Numbers 29

Lahu Bible Edited © Thailand Bible Society and Bible Society of Myanmar, 2010, 2020.

← Chapter 28 Jump to: Chapter 30 →

1Ha pa suhˍ maˬ teˇ maˬ, awˉ lawˉ peuˇ ve teˇ nyi htaˇ nawˬ hui bon lawˬ tuˬ gʼa hpawnˬ da‸ leh, chaw teˇ gʼaˇ ka‸ kanˉ maˇ gʼa te. Oˇ ve teˇ nyi htaˇ, behˬ heh ma teˇ hpaˍ hta‸ gʼa meuˆ ve yoˬ.

2Te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ hkeh, yawˬ paˍ lonˉ teˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ suhˍ hkeh hta‸ yuˬ leh Gʼuiˬsha hta‸ gʼa tuˉ tanˇ piˇ ve yoˬ.

3To nuˇ to shaˆ oˇ ve teˇ hpaˍ geh teˇ geh, awˬ shiˍ awˬ nu tuˉ tanˇ tuˬ hpeh‸ ve shaˍlonˍ chu hkaw‸ taˍ ve caˬ hkʼa meu-e teˇ hpaˍ gʼa tuˉ tanˇ piˇ ve yoˬ. Nuˇ paˍ lonˉ kʼo caˬ hkʼa meu-e shehˆ panˇ, yawˬ paˍlonˉ kʼo caˬ hkʼa meu-e nyiˇ panˇ,

4leh yawˬ ehˉ kʼo caˬ hkʼa meu-e teˇ panˇ gʼa ga hkaw‸ tuˉ tanˇ piˇ ve yoˬ.

5Chi hkʼoˆ ka‸, chaw yaˇ venˇbaˆ ponˬ leh kʼaw‸ da‸ kehˬ la tuˬ, aˉ che‸ awˬ paˍ teˇ hkeh gʼa tuˉ tanˇ piˇ ve yoˬ.

6Teˇ nyi le le tuˉ tanˇ piˇ chehˇ ve tuˉ tanˇ tuˬ teˇ hpaˍ awˬ hkʼoˆ, ha pa chi ve awˉ lawˉ peuˇ teˇ nyi htaˇ, nawˬ hui lehˬ tuˉ tanˇ tuˬ chi teˇ hpaˍ leh a pehˉ meuˇ gʼuiˬ gʼa tuˉ tanˇ piˇ ve yoˬ. Chi hkʼe ve tuˉ tanˇ tuˬ lehˬ, Gʼuiˬsha nyi ma cawˇ ve awˬ shaˉ hawnˉ ve tuˉ tanˇ tuˬ hpeh‸ ve yoˬ.

7Ha pa suhˍ maˬ teˇ maˬ, teˇ chi nyi htaˇ nawˬ hui bon lawˬ tuˬ gʼa hpawnˬ gaˬ la piˇ ve yoˬ. Chaw teˇ gʼaˇ ka‸ caˇ tuˬ maˇ gʼa caˇ. Kanˉ ka‸ maˇ gʼa te.

8Te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ hkeh, yawˬ paˍ lonˉ teˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ suhˍ hkeh Gʼuiˬsha hta‸ gʼa tuˉ tanˇ piˇ ve yoˬ.

9To nuˇ to shaˆ chi ve geh teˇ geh, awˬ shiˍ awˬ nu tuˉ tanˇ tuˬ hpeh‸ ve shaˍlonˍ chu hkaw‸ taˍ ve caˬ hkʼa meu-e teˇ hpaˍ gʼa tuˉ tanˇ piˇ ve yoˬ. Nuˇ paˍ lonˉ teˇ hkeh kʼo caˬ hkʼa meu-e shehˆpanˇ, yawˬ paˍ lonˉ teˇ hkeh kʼo caˬ hkʼa meu-e nyiˇ panˇ,

10leh yawˬ ehˉ teˇ hkeh kʼo caˬ hkʼa meu-e teˇ panˇ gʼa ga hkaw‸ tuˉ tanˇ piˇ ve yoˬ.

11Chi hkʼoˆ ka‸, chaw yaˇ teˇ hpaˍ venˇbaˆ ponˬ leh kʼaw‸ da‸ kehˬ la tuˬ, aˉ che‸ awˬ paˍ teˇ hkeh gʼa tuˉ tanˇ piˇ ve yoˬ. Teˇ nyi le le tuˉ tanˇ piˇ chehˇ ve tuˉ tanˇ tuˬ teˇ hpaˍ awˬ hkʼoˆ, tuˉ tanˇ tuˬ chi teˇ hpaˍ leh a pehˉ meuˇ gʼuiˬ gʼa tuˉ tanˇ piˇ ve yoˬ.

12Ha pa suhˍ maˬ teˇ maˬ, teˇ chi ngaˇ nyi htaˇ, nawˬ hui bon lawˬ tuˬ gʼa hpawnˬ gaˬ la piˇ ve yoˬ. Pawehˇ chi ve hta‸ suhˍ nyi hkʼa gaˬ gʼa te leh, chaw teˇ gʼaˇ ka‸ kanˉ maˇ gʼa te.

13Pawehˇ te ve awˉ lawˉ peuˇ teˇ nyi htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ chi shehˆ hkeh, yawˬ paˍ lonˉ nyiˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh Gʼuiˬsha hta‸ gʼa tuˉ tanˇ piˇ ve yoˬ.

14Ceˇ oˇ ve teˇ hpaˍ geh teˇ geh, awˬ shiˍ awˬ nu tuˉ tanˇ tuˬ hpeh‸ ve shaˍlonˍ chu hkaw‸ taˍ ve caˬ hkʼa meu-e teˇ hpaˍ gʼa tuˉ tanˇ piˇ ve yoˬ. Nuˇ paˍ lonˉ teˇ hkeh kʼo caˬ hkʼa meu-e shehˆ panˇ, yawˬ paˍ lonˉ teˇ hkeh kʼo caˬ hkʼa meu-e nyiˇ panˇ,

15yawˬ ehˉ teˇ hkeh kʼo caˬ hkʼa meu-e teˇ panˇ hta‸ yuˬ leh, a pehˉ meuˇ gʼuiˬ geh teˇ geh gʼa tuˉ tanˇ piˇ ve yoˬ.

16Chi hkʼoˆ ka‸, chaw yaˇ teˇ hpaˍ venˇbaˆ gʼa ponˬ leh kʼaw‸ da‸ kehˬ la tuˬ, aˉ che‸ awˬ paˍ teˇ hkeh gʼa tuˉ tanˇ piˇ ve yoˬ. Teˇ nyi le le tuˉ tanˇ piˇ chehˇ ve tuˉ tanˇ tuˬ teˇ hpaˍ awˬ hkʼoˆ, tuˉ tanˇ tuˬ chi teˇ hpaˍ hta‸ htawˇ awˬ shiˍ awˬ nu tuˉ tanˇ tuˬ leh a pehˉ meuˇ gʼuiˬ geh teˇ geh Gʼuiˬsha hta‸ gʼa tuˉ tanˇ piˇ ve yoˬ.

17Nyiˇ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ chi nyiˇ hkeh, yawˬ paˍ lonˉ nyiˇ hkeh leh, a sha‸ teˇ hkʼaw‸ gaˬ peuˬve yawˬ ehˉ awˬ paˍteˇ chi awˇ hkeh gʼa tuˉ tanˇ piˇ ve yoˬ. Awˉ lawˉ peuˇ ve teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

20Shehˆ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ chi teˇ hkeh, yawˬ paˍ lonˉ nyiˇ hkeh leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh gʼa tuˉ tanˇ piˇ ve yoˬ. Awˉ lawˉ peuˇ ve teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ, gʼa tuˉ tanˇ piˇ ve yoˬ.

23Awˇ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ chi hkeh, yawˬ paˍ lonˉ nyiˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh gʼa tuˉ tanˇ piˇ ve yoˬ. Awˉ lawˉ peuˇ ve teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

26Ngaˇ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ kʼawˇ hkeh, yawˬ paˍ lonˉ nyiˇ hkeh, a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh gʼa tuˉ tanˇ piˇ ve yoˬ. Awˉ lawˉ peuˇ ve teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

29Hkaw‸ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ hinˉ hkeh, yawˬ paˍ lonˉ nyiˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh, gʼa tuˉ tanˇ piˇ ve yoˬ. Awˉ lawˉ peuˇ teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

32Suhˍ nyi teˇ nyi gaˬ htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ suhˍ hkeh, yawˬ paˍ lonˉ nyiˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ teˇ chi awˇ hkeh gʼa tuˉ tanˇ piˇ ve yoˬ. Awˉ lawˉ peuˇ teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

35Hiˉ nyi teˇ nyi gaˬ htaˇ, nawˬ hui lehˬ bon lawˬ tuˬ gʼa hpawnˬ gaˬ la piˇ leh, chaw teˇ gʼaˇ ka‸ kanˉ maˇ gʼa te. Te‸ chiˉ awˬ kuiˉ awˬ haiˇ maˇ cawˬ ve nuˇ paˍ lonˉ teˇ hkeh, yawˬ paˍ lonˉ teˇ hkeh, leh a sha‸ teˇ hkʼaw‸ gaˬ peuˬve yawˬ ehˉ awˬ paˍ suhˍ hkeh Gʼuiˬsha hta‸ gʼa tuˉ tanˇ piˇ ve yoˬ. Awˉ lawˉ peuˇ teˇ nyi hkʼa shuˍ, awˬ nu loˍ ve tuˉ tanˇ tuˬ teˇ hpaˍ hta‸ htawˇ gʼa tuˉ tanˇ piˇ ve yoˬ.

39Chi ve lehˬ, pawehˇ te tuˬ kʼoˆ piˇ taˍ ve awˬ yanˇ gaˬ la htaˇ, Gʼuiˬsha hta‸ tuˉ tanˇ piˇ tuˬ ve aˬ miˍ tuˉ tanˇ tuˬ, awˬ shiˍ awˬ nu tuˉ tanˇ tuˬ, a pehˉ meuˇ gʼuiˬ tuˉ tanˇ tuˬ, leh awˬ chawˇ te da‸ ve tuˉ tanˇ tuˬ teˇ hpaˍ, tuˉ tanˇ piˇ tuˬ ve awˬ liˇ awˬ hkʼaˇ hpeh‸ ve yoˬ. Chi ve awˬ hkʼaw lo, nawˬ hui hkʼaˇ nawˬ hui Gʼuiˬsha hta‸ ka ti‸ te leh tuˉ tanˇ piˇ ve teˇ hpaˍ maˇ lo‸-e sheˍ.

40Moˉseˍ lehˬ, Gʼuiˬsha kʼoˆ ve awˬ ceuˬ chi hkʼa peu-eˬ, Iˉsaˍreˍlaˆ chaw hui hta‸ kʼoˆ maˍ piˇ ve yoˬ.

← Chapter 28 Jump to: Chapter 30 →