Numbers 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to: Chapter 29 →

1Gʼuiˬsha lehˬ, yawˇ nyi ma cawˇ ve tuˉ tanˇ tuˬ teˇ hpaˍ yawˇ hta‸ awˬ yanˇ cawˇ cawˇ tuˉ tanˇ laˇ tuˬ,

2Moˉseˍ hta‸ cuˇ leh Iˉsaˍreˍlaˆ chaw hui hta‸ kʼoˆ maˍ piˇ ve yoˬ.

3Chi ve lehˬ, Gʼuiˬsha hta‸ gʼa tuˉ tanˇ piˇ tuˬ ve tuˉ tanˇ tuˬ teˇ hpaˍ hpeh‸ ve yoˬ. Te‸ chiˉ awˬ kuiˉ awˬ haiˇ maˇ cawˬ ve a sha‸ teˇ hkʼaw‸ gaˬ peuˬ ve yawˬ awˬ paˍ nyiˇ hkeh hta‸ yuˬ leh, teˇ nyi le le Gʼuiˬsha hta‸ aˬ miˍ gʼa tuˉ tanˇ piˇ ve yoˬ.

4Awˉ lawˉ peuˇ ve teˇ hkeh hta‸ mvuhˇ shawˉ hpawˇ gʼa tuˉ tanˇ piˇ leh, awˬ nu ve teˇ hkeh hta‸ mvuhˇ hpeu‸ hpawˇ gʼa tuˉ tanˇ piˇ ve yoˬ.

5Yawˬ ehˉ geh teˇ geh, shaˍlonˍ chu teˇ kaw hkaw‸ da‸ taˍ ve caˬ hkʼa meu-e teˇ panˇ yuˬ leh gʼa tuˉ tanˇ piˇ ve yoˬ.

6Chi ve lehˬ, Siˉnaˆ hkʼaw hkʼoˆ lo awˉ lawˉ peuˇ teˇ pawˆ Gʼuiˬsha hta‸ tuˉ tanˇ piˇ ve awˬ shaˉ hawnˉ ve tuˉ tanˇ tuˬ hpeh‸ leh, teˇ nyi le le chi hkʼe gʼa tuˉ tanˇ piˇ ve yoˬ.

7Yawˬ ehˉ hta‸ tuˉ tanˇ piˇ chehˇ htaˇ, a pehˉ meuˇ gʼuiˬ teˇ kaw hta‸ htawˇ yuˬ leh tuˉ tanˇ kuiˬ hkʼoˆ lo gʼa ngeuˍ pfuhˍ ve yoˬ.

8Mvuhˇ hpeu‸ hpawˇ gaˬ la ve teˇ yanˇ, mvuhˇ shawˉ hpawˇ te ve hkʼe yawˬ ehˉ hta‸ yuˬ leh, a pehˉ meuˇ gʼuiˬ geh teˇ geh Gʼuiˬsha hta‸ gʼa kʼaw‸ tuˉ tanˇ piˇ ve yoˬ. Chi ve lehˬ, Gʼuiˬsha nyi ma cawˇ ve awˬ shaˉ hawnˉ ve tuˉ tanˇ tuˬ hpeh‸ ve yoˬ.

9Shinˉ nyi gaˬ ve teˇ yanˇ, te‸ chiˉ awˬ kuiˉ awˬ haiˇ maˇ cawˬ ve a sha‸ teˇ hkʼaw‸ gaˬ peuˬ ve yawˬ ehˉ nyiˇ hkeh hta‸ yuˬ leh, shaˍlonˍ chu hkaw‸ taˍ ve caˬ hkʼa meu-e nyiˇ panˇ leh, a pehˉ meuˇ gʼuiˬ geh teˇ geh Gʼuiˬsha hta‸ gʼa tuˉ tanˇ piˇ ve yoˬ.

10Teˇ nyi le le awˬ yanˇ cawˇ cawˇ tuˉ tanˇ piˇ chehˇ ve tanˇ tuˬ awˬ hkʼoˆ, shinˉ nyi gaˬ ve teˇ yanˇ, yawˬ ehˉ oˇ ve nyiˇ hkeh hta‸ htawˇ gʼa kʼaw‸ tuˉ tanˇ piˇ ve yoˬ.

11Ha pa awˉ lawˉ peuˇ ve teˇ nyi gaˬ ve teˇ pawˆ le le, te‸ chiˉ awˬ kuiˉ awˬ haiˇ maˇ cawˬ ve nuˇ paˍ lonˉ nyiˇ hkeh, yawˬ paˍ lonˉ teˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ awˬ paˍ suhˍ hkeh yuˬ leh Gʼuiˬsha hta‸ gʼa tuˉ tanˇ piˇ ve yoˬ.

12Awˬ shiˍ awˬ nu tuˉ tanˇ tuˬ awˬ pon, shaˍlonˍ chu hkaw‸ taˍ ve caˬ hkʼa meu-e shehˆ panˇ, yawˬ paˍ lonˉ kʼo caˬ hkʼa meu-e nyiˇ panˇ,

13leh yawˬ ehˉ teˇ hkeh kʼo caˬ hkʼa meu-e teˇ panˇ gʼa ga hkaw‸ tuˉ tanˇ piˇ ve yoˬ. Chi ve lehˬ, Gʼuiˬsha nyi ma cawˇ ve awˬ shaˉ hawnˉ ve tuˉ tanˇ tuˬ hpeh‸ ve yoˬ.

14A pehˉ meuˇ gʼuiˬ tuˉ tanˇ piˇ ve teˇ yanˇ, nuˇ paˍ lonˉ teˇ hkeh kʼo, a pehˉ meuˇ gʼuiˬ nyiˇ kaw, yawˬ paˍ lonˉ kʼo, a pehˉ meuˇ gʼuiˬ teˇ kaw, leh yawˬ ehˉ kʼo, a pehˉ meuˇ gʼuiˬ teˇ kaw gʼa ga hkaw‸ tuˉ tanˇ piˇ ve yoˬ. Chi ve lehˬ, ha pa awˉ lawˉ peuˇ ve teˇ nyi gaˬ ve teˇ pawˆ le le, Gʼuiˬsha hta‸ tuˉ tanˇ piˇ tuˬ ve awˬ liˇ awˬ hkʼaˇ hpeh‸ ve yoˬ.

15Teˇ nyi le le awˬ yanˇ cawˇ cawˇ tuˉ tanˇ tuˬ leh a pehˉ meuˇ gʼuiˬ tuˉ tanˇ tuˬ awˬ hkʼoˆ, venˇbaˆ hpehˇ ve tuˉ tanˇ tuˬ awˬ pon aˉ che‸ awˬ paˍ teˇ hkeh hta‸ htawˇ yuˬ leh gʼa tuˉ tanˇ piˇ ve yoˬ.

16Gʼuiˬsha hta‸ taˍ uiˍ taˍ mvuh piˇ ve Paˍsaˍhkaˍ pawehˇ chi ve hta‸, ha pa awˉ lawˉ peuˇ teˇ maˬ teˇ chi awˇ nyi htaˇ gʼa tanˬ te ve yoˬ.

17Teˇ chi ngaˇ nyi teˇ nyi gaˬ htaˇ, nawˬ hui lehˬ diˇ maˇ keu ve hkaoˍmonˇ hta‸ ceh tiˉ gʼa caˇ leh, suhˍ nyi hkʼa gaˬ bon pawehˇ lonˉ chi hta‸ gʼa te ve yoˬ.

18Awˉ lawˉ peuˇ ve teˇ nyi htaˇ, nawˬ hui lehˬ bon lawˬ kuiˬ lo gʼa kʼai leh chaw teˇ gʼaˇ ka‸ kanˉ maˇ gʼa te.

19Te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ nyiˇ hkeh, yawˬ paˍ lonˉ teˇ hkeh leh a sha‸ teˇ hkʼaw‸ gaˬ peuˬ ve yawˬ ehˉ suhˍ hkeh hta‸ yuˬ leh, Gʼuiˬsha hta‸ gʼa tuˉ tanˇ piˇ ve yoˬ.

20To nuˇ to shaˆ oˇ ve teˇ hpaˍ geh teˇ geh, awˬ shiˍ awˬ nu tuˉ tanˇ tuˬ hpeh‸ ve shaˍlonˍ chu hkaw‸ taˍ ve caˬ hkʼa meu-e teˇ hpaˍ gʼa tuˉ tanˇ piˇ ve yoˬ. Nuˇ paˍ lonˉ teˇ hkeh kʼo, caˬ hkʼa meu-e shehˆ panˇ,

21yawˬ paˍ lonˉ teˇ hkeh kʼo, caˬ hkʼa meu-e nyiˇ panˇ leh yawˬ ehˉ teˇ hkeh kʼo, caˬ hkʼa meu-e teˇ panˇ gʼa ga hkaw‸ tuˉ tanˇ ve yoˬ.

22Chi hkʼoˆ ka‸ chaw yaˇ teˇ hpaˍ venˇbaˆ ponˬ leh, kʼaw‸ da‸ kehˬ la tuˬ, aˉ che‸ awˬ paˍ teˇ hkeh gʼa tuˉ tanˇ ve yoˬ.

23Teˇ nyi le le tuˉ tanˇpiˇ chehˇ ve tuˉ tanˇ tuˬ awˬ hkʼoˆ, tuˉ tanˇ tuˬchi teˇ hpaˍ hta‸ ka‸ gʼa tuˉ tanˇ piˇ ve yoˬ.

24Suhˍ nyi hkʼa gaˬ nawˬ hui chi hkʼe gʼa te ve yoˬ. Chi hkʼe ve tanˇ tuˬ lehˬ, yawˇ nyi ma cawˇ ve awˬ shaˉ hawnˉ ve tuˉ tanˇ tuˬ hpeh‸ ve yoˬ.

25Suhˍ nyi teˇ nyi gaˬ htaˇ, nawˬ hui bon lawˬ kuiˬ lo gʼa kʼai leh, chaw teˇ gʼaˇ ka‸ kanˉ maˇ gʼa te.

26Caˬ gʼeu‸ htaˇ te ve pawehˇ awˉ lawˉ peuˇ teˇ nyi htaˇ, nawˬ hui lehˬ awˬ shiˍ awˬ nu awˬ suhˉ teˇ hpaˍ Gʼuiˬsha geh gʼa yuˬ laˬ leh, bon gʼa lawˬ ve yoˬ. Chaw teˇ gʼaˇ ka‸ kanˉ maˇ gʼa te.

27Te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ nyiˇ hkeh, yawˬ paˍ lonˉ teˇ hkeh, leh a sha‸ teˇ hkʼaw‸ gaˬ peuˬ ve yawˬ ehˉ suhˍ hkeh Gʼuiˬsha hta‸ gʼa tuˉ tanˇ piˇ ve yoˬ.

28To nuˇ to shaˆ oˇ ve teˇ hpaˍ geh teˇ geh awˬ shiˍ awˬ nu tuˉ tanˇ tuˬ hpeh‸ ve shaˍlonˍ chu hkaw‸ taˍ ve caˬ hkʼa meu-e teˇ hpaˍ gʼa tuˉ tanˇ ve yoˬ. Nuˇ paˍ lonˉ teˇ hkeh kʼo caˬ hkʼa meu-e shehˆ panˇ, yawˬ paˍ lonˉ teˇ hkeh kʼo caˬ hkʼa meu-e nyiˇ panˇ,

29leh yawˬ ehˉ teˇ hkeh kʼo caˬ hkʼa meu-e teˇ panˇ, gʼa ga hkaw‸ tuˉ tanˇ ve yoˬ.

30Chaw yaˇ teˇ hpaˍ venˇbaˆ gʼa ponˬ leh kʼaw‸ da‸ kehˬ la tuˬ, aˉ che‸ awˬ paˍ teˇ hkeh gʼa tuˉ tanˇ ve yoˬ.

31Teˇ nyi le le tuˉ tanˇ piˇ chehˇ ve tuˉ tanˇ tuˬ teˇ hpaˍ awˬ hkʼoˆ, tuˉ tanˇ tuˬ chi teˇ hpaˍ leh, a pehˉ meuˇ gʼuiˬ teˇ hpaˍ gʼa tuˉ tanˇ piˇ ve yoˬ.

← Chapter 27 Jump to: Chapter 29 →