Jeremiah 14

Shan

← Chapter 13 Jump to: Chapter 15 →

1ၼုၵ်ႈၵပၢတ်ႈ ထႃႇဝရႃႉၽြႃး ဢၼ်ဢဝ် လွင်ႈတၢင်းဢၼ်ၽႃႉလႅင်ႉ ၽူၼ်ဢမ်ႇတူၵ်းၼၼ်ႉလႄႈ ႁွတ်ႈမႃးတီႈ ယေႇရမီႉ ၸမ်ႉ၊-

2မိူင်း ယူႉတႃႉ ၶၢင်းၶီၶၢင်းၽၢၼ်လႄႈ၊ ၽၵ်းတူဝဵင်းမၼ်းၸိူဝ်းၼၼ်ႉ မီးသဵင်ဢၼ်ပွင်ႉၶၢင်းပွင်ႉမိူၼ်ႇယူႇဢေႃႈ။ ၶဝ်ၼုင်ႈၶူဝ်းၼုင်ႈ ဢၼ်လမ်ၵမ်ႇသေလႄႈ ၼင်ႈယူႇၵႃႈၼိူဝ်လိၼ်လႄႈ သဵင်ဢၼ် ဝဵင်း ယေႇရူႉသလႅမ်ႇ ႁႆႈႁွင်ႉၼၼ်ႉ ၶိုၼ်ႈယူႇဢေႃႈ။-

3မူးမၢတ်ႈၽွင်းမိူင်းတင်းလၢႆ ဢွၼ်ၵၼ်ပွႆႇၸႂ်ႉၵူၼ်းဢွၼ်ႇၶဝ်ၵႂႃႇတဵၵ်းၼမ်ႉလႄႈ ၶဝ်ၼၼ်ႉႁွတ်ႈထိုင်ၵႃႈတီႈ ဢိူင်ႇၼမ်ႉၶုမ်ၼမ်ႉ သေယဝ်ႉ၊ ဢမ်ႇထူပ်းၼမ်ႉထူပ်းၼၢႆး။ ၶဝ်ဢွၼ်ၵၼ် ပႃးဢဝ်မေႃႈပဝ်ႇမေႃႈလၢပ်ႈယူႇ သေလႄႈ ၶိုၼ်းမႃးဢေႃႈ။ ၶဝ်မီးတၢင်းဢၼ် ဢူၵ်းဢၢႆ ငိူဝ်ႈငဝ်လႄႈဢွၼ်ၵၼ် ႁူမ်ႇသုမ်ႇႁူဝ်ၶဝ်ယူႇဢေႃႈ။-

4ၵွပ်ႈပိူဝ်ႈဢၼ် ၽူၼ်ဢမ်ႇတူၵ်းၵႃႈၼႂ်းမိူင်းၸဝ်ႈလႄႈ လိၼ်မီးတၢင်းဢၼ်တႅၵ်ႇဢႃႈဝႆႉၼၼ်ႉလႄႈ ၶဝ်ၸိူဝ်းဢၼ်ဢဝ်ထႆ ထႆၼၼ်ႉမီးတၢင်းဢၼ် ဢူၵ်းဢၢႆလႄႈ ဢွၼ်ၵၼ်ႁူမ်ႇသုမ်ႇႁူဝ်ၶဝ်ယူႇဢေႃႈ။-

5တိုင်မႄႈ ၵိူတ်ႇလဵင်ႉလုၵ်ႈမႃး ၵႃႈၼႂ်းတီႈပၢင်ႇတီႈပဵင်းလႄႈ ၸုၼ်ႉပႅတ်ႈလုၵ်ႈဢွၼ်ႇမၼ်း ၵွပ်ႈပိူဝ်ႈဢၼ်ဢမ်ႇမီးယိူဝ်ႈၼၼ်ႉဢေႃႈ။-

6လီႈဢၼ်ႁႄရိူင်း တင်းလၢႆ ဢွၼ်ၵၼ်ၸုၵ်းယူႇၵႃႈၼိူဝ်တီႈဢၼ်သုင်သေလႄႈ သုတ်ႇလူမ်းမိူၼ်ၸိူဝ်ႉၼင်ႇ မႃလိၼ်ၼၼ်ႉလႄႈ မၢၵ်ႇတႃၶဝ်လူႉၵႂႃႇ ၵွပ်ႈပိူဝ်ႈဢၼ်ဢမ်ႇမီး တူၼ်ႈယိူဝ်ႈတူၼ်ႈယႃႈ ၼၼ်ႉဢေႃႈ။-

7ထႃႇဝရႃႉၽြႃးတီႈၶႃႈ၊ ပိၵ်ႉသမ်ႉဢပႅတ်ႈၶႃႈၸဝ်ႈႁဝ်းၶဝ် ၶၢမ်ႇသၢၵ်ႈသေႇယူႇၽၢႆႇၼိုင်ႈ တင်းၶႃႈၸဝ်ႈႁဝ်းၶဝ်သေၵေႃႈ၊ ၶႅၼ်းတေႃႈထွၵ်ႈလူၺ်ႈ ၼႃႇမႃႉၸိုဝ်ႈသဵင်ၸဝ်ႈႁဝ်း သေလႄႈ ၸီႇယၢင်ႇသေၵမ်းတီႈၶႃႈ၊ တၢင်းဢၼ်ၶႃႈၸဝ်ႈႁဝ်းၶဝ် ၽွၵ်ႈပျၢၼ်ႇၶိုၼ်းၵႂႃႇၼၼ်ႉ ပဵၼ်ဢၼ်ၼမ်ၼႃႇလူင်လၢင်လႄႈ ၶႃႈၸဝ်ႈႁဝ်းၶဝ်ဢွၼ်ၵၼ် ၽိတ်းပိူင်ႈၸဝ်ႈႁဝ်း တီႈၶႃႈယဝ်ႉ။-

8ၸဝ်ႈဢၼ်ပဵၼ် လွင်ႈဢၼ် မဵဝ်း ဢီႉသရေႇလႃႉ လီမုင်ႈလီမွင်း၊ ၸဝ်ႈဢၼ်ၵႄႇသႄႇၶျွတ်ႈဢဝ် ၼႂ်းၶိင်ႇမိူဝ်ႈဢၼ် ၽေးႁွတ်ႈထိုင်ၼၼ်ႉတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပဵၼ်ၸိူဝ်ႉၼင်ႇၶႅၵ်ႇ ၵႃႈၼႂ်းမိူင်းၸဝ်ႈ ဢိၵ်ႇတင်းၸိူဝ်ႉၼင်ႇ ၵေႃႉဢၼ်ၵႂႃႇတၢင်းပႆတၢင်း ဢၼ်ၶဝ်ႁႂ်ႈလႆႈၵင်ႈမူဝ်းၵႃႇ ၶိုၼ်းလဵဝ်ၵူၺ်းၼၼ်ႉ ၼင်ႇႁိုဝ်တီႈၶႃႈ၊-

9ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပဵၼ်ၸိူဝ်ႉၼင်ႇ ၵေႃႉဢၼ်ႁိူဝ်ႉဢူၼ်ႈလိုမ်းတူဝ် ဢိၵ်ႇတင်းၸိူဝ်ႉၼင်ႇ ၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ဢမ်ႇတၢတ်ႈၼိူင်ႇ ႁႂ်ႈလႆႈၵႄႇသႄႇဢဝ်လွတ်ႈၼၼ်ႉ ၼင်ႇႁိုဝ်တီႈၶႃႈ၊ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းၸိုင် မီးယူႇ ၵႃႈၼႂ်း ၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၶႃႈၸဝ်ႈႁဝ်းၶဝ်ၼႆႉ ပဵၼ်ၵေႃႉဢၼ်လႆႈၶၢမ်ႇတၢင်းဢၼ် ႁွင်ႉႁဵၵ်ႈလူၺ်ႈ ၼႃႇမႃႉၸိုဝ်ႈသဵင် ၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈ ယႃႇပေၸုၼ်ႉပႅတ်ႈ ၶႃႈၸဝ်ႈႁဝ်းၶဝ်သေၵမ်းတီႈၶႃႈ၊-

10ထႃႇဝရႃႉၽြႃး ဢဝ်လွင်ႈ ၵူၼ်းမဵဝ်းၼႆႉလႄႈ မီးဢမိင်ႉၸမ်ႉ၊ ၶဝ်ဢွၼ်ၵၼ်မီးဢလူဝ်ႇ ၶႂ်ႈလႄႇၶႂ်ႈလၢဝ်းယူႇ ၼႃႇလူင်လၢင်ဢေႃႈ။ ၶဝ်ဢမ်ႇဢွၼ်ၵၼ် ၶျုၵ်ႈဝႆႉတိၼ်ၶဝ်လႆႈ။ ပိူဝ်ႈၼႆလႄႈ ထႃႇဝရႃႉၽြႃး ဢမ်ႇထုၵ်ႇၸႂ်ၵျိူၵ်ႈၸႂ်။ မၼ်းၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်း တူႉၸရိူၵ်ႈဢၼ်ၶဝ်ႁဵတ်းၼၼ်ႉလႄႈ ၸႅတ်ႈထၢမ်ၶဝ်ၵွပ်ႈပိူဝ်ႈဢပႅတ်ႈၶဝ်ဢေႃႈ။-

11ထႃႇဝရႃႉၽြႃး မီးဢမိင်ႉတီႈၵဝ်ၸမ်ႉ၊ ယႃႇပေသူးတွင်းယွၼ်းဢဝ် ဢၼ်လီဢၼ်ငၢမ်းပုၼ်ႈ ၵူၼ်းမဵဝ်းၼႆႉ။-

12ယၢမ်းမိူဝ်ႈဢၼ် ၶဝ်ၵမ်တၢင်းၵိၼ်ၼၼ်ႉ ၵဝ်တၵ်းဢမ်ႇထွမ်ႇဢမ်ႇငိၼ်းသဵင် ဢၼ်ၶဝ်ႁွင်ႉသႅၼ်ႇၼၼ်ႉ။ ယၢမ်းမိူဝ်ႈဢၼ် ၶဝ်သၢၵ်ႈၵၢပ်ႈယိတ်ႈ ဢၼ်တုတ်ႇၽႆး ဢိၵ်ႇတင်း ၶိူင်ႈပုၵ်ႈၸေႃႇၼၼ်ႉၵေႃႈ၊ ၵဝ်တၵ်းဢမ်ႇႁပ်ႉတုင်းဢဝ်။ ၵဝ်တၵ်းႁႂ်ႈၶဝ်သုမ်းၸွမ်းလူၺ်ႈ ၽေးလၢပ်ႇ၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်းဢေႃႈ၊ ဝႃႈၼင်ႇၼႆသေယဝ်ႉ၊

13ၵဝ်ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃး တီႈၶႃ။၊ တူၺ်းလူး၊ ပရေႃးၽႅတ်ႈ တင်းလၢႆ ဢွၼ်ၵၼ်ႁေႃးလၢတ်ႈ တီႈၶဝ်ၼႆႉလႄႈဝႃႈ၊ သူဢမ်ႇလႆႈထူပ်းၽေးလၢပ်ႇၽေးလႅဝ်း။ သူဢမ်ႇလႆႈမီးၽေး တၢင်းဢၼ်ဢိုပ်းဢၼ်ယၢၵ်ႈ။ ၵဝ်တၵ်းပၼ်တၢင်းၼိမ် ဢၼ်မၼ်ႈဢၼ်ၶိူင်ႇ ၵႃႈတီႈၼႆႈဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆလႄႈ၊-

14ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊ ပရေႃးၽႅတ်ႈၸိူဝ်းၼၼ်ႉ ၸၢင်ႈဢွၼ်ၵၼ် ဢိင်ၼႃႇမႃႉၸိုဝ်ႈသဵင်ၵဝ်သေလႄႈ ႁေႃးလၢတ်ႈမူႉသႃႇဢေႃႈ။ ၵဝ်ဢမ်ႇပွႆႇၸႂ်ႉၶဝ်။ ၵဝ်ဢမ်ႇသင်ႇလၢတ်ႈဝႆႉတီႈၶဝ်။ ၵဝ်ဢမ်ႇပၼ်ပျႃႇတိၵ်ႈတီႈၶဝ်။ ၶဝ်ဢဝ်တၢင်းဢၼ်ပႅတ်ႉတႃလႅၼ်တႃ၊ တၢင်းဢၼ်ၽီၶဝ်ႈ၊ တၢင်းဢၼ် ၵျၢမ်ႇပွင်ဢၼ်လၢႆလၢႆဢမ်ႇပွင်ႇလွင်ႈၵႃႈသင်၊ တၢင်းဢၼ်ပႅတ်ႉလႅၼ်ၸွမ်းလူၺ်ႈ ၺၢၼ်ႇၶဝ်လွၼ်ႉလွၼ်ႉ ၼၼ်ႉသေလႄႈ ႁေႃးလၢတ်ႈဢေႃႈ။-

15ပိူဝ်ႈၼႆလႄႈ ထႃႇဝရႃႉၽြႃး ဢဝ်လွင်ႈပရေႃးၽႅတ်ႈ ဢၼ်ဢိင်ၼႃႇမႃႉၸိုဝ်ႈသဵင်ၵဝ် သေလႄႈ ႁေႃးလၢတ်ႈဢၼ် ၵဝ်ယင်းဢမ်ႇပွႆႇဢမ်ႇၸႂ်ႉၶဝ်လႄႈ ၶဝ်လၢတ်ႈလႄႈဝႃႈ၊ ၵႃႈတီႈမိူင်းၼႆႉဢမ်ႇလႆႈမီးၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ဝႃႈၼင်ႇၼႆ ၸိူဝ်းၼၼ်ႉလႄႈ မီးဢမိင်ႉၸမ်ႉ၊ ပရေႃးၽႅတ်ႈၸိူဝ်းၼၼ်ႉ တၵ်းသုမ်းၸွမ်းလူၺ်ႈ ၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈဢေႃႈ။-

16ၵူၼ်းတင်းလၢႆ ဢၼ်လႆႈထွမ်ႇ တၢင်းဢၼ်ပရေႃးၽႅတ်ႈ ၸိူဝ်းၼၼ်ႉ ႁေႃးလၢတ်ႈၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်ထိမ်ႈတူၵ်းၵႃႈၼႂ်းသဵၼ်ႈတၢင်း ဝဵင်း ယေႇရူႉသလႅမ်ႇ ၵွပ်ႈပိူဝ်ႈ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးလၢပ်ႇၽေးလႅဝ်းၼၼ်ႉ သေလႄႈ ၽူႈလႂ်သေၵေႃႉ ဢမ်ႇလႆႈသၢင်းၵျူဝ်ႇ ၸႃႉၸဵမ်တူဝ်ၶဝ်ၼၼ်ႉလႄႈ မေးၶဝ်၊ လုၵ်ႈၸၢႆးလုၵ်ႈယိင်းၶဝ်ၸိူဝ်းၼၼ်ႉ။ ၵဝ်တၵ်းဢဝ်ဢပႅတ်ႈၶဝ်ထွၵ်ႇႁိုဝ်ႈသႂ်ႇ ၵႃႈၼိူဝ်ၶဝ်ဢေႃႈ။-

17ၵႂၢမ်းဢၼ်မႂ်းတၵ်းလႆႈလၢတ်ႈတီႈၶဝ်ၸမ်ႉ၊ ႁႂ်ႈမၢၵ်ႇတႃၵဝ်ၼႆႉပဵၼ်ၼမ်ႉလႆတူၵ်းယူႇ တင်းဝၼ်းတင်းၶိုၼ်းသေၵမ်းလူၺ်ႈ။ ယႃႇႁႂ်ႈထၢတ်ႇသေၵမ်း။ လုၵ်ႈယိင်းသၢဝ်ၵူၼ်းမဵဝ်းၵဝ်ၼႆႉၼၼ်ႉ လႆႈၶၢမ်ႇတၢင်းဢၼ်လုပ်ႇမၼ်း ႁၵ်းၵႂႃႇလူၺ်ႈတၢင်းၸဵပ်း ဢၼ်ႁႅင်းၼႃႇလူင်လၢင်ၼၼ်ႉယဝ်ႉ။-

18ယၢမ်းမိူဝ်ႈဢၼ်ၵဝ်ၵႂႃႇၵႃႈတီႈၼွၵ်ႈ တီႈပၢင်ႇၼၼ်ႉၸိုင်၊ ၵဝ်လႆႈထူပ်းႁၼ်တူဝ်တၢႆ ဢၼ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉ လႄႈ ယၢမ်းမိူဝ်ႈဢၼ်ၵဝ် ၶဝ်ႈၵႃႈၼႂ်းဝဵင်းၼၼ်ႉၸိုင်၊ ၵဝ်လႆႈထူပ်းႁၼ်ၶဝ်ၸိူဝ်းဢၼ် မီးတၢင်းၶႆႈတၢင်းပဵၼ် လူၺ်ႈတၢင်းဢၼ်ဢိုပ်း ဢၼ်ယၢၵ်ႈၼၼ်ႉဢေႃႈ။ ပရေႃးၽႅတ်ႈ ဢိၵ်ႇတင်းယိတ်ႈပရေႃးႁဵၵ်ႈတင်းလၢႆ ယင်းဢမ်ႇႁူႉၵႃႈသင်လႃးလႃးလႄႈ ဢွၼ်ၵၼ်လႄႇလၢဝ်းၵႂႃႇ ၵူႈတီႈၵူႈလႅၼ်ဢေႃႈ။

19ၸဝ်ႈႁဝ်းတွပ်ႇပႅတ်ႈထဵင်ပႅတ်ႈ မိူင်း ယူႉတႃႉ တင်းသဵင်ႈတင်းမူတ်းယဝ်ႉ တီႈၶႃႈႁိုဝ်။ ႁူဝ်ၸႂ်ၸဝ်ႈႁဝ်းလီႁင်ႈ ဢဵတ်ႇသဵတ်ႇဝဵင်း ၸီႉဢုၼ်ႇ တီႈၶႃႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပၼ်တၢမ်ႇ တီႈၶႃႈၸဝ်ႈႁဝ်းၶဝ် ႁႂ်ႈထၼ်ႈပေႃး ဢမ်ႇလႆႈသၢၵ်ႈသႃႇၶႅၼ်းမႃး ၼင်ႇႁိုဝ်တီႈၶႃႈ၊ ပိၵ်ႉသမ်ႉၶႃႈၸဝ်ႈႁဝ်းၶဝ် မုင်ႈမွင်း တၢင်းဢၼ်ၼိမ် ဢၼ်လီသေၵေႃႈ၊ ဢမ်ႇလႆႈတၢင်းဢၼ်လီ ဢၼ်ငၢမ်းတီႈၶႃႈ၊ ပိၵ်ႉသမ်ႉမုင်ႈမွင်း ၵတ်းယဵၼ်ၶျၢမ်းသႃႇသေၵေႃႈ၊ လႆႈဢွၼ်ၵၼ်ထူပ်းၽေးဢူႉပၢတ်ႈၵူၺ်း တီႈၶႃႈဢေႃႈ။-

20ထႃႇဝရႃႉၽြႃး တီႈၶႃႈ၊ ၶႃႈၸဝ်ႈႁဝ်းၶဝ် ႁူႉတူႉၸရိူၵ်ႈၶႃႈၸဝ်ႈႁဝ်းၶဝ် ဢိၵ်ႇတင်းဢပႅတ်ႈ ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉယူႇ ဢမၢၼ်ႇၶၼ်ပဵၼ်တီႈၶႃႈဢေႃႈ။ ၶႃႈၸဝ်ႈႁဝ်းၶဝ် ၽိတ်းပိူင်ႈၸဝ်ႈႁဝ်းယဝ်ႉတီႈၶႃႈယဝ်ႉ။-

21ၵွပ်ႈပိူဝ်ႈ ၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ယႃႇပေလီႁင်ႈ ဢဵတ်ႇသဵတ်ႇၶႃႈၸဝ်ႈႁဝ်းၶဝ် သေၵမ်းတီႈၶႃႈ၊ ယႃႇပေၶျႃးသရေႇပလၢင်ႇ မုၼ်ၽုင်းၸဝ်ႈႁဝ်း တူၵ်းတီႈတႅမ်ႇသေၵမ်းတီႈၶႃႈ၊ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်းသေၵမ်းတီႈၶႃႈ၊ ၶႅၼ်းတေႃႈယႃႇပေယႃႉ ပတီႉၺိၺ်ႇၸဝ်ႈႁဝ်း ဢၼ်ႁဵတ်းလူၺ်ႈၵၼ် တင်းၶႃႈၸဝ်ႈႁဝ်းၶဝ်ၼၼ်ႉပႅတ်ႈ သေၵမ်းတီႈၶႃႈ၊-

22ၼႂ်းၶိူင်ႈပိူင် ဢၼ်လၢႆလၢႆ ဢမ်ႇပွင်ႇလွင်ႈၵႃႈသင် ဢၼ်ၵူၼ်းသႃႇသၼႃႇပႃႉတင်းလၢႆ ၵူဝ်းၵႂၢႆႇၸိူဝ်းၼၼ်ႉ မီးဢၼ်ႁႂ်ႈၽူၼ်တူၵ်းလႆႈႁိုဝ်။ ၽႃႉၵၢင်ႁၢဝ်ယူႇဢလူဝ်ႇလူဝ်ႇလႄႈ ယွတ်ႇၼမ်ႉၽူၼ်တူၵ်းလႆႈႁိုဝ်။ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ပဵၼ်ၸဝ်ႈႁဝ်းၵူၺ်းၵူၺ်း ဢမ်ႇၸႂ်ႈတီႈၶႃႈႁိုဝ်။ ပိူဝ်ႈၼႆလႄႈ ၶႃႈၸဝ်ႈႁဝ်းၶဝ် တၵ်းမုင်ႈမွင်းၸဝ်ႈႁဝ်းယူႇ တီႈၶႃႈဢေႃႈ။ ၸဝ်ႈႁဝ်းႁဵတ်းပဵၼ် လွင်ႈတၢင်းၸိူဝ်းၼႆႉ ၵူႈၸိူဝ်ႉၵူႈပိူင်တီႈၶႃႈဢေႃႈ။

← Chapter 13 Jump to: Chapter 15 →