tuˬ, ngaˬ hta‸ laˬ leh a ciˉ ca hkeu piˇ la teh‸ ngaˬ hta‸ kuˬ laˇ ve yoˬ, teh‸ kʼoˆ piˇ ve yoˬ

12Oˇ htaˇ, Gʼuiˬsha Baˍlanˍ hta‸ chi hkʼe kʼoˆ piˇ ve yoˬ. Nawˬ yawˇ hui geh taˇ kʼai. Iˉsaˍreˍlaˆ chaw oˇ ve teˇ hpaˍ hta‸ nawˬ maˇ gʼa hkeu piˇ. Awˬ lawn kʼo, yawˇ hui lehˬ ngaˬ ve awˬ bon hta‸ gʼa taˍ peuˬ ve yoˬ, teh‸ yawˇ hta‸ kʼoˆ piˇ ve yoˬ.

13Shawˉ pawˍ mvuhˇ htiˇ la ve teˇ yanˇ, Baˍlanˍ yawˇ hui geh kʼai leh, Nawˬ hui kʼo‸-e loˬ. Gʼuiˬsha ngaˬ hta‸ nawˬ hui geh kʼai tuˬ a hkaw-anˬ maˇ piˇ laˇ ve law, teh‸ yawˇ hui hta‸ kʼoˆ piˇ ve yoˬ.

14Hkʼe te leh, yawˇ hui kʼaw‸ kʼo‸-e leh Baˍlanˍ laˬ maˇ hpeh‸ ve awˬ lawn yawˇ hui ve jawˇmawˇ Baˍlehˆ hta‸ kʼoˆ piˇ ve yoˬ.

15Oˇ htaˇ, Baˍlehˆ lehˬ ponˬ laˬ htaˇ teˇ pawˆ a‸ kehˉ chaw maˇ chaweh Baˍlanˍ geh kʼaw‸ kʼai tcuh ve yoˬ.

16Yawˇ hui Baˍlanˍ geh laˬ leh, jawˇmawˇ ve tawˇ chi teˇ hpaˍ yawˇ hta‸ kʼoˆ piˇ ve yoˬ. Awˬ bon te leh a ciˉ laˬ-o‸.

17Ngaˬ nawˬ hta‸ la‸ shawnˍ maˇ maˇ pe‸ laˇ tuˬ yoˬ. Nawˬ laˬ leh chaw chi teˇ hpaˍ hta‸ a ciˉ ca hkeu piˇ la-o, teh‸ yawˇ hta‸ kʼoˆ piˇ ve yoˬ.

18Ya‸ hkʼaˇ, Baˍlanˍ kʼaw‸ yaw hkʼaw‸ leh kʼoˆ ve, Baˍlehˆ lehˬ yawˇ ve hawˉ yehˬ hkʼaw cawˬ ve hpu shi hkʼa peu-eˬ ngaˬ hta‸ pe‸ laˇ ve htawˇ, ngaˬ ve Jawˇmawˇ Gʼuiˬsha ve tawˇ hta‸ ngaˬ a ciˉ ka‸ ponˬ leuˉ maˇ hpeh‸.

19Ya‸ hkʼaˇ, nawˬ hui ya‸ puiˉ ka‸ choˬ kaˬ haˉ taˉ sheˍ. Gʼuiˬsha ngaˬ hta‸ hkʼaˬ hkʼe kʼaw‸ kʼoˆ laˇ tuˬ naˍ maˇ shiˍ, teh‸ yawˇ hui hta‸ kʼoˆ piˇ ve yoˬ.

20Oˇ ve teˇ haˉ Gʼuiˬsha yawˇ geh kʼaw‸ laˬ leh, Chaw chi teˇ hpaˍ nawˬ hta‸ ca kʼaw‸ kuˬ la ve kʼo, yawˇ hui geh kʼai loˬ. Ya‸ hkʼaˇ, ngaˬ kʼoˆ laˇ ve hkʼe ceh tiˉ nawˬ gʼa kʼoˆ ve yoˬ, teh‸ yawˇ hta‸ kʼoˆ piˇ ve yoˬ.

21Hkʼe te leh shawˉ pawˍ mvuhˇ htiˇ la ve teˇ yanˇ, Baˍlanˍ yawˇ ve piˉ laˬ hta‸ ciˇ leh yawˇ hui geh kʼai ve yoˬ.

22Baˍlanˍ chaw oˇ ve teˇ hpaˍ geh kʼai toˇ chehˇ ve hta‸ Gʼuiˬsha mawˬ leh nyi ma zuhˆ ve yoˬ. Yawˇ lehˬ, awˬ ceˬ paˍ nyiˇ gʼaˇ hta‸ shiˍ leh piˉ laˬ ciˇ kʼai chehˇ ve teˇ yanˇ, Gʼuiˬsha ve mvuhˇ naw tcuh yaˇ teˇ gʼaˇ lehˬ yawˇ hta‸ tawˍ taˍ tuˬ, ya‸ kʼaw hpuiˇ lo huˉ taˍ ve yoˬ.

23Mvuhˇ naw tcuh yaˇ oˇ ve aˉhtaw gʼawˬ leh huˉ chehˇ ve hta‸ piˉ laˬ gʼa mawˬ ve teˇ yanˇ, ya‸ kʼaw hawˉ lo ya‸-e ve yoˬ. Baˍlanˍ lehˬ piˉ laˬ hta‸ jaw‸ leh ya‸ kʼaw hkʼoˆ lo gʼa‸ peu ve yoˬ.

24Oˇ ve hkʼaw‸ nawˉ, mvuhˇ naw tcuh yaˇ oˇ ve lehˬ, a pehˉ meuˇ hko nyiˇ maˬ awˬ kaˍ lo cawˬ ve miˬ haˍ ve chehˇ kuiˬ lo kʼaw‸ huˉ taˍ ve yoˬ.

25Piˉ laˬ oˇ ve lehˬ mvuhˇ naw tcuh yaˇ hta‸ kʼaw‸ mawˬ ve teˇ yanˇ, haˉ hpawˇ cawˬ kuiˬ lo kʼai leh Baˍlanˍ ve hkui sheh hta‸ haˉ pui shawˆ hkʼaw sheˬ ve yoˬ. Hkʼe te leh, Baˍlanˍ piˉ laˬ hta‸ kʼaw‸ jaw‸ hpehˇ ve yoˬ.

26Oˇ ve hkʼaw‸ nawˉ, mvuhˇ naw tcuh yaˇ oˇ ve lehˬ awˬ gʼuˇ suhˍ teˇ kaˬ lo ca kʼaw‸ huˉ chehˇ taˍ ve yoˬ. Chehˇ kuiˬ oˇ ve lehˬ cehˍ jaˇ ve chehˇ kuiˬ hpeh‸ leh awˬ nu awˬ na ca jaw kʼai kuiˬ maˇ cawˬ.

27Hkʼe te leh, piˉ laˬ oˇ ve mvuhˇ naw tcuh yaˇ hta‸ teˇ pawˆ gʼa kʼaw‸ mawˬ ve teˇ yanˇ, miˬ chaˇ hkʼoˆ lo paˍ zuh‸ sheˬ ve yoˬ. Baˍlanˍ nyi ma zuhˆ jaˇ leh, piˉ laˬ hta‸ gʼaˇ hte‸ jaw‸ ve yoˬ.

28Oˇ htaˇ, Gʼuiˬsha lehˬ piˉ laˬ hta‸ tawˇ yaw tcuh leh, Ngaˬ nawˬ hta‸ aˬ hto‸ ma te ya‸ kuiˬ cawˬ leh, ngaˬ hta‸ shehˆ pawˆ jaw‸ hpehˇ laˇ ve le, teh‸ Baˍlanˍ hta‸ kʼoˆ piˇ ve yoˬ.

29Baˍlanˍ kʼaw‸ yaw hkʼaw‸ leh, Nawˬ ngaˬ hta‸ maˇ shawˍ maˇ caˆ te guiˇ laˇ ve yoˬ. Ngaˬ aˉhtaw pfuhˇ taˍ ve hkʼe kʼo, nawˬ hta‸ chaw pehˍ laˇ tuˬ yoˬ, teh‸ piˉ laˬ hta‸ kʼoˆ piˇ ve yoˬ.

30Piˉ laˬ kʼaw‸ yaw hkʼaw‸ leh kʼoˆ ve, Ngaˬ lehˬ nawˬ teˇ co-e ciˇ toˇ chehˇ ve piˉ laˬ maˇ heˆ laˇ. Ngaˬ nawˬ hta‸ teˇ pawˆ pawˆ chi hkʼe te laˇ jaw laˇ, teh‸ Baˍlanˍ hta‸ kʼoˆ piˇ ve yoˬ. Baˍlanˍ htawˇ, Maˇ te laˇ jaw, teh‸ piˉ laˬ hta‸ kʼaw‸ kʼoˆ piˇ ve yoˬ.

31Oˇ htaˇ, Gʼuiˬsha Baˍlanˍ ve mehˆ shiˍ hta‸ hpaw piˇ leh, yawˇ lehˬ oˇ kaˬ lo aˉhtaw yuˬ leh huˉ taˍ ve mvuhˇ naw tcuh hta‸ gʼa mawˬ ve yoˬ. Oˇ htaˇ Baˍlanˍ miˬ chaˇ hkʼoˆ boˆ taˍ ve yoˬ.

32Mvuhˇ naw tcuh yaˇ kʼoˆ ve, Aˬ hto‸ ma pa taw nawˬ ve piˉ laˬ hta‸ shehˆ pawˆ hkʼa gaˬ jaw‸ ve le. Nawˬ ya‸ kʼaw chi hta‸ maˇ te toˇ cawˇ ve pa taw, ngaˬ nawˬ hta‸ ca tawˍ taˍ la ve yoˬ.

33Ya‸ hkʼaˇ, nawˬ ve piˉ laˬ ngaˬ hta‸ mawˬ leh shehˆ pawˆ hkʼa gaˬ awˬ gʼuˇ suhˍ kʼai maˇ gaˬ ve yoˬ. Piˉ laˬ oˇ hkʼe maˇ te leh, ya‸ kʼaw hkʼaˇ suh hteˇ lehˍ laˬ chehˇ ve hkʼe kʼo, ngaˬ nawˬ hta‸ tiˇ pehˍ leh piˉ laˬ hta‸ ponˬ piˇ tuˬ yoˬ, teh‸ Baˍlanˍ hta‸ kʼoˆ piˇ ve yoˬ.

34Baˍlanˍ kʼaw‸ yaw hkʼaw‸ leh kʼoˆ ve, Ngaˬ te ya‸ jaˇ peuˬ. Nawˬ ngaˬ hta‸ tawˍ taˍ laˇ tuˬ, ya‸ kʼaw hpuiˇ lo huˉ chehˇ taˍ ve hta‸ ngaˬ maˇ shiˍ. Ngaˬ awˬ gʼuˇ suhˍ kʼaw‸ caˉ kʼai maˇ cawˇ teh‸ nawˬ dawˇ ve kʼo, ngaˬ aˉ hkʼaw lo kʼaw‸ kʼo‸-e tuˬ yoˬ, teh‸ yawˇ hta‸ kʼoˆ piˇ ve yoˬ.

35Ya‸ hkʼaˇ, mvuhˇ naw tcuh yaˇ kʼoˆ ve, Chaw chi teˇ hpaˍ geh kʼai-o. Ya‸ hkʼaˇ, ngaˬ kʼoˆ tcuh laˇ ve hkʼe ceh nawˬ gʼa kʼoˆ ve yoˬ, teh‸ yawˇ hta‸ kʼoˆ piˇ ve yoˬ. Hkʼe te leh Baˍlanˍ yawˇ hui geh kʼai ve yoˬ.

36Baˍlanˍ laˬ chehˇ ve awˬ hkawˇ hta‸ Baˍlehˆ gʼa kaˇ ve teˇ yanˇ, yawˇ lehˬ Baˍlanˍ hta‸ ca ha‸ yuˬ tuˬ, Mawˇbaˆ miˬ tcuhˉ, Aˍnonˍ iˉ kaˆ lawˬ paˇ lo cawˬ ve Aˍraˆ venˇ lo kʼai ve yoˬ.

37Oˇ htaˇ Baˍlehˆ lehˬ, Aˬ hto‸ ma pa taw ngaˬ nawˬ hta‸ awˉ lawˉ peuˇ teˇ pawˆ ca kuˬ tcuh htaˇ ka‸ nawˬ maˇ laˬ ve le. Ngaˬ nawˬ hta‸ la‸ shawnˍ maˇ maˇ piˇ laˇ maˇ gʼa taˬ teh‸ nawˬ dawˇ ve laˇ, teh‸ Baˍlanˍ hta‸ kʼoˆ piˇ ve yoˬ.

38Baˍlanˍ kʼaw‸ yaw hkʼaw‸ leh kʼoˆ ve, Ngaˬ laˬ ve maˇ heˆ laˇ. Ya‸ hkʼaˇ, chi beu‸ ngaˬ geh aˬ hto‸ ma kanˇ paˆ cawˬ ve le. Gʼuiˬsha ngaˬ hta‸ kʼoˆ tcuh laˇ ve hkʼe ceh ngaˬ gʼa kʼoˆ tuˬ yoˬ, teh‸ Baˍlehˆ hta‸ kʼoˆ piˇ ve yoˬ.

39Hkʼe te leh, Baˍlanˍ lehˬ Baˍlehˆ geh teˇ geh Huˇzoˆ venˇ lo kʼai ve yoˬ.

40Baˍlehˆ lehˬ, nuˇ leh yawˬ ehˉ teˇ hpaˍ tiˇ leh, awˬ shaˍ teˇ hpaˍ Baˍlanˍ leh awˬ hoˉ awˬ naˬ teˇ hpaˍ hta‸ piˇ ve yoˬ.

41Shawˉ pawˍ mvuhˇ htiˇ la leh, Baˍlehˆ lehˬ Baˍlanˍ hta‸ shiˍveu leh, Iˉsaˍreˍlaˆ chaw hui deh chehˇ taˍ ve hta‸ nyi mawˬ hpeh‸ ve Baˍmoˆbaˍlaˆ hkʼaw hkʼoˆ lo taˆ-e ve yoˬ.

← Chapter 21 Jump to: Chapter 23 →