1 Samuel 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Benjamín trïbupitam respitashqa juk runa Cis jutiyuq karqan. Cispa papäninmi Abiel y Abielpa papäninmi Zeror karqan. Zerorpa papäninmi Becorat y Becoratpa papäninnam Afía karqan.

2Cispa tsurin Saúlmi kuyayllapä jövin karqan. Paynö kuyayllapäqa Israel runakunachö manam pipis karqantsu. Jatun kaptinmi wakin runakuna umrullanman chäyaq.

3Juk kutichö Cispa ashnunkuna oqrakaskiptinmi tsurin Saúlta nirqan: «Juk sirvimaqnintsikta pushakurkur ashnuntsikkuna ashiq ayway».

4Tsaymi ashnunkuna ashiq Saúl aywarqan. Efraín jallqakunapa ashirmi Salisa ninqan jallqaman chäyarqan. Tsaychöpis mana tarirmi Saalim partipa y Benjamín trïbu runakuna täyanqan partipapis ashiyarqan. Tsaychöpis manam tariyarqantsu.

5Zuf partiman chaykurmi sirviqninta nirqan: «Kaypitaqa kutikushunna. Ashnukunapä llakikunanpa rantinqa noqantsikpänachi papänïqa llakikuykan».

6Tsaynö niptinmi sirviqnin nirqan: «Kay markachö kanmi Tayta Diospa profëtan. Imapis päsananpä niptinqa ninqannöllam päsan. Tsaymi pïmaypis payta respitayan. Tapukushqaqa capazchi nimäshun maypa ashiq aywanantsikpäpis».

7Tsaynö niptinmi Saúl nirqan: «Tsaynö kaptinqa aku aywashun. Peru millkapantsikpä apamunqantsik tantapis ushakaykaptinnaqa ¿imallantsikwanrä payman chäshun?»

8Tsaymi sirviqnin nirqan: «Taksha yuraq qellaytam tsararaykä. Tsaytachi pägashun maypa ashiq aywanapäpis willamänantsikpä».

9(Unayqa profëtapämi Israel runakuna willakuq niyaq. Tsaymi imapis kaptin Tayta Diosta tapukuyta munarqa «willamänantsikpä willakuqman aywashun» niyaq.)

10Tsaymi sirviqninta Saúl nirqan: «Pay kaqman ras aywashun». Tsaynö nirmi Tayta Diospa profëtan kaqman aywayarqan.

11Markaman witsaykarmi yakukuq aywaykaq jipashkunawan tinkuyarqan. Tsaymi paykunata tapukur niyarqan: «¿Tsaychötsurä profëta kaykan?»

12Jipashkunanam niyarqan: «¡Awmi! Tsayrämi chämushqa. Peru ras aywayay. Sacrificiuta rurananpämi runakuna qayatsiyashqa. Altar kaqman witsänanpänam kaykan.

13Tsaychömi llapan runakunawan sacrificiuta mikuyanqa. Manarä mikuq aywaptin ras ashiyay. Pay manarä chaptinqa manam runakuna mikuyanqarätsu. Payrämi runakuna mikuyänanpä Tayta Diosta mañakunqa. Ras aywarqa manarä yarquqtam tariyanki».

14Tsaynö niyaptinmi markaman empëñu witsar Samuelwan tinkuyarqan. Payqa altarman mikuqnam aywaykarqan.

15Tsay markaman Saúl chänanpä juk junaq faltaykaptinmi Samuelta Tayta Dios ninä:

16«Israel runakuna pasaypa ñakayanqanta rikarmi mandaqnin rey kananpä mañakayämanqanta awnirqü. Tsaymi waray junaq kaynö höra qam kaqman Benjamín trïbu runa chämunqa. Paypa umanman aceitita wiñanki kuyanqä Israel runakunapa mandaqnin rey kananpä. Paymi Israel runakunata salvanqa filisteo runakunapa poderninchö ñakayanqanpita».

17Saúl chaykuptinmi Samuelta Tayta Dios nirqan: «Taqay runa rey kananpämi qamta nirqä. Paymi Israel nacionpa mandaqnin rey kanqa».

18Tsay höram tsay marka yaykunachö Samuel kaqman witiykur Saúl nirqan: «Taytay, tapukulläshayki. ¿Maychötä profëtapa wayin?»

19Tsaynö niptinmi Samuel nirqan: «Ashiykanqayki profëta noqam kä. Kananqa altar kaqman mikuq aywashun. Waray wäraynam llapan tapukamanqaykita willaykuptï aywakunki.

20Kimsa junaqna ashiyanqayki ashnuykikunapä amana llakikuyaynatsu. Tsay ashnuykikunataqa tariyashqanam. Peru kanan jukta willashayki. Kananpitaqa Israel runakunapa llapan imaykankunapis qampä y castaykikunapänam kanqa».

21Tsaynam Saúl nirqan: «Noqaqa Benjamín trïbupitam kä. Tsaynöllam tsay trïbuqa llapan Israel trïbukunapitapis mas wallkalla kaykan. Benjamín trïbuchö castäpis manakaqllam kayan. Tsaynö kaykaptinqa ¿imanirtä tsaynö nimanki?»

22Tsaypitanam mikuyänanpä kaq jatun cuartuman Saúlta y sirviqninta pushaykur autoridäkuna jamakuyänanman Samuel jamatsirqan. Tsaychömi kimsa chunkanö (30) qayatsinqan runakuna kaykäyarqan.

23Jamaskiyaptinnam kusinakuqta Samuel nirqan: «Churanaykipä ninqä allin kaq prësata apamuy».

24Tsaynö niptinmi kusinakuq runa juk entëru chankanta apaskamur Saúlta churapurqan. Churapuskiptinmi Samuel nirqan: «Taytay, mikurkullay. Kay runakunata manarä qayatsimurmi kay aytsata qampä churatsirqä». Tsaynö niptinmi paykunawan Saúl mikurqan.

25Mikunqanpita wayinman kutiskirnam wayi jananchö qorpa punukunan kaq cuartuchö Saúlpä cämata alistarqan.

26Tsaymi tsay paqas Saúl tsaychö punurqan. Waraynin wäraynam qayakur Samuel nirqan: «Shärikuyna markaykipa kutikunaykipä». Tsaynö niptinmi Saúl shärikurqan aywakunanpä. Aywakuptinnam Samuelpis paywan juntu aywarqan markapita yarqunqanyaq.

27Marka yarqunaman chaykurnam Samuel nirqan: «Sirvishuqniki puntaykätsun. Qamqa ichik shuyaskiyrä Tayta Dios nimanqankunata willanäpä». Puntakunanpä niptinmi sirviqnin puntarqan.

← Chapter 8 Jump to: Chapter 10 →