Jeremiah 39

Kirundi (Bibliya Yera 1951, 1967 (Burundi))

← Chapter 38 Jump to: Chapter 40 →

1Nuko Yerusalemu haratsindwa. Nebukadineza umwami w’i Babuloni, n’ingabo ziwe zose, yaje gutera Yerusalemu arahugariza, mu mwaka ugira icenda Zedekiya umwami w’i Buyuda ari ku ngoma, mu kwezi kw’icumi;

2maze mu mwaka ugira icumi na rimwe Zedekiya ari ku ngoma, mu kwezi kwa kane, ku musi wakwo w’icenda, basatura uruzitiro rw’ico gisagara.

3Hatsinzwe, abaganwa bose b’umwami w’i Babuloni baraza basagaza mu kirimba co hagati, ni bo aba: Nerugali‐sharezeri, na Samugari‐nebo, na Sarusekimu, na Rabu‐sarisi, na Nerugali‐sharezeri, na Rabu‐magu, bo n’abandi baganwa bose b’umwami w’i Babuloni.

4Maze Zedekiya umwami w’i Buyuda n’ingabo zose bababonye, barahunga, bahenga mw ijoro bava mu gisagara, baciye mu ndimiro y’umwami no mu kirimba kiri hagati y’inzitiro zibiri: umwami ajana inzira ica mu kiyaya Araba.

5Maz’ ingabo z’Abakaludaya zibōma inyuma, zihambiriza Zedekiya mu kiyaya c’i Yeriko: bamaze kumufata, baramudūgana, bamuzanira Nebukadineza umwami w’i Babuloni bamumusanza i Ribula mu ntāra y’i Hamati: amucirakw iteka.

6Nuk’ uwo mwami w’i Babuloni yicira abahungu ba Zedekiya imbere y’amaso yiwe nyene i Ribula; kand’ uwo mwami w’i Babuloni yica n’abaganwa bose b’i Buyuda.

7Ikigeretseko anogora amaso Zedekiya, amwambika umunyororo kugira ngo bamujane i Babuloni.

8Abakaludaya banda umuriro ingoro y’umwami n’ amazu y’abantu, basangangura n’ inzitiro zikikije i Yerusalemu.

9Maze Nebuzaradani, umukuru w’abashibamyi, ajana i Babuloni amasigarira y’abantu bāri bagisigaye mu gisagara, n’abāri bāragiye kumwisaba, n’amasigarira y’abantu bāri bagisigaye, abajana ar’ inyagano.

10Ariko Nebuzaradani uwo mukuru w’abashibamyi, asiga mu gihugu c’i Buyuda abantu ba nyarucari batagira ico batunze, abaha imirima y’inzabibu n’amatongo ico gihe.

11Maze Nebukadineza umwami w’i Babuloni agera Nebuzaradani uwo mukuru w’abashibamyi ku vya Yeremiya,

12ati Mujane, umuzigame neza, ntugire ico umugira; kand’ ukw azogomba abe ari k’uzomugirira.

13Nuko Nebuzaradani uwo mukuru w’abashibamyi aratuma, bo na Nebushazabani na Rabu‐sarisi na Nerugali‐sharezeri na Rabu‐magu, n’abakuru bose b’umwami w’i Babuloni,

14baratuma, bakūra Yeremiya mu rugo rw’ibohero, bamuha Gedaliya mwene Ahikamu, Ahikamu wa Shafani, ngw amujane i we: nuko yibera ngaho mu bandi bantu.

15Kand’ ijambo ry’Uhoraho ryari ryaje kuri Yeremiya, igihe yar’ acugaraniwe mu rugo rw’ ibohero,

16riti Genda ubarire Ebedumeleki Umunyetiyopiya, ut’ Uku ni k’Uhoraho Nyen’ ingabo agize, ni we Mana y’Abisirayeli, ati Rāba ngira nshitse kur’ iki gisagara ayo nakivuzeko y’ivyago, atar’ ay’ ivyiza; kandi bizoshika uvyibonera kuri nya musi.

17Ariko weho nzokurokora kur’ uwo musi, ni jewe Uhoraho mbivuze: kandi ntuzotangwa mu maboko y’abo utinya.

18Kuko ntazobura kugukiza; ntuzokwicwa n’inkota, arikw amagara yawe uzoba uyakijije, kuko wanyizigiye, ni jewe Uhoraho mbivuze.

← Chapter 38 Jump to: Chapter 40 →