bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Samuel 16
1 Samuel 16
Quechuan QXO (Biblia en Quechua del sur de Conchucos)
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 17 →
1
Tsaypitanam Samuelta Tayta Dios nirqan: «¿Imayyaqtä Saúlpä llakikur waqanki? Payqa manam Israel runakunapa mandaqnin rey kanqanatsu. Waqanaykipa rantinqa carnërupa waqranchö aceitita apakurkur Belénchö Isaíman ayway. Paypa juk tsurintam rey kananpä akrarqü».
2
Tsaynö niptinmi Samuel nirqan: «¡Kananqa! ¿Imatatä rurashä? ¡Juk reyta churanäpä aywanqäta musyaykurqa Saúl wanutsimanqam!» Tsaynö niptinmi Tayta Dios nirqan: «Juk ternërata qatirkur ayway. Pipis tapushuptikiqa: «Tayta Diospä sacrificiuta rupatsiqmi aywaykä» ninki.
3
Chaykur Isaíta pushanki sacrificiuta rupatsinaykipä kaqman. Tsaychömi mayqan tsurintapis rey kananpä akranqäta rikatsiptï umanman aceitita wiñanki».
4
Tsaymi Tayta Dios ninqannölla Belén markaman Samuel aywarqan. Belénman chaykuptinmi mayor runakuna payta chaskiyänanpä yarqamur mantsakashqa tapuyarqan: «¿Taytay, imaqtä shamurquyki?»
5
Tsaynö niptinmi Samuel nirqan: «Tayta Diosta adoraqmi shamurqü. Qamkunapis purificakuskir shäyämuy sacrificiuta rupatsinantsikpä». Tsaynö nirmi Isaíta y tsurinkunata yakuwan purificaskir sacrificiuta rupaykätsinqanman aywayänanpä nirqan.
6
Chaykuyaptinnam Isaípa tsurin Eliabta rikaykur shonqullanchö Samuel nirqan: «Paytam Tayta Dios akrashqa kanqa rey kananpä».
7
Tsaymi Tayta Dios nirqan: «Buen mözu kanqanpita y jatun kanqanpita akranqäta ama yarpaytsu. Manam paytatsu akrarqü. Buen mözu kanqanpita alli runa kanqanta runakuna yarpäyaptinpis noqaqa manam buen mözu kanqanpitatsu pitapis akrä, sinöqa alli shonquyuq kanqanpitam».
8
Tsaypitam tsurin Abinadabta Samuelpa puntanman Isaí pusharqan. Payta rikaykurmi Samuel nirqan: «Paytapis Tayta Dios manam akrashqatsu».
9
Tsaynö niptinmi tsurin Samatana Isaí pusharqan. Tsaymi Samuel nirqan: «Paytapis manam Tayta Dios akrashqatsu».
10
Tsaynöllam qanchis tsurinkunata Isaí pusharqan. Paykunata rikaykurmi Samuel nirqan: «Pushamunqayki tsurikikunata manam mayqantapis Tayta Dios akrashqatsu».
11
Tsaymi Samuel tapurqan: «¿Tsayllaku llapan tsurikikuna?» Isaínam nirqan: «Taytay, ñuñush kaq tsurillänam üshata mitsikuykan». Samuelnam nirqan: «Payta ras qayatsimuy. Pay manarä chämuptinqa manam mikushunrätsu».
12
Tsaynö niptinmi ñuñush tsurin Davidta Isaí qayatsirqan. Tsay jövinqa kuyayllapämi karqan. Chaykuptinmi Samuelta Tayta Dios nirqan: «Paytam akrarqü. Rey kananpä umanman aceitita wiñay».
13
Tsaymi rey kananpä wawqinkunapa puntanchö Davidpa umanman aceitita Samuel wiñarqan. Tsaypitanam Tayta Diospa Espïritun Davidta shumaq yanaparqan. Tsaypitanam Samuelqa Ramá markaman kutikurqan.
14
Tsay witsanmi Tayta Diospa Espïritun Saúlpita yarqushqa karqan. Tsaymi juk supayta Tayta Dios mandaptin Saúlqa pasaypa löcuyar purirqan.
15
Tsaymi yanapaqnin runakuna Saúlta niyarqan: «Taytay, Tayta Dios mandamunqan supaymi löcuyaykätsishunki.
16
¿Alliku kanman pillatapis arpa tukaqta ashiyämuptï? Paymi Tayta Dios mandamunqan supay löcuyaykätsishuptiki tukapäshunki. Tsaynöpam löcuyanqaykipita allinki».
17
Tsaymi yanapaqnin runakunata Saúl nirqan: «Tsaynö kaptinqa ras aywar alli tukaqta pushayämuy».
18
Tsaynö niptinmi juk yanapaqnin nirqan: «Belén markachö Isaípa tsurintam arpata shumaq tukaqta rikarqü. Tsay jövinqa pelyaytapis manam mantsantsu. Imatapis manam llutallaqa parlantsu y buen mözum. Paytaqa Tayta Diosmi yanapan».
19
Tsaynö niptinmi Isaíman mandar Saúl nirqan: «Isaíta niyay üsha mitsiq tsurin Davidta mandamunanpä».
20
Tsaymi Isaíqa tsurin Davidta Saúl kaqman mandarqan juk cabrata jancharkatsir, vïnu puritsikunan qaraman vïnuta wiñaparkur y tantata ashnuman chaqnaparkur.
21
Tsaynöpam Saúl kaqman David chaykur mandanqanta rurarqan. Saúlmi Davidta kuyarnin arman puritsiq kananpä churarqan.
22
Tsaymi Isaíta niyänanpä mandarqan: «Tsuriki Davidqa shonqunpänöshi. Tsayshi qamta rugakamushunki jaqipaykunaykipä».
23
Tsaynöllam Tayta Dios mandamunqan supay Saúlta löcuyätsiptin arpanta David tukapaq. Tukapaptinmi Saúl alliskir tranquïluna kakuq.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31