Jeremiah 37

Kirundi (Bibliya Yera 1951, 1967 (Burundi))

← Chapter 36 Jump to: Chapter 38 →

1Zedekiya mwene Yosiya aja ku ngoma mu gishingo ca Koniya mwene Yehoyakimu, Nebukadineza umwami w’i Babuloni ari we amwimitse mu gihugu c’i Buyuda.

2Ariko ntiyumvira amajambo y’Uhoraho ayo yavugisha Yeremiya, ubgiwe cank’ abasavyi biwe cank’ abantu bo mu gihugu.

3Maz’ umwami Zedekiya atuma Yehukali mwene Shelemiya na Zefaniya mwene Mayaseya umuherezi kuri Yeremiya uwavugishwa n’Imana, ati N’udusengere k’Uhoraho Imana yacu.

4Kandi Yeremiya yar’ acigendagendera mu bandi bantu, kuko bataribgamushire mw ibohero.

5Kand’ ingabo za Farawo zari zije zivuye muri Egiputa: maz’ Abakaludaya bari bugarije i Yerusalemu bumvise inkuru zavyo, bata i Yerusalemu barakimirana.

6Maz’ ijambo ry’Uhoraho riza kur’ uwo yavugisha Yeremiya,

7rit’ Uku ni k’ Uhoraho agize, ni we Mana y’ Abisirayeli, at’ Uku abe ari ko mubarira umwami w’i Buyuda yabantumyeko kunsiguza, muti Rāba ingabo za Farawo zije kubatabara zizosubira muri Egiputa mu gihugu cabo.

8Kand’ Abakaludaya bazogaruka, batere iki gisagara; bazogitsinda bagitongoze umuriro.

9Uku ni k’Uhoraho agize, ati Ntimwihende, mut’ Abakaludaya bazotuvako nta kabuza: kuko batazobavako.

10Kuko naho mwotikiza ingabo zose z’Abakaludaya babarwanya, hagasigaramw’ abakomeretse basa, na ho nyene bova hasi, umuntu wese aho yar’ ari mw ihema ryiwe, bagatongoza iki gisagara umuriro.

11Nukw ingabo z’Abakaludaya zimaze gukimirana zitaye i Yerusalemu kubgo kugirira ubgoba ingabo za Farawo,

12Yeremiya asokoroka i Yerusalemu ngw aje mu ntāra ya Benyamini, gushikiririzway’ umugabane wiwe hagati mu bantu.

13Agishika mw irembo ryitwa irya Benyamini, umukuru w’ abashibamyi yitwa Iriya mwene Shelemiya, Shelemiya wa Hananiya, ni ho yar’ ahagaze: afata uwo muvugishwa Yeremiya, at’ Uroye kwisaba Abakaludaya.

14Yeremiya ati S’ivy’ ukuri; singiye kwisaba Abakaludaya. Ariko yanka kuvyumva: nuko Iriya afata Yeremiya, amushīra abaganwa.

15Abaganwa bashavurira Yeremiya, baramukubita, bamushira mw ibohero mu nzu ya Yonatani umukarani, kuko bāri bayigize ibohero.

16Nuko Yeremiya amaze gushika mw ibohero, mu kazu ko mu kuzimu, ahamaze imisi myinshi,

17umwami Zedekiya atuma kumuzana; nuk’ umwami amubariza mu mpisho mu ngoro yiwe, ati Mbega nta jambo ryoba rivuye k’Uhoraho? Yeremiya ati Ririho; at’ Uzotangwa mu kuboko kw’umwami w’i Babuloni.

18Ikindi, Yeremiya abaza umwami Zedekiya, ati Mbega nagucumuyekw iki, cank’ abantu bawe, cank’ ubu bgoko, ko mwanshize mw ibohero?

19Ba kamenyi banyu bābabarira, ng’ Umwami w’i Babuloni ntazobatera canke ngw atere iki gihugu, bari hehe?

20Non’ urazirikanye, mwami wanje nyen’ ingoma, tegēra ivyo ngusavye ndakwinginze; ntunsubize mu nzu ya Yonatani umukarani, simpfireyo.

21Nuk’ umwami Zedekiya aravuga, bashira Yeremiya mu rugo rw’ibohero, bamugaburira umutsima uko bukeye, bawuguriye ku nzira y’abacumvyi, gushitsa ah’ imitsima yose yahebūriwe mu gisagara. Nuko Yeremiya aguma ngaho mu rugo rw’ibohero.

← Chapter 36 Jump to: Chapter 38 →