1 Samuel 13

Malagasy (Baiboly Protestanta Malagasy 2011)

← Chapter 12 Jump to: Chapter 14 →

1Telopolo taona i Saoly raha nanomboka nanjaka; ary roa taona no nanjakany tamin’ny Israely.

2Nifantina telo arivo lahy tamin’ny Israely i Saoly, koa ny roa arivo lahy dia niaraka taminy tany Mikmasy sy tany amin’ny tendrombohitr’i Betela, ary ny arivo lahy niaraka tamin’i Jonatana tany Gibean’i Benjamina; ny olona sisa kosa samy nalefany hody any an-dainy avy.

3Dia namely ny miaramilan’ny Filistina izay tany Geba i Jonatana ka ren’ny Filistina izany. Ary nampitsoka anjomara teny amin’ny tany rehetra i Saoly ka niteny hoe: Aoka handre ny Hebreo!

4Dia ren’ny Israely rehetra fa namely ny miaramilan’ny Filistina i Saoly, hany ka halan’ny Filistina ny Israely. Dia nivory hanaraka an’i Saoly ho any Gilgala ny olona.

5Filistina telo alina an-kalesy fitondra miady sy enina arivo an-tsoavaly ary vahoaka betsaka tahaka ny fasika eny amoron-dranomasina no nivory hiady tamin’ny Israely; ary nandeha izy ireo ka nitoby tany Mikmasy, any atsinanan’i Bety-Avena.

6Nony hitan’ny lehilahin’ny Israely fa latsaka an-katerena izy, satria nijaly mafy ny olona, dia niery tany amin’ny zohy sy tany amin’ny kirihitrala, tany amin’ny harambato sy tany amin’ny fierena ary tany amin’ny lavaka famorian-drano izy ireo.

7Ny Hebreo sasany kosa dia lasa nita an’i Jordana nankany amin’ny tanin’i Gada sy i Gileada. Fa mbola tany Gilgala ihany i Saoly ary ny vahoaka rehetra dia nanaraka azy sady toran-kovitra be ihany.

8Dia niandry hafitoana izy araka ny fotoana nomen’i Samoela; nefa tsy mbola tonga tany Gilgala ihany i Samoela ka niely ny olona.

9Ary hoy i Saoly: Ento etỳ amiko ny fanatitra dorana manontolo sy ny fanati-pihavanana; dia nanolotra ny fanatitra dorana manontolo izy.

10Rehefa vita ny fanolorany ny fanatitra dorana manontolo dia indro, tamy i Samoela, ary nivoaka hitsena azy i Saoly mba hiarahaba azy.

11Dia hoy i Samoela: Inona no nataonao? Hoy i Saoly: Raha hitako fa niely nandao ahy ny olona sady tsy tonga tamin’ny fotoana ianao ary efa tafangona tany Mikmasy ny Filistina,

12dia hoy aho: Hidina amin’izao ny Filistina hamely ahy atỳ Gilgala nefa tsy mbola nanao fifonana tamin’NY TOMPO aho, dia nahatsiaro voatery nanolotra ny fanatitra dorana manontolo aho.

13Hoy i Samoela tamin’i Saoly: Nanao hadalana ianao; tsy nitandrina ny didin’NY TOMPO Andriamanitrao izay nandidiany anao ianao; fa raha tsy nanao izany ianao dia ho nampitoetra ny fanjakanao ho mandrakizay eo amin’ny Israely NY TOMPO.

14Koa izao dia tsy haharitra ny fanjakanao; NY TOMPO efa nitady lehilahy ho Azy araka ny fony, ary izy no voatendrin’NY TOMPO ho mpanapaka ny olony, satria tsy nitandrina izay nandidian’NY TOMPO anao ianao.

15Dia nitsangana i Samoela ka niakatra avy tany Gilgala hankany Gibean’i Benjamina. Ary nandamina ny olona izay teo aminy i Saoly, tokony ho eninjato lahy izy ireo.

16Raha mbola nitoetra tany Gibean’i Benjamina i Saoly sy i Jonatana zanany ary ny vahoaka teo amin’izy roa lahy dia nitoby tany Mikmasy kosa ny Filistina.

17Dia nivoaka avy teo amin’ny tobin’ny Filistina ny mpandrava ka nizara ho antoko telo: Ny antoko iray dia nizotra tamin’ny lalana mankany Ofra ho any amin’ny tany Sohala;

18ny iray dia nizotra ho any amin’ny lalana mankany Bety-Horona; ary ny iray kosa dia nizotra ho any amin’ny lalana mankany amin’ny sisintany manatrika ny lohasaha Zeboima tandrifin’ny tany efitra.

19Ary teny amin’ny tanin’ny Israely rehetra dia tsy nisy mpanefy; satria hoy ny Filistina: Mba tsy hanefy sabatra na lefona anie ny Hebreo!

20Dia samy nidina ho any amin’ny Filistina ny Israely rehetra mba handranitra ny angadiny, ny fiasàny vy, ny famakiny ary ny lelan’angadinombiny.

21Ny saran’ny fandranitany ny angady, ny fiasana vy, ny telorantsana, ny famaky ary ny fanitsiana ny fanindronan’omby dia roa ampahatelon’ny sekela.

22Koa tamin’ny fotoana niadiana dia tsy nisy sabatra na lefona hita teny an-tanan’ny vahoaka rehetra izay niaraka tamin’i Saoly sy i Jonatana; fa i Saoly sy i Jonatana zanany ihany no nanana.

23Ary nisy andia-miaramilan’ny Filistina nivoaka ho ao amin’ny hadilanana mankany Mikmasy.

← Chapter 12 Jump to: Chapter 14 →