Numbers 23

Lahu Bible Edited © Thailand Bible Society and Bible Society of Myanmar, 2010, 2020.

← Chapter 22 Jump to: Chapter 24 →

1Oˇ htaˇ Baˍlanˍ lehˬ, Choˬ kaˬ lo ngaˬ awˬ pon tuˉ tanˇ kuiˬ suhˍ maˬ te leh, nuˇ paˍ lonˉ suhˍ hkeh leh yawˬ ehˉ suhˍ hkeh yuˬ veu laˇ-oˆ, teh‸ Baˍlehˆ hta‸ kʼoˆ piˇ ve yoˬ.

2Baˍlehˆ lehˬ yawˇ kʼoˆ ve hkʼe te leh, tuˉ tanˇ kuiˬ teˇ maˬ awˬ hkʼoˆ lo nuˇ teˇ hkeh leh yawˬ ehˉ teˇ hkeh tuˉ tanˇ piˇ ve yoˬ.

3Oˇ hkʼe te peuˬ hkʼaw‸ nawˉ, Baˍlanˍ lehˬ Baˍlehˆ hta‸ chi hkʼe kʼoˆ piˇ ve yoˬ. Nawˬ choˬ kaˬ tuˉ tanˇ kuiˬ paˇ lo huˉ taˍ-o‸. Gʼuiˬsha ngaˬ hta‸ tawˇ yaw laˇ tuˬ leh naˍ, ca na nyi shaˍ. Yawˇ ngaˬ hta‸ kʼoˆ laˇ ve tawˇ hkʼa peu-eˬ ngaˬ nawˬ hta‸ kʼaw‸ kʼoˆ laˇ tuˬ yoˬ, teh‸ Baˍlehˆ hta‸ kʼoˆ piˇ taˉ leh, hkʼaw hkʼoˆ lo taˆ-e ve yoˬ.

4Oˇ kaˬ lo Gʼuiˬsha yawˇ geh laˬ ve yoˬ. Baˍlanˍ kʼoˆ ve, Ngaˬ tuˉ tanˇ kuiˬ suhˍ maˬ te leh, tuˉ tanˇ kuiˬ teˇ maˬ awˬ hkʼoˆ lo nuˇ teˇ hkeh leh yawˬ teˇ hkeh tuˉ tanˇ taˍ peuˬ, teh‸ Gʼuiˬsha hta‸ kʼoˆ piˇ ve yoˬ.

5Gʼuiˬsha lehˬ, Baˍlanˍ hkʼaˬ hkʼe gʼa kʼoˆ tuˬ ve awˬ lawn teˇ hpaˍ kʼoˆ maˍ piˇ peuˬ hkʼaw‸ nawˉ, Baˍlehˆ geh kʼaw‸ kʼo‸-e tcuh ve yoˬ.

6Hkʼe te leh, yawˇ hkʼaw hkʼoˆ lo ya‸-e leh, Baˍlehˆ lehˬ tuˉ tanˇ kuiˬ paˇ lo ceh tiˉ huˉ chehˇ taˍ laˇ ve hta‸ yawˇ gʼa mawˬ ve yoˬ. Mawˇbaˆ chaw awˬ hoˉ awˬ naˬ teˇ hpaˍ htawˇ yawˇ geh chehˇ taˍ ve yoˬ.

7Oˇ htaˇ, Baˍlanˍ chi hkʼe kʼoˆ ve yoˬ. Jawˇmawˇ Baˍlehˆ lehˬ, Iˉsaˍreˍlaˆ chaw hui hta‸ hkeu piˇ tuˬ, Suˇriˆ mvuhˇmiˬ hkʼaw chehˇ taˍ ve ngaˬ hta‸ ca shiˍ la ve yoˬ.

8Gʼuiˬsha maˇ hkeu taˍ ve chaw hta‸ ngaˬ hkʼaˬ hkʼe te hkeu piˇ hpeh‸ tuˬ ve le. Gʼuiˬsha nyi ma maˇ cawˇ ve luˬ ve sheˆ ve tawˇ hta‸ ngaˬ hkʼaˬ hkʼe te yaw hpeh‸ tuˬ le.

9Ngaˬ choˬ kaˬ haˉ hpawˇ hkʼoˆ chehˇ taˍ leh, yawˇ hui hta‸ mawˬ chehˇ ve yoˬ. Chaw oˇ ve teˇ hpaˍ lehˬ, yawˇ hui hkʼaˇ yawˇ hui chehˇ taˍ ve yoˬ. Yawˇ hui lehˬ, awˬ nu ve chaw ceuˬ teˇ hpaˍ a‸ kehˉ awˬ bon gʼa taˍ ve chaw hpeh‸ ve hta‸ shiˍ chehˇ ve yoˬ.

10Iˉsaˍreˍlaˆ ve awˬ ceuˬ awˬ hkʼaˇ teˇ hpaˍ lehˬ, je‸ meu-e hkʼa shuˍ hpeh‸ ve yoˬ. Yawˇ hui lehˬ gʼaw maˇ peuˬ htaˇ hkʼa gaˬ maˇ jaˇ ve yoˬ. Ngaˬ hta‸ ka‸ Gʼuiˬsha ve chaw hkʼe shawˍ laˇ leh, hteˇ ve cawˇ ve chaw hkʼe gawˬ lehˍ ve hkʼaw suh-e tcuh laˇ-oˆ, teh‸ kʼoˆ ve yoˬ.

11Oˇ htaˇ, Baˍlehˆ chi hkʼe kʼoˆ ve yoˬ. Nawˬ hkʼaˬ hkʼe te ve le. Ngaˬ ve canˇ paˍ teˇ hpaˍ hta‸ hkeu piˇ tuˬ ngaˬ nawˬ hta‸ choˬ kaˬ lo shiˍ veu laˇ taˍ ve yoˬ. Ya‸ hkʼaˇ, nawˬ yawˇ hui hta‸ awˬ bon na‸ piˇ chehˇ ve law, teh‸ Baˍlanˍ hta‸ kʼoˆ piˇ ve yoˬ.

12Baˍlanˍ kʼaw‸ yaw hkʼaw‸ leh kʼoˆ ve, Ngaˬ lehˬ Gʼuiˬsha kʼoˆ tcuh laˇ ve tawˇ hta‸ ceh tiˉ kʼoˆ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

13Oˇ ve hkʼaw‸ nawˉ Baˍlehˆ chi hkʼe kʼoˆ ve yoˬ. Laˬ-o‸. Ngaˬ hui Iˉsaˍreˍlaˆ chaw hui hta‸ nyi mawˬ hpeh‸ ve awˬ nu ve chehˇ kuiˬ teˇ kaˬ lo kʼaw‸ kʼai shaˍ. Oˇ kaˬ lo chehˇ taˍ leh yawˇ hui hta‸ teˇ pawˆ kʼaw‸ hkeu piˇ-oˆ, teh‸ Baˍlanˍ hta‸ kʼoˆ piˇ ve yoˬ.

14Hkʼe te leh, yawˇ Baˍlanˍ hta‸ shiˍ veu leh Piˉsaˍgaˍ hkʼaw hkʼoˆ lo cawˬ ve Zawˇhpenˍ miˬ tawˬ kuiˬ lo shiˍ kʼai ve yoˬ. Oˇ kaˬ lo htawˇ tuˉ tanˇ kuiˬ suhˍ maˬ kʼaw‸ te leh, tuˉ tanˇ kuiˬ teˇ maˬ awˬ hkʼoˆ lo nuˇ teˇ hkeh leh yawˬ ehˉ teˇ hkeh tuˉ tanˇ piˇ ve yoˬ.

15Oˇ htaˇ Baˍlanˍ lehˬ, Nawˬ choˬ kaˬ tuˉ tanˇ kuiˬ paˇ lo huˉ taˍ-o‸. Ngaˬ oˇ kaˬ lo Gʼuiˬsha hta‸ ca hpuˇ da‸ shaˍ, teh‸ Baˍlehˆ hta‸ kʼoˆ piˇ ve yoˬ.

16Gʼuiˬsha Baˍlanˍ geh laˬ leh, hkʼaˬ hkʼe gʼa kʼoˆ tuˬ ve awˬ hkʼaˇ beˆ maˍ piˇ peuˬ hkʼaw‸ nawˉ, Baˍlehˆ geh kʼaw‸ kʼo‸-e tcuh ve yoˬ.

17Hkʼe te leh yawˇ Baˍlehˆ geh kʼaw‸ kʼo‸-e leh, yawˇ lehˬ tuˉ tanˇ kuiˬ paˇ lo tiˉ huˉ chehˇ taˍ laˇ ve hta‸ gʼa mawˬ ve yoˬ. Mawˇ baˆ chaw awˬ hoˉ awˬ naˬ teˇ hpaˍ htawˇ, yawˇ geh teˇ geh chehˇ taˍ ve yoˬ. Gʼuiˬsha hkʼaˬ hkʼe kʼoˆ laˇ ve awˬ lawn Baˍlehˆ na nyi htaˇ,

18Baˍlanˍ chi hkʼe kʼoˆ ve yoˬ. Ziˆhpawˇ ve yaˇ Baˍlehˆ-oˬ, cho kaˬ laˬ leh ngaˬ kʼoˆ ve tawˇ hta‸ ca na la-o.

19Gʼuiˬsha lehˬ, chaw yaˇ hkʼa shuˍ heˍ puiˉ ve maˇ heˆ. Yawˇ lehˬ nyi ma pa puiˉ ve chaw yaˇ hkʼe maˇ heˆ. Yawˇ ka ti‸ te taˍ ve hkʼa shuˍ, hteˇ lehˍ te ve yoˬ. Yawˇ kʼoˆ ve teˇ hpaˍ hpeh‸ la ve yoˬ.

20Yawˇ hui hta‸ bon na‸ piˇ tuˬ, yawˇ ngaˬ hta‸ kʼoˆ laˇ ve yoˬ. Gʼuiˬsha bon na‸ piˇ taˍ peuˬ ve hta‸ ngaˬ kʼaw‸ yuˬ hkʼaw‸ tuˬ te maˇ gʼa.

21Awˬ gʼuˇ suhˍ hpawˇ Iˉsaˍreˍlaˆ chaw hui hkʼaˬ hkʼe hpeh‸ la tuˬ ve hta‸ ngaˬ mawˬ taˍ peuˬ ve yoˬ. Kawˆ tuˬ dawˇ haˍ tuˬ teˇ hpaˍ yawˇ hui awˬ hkʼoˆ lo gaˬ la tuˬ ve maˇ heˆ. Yawˇ hui ve Gʼuiˬsha yawˇ hui geh chehˇ taˍ leh, yawˇ hta‸ yawˇ hui ve Jawˇmawˇ teh‸ kʼoˆ chehˇ ve yoˬ.

22Gʼuiˬsha lehˬ, yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ. Heh nuˇ hkʼa shuˍ, yawˇ lehˬ yawˇ hui awˬ pon ma‸ bawˆ piˇ chehˇ ve yoˬ.

23Iˉsaˍreˍlaˆ chaw hui hta‸ neˇ pi pfuhˍ piˇ tuˬ maˇ kʼoˆ, hpehˇ pfuhˍ piˇ tuˬ maˇ kʼoˆ, ca te maˇ gʼa. Gʼuiˬsha te piˇ taˍ peuˬ ve kanˉ hta‸ nyi sheˍ teh‸ chi beu‸ chaw yaˇ teˇ hpaˍ kʼoˆ da‸ chehˇ tuˬ yoˬ.

24Iˉsaˍreˍlaˆ chaw teˇ hpaˍ lehˬ, awˬ gʼaˇ uiˍ jaˇ ve laˇ caˬ shiˉ hkʼe hpeh‸ ve yoˬ. Yawˇ che‸ pehˍ taˍ ve awˬ ceuˬ hta‸ maˇ gʼa tzuh‸ suhˍ leh awˬ suhˍ hta‸ maˇ gʼa dawˬ sheˍ ve ceh ceh, yawˇ ta‸ iˉ chehˇ tuˬ ve maˇ heˆ, teh‸ kʼoˆ ve yoˬ.

25Oˇ htaˇ Baˍlehˆ lehˬ, Nawˬ Iˉsaˍreˍlaˆ chaw hui hta‸ maˇ hkeu piˇ ve htawˇ, yawˇ hui hta‸ awˬ bon taˇ na‸ piˇ-oˆ, teh‸ Baˍlanˍ hta‸ kʼoˆ piˇ ve yoˬ.

26Baˍlanˍ kʼaw‸ yaw hkʼaw‸ leh kʼoˆ ve, Gʼuiˬsha ngaˬ hta‸ kʼoˆ tcuh laˇ ve hkʼe ceh ngaˬ gʼa kʼoˆ tuˬ yoˬ, teh‸ nawˬ hta‸ kʼoˆ piˇ taˍ peuˬ ve maˇ heˆ laˇ, teh‸ Baˍlehˆ hta‸ kʼoˆ piˇ ve yoˬ.

27Oˇ ve hkʼaw‸ nawˉ, Baˍlehˆ chi hkʼe kʼaw‸ kʼoˆ ve yoˬ. Laˬ-o‸. Ngaˬ hui awˬ gʼuˇ suhˍ teˇ kaˬ lo kʼaw‸ kʼai shaˍ. Oˇ kaˬ lo Gʼuiˬsha nawˬ hta‸ hkeu ve tawˇ yaw tcuh tuˬ leh naˍ maˇ shiˍ, teh‸ Baˍlanˍ hta‸ kʼoˆ piˇ ve yoˬ.

28Hkʼe te leh, Baˍlehˆ yawˇ hta‸ heh puiˉ hkʼaw hpawˇ lo cawˬ ve Peˍawˇ hkʼaw hkʼoˆ lo shiˍ kʼai ve yoˬ.

29Oˇ htaˇ Baˍlanˍ kʼoˆ ve, Choˬ kaˬlo ngaˬ awˬ pon tuˉ tanˇ kuiˬ suhˍ maˬ kʼaw‸ te leh nuˇ paˍ lonˉ suhˍ hkeh leh yawˬ ehˉ suhˍ hkeh yuˬ veu laˇ-oˆ, teh‸ Baˍlehˆ hta‸ kʼoˆ piˇ ve yoˬ.

30Baˍlehˆ lehˬ yawˇ kʼoˆ ve hkʼe te leh, tuˉ tanˇ kuiˬ teˇ maˬ awˬ hkʼoˆ lo nuˇ teˇ hkeh leh yawˬ ehˉ teˇ hkeh tuˉ tanˇ piˇ ve yoˬ.

← Chapter 22 Jump to: Chapter 24 →