Jeremiah 46

Kirundi (Bibliya Yera 1951, 1967 (Burundi))

← Chapter 45 Jump to: Chapter 47 →

1Ijambo ry’Uhoraho ryaje kuri Yeremiya uwavugishwa na we ku vy’amahanga.

2Ku vya Egiputa: amajambo yo ku vy’ingabo za Farawo‐Neko umwami wa Egiputa, zari ku nkengera y’uruzi Efurate i Karukemeshi, izo Nebukadineza umwami w’i Babuloni yanesheje mu mwaka ugira kane Yehoyakimu mwene Yosiya umwami w’i Buyuda ari ku ngoma.

3Mutegure inkinzo nto‐nto na nini‐nini, mutonde urugamba murwane.

4Mushire amatandiko ku mafarasi, muheze mwūrire, mwebge abayagenderako, mutonde mwambaye inkofero z’ivyuma; murtyorore amacumu, mwambare ivyuma vyo gukīngira imibiri.

5N’iki gitumye bacika ivutu bagakimirana? Abahizi babo batsinzwe hasi, barahunga baratemesha, batarinze no gukebuka: haba ibibateye ubgoba irya n’ino, ni k’Uhoraho agize.

6Ntihagira impayamaguru icīka, cank’ umuhizi ngo hagire uwikiza; i burārūko ku nkengera y’uruzi Efurate ni ho batsitaye baratemba.

7Uyu ni nde asendanisha nka Nili, amazi yiwe agatera imipfunda nk’inzūzi?

8Ni Egiputa hasendanisha nka Nili, n’amazi yaho atera imipfunda nk’inzūzi: havuga, hati Hinge nsendanishe, ndenge isi yose; nze ngeseze ibisagara n’ ababibamwo.

9Mudūge, mwa mafarasi, mugende akabushungwe, mwa mikogote! Abahizi ni barumikeko, ni bo Banyetiyopiya n’ Abaputi batwara inkinzo, n’Abaludimu batwara imiheto bazi kuyifora.

10Kuk’ uwo musi ar’ uw’ Umwami, ni we Uhoraho Nyen’ ingabo, ar’ umusi wo kwīhōrako, kugira ngo yīhōre abarwanizi biwe: inkota izorya ihāge, izonywa amaraso yabo ihīmbe: kuk’ Umwami, ari we Uhoraho Nyen’ ingabo, acumitira ibimazi mu gihugu c’i burārūko ku nkengera y’uruzi Efurate.

11Dūga upfe kwizenza i Gileyadi, wābīrey’ umuti, wewe mukobga w’inkumi ari we Egiputa: nta kimazi kunywa imiti myinshi: nta wo kuzogukiza uriho.

12Amahanga yumvise ibitētērwa vyawe, isi yuzuye amaborogo yawe: kuk’ umuhizi atsitaye ku wundi, bompi bagatemba hamwe.

13Ijambo Uhoraho yabariye Yeremiya ūvugishwa na we, ry’ ingene Nebukadineza umwami w’i Babuloni azoza gutera igihugu ca Egiputa.

14Muvugire muri Egiputa, muvyamamaze i Migidoli, muvyamamaze n’i Nofu n’i Tahapanesi, muti Mutonde, mwitegure, kukw inkota yariritse impande zose zigukikije.

15N’iki gituma abahizi bawe bahunga? Ntibāshinze ikirenge, kuk’ Uhoraho yabirukanye.

16Yatumye benshi batsitara, mbere bātsitaranyeko: bati Ngo tuvyuke twisubirire mu b’i wacu, no mu gihugu twavukiyemwo, duhunge inkota iririka.

17Aho hantu ni ho basemerereye, bati Farawo umwami wa Egiputa n’ukureremesha akarūru gusa! Yazangazanze mu gihe cashinzwe.

18Nk’uko ndiho, ni k’Umwami agize, ari we yitwa Uhoraho Nyen’ ingabo, n’ukuri nk’uko Tabora umeze ku yindi misozi, kandi nk’ uko Karumeli umeze ku kiyaga, ni k’ūgiye kuza azoza ameze.

19Ewe wa mukobga wibereye muri Egiputa, witegure kujanwa kw inyagano; kukw i Nofu hazohinduka amatongo, hazotongorwa, hasigare ata wukihaba.

20Egiputa n’inka y’iriza iteye igomwe rwose; ariko haje ikibugu kivuye i burārūko, kirashitse.

21Kand’ ingabo zaho z’abacangero ziri hagati yaho, zimeze nk’inyana zo mu ruhongore: kuko na zo zakimiranye, zahungiye icarimwe, ntizashinga ikirenge: kuk’ umusi w’ ivyago vyabo ubashitseko, ni co gihe co kūzirwa kwabo.

22Akariri kabo kazokwumvikana nk’ ugukakamba kw’inzoka; kuko bazobāzira bari n’ingabo, babatere bari n’amacabiti, nk’abaje kwicira ibiti.

23Bazokwicira ikibira caho, ni k’Uhoraho agize, naho kizitanye gite; kuko barusha inzige ubginshi, kandi badaharūrika.

24Umukobga, ni we Egiputa, azokorwa n’isoni; azotangwa mu maboko y’abantu b’i burārūko.

25Uhoraho Nyen’ ingabo, ni we Mana y’Abisirayeli, aravuga, ati Nzohana Amona ikigirwamana c’ ahitwa No, na Farawo na Egiputa n’imana zaho n’abami baho; mbere Farawo nzomuhanana n’abamwizigira.

26Nzobatanga mu maboko y’abashaka kubica, no mu kuboko kwa Nebukadineza umwami w’i Babuloni, no mu maboko y’ abasavyi biwe; ariko hanyuma y’ivyo muri Egiputa hazosubira kubamw’ abantu, nk’uko hamye mu misi ya kera, ni jewe Uhoraho mbivuze.

27Ariko weho ntutinye, ewe Yakobo musavyi wanje, nturanduke umutima, ewe Isirayeli: kuko rāba nzogukiza ngukūre kure, uruvyaro rwawe ndarukūre mu gihugu rwajanywemwo ar’ inyagano; Yakobo azogaruka, kand’ azokwibera amahoro ata nkomanzi, kandi nta wuzomutera ubgoba.

28Ntutinye, ewe Yakobo musavyi wanje, ni jewe Uhoraho mbivuze, kuko ndi kumwe nawe: kuko nzoherengeteza amahanga yose, ayo nagushwiragirijemwo: ariko weho sinzoguherengeteza; mugabo nzoguhana ibigeze, sinzokureka ntaguhannye.

← Chapter 45 Jump to: Chapter 47 →