Jeremiah 29

Kirundi (Bibliya Yera 1951, 1967 (Burundi))

← Chapter 28 Jump to: Chapter 30 →

1Aya ni yo majambo y’icete ūvugishwa n’Imana Yeremiya yarungitse ar’ i Yerusalemu, akirungikira abāsigaye b’abashingantahe mu bambukanywe, n’ abaherezi n’abavugishwa n’abantu bose Nebukadineza yambukanye abakūye i Yerusalemu abajana i Babuloni.

2Ico gihe umwami Yekoniya n’umugabekazi n’abantu b’inkone n’abaganwa b’i Buyuda n’i Yerusalemu n’ababāji n’abacuzi, bāri bamaze kuvanwa i Yerusalemu.

3Akirungikana Elasa mwene Shafani na Gemariya mwene Hilukiya, abo Zedekiya umwami w’i Buyuda atumye i Babuloni kuri Nebukadineza umwami w’i Babuloni, cāri canditse,

4ng’ Uku ni k’ Uhoraho Nyen’ ingabo agize, ni we Mana y’Abisirayeli, abarira abānyazwe bose, abo yambukanishije ngo bakūrwe i Yerusalemu bajanwe i Babuloni,

5ati Ni mwiyubakire amazu, muyabemwo; mwirimire amatongo murye ibiyezemwo;

6mwiyabīrire abagore, muvyare abahungu n’abakobga; musabire abahungu banyu abageni, mushingire abakobga banyu, kugira ngo na bo bavyare abahungu n’abakobga; murondokereyo, ntimube inkehwa.

7Mwifurize amahoro igisagara, ico natumye mwambukanirwamwo, mugisengere Uhoraho: kuko kibaye amahoro namwe muzoba amahoro.

8Kuk’ ukw ari k’ Uhoraho Nyen’ ingabo agize, ni we Mana y’Abisirayeli, ati Ba kamenyi banyu baba muri mwebge n’abapfumu banyu ntibabahende, kandi ntimukumvire inzozi babarotera.

9Kuko babaragurira ibinyoma mw izina ryanje, nanje ntābatumye, ni jewe Uhoraho mbivuze.

10Kuk’ ukw ari k’Uhoraho agize, at’ Imyaka mirongwirindwi ni yarangira mur’ i Babuloni, nzobagendera, mbashitsekw ijambo ryanje ryiza, mbagarukane aha hantu.

11Kuko nzi ivyiyumviro mbiyumvirako, ni jewe Uhoraho mbivuze, kw ar’ ivyiyumviro vy’amahoro, atar’ ivy’ ivyago, kugira ngo mbahe ivyizigiro vyo mw iherezo ryanyu.

12Kandi muzonyambaza, muzoza munsenge, nanje nzobumva.

13Muzondondera kandi muzombona, ni mwandondeza umutima wanyu wose.

14Nanje nzobabonekera, ni jewe Uhoraho mbivuze, ntume muhindukira, muve mu kinyago, kandi nzobakoranya mbakūye mu mahanga yose n’ahantu hose aho nabirukaniye, ni jewe Uhoraho mbivuze; kandi nzobagarukana ahantu nabakūye igihe nabambukanisha.

15Ko muvuga, mut’ Uhoraho yaduhagurukirije abavugishwa na we i Babuloni.

16Uku ni k’ Uhoraho agize ku vy’umwami ari ku ngoma ya Dawidi, no ku vy’ abantu bose baba mur’ iki gisagara, ni bo bene wanyu mutājanye igihe mwambukanwa;

17uku ni k’Uhoraho Nyen’ ingabo agize, ati Rāba nzorungika inkota n’ inzara n’ikīza muri bo, mbahindure nk’insukoni ziteye ishishi, zidashoboka kuribga kubgo kubora.

18Nzobirukanisha inkota n’inzara n’ikīza, mbatange batererekanywe irya n’ino mu bihugu vy’abami bose bo mw isi, ngo babe ibivume n’akajoreza n’ abo kuvuzwakw agahwa n’igitutsi mu mahanga yose aho nabirukaniye;

19kuko batumviye amajambo yanje, ni jewe Uhoraho mbivuze, ayo natumye abasavyi banje mvugisha, nama nzindurwa no kubatuma, ariko ntibaruha bumva, ni jewe Uhoraho mbivuze.

20None rero ni mwumve ijambo ryanje, jewe Uhoraho, mwebge mwese abambukanywe, abo narungitse ngo muve i Yerusalemu muje i Babuloni.

21Uku ni ko mvuze, jewe Uhoraho Nyen’ ingabo, Imana y’Abisirayeli, ku vya Ahabu mwene Kolaya no ku vya Zedekiya mwene Mayaseya, babaragurira ibinyoma mw izina ryanje, nt’ Ehe nzobatanga mu kuboko kwa Nebukadineza umwami w’i Babuloni, na we azobicira imbere y’ amaso yanyu;

22kandi bazohinduka umuvumo wo kuvumana w’abambukanywe bose b’i Buyuda bar’ i Babuloni, ng’ Uhoraho arakakugira nka Zedekiya na Ahabu, abo umwami w’i Babuloni yataze ku muriro babona;

23kuko bākoze ivy’ ubupfu mu Bgisirayeli, bagasambana n’abagore ba bagenzi babo, bakavuga amagambo y’ibinyoma mw izina ryanje, ayo ntābageze; jewe ubganje ndabizi, kandi nd’icabona, ni jewe Uhoraho mbivuze.

24Kandi ku vya Shemaya w’i Nehelamu uvuge,

25ut’ Uku ni k’Uhoraho Nyen’ ingabo agize, ni we Mana y’Abisirayeli, ati Ko warungitse ivyete mw izina ryawe, ukabirungikira ababa i Yerusalemu bose, na Zefaniya mwene Mayaseya umuherezi, n’abaherezi bose,

26ukavuga, ut’ Uhoraho ko yaguhinduye umuherezi mu gishingo c’umuherezi Yehoyada, namwe kugira ngo mube ababgiriza mu ngoro y’Uhoraho, ngo mubuze umuntu wese w’ umusazi yīgira ūvugishwa n’Imana, ngo mumushire mu mpatane z’ibiti no mu minyororo;

27none rero n’iki cakubujije guhana Yeremiya w’i Anatoti, yīgira ūvugishwa n’Imana ngo yabatumweko?

28Kw adutumakw amajambo i Babuloni, avuga, ngo Turacasigaje igihe kirekire tur’ inyagano: ngo Ni twiyubakire amazu, tuyabemwo; ngo Ni twirimire amatongo turye ibiyezemwo.

29Maze Zefaniya umuherezi asoma ico cete ūvugishwa n’ Imana Yeremiya yumva.

30Nukw ijambo ry’Uhoraho riza kuri Yeremiya,

31riti Tuma ku bājanywe kw inyagano bose, ubabgire, ut’ Uku ni k’Uhoraho agize ku vya Shemaya w’i Nehelamu, ati Kw ababariye amagambo, nanje ntāmutumye, akabizigiza ibinyoma,

32nuko rero, uku ni ko mvuze, jewe Uhoraho, nti Rāba, nzohana Shemaya w’i Nehelamu n’ uruvyaro rwiwe; ntazosigarana n’ umwe mu biwe azoba mur’ ubu bgoko, na we ntazoruha abona ivyiza nzogirira abantu banje, ni jewe Uhoraho mbivuze: kuko yavuze ivy’ ukungarariza jewe Uhoraho.

← Chapter 28 Jump to: Chapter 30 →