Jeremiah 20

Kirundi (Bibliya Yera 1951, 1967 (Burundi))

← Chapter 19 Jump to: Chapter 21 →

1Nuko Pashuri mwene Imeri umuherezi, yar’ umubgiriza mukuru wo mu ngoro y’Uhoraho, yumvise Yeremiya avuze izo mbūri,

2aca aramukubita, amushira mu mpatane z’ibiti vyari ku kirimba gihera haruguru citwa ica Benyamini, kirora ku ngoro y’ Uhoraho.

3Bukeye Pashuri akūra Yeremiya mur’ izo mpatane. Maze Yeremiya aramubgira, at’ Uhoraho ntiyakwise Pashuri, ariko yakwise Magori‐misabibu.

4Kuk’ ukw ari k’Uhoraho agize, ati Nzotuma wikanga, ukange na bagenzi bawe bose; bazohindikiranywa n’inkota z’abansi babo, nawe amaso yawe azovyibonera. Nzotanga Ubuyuda bgose mu kuboko kw’umwami w’i Babuloni, kand’ azobajana ar’ inyagano i Babuloni, kand’ azobicisha inkota.

5Ikigeretseko nzotanga itunga ryose ry’iki gisagara, n’ivyar’ inyungu zaco, n’ivy’ igiciro vyaco vyose, mbere n’ibitayega vyose vy’abami b’i Buyuda, mbitange mu maboko y’abansi babo bazoba babanyaze, babafashe, babajanye i Babuloni.

6Kandi nawe, Pashuri, mwe n’abo mu rugo rwawe bose, muzojanwa kw inyagano: kand’ uzoshika i Babuloni, ni yo uzogwa, ni yo uzohambga, mwe na bagenzi bawe bose, abo warotoreye ivy’ ibinyoma.

7Ewe Uhoraho, waranyoheje ndoha, wandushije inkomezi, uranjaniranya: mpindutse agatwengo kurenza umusi, umuntu wese arancokora.

8Kukw iyo mvuze, mvugira hejuru; mvugira hejuru, nti Har’ umuryano n’ubunyazi! Mber’ ijambo ry’Uhoraho ryampinduye agatukisha n’agatwengo kurenza umusi.

9Iyo mvuze, nti Sinzosubira kumuvuga, canke ngo ngire ico mvuga mw izina ryiwe, haca haba nk’umuriro uyingana mu mutima wanje, uhīshije uburimbi amagufa yanje, bikangora kwiyumanganya, nkaba ntobishobora.

10Kuko numvise benshi bandementaniriza, ubgoba bukantera irya n’ino. Abakunzi banje pfampfe bose, ni bo barereka ko notsitara, bavuga, bati Mumurege, natwe tumurege, kumbure yogwa mu mutego, natwe tukamunesha, tukamwīhōra.

11Ariko noneh’ Uhoraho ari kumwe nanje nk’umunyenkomezi n’uw’ igitinyiro; ni co kizotuma abampama batsitara, ntibaneshe: bazorimarima rwose kuko batākoze ivy’ ubgenge, bagire ibitētērwa bitazobavako, bitazoruha vyibagirana.

12Ariko wewe, Uhoraho Nyen’ ingabo, wewe ugerageza abagororotsi, ukitegereza imishaha n’imitima, umpe kwibonera ingen’ ubīhōra, kukw ari wewe nitwayeko.

13Muririmbire Uhoraho, muhimbaze Uhoraho: kuko yarokoye ubugingo bg’umukene, akabukūra mu maboko y’inkozi z’ibibi.

14Umusi navukiyeko uravumwe! Umusi mama yamvyariyeko ntube ucitwa uw’ amahirwe.

15Aravumwe umuntu yazaniye inkuru data, at’ Uvyaye umwana w’umuhungu; bikamunezereza cane.

16Uwo muntu n’abe nka vya bisagara Uhoraho yasanganguye, ata kagongwe: ni yumve amaborogo mu gatondotondo, n’ akarūru ku murango;

17kukw atānyishe nkiri mu nda ya mama; ni ko mama yombereye imva, akazokwama akuriwe.

18N’iki cankūye mu nda, ngo nze mbone ubutame n’umubabaro, imisi yanje nkayimara mu bitētērwa?

← Chapter 19 Jump to: Chapter 21 →