Jeremiah 35

Kirundi (Bibliya Yera 1951, 1967 (Burundi))

← Chapter 34 Jump to: Chapter 36 →

1Ijambo ryaje kuri Yeremiya rivuye k’Uhoraho mu gihe ca Yehoyakimu mwene Yosiya, umwami w’i Buyuda,

2riti Genda ku b’inzu ya Rekabu, uvugane na bo, ubinjize mu ngoro y’Uhoraho, ubashikane muri kimwe mu vyumba vyubatswe kuri yo, ubahe vino banywe.

3Nuko njana Yazaniya mwene Yeremiya, Yeremiya wa Habaziniya, n’abo bavukana, n’abana biwe bose, n’ab’ inzu ya Rekabu bose,

4mbinjiza mu ngoro y’Uhoraho, mu cumba ca bene Hanani, Hanani wa Igidaliya umuntu w’Imana, gihereranye n’icumba c’abaganwa, cari hejuru y’icumba ca Mayaseya mwene Shalumu umushibamyi wo ku muryango.

5Ntereka imibindi yuzuye vino, bo n’amakarabo, imbere y’ab’ inzu ya Rekabu, ndababgira, nti Ngiyo vino ni munywe.

6Na bo baravuga, bati Nta vino tunywa: kuko Yonadabu mwene Rekabu sogokuruza wacu yatwihanikirije, ati Ntimuze mwigere munywa vino, mwebge cank’ abana banyu,

7canke ngo muze mwigere mwubaka inzu, canke ngo murime, canke ngo mutere uruzabibu canke ngo hagire ūzorwitirirwa; at’ Arikw imisi muzomara yose muze mube mu mahema, kugira ngo mubone kuramba mu gihugu mubamwo.

8Kandi twumviye Yonadabu mwene Rekabu sogokuruza mu vyo yatuziririje vyose, kutanywa vino imisi tuzomaraho yose, twebge n’abagore bacu n’abahungu bacu n’abakobga bacu;

9no kutubaka amazu yo kubamwo, no kutagira uruzabibu cank’ itongo cank’ imbuto zo gutera;

10ariko twibereye mu mahema, twumvira iragi rya vyose Yonadabu sogokuruza yadusigaranye.

11Maze rero, Nebukadineza umwami w’i Babuloni ateye iki gihugu, turavugana, tuti Ngo tuje i Yerusalemu, duhunge ingabo z’Abakaludaya, duhunge n’ingabo z’Abasiriya; ni kwo kuba i Yerusalemu.

12Maz’ ijambo ry’Uhoraho riza kuri Yeremiya,

13rit’ Uku ni k’Uhoraho Nyen’ ingabo agize, ni we Mana y’Abisirayeli, ati Genda ubarire abagabo b’i Buyuda n’ababa i Yerusalemu, uti Mbega ntimworuha mwemera indero yanje ngo mwumvire amajambo yanje? ni jewe Uhoraho mbibajije.

14Amajambo ya Yonadabu mwene Rekabu, ayo yihanikirije abana biwe ngo ntibanywe vino, barayashitsa, no gushitsa kur’ uyu musi nta yo banywa, kuko bumviye iragi rya sekuruza; ariko jeho navuganye namwe, nama nzindurwa no kubabarira, namwe ntimwanyumvira.

15Kandi nabatumyekw abasavyi banje bose abo navugisha, nama nzindurwa no kubatuma, nt’ Enda ni mugaruke, umuntu wese ave mu nzira yiwe mbi, mutunganye ibikorwa vyanyu, mwoye gukurikira izindi mana ngo muzigendanire; nti Ni ho muzobona kwibera mu gihugu nabahaye, mwe na ba sogokuruza: ariko ntimwateze ugutwi, canke ngo munyumvire.

16Bene Yonadabu wa Rekabu ko bāshikije iragi rya sekuruza yabasigaranye, arik’ ubu bgoko bgo ntibgānyumviye;

17nuko rero, uku ni ko mvuze, jewe Uhoraho, Imana Nyen’ ingabo, Imana y’Abisirayeli, nt’ Ehe nzozana ku Bayuda no ku baba i Yerusalemu bose ivyago vyose nabageneye, kuko nababūriye bakanka kwumva, nkabahamagara bakanka kwitaba.

18Nuko Yeremiya abarira ab’ inzu ya Rekabu, at’ Uku ni k’Uhoraho Nyen’ ingabo agize, ni we Mana y’Abisirayeli, ati Ko mwumviye iragi rya sogokuruza Yonadabu, mukitondera amabgirizwa yiwe yose, mukagenza nk’uko yababariye muri vyose;

19nuko rero, uku ni k’ Uhoraho Nyen’ ingabo agize, ni we Mana y’Abisirayeli, ati Yonadabu mwene Rekabu ntazokwigera abura uwo kuzokwama ahagarara imbere yanje gushitsa ibihe vyose.

← Chapter 34 Jump to: Chapter 36 →