Numbers 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Gʼuiˬsha Aˍronˍ hta‸ chi hkʼe kʼoˆ piˇ ve yoˬ. Nawˬ awˬ to, nawˬ ve yaˇ, leh Leˍviˆ chaw teˇ hpaˍ lehˬ, ngaˬ ve bon yehˬ hkʼaw teˇ ceuˬ ceuˬ te ya‸ ve kʼo, ciˍ yanˍ ve hta‸ gʼa hkanˍ tuˬ yoˬ. Ya‸ hkʼaˇ, paw hkuˇ hta‸ tiˉ caˉ da‸ ve kanˉ hta‸ te ya‸ ve kʼo, nawˬ leh nawˬ ve yaˇ teˇ hpaˍ tiˉ gʼa hkanˍ tuˬ yoˬ.

2Nawˬ ve awˬ ceuˬ awˬ hkʼaˇ Leˍviˆ chaw hui hta‸ kuˬ yuˬ leh, bon yehˬ hkʼaw nawˬ hta‸ ga laˇ tcuh-o.

3Yawˇ hui lehˬ nawˬ awˬ pon, bon yehˬ awˬ pon leh loˍ ve kanˉ teˇ hpaˍ hta‸ gʼa ga te ve yoˬ. Ya‸ hkʼaˇ, yawˇ hui lehˬ bon yehˬ hkʼaw cawˬ ve da‸ kehˬ ve mawˇ teˇ hpaˍ hta‸ maˇ gʼa htawˇ. Oˇ hkʼe te ve kʼo, yawˇ hui ka‸ nawˬ hui ka‸ tiˇ pehˍ ve hta‸ gʼa hkanˍ tuˬ yoˬ.

4Yawˇ hui lehˬ, nawˬ hui geh teˇ geh bon yehˬ hkʼaw lo kanˉ gʼa te ve yoˬ. Ya‸ hkʼaˇ, maˇ keunˍ ve chaw teˇ gʼaˇ ka‸ nawˬ hui geh kanˉ maˇ gʼa te.

5Nawˬ leh nawˬ ve yaˇ teˇ hpaˍ ceh tiˉ, da‸ kehˬ ve bawehˇ hkʼaw tuˉ tanˇ kuiˬ lo kanˉ gʼa te ve yoˬ. Oˇ hkʼe te ve kʼo, ngaˬ ve chaw teˇ hpaˍ hta‸ ngaˬ nyi ma kʼaw‸ zuhˆ tuˬ ve maˇ heˆ.

6Iˉsaˍreˍlaˆ chaw teˇ hpaˍ awˬ hkʼaw lo, nawˬ hui hta‸ gʼa ga laˇ tuˬ Leˍviˆ chaw teˇ hpaˍ hta‸ ngaˬ leuˆ yuˬ taˍ peuˬ ve yoˬ. Yawˇ hui lehˬ, ngaˬ ve aˉ po kʼo bon yehˬ hkʼaw kanˉ te tuˬ, ngaˬ hta‸ chiˇ a‸ laˇ taˍ peuˬ ve chaw teˇ hpaˍ hpeh‸ ve yoˬ.

7Ya‸ hkʼaˇ, nawˬ leh nawˬ ve yaˇ teˇ hpaˍ ceh tiˉ paw hkuˇ gʼa te leh, da‸ kehˬ jaˇ ve chehˇ kuiˬ leh tuˉ tanˇ kuiˬ lo kanˉ gʼa te ve yoˬ. Ngaˬ nawˬ hui hta‸ paw hkuˇ hpeh‸ la piˇ taˍ peuˬ ve pa taw, nawˬ hui kanˉ oˇ ve teˇ hpaˍ hta‸ gʼa te ve yoˬ. Da‸ kehˬ ve mawˇ teˇ hpaˍ awˬ paˇ lo laˬ ve chaw hkʼaˬ ve teˇ gʼaˇ maˇ kʼoˆ, tiˇ pehˍ ve hta‸ gʼa hkanˍ tuˬ yoˬ, teh‸ Aˍronˍ hta‸ kʼoˆ piˇ ve yoˬ.

8Gʼuiˬsha Aˍronˍ hta‸ chi hkʼe kʼaw‸ kʼoˆ piˇ ve yoˬ. Aˬ miˍ tuˉ tanˇ piˇ tuˬ maˇ heˆ ve awˬ nu ve tanˇ tuˬ hkʼa peu-eˬ, ngaˬ nawˬ hta‸ piˇ laˇ taˍ peuˬ ve hta‸ dawˇ nawˇ-oˆ. Tanˇ tuˬ oˇ ve teˇ hpaˍ lehˬ, nawˬ leh nawˬ ve awˬ ceuˬ awˬ hkʼaˇ teˇ hpaˍ awˬ pon hpeh‸ ve yoˬ.

9Tuˉ tanˇ kuiˬ hkʼoˆ lo tuˉ tanˇ tuˬ maˇ loˍ ve, awˬ shiˍ awˬ nu tuˉ tanˇ tuˬ, venˇbaˆ hpehˇ ve tanˇ tuˬ, leh Gʼuiˬsha hta‸ kʼaw‸ hkʼaw‸ piˇ ve tanˇ tuˬ chi teˇ hpaˍ lehˬ, nawˬ hui awˬ pon hpeh‸ ve yoˬ. Tanˇ tuˬ chi teˇ hpaˍ lehˬ da‸ kehˬ jaˇ ve yoˬ.

10Nawˬ hui lehˬ, tanˇ tuˬ chi teˇ hpaˍ hta‸ da‸ kehˬ ve chehˇ kuiˬ lo ceh tiˉ gʼa caˇ ve yoˬ. Tanˇ tuˬ chi teˇ hpaˍ hta‸ da‸ kehˬ jaˇ ve awˬ ceuˬ teh‸ shawˍ leh, hawˉ hkʼaˆ paˍ ceh tiˉ gʼa caˇ ve yoˬ.

11Chi hkʼoˆ ka‸, Iˉsaˍreˍlaˆ chaw teˇ hpaˍ ngaˬ hta‸ tanˇ laˇ ve awˬ nu ve tanˇ tuˬ teˇ hpaˍ hta‸ htawˇ, nawˬ hui caˇ hpeh‸ ve yoˬ. Ngaˬ lehˬ tanˇ tuˬ oˇ ve teˇ hpaˍ hta‸ nawˬ awˬ to leh nawˬ ve yaˇ paˍ yaˇmiˇ teˇ hpaˍ hta‸ piˇ laˇ taˍ ve yoˬ. Nawˬ ve yehˬ kʼa hkʼaw a shu yawˇ awˬ to hta‸ da‸ kehˬ tuˬ te taˍ peuˬ ve chaw hkʼa peu-eˬ tanˇ tuˬ oˇ ve hta‸ caˇ hpeh‸ ve yoˬ.

12Awˉ lawˉ peuˇ naw‸ la ve awˬ shiˍ awˬ nu teˇ hpaˍ hkʼaw, Iˉsaˍreˍlaˆ chaw teˇ hpaˍ ngaˬ hta‸ tanˇ laˇ ve shaˍlonˍ chu, a pehˉ meuˇ gʼuiˬ, leh caˬ shiˍ chi teˇ hpaˍ hta‸ htawˇ nawˬ hui caˇ hpeh‸ ve yoˬ.

13Tanˇ tuˬ oˇ ve teˇ hpaˍ lehˬ nawˬ hui ve mawˇ hpeh‸ leh, nawˬ ve yehˬ kʼa hkʼaw a shu yawˇ awˬ to hta‸ da‸ kehˬ tuˬ te taˍ peuˬ ve chaw hkʼa peu-eˬ caˇ hpeh‸ ve yoˬ.

14Iˉsaˍreˍlaˆ chaw teˇ hpaˍ ngaˬ hta‸ hkʼa tanˇ laˇ ve mawˇ hkʼa peu-eˬ hta‸ nawˬ hui caˇ hpeh‸ ve yoˬ.

15Iˉsaˍreˍlaˆ chaw awˬ hkʼaw lo, awˉ lawˉ peuˇ paw la ve yaˇ paˍ uiˍ leh ceˇ teˇ hpaˍ htawˇ nawˬ hui ve mawˇ hpeh‸ ve yoˬ. Ya‸ hkʼaˇ, yaˇ oˇ ve teˇ hpaˍ leh ceˇ oˇ ve teˇ hpaˍ hta‸ shu ca kʼaw‸ vuiˬ hkʼaw‸ la ve kʼo, hpu oˇ ve teˇ hpaˍ hta‸ nawˬ hui gʼa ha‸ yuˬ ve yoˬ.

16A sha‸ teˇ ha pa gaˬ peuˬ ve yaˇ ehˉ hta‸ hpu ngaˇ hteh‸ gʼa kʼaw‸ vuiˬ hkʼaw‸ tcuh ve yoˬ.

17Ya‸ hkʼaˇ, awˉ lawˉ peuˇ paw la ve nuˇ, yawˬ, aˉ che‸ teˇ hpaˍ hta‸ kʼaw‸ vuiˬ hkʼaw‸ tuˬ a hkaw-anˬ maˇ cawˬ. Ceˇ oˇ ve teˇ hpaˍ lehˬ, ngaˬ ve mawˇ hpeh‸ leh ngaˬ hta‸ gʼa tuˉ tanˇ laˇ ve yoˬ. Ceˇ oˇ ve teˇ hpaˍ ve awˬ suhˍ hta‸ yuˬ leh, tuˉ tanˇ kuiˬ hta‸ gʼa hpeh‸ pfuhˍ ve yoˬ. Awˬ chu teˇ hpaˍ hta‸ yuˬ leh, ngaˬ hta‸ gʼa tuˉ tanˇ laˇ ve yoˬ. Chi ve lehˬ, awˬ shaˉ hawnˉ leh ngaˬ nyi ma cawˇ ve tanˇ tuˬ hpeh‸ ve yoˬ.

18Awˬ shaˍ teˇ hpaˍ lehˬ nawˬ hui awˬ pon hpeh‸ ve yoˬ.

19Iˉsaˍreˍlaˆ chaw teˇ hpaˍ ngaˬ hta‸ tanˇ laˇ ve tanˇ tuˬ hkʼa peu-eˬ, nawˬ leh nawˬ ve yaˇ paˍ yaˇ miˇ teˇ hpaˍ hta‸ ngaˬ piˇ laˇ taˍ ve yoˬ. Chi ve lehˬ, nawˬ awˬ to leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ te laˇ taˍ peuˬ ve maˇ luˬ puiˉ ve ka ti‸ hpeh‸ ve yoˬ.

20Nawˬ hui geh te‸ chiˉ mawˇ jeˬ maˇ gʼa cawˬ piˇ. Iˉsaˍreˍlaˆ chaw hui hta‸ piˇ tuˬ ve mvuhˇmiˬ hkʼaw lo, nawˬ hui hta‸ miˬguiˬ pehˬ laˇ tuˬ ve maˇ heˆ. Nawˬ hui loˍ ve awˬ ceuˬ hkʼa peu-eˬ ngaˬ geh cawˬ ve yoˬ, teh‸ Gʼuiˬsha Aˍronˍ hta‸ kʼoˆ piˇ ve yoˬ.

21Gʼuiˬsha kʼoˆ ve, Iˉsaˍreˍlaˆ chaw hui ngaˬ hta‸ tanˇ laˇ ve teˇ chi pun teˇ pun mawˇ jeˬ hkʼa peu-eˬ ngaˬ Leˍviˆ chaw hui hta‸ piˇ taˍ peuˬ ve yoˬ. Awˬ lawn kʼo, yawˇ hui htawˇ bon yehˬ hkʼaw kanˉ te chehˇ ve pa taw yoˬ.

22Iˉsaˍreˍlaˆ chaw teˇ hpaˍ lehˬ, aˉ po kʼo bon yehˬ paˇ lo maˇ gʼa laˬ. Laˬ ve kʼo gʼa suh tuˬ yoˬ.

23Ya‸ nyi hkʼaw‸ nawˉ, Leˍviˆ chaw teˇ hpaˍ lehˬ bon yehˬ hta‸ hkʼa deh‸ gʼa ha‸ shaˉ ve yoˬ. Leˍviˆ chaw teˇ hpaˍ teˇ co peuˬ teˇ co kanˉ chi hta‸ gʼa te ve yoˬ. Yawˇ hui geh te‸ chiˉ mawˇ jeˬ maˇ gʼa cawˬ piˇ.

24Awˬ lawn kʼo, chaw yaˇ teˇ hpaˍ ngaˬ hta‸ tanˇ laˇ ve teˇ chi pun teˇ pun ve mawˇ jeˬ hkʼa peu-eˬ, ngaˬ yawˇ hui hta‸ piˇ taˍ peuˬ ve yoˬ. Chi hta‸ pa taw, yawˇ hui geh te‸ chiˉ mawˇ jeˬ maˇ gʼa cawˬ piˇ tuˬ, ngaˬ kʼoˆ piˇ taˍ peuˬ ve yoˬ, teh‸ Gʼuiˬsha kʼoˆ ve yoˬ.

25Gʼuiˬsha Moˉseˍ hta‸ cuˇ leh Leˍviˆ chaw teˇ hpaˍ hta‸ chi hkʼe kʼoˆ piˇ ve yoˬ.

26Iˉsaˍreˍlaˆ chaw teˇ hpaˍ ngaˬ hta‸ tanˇ laˇ ve teˇ chi pun teˇ pun awˬ hkʼaw lo, nawˬ hui ngaˬ hta‸ teˇ chi pun teˇ pun gʼa kʼaw‸ tanˇ laˇ ve yoˬ.

27Muiˬ caˇ shehˍ hpaˇ teˇ hpaˍ ngaˬ hta‸ caˬ shiˍ leh a pehˉ meuˇ gʼuiˬ teˇ chi pun teˇ pun tanˇ laˇ chehˇ ve hkʼe, nawˬ hui htawˇ gʼa taˍ ve mawˇ teˇ chi pun teˇ pun ngaˬ hta‸ gʼa tanˇ laˇ ve yoˬ.

28Nawˬ hui lehˬ teˇ chi pun teˇ pun tanˇ tuˬ chi teˇ hpaˍ, Aˍronˍ hta‸ gʼa piˇ ve yoˬ.

29Nawˬ hui tanˇ piˇ ve teˇ yanˇ, da‸ jaˇ ve awˬ ceuˬ teˇ hpaˍ ceh tiˉ yuˬ leh tanˇ piˇ-oˆ.

30Nawˬ hui tanˇ piˇ peuˬ ve teˇ yanˇ, cawˬ taˍ ve mawˇ teˇ hpaˍ hta‸ muiˬ caˇ paˍ teˇ hpaˍ a shu yawˇ ve awˬ shiˍ awˬ nu hta‸ ha‸ shaˉ taˍ ve hkʼe, nawˬ hui htawˇ ha‸ shaˉ taˍ hpeh‸ ve yoˬ.

31Mawˇ oˇ ve teˇ hpaˍ hta‸ nawˬ hui leh nawˬ hui ve miˇ yaˇ teˇ hpaˍ caˇ hpeh‸ ve yoˬ. Awˬ lawn kʼo, oˇ ve teˇ hpaˍ lehˬ nawˬ hui bon yehˬ hkʼaw kanˉ te chehˇ ve pa taw, nawˬ hui gʼa keunˍ ve mawˇ teˇ hpaˍ hpeh‸ ve yoˬ.

32Nawˬ hui teˇ chi pun teˇ pun tanˇ peuˬ hkʼaw‸ nawˉ, mawˇ oˇ ve teˇ hpaˍ hta‸ caˇ ve kʼo, te‸ chiˉ venˇbaˆ maˇ cawˬ. Ya‸ hkʼaˇ, teˇ chi pun teˇ pun maˇ tanˇ piˇ sheˍ gʼuˇ suhˍ, mawˇ oˇ ve teˇ hpaˍ hta‸ maˇ gʼa caˇ tuˬ shaˍ ti‸ taˍ-o‸. Nawˬ hui caˇ ve kʼo gʼa suh tuˬ yoˬ, teh‸ Gʼuiˬsha Moˉseˍ hta‸ kʼoˆ piˇ ve yoˬ.

← Chapter 17 Jump to: Chapter 19 →