Jeremiah 19

Kirundi (Bibliya Yera 1951, 1967 (Burundi))

← Chapter 18 Jump to: Chapter 20 →

1Uku ni k’Uhoraho yagize, ati Genda ugure ikarabo ku mubumvyi, uheze ujane abashingantahe bo mur’ ubu bgoko, n’ abakuru b’abaherezi,

2ugende ushike mu mwonga wa mwene Hinomu, aherekeye mw ishikiro ry’irembo ry’ababumvyi, uhavugire amajambo nkubarira:

3uti Ni mwumve ijambo ry’Uhoraho, mwebge bami b’i Buyuda, namwe ababa i Yerusalemu; uku ni k’ Uhoraho Nyen’ ingabo agize, ni we Mana y’Abisirayeli, at’ Ehe nzozana ivyago aha hantu, kand’ ūzovyumva wese iminzerere izomuvuga mu matwi.

4Kuko bāntaye, bagahumanya aha hantu, bakahoserereza imibavu izindi mana batigeze kumenya, bo na ba sekuruza n’abami b’i Buyuda; bakuzuza aha hantu ibitenga vy’ amaraso y’abatācumuye;

5bagataba ibitabo vya Bayali, ngo bahosereze abahungu babo mu muriro, babe ibimazi vyosherejwe Bayali; ar’ ikintu ntābageze, ntāvuze, kitigeze no kuza mu mutima wanje.

6Nuko rero, umve, imisi igira ize, ni jewe Uhoraho mbivuze, aha hantu ntihazoba hacitwa Tofeti, canke ngo hitwe Umwonga wa mwene Hinomu; ariko hazokwitwa Umwonga w’Imihindigiti.

7Kandi nzohindurira ubusa aha hantu inama z’i Buyuda n’iz’ i Yerusalemu; nzobahindikiranya n’inkota imbere y’abansi babo, bicwe n’amaboko y’ababahīga: kand’ imivyimba yabo nzoyigabura ibe inyama z’ibisīga vyo mu kirēre, n’iz’ ibikōko vyo kw isi.

8Nzohindura iki gisagara akajoreza, n’ico kuvuzwakw agahwa; umuntu wese azohaca azojorerwa, avuze agahwa kubg’ ivyago vyaho vyose.

9Nzotuma barya abahungu babo n’abakobga babo, umuntu wese aryekw inyama mugenzi we, kubgo kwugarizwa no gusugerezwa, basugerejwe n’abansi babo n’ababahīga ngo babice.

10Uheze usābirize iryo karabo imbere y’abo bantu mwajanye,

11ubabgire, ut’ Uku ni k’Uhoraho Nyen’ ingabo agize, at’ Uko ni ko nzosāvya ubu bgoko n’iki gisagara, nk’uk’ umuntu asāvya ikibumbano, kidashobora kwungwa ukundi: uti Maze bazohamba i Tofeti gushitsa aho batazoba bagishigaje n’akanya k’aho bahamba.

12Uko ni ko nzogirira aha hantu, bo n’abahaba, ni jewe Uhoraho mbivuze, mpindure iki gisagara kibe nk’i Tofeti:

13ingo z’i Yerusalemu n’ingoro z’abami b’i Buyuda zizoba ibihumane, zimere nk’aha hantu i Tofeti, mbere n’amazu yose būriyeko hejuru ngo bosereze imibavu inyenyeri zose, ari zo ngabo zo kw ijuru, bagasukira ibiturire izindi mana.

14Nuko Yeremiya aragaruka avuye i Tofeti, ah’ Uhoraho yari yamutumye kuvuga imbūri; maz’ ahagarara mu rugo rw’ingoro y’ Uhoraho, abarira abantu bose,

15at’ Uku ni k’Uhoraho Nyen’ ingabo agize, ni we Mana y’Abisirayeli, at’ Ehe nzozana kur’ iki gisagara, no ku bindi bisagara vyose vyo hafi yaco, ivyago vyose nakigeneye, kuko bāgamitse amazosi yabo, bakanka kwumva amajambo yanje.

← Chapter 18 Jump to: Chapter 20 →