Jeremiah 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Icaha ca Yuda candikishijwe ikaramu y’icuma, n’ akabuye gasongoye kitwa alimasi: canditswe ku bisate, ari vyo mitima yabo, canditswe no ku mahembe y’ibicaniro vyabo;

2abana babo bibuka ibicaniro vyabo, n’ibigirwamana vyabo vya Ashera vyashinzwe i ruhande y’ibiti bitotahaye ku misozi miremire.

3Ewe musozi wanje wibonekeza mu gihugu, ibintu vyawe n’itunga ryawe ryose nzobigomorera binyagwe, bo n’ibitabo vyawe vyatabge ku mpinga z’imisozi, kubg’ ivyaha, bihereye ku mbibe zawe zose.

4Kandi nawe uzohomba ishamvu yawe naguhaye, ari wewe uvyihamagariye; nzotuma ukorera abansi bawe uri mu gihugu utazi, kuko mwadometse umuriro w’uburake bganje uzokwaka gushitsa ibihe vyose.

5Uku ni k’Uhoraho agize, at’ Aravumwe umuntu yishimira abantu, akizigira inkomezi z’abari n’umubiri, umutima wiwe ukava k’Uhoraho.

6Azoba nk’agasaka k’inkōkōre mu bugaragwa, kandi ntazobona ivyiza bimujeko; arikw azoba ahagadutse ahantu h’ ubgeranyange, igihugu c’umunyu kitabamw’ abantu.

7Arahiriwe umuntu yizigira Uhoraho, Uhoraho akaba ivyizigiro vyiwe.

8Kukw azoba nk’igiti gitewe i ruhande y’amazi, gishōrera imizi yaco i ruhande y’uruzi, kitumva izuba iyo ryatse, ariko kikāmana itōto; ntikizorinda kwiganyira mu mwaka w’uruzuba, kandi ntikizoharuruka kwama.

9Umutima uribesha kuruta ibindi vyose, urwaye indwara itavūrwa: ni nde yowumenya?

10Ni jewe Uhoraho nsesa umutima, nkagerageza umushaha, kugira ngo ngerere umuntu wese ibikwiranye n’ingeso ziwe, n’ibikwiranye n’ivy’ ibikorwa vyiwe vyeze.

11Nk’ukw inkware ibundikira amagi itātaye, umuntu yironkera itunga mu buryo bubi ni kw amera: agicagatije imisi yo kubaho kwiwe rizomuvako, kw iherezo ryiwe azoboneka kw ar’ igipfu.

12Ahantu h’ahēra hacu ni ho ntebe y’icubahiro, ishizwe hejuru uhereye mbere na mbere.

13Ewe Uhoraho, vyizigiro vy’Abisirayeli, abagutaye bose bazorimarima; abakuvako bazokwandikwa mu mukungugu gusa, kuko bataye Uhoraho, ari we sōko y’amazi y’ ubugingo.

14Mvūra, Uhoraho we, nanje ndakira; undokore, nanje ndarokoka: kukw ari wewe shimwe ryanje.

15Erega barambaza, bat’ Ijambo ry’Uhoraho riri hehe? Ni rishike turābe!

16Ariko jewe ubganje sinanse kuba umwungere nk’uk’ ugomba; sinifuje wa musi w’ivyago, nawe urabizi: ico navugishije akanwa cose car’ imbere yawe.

17Ntumbere ikinca ivutu: ni wewe buhungiro bganje ku musi w’ivyago.

18Abampīga ni bamāramāre, ariko jeho noye kumāramāra; ni bacike ivutu, ariko jeho noye kuricika: ubashitseko wa musi w’ivyago, ubageseze umurengera.

19Maz’ Uhoraho arambarira, ati Genda uhagarare mu kirimba gihitamw’ abantu bose, ari co abami b’Abayuda bahora bacamw’ amaja n’amaza, uhagarare no ku birimba bindi vyose vy’i Yerusalemu,

20ubabgire, uti Ni mwumve ijambo ry’Uhoraho, mwebge bami b’i Buyuda na Buyuda bgose, n’ababa i Yerusalemu mwese, abaca mur’ ibi birimba;

21uku ni k’Uhoraho agize, ati Ni mwirinde, ntimukagire ico mwiremēka na kimwe ku musi w’isabato, canke ngo mugicishe mu birimba vy’i Yerusalemu;

22kandi ntimukagire icikorerwa musohokana mu nzu zanyu ku musi w’isabato, kandi ntimugire igikorwa na kimwe muwukorako: ariko muziririze umusi w’isabato, nk’uko nageze ba sogokuruza;

23yamara bo ntibānyumvira, canke ngo batege amatwi, ariko bāgamika amazosi ngo boye kwumva, canke ngo bemere kwigishwa.

24None rero mweho ni mwanyumvirana umwete, ni jewe Uhoraho mbivuze, mukareka gucisha icikorerwa na kimwe mu birimba vy’iki gisagara ku musi w’isabato, ariko mukaziririza umusi w’isabato, ntimugire igikorwa na kimwe muwukorako;

25ni ho mu birimba vy’iki gisagara hazoca abami n’abaganwa uko bakūranwa ku ngoma ya Dawidi, bagendera mu mikogote no ku mafarasi, bo ubgabo n’ abaganwa babo, n’abagabo b’i Buyuda, n’ababa i Yerusalemu: kand’ iki gisagara kizokwamah’ ibihe bidashira.

26Kandi bazoza bavuye mu bisagara vy’i Buyuda, no mu bihugu bikikije i Yerusalemu, no mu gihugu c’Ababenyamini, no mu misozi iciye bugufi, na ruguru mu mugamba, no mu gihugu c’i bumanuko, bazana ibimazi vyo kwoswa n’ivyo gukererwa n’ivyo gushikana, n’imibavu, bazana n’ivy’ ishimwe, babizana mu ngoro yanje jewe Uhoraho.

27Ariko ni mutanyumvira ngo muziririze umusi w’isabato, ngo mwoye kugira ico mwiremēka mugicana mu birimba vy’i Yerusalemu ku musi w’isabato, nuko nzodomeka umuriro mu birimba vyaho, uzotongora ingoro z’i Yerusalemu, kandi ntibazoruha bawuzimya.

← Chapter 16 Jump to: Chapter 18 →