Jeremiah 42

Shan

← Chapter 41 Jump to: Chapter 43 →

1မိူဝ်ႈၼၼ်ႉတပ်ႉမူးၵႃႈမီး ဢိၵ်ႇတင်း ယေႃးႁၼၼ်ႇ လုၵ်ႈၸၢႆး ၵႃႇရႃႇ၊ ယေႇၸၼီႉ လုၵ်ႈၸၢႆး ႁေႃးသေႇ တင်းၵူၼ်းလူင် ၵူၼ်းဢွၼ်ႇ တင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်သုတ်ႉၸပ်းသုတ်ႉၸူးလႄႈ လၢတ်ႈတီႈပရေႃးၽႅတ်ႈ ယေႇရမီႉ လႄႈဝႃႈ၊-

2ၵွပ်ႈပိူဝ်ႈဢၼ်ႁဝ်းၶႃႈ ၵိုတ်းၵျၢၼ်ႇဝႆႉၵႄႇၼႃႇလူင်လၢင် ၵႃႈၼႂ်းၶဝ်ၸိူဝ်းဢၼ်ၼမ်ၼႃႇ မိူဝ်ႈဢွၼ်တၢင်းၼၼ်ႉ ၵႃႈၼင်ႇဢၼ် ၸဝ်ႈႁဝ်းႁၼ်ၼႆႉလႄႈ၊ ၶႅၼ်းတေႃႈ ႁႂ်ႈတၢင်းဢၼ်ႁဝ်းၶႃႈတွင်းပၢၼ်ႇ ယွၼ်းဢဝ်ၼႆႉမီးတၢင်းဢၼ် ႁပ်ႉတုင်းဢဝ်ၵႃႈတီႈၽၢႆႇၼႃႈ ၸဝ်ႈႁဝ်းလႄႈ သူးတွင်းတီႈ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ပုၼ်ႈႁဝ်းၶႃႈ ဢၼ်ဝႃႈ ပုၼ်ႈၵူၼ်းၵႃႈဢၼ်ၵိုတ်းဢၼ်ၵျၢၼ်ႇၸိူဝ်းၼႆႉ၊-

3ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းလႆႈၼႄပျႃး သဵၼ်ႈတၢင်းဢၼ်ႁဝ်းၶႃႈ တၵ်းလႆႈၵႂႃႇ ဢိၵ်ႇတင်း လွင်ႈတၢင်းဢၼ်ႁဝ်းၶႃႈ တၵ်းလႆႈႁဵတ်းၼၼ်ႉ တီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။-

4ပရေႃးၽႅတ်ႈ ယေႇရမီႉ ၵေႃႈ လၢတ်ႈတီႈၶဝ်လႄႈဝႃႈ၊ ၵဝ်ငိၼ်းသူယဝ်ႉ။ ၵဝ်တၵ်းသူးတွင်းတီႈ ထႃႇဝရႃႉၽြႃး ၽြႃးပဵၼ်ၸဝ်ႈသူ ၸွမ်းၵႃႈၼင်ႇဢၼ် သူလၢတ်ႈၼႆႉဢေႃႈ။ ၵဝ်တၵ်းၶိုၼ်းလၢတ်ႈ ၵႃႈဢၼ် ထႃႇဝရႃႉၽြႃး မီးဢမိင်ႉ တီႈသူၼၼ်ႉတီႈသူဢေႃႈ။ ၵဝ်တၵ်းဢမ်ႇသိူင်ႇဢမ်ႇမႅပ်ႉဝႆႉ လွင်ႈတၢင်းသေၸိူဝ်ႉသေပိူင်၊ ဝႃႈၼင်ႇၼႆဢေႃႈ။-

5ၶဝ်ၵေႃႈဢွၼ်ၵၼ်လၢတ်ႈတီႈ ယေႇရမီႉ လႄႈဝႃႈ၊ ႁႂ်ႈထႃႇဝရႃႉၽြႃး ပဵၼ်သၢၵ်ႈသေႇ ဢၼ်ၸိုဝ်ႈဢၼ်ၸႂ်ႈလႄႈ ပႂ်ႉသဵတ်ႈၸႃႇ တီႈႁဝ်းၶႃႈ လူၺ်ႈလွင်ႈဢၼ်ႁဝ်းၶႃႈ တၵ်းႁဵတ်းၸွမ်း ၵႃႈၼင်ႇဢၼ် ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းသင်ႇလၢတ်ႈဝႆႉ တီႈႁဝ်းၶႃႈၼၼ်ႉ သေၵမ်းလူၺ်ႈ။-

6ဢမိင်ႉ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ ဢၼ်ပဵၼ်ၸဝ်ႈ ဢၼ်ႁဝ်းၶႃႈ ပွႆႇၸႂ်ႉၸဝ်ႈႁဝ်းၵႂႃႇၸူးၼၼ်ႉ ပဵၼ်ဢၼ်လီသေဢမ်ႇဝႃႈ၊ ပဵၼ်ဢၼ်ဢမ်ႇလီသေဢမ်ႇဝႃႈ၊ ႁဝ်းၶႃႈတၵ်းထွမ်ႇဢဝ်ၸွမ်းဢဝ် ႁႂ်ႈလႆႈၵတ်းယဵၼ်ၶျၢမ်းသႃႇ မိူဝ်ႈဢၼ် ႁဝ်းၶႃႈထွမ်ႇဢဝ်ၸွမ်းဢဝ် ဢမိင်ႉ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

7လိုၼ်းၼၼ်ႉ မိူဝ်ႈဢၼ်လႆႈ သိပ်းဝၼ်းယဝ်ႉၼၼ်ႉ၊ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ လႄႈ၊-

8မၼ်းႁွင်ႉဢဝ် ယေႃးႁၼၼ်ႇ လုၵ်ႈၸၢႆး ၵႃႇရႃႇ ၊ တပ်ႉမူး ၵႃႈဢၼ်ပႃးလူၺ်ႈၵၼ်တင်းမၼ်း ဢိၵ်ႇတင်း ၵူၼ်းလူင်ၵူၼ်းဢွၼ်ႇ တင်းသဵင်ႈတင်းလူင်မႃးလႄႈ လၢတ်ႈလႄႈဝႃႈ၊-

9ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢၼ်သူပွႆႇၸႂ်ႉၵဝ် ႁႂ်ႈလႆႈလဝ်ႊထၢမ်တၢင်းဢၼ် သူယွၼ်းဢဝ်ၼၼ်ႉ မီးဢမိင်ႉၸမ်ႉ၊-

10ပေႃးသူယူႇ ၵႃႈတီႈမိူင်းၼႆႉ ဢမၢၼ်ႇၶၼ်ပဵၼ်ၸိုင်၊ ၵဝ်တၵ်းတႄႇႁဵတ်းသူလႄႈ ဢမ်ႇၵိူၼ်ႇဢမ်ႇယႃႉသူပႅတ်ႈ။ ၵဝ်တၵ်းၽုၵ်ႇသွမ်ႈသူလႄႈ ဢမ်ႇထွတ်ႇဢမ်ႇထူၺ်ႈသူပႅတ်ႈ။ ၵဝ်ၶုၵ်းၸႂ်လႆႈမႆႈၸႂ် ၵွပ်ႈပိူဝ်ႈၽေးတၢမ်ႇ ဢၼ်ၵဝ်ႁႂ်ႈႁွတ်ႈထိုင် ၵႃႈၼိူဝ်သူၼၼ်ႉဢေႃႈ။-

11ယႃႇပေၵူဝ်ပေႁႄ ၶုၼ်ႁေႃၶမ်း ပႃႇပူႉလုၼ်ႇ ဢၼ်သူၸၢင်ႈၵူဝ်ႁႄၼၼ်ႉ။ ထႃႇဝရႃႉၽြႃး မီးဢမိင်ႉၸမ်ႉ၊ ယႃႇပေၵူဝ်ပေႁႄမၼ်းၼၼ်ႉ။ ၵဝ်မီးယူႇလူၺ်ႈၵၼ်တင်းသူ ႁႂ်ႈလႆႈၵႄႇသႄႇၶျွတ်ႈဢဝ်သူလႄႈ ၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းမၼ်းၼၼ်ႉဢေႃႈ။-

12ၵဝ်တၵ်း ဢဵတ်းလူၵႄႇသႄႇၸွႆႈထႅမ်သူ ႁႂ်ႈမၼ်းၼၼ်ႉလႆႈမီးတၢင်းဢၼ် ဢဵတ်းလူသူသေလႄႈ ႁႂ်ႈသူၶိုၼ်းမိူဝ်း ၵႃႈတီႈမိူင်းတီႈယူႇသူဢေႃႈ။-

13ပေႃးဢမ်ႇၼၼ် ပေႃးသူလၢတ်ႈလႄႈဝႃႈ၊ ႁဝ်းတၵ်းဢမ်ႇယူႇၵႃႈၼႂ်းမိူင်းၼႆႉ၊ ဝႃႈၼင်ႇၼႆယူႇ တေႃႇထိုင်ႁွတ်ႈထၼ်ႈပေႃး ဢမ်ႇထွမ်ႇဢမ်ႇဢဝ် ၵႂၢမ်းဢမိင်ႉ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းလႄႈ လၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ။-

14ႁဝ်းတၵ်း ၵႂႃႇၵႃႈတီႈမိူင်း ဢေႇၵိပ်ႉတူႉ တီႈဢၼ်ဢမ်ႇထူပ်းဢမ်ႇႁၼ် ဢမူႉသိုၵ်း၊ ဢမ်ႇငိၼ်းသဵင်ပဝ်ႇၼႄးၶရႃႇ၊ ဢမ်ႇဢိုပ်းဢမ်ႇယၢၵ်ႈၼၼ်ႉလႄႈ ယူႇၵႃႈတီႈၼၼ်ႈဢေႃႈ၊ ဝႃႈၼင်ႇၼႆၸိုင်၊-

15ၵူၼ်းမဵဝ်း ယူႉတႃႉ ဢၼ်ယင်းၵိုတ်းယင်းၵျၢၼ်ႇၶဝ်ဢိူၺ်း၊ ဢွၼ်ၵၼ် ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ပေႃးသူဝၢႆႇၼႃႈသူ ႁႂ်ႈလႆႈၵႂႃႇၸူးၵႃႈတီႈမိူင်း ဢေႇၵိပ်ႉတူႉ တိၵ်းတိၵ်း ယူႇသေလႄႈ ၵႂႃႇႁႂ်ႈလႆႈသွၼ်ႈပိုင်ႈယူႇၵႃႈတီႈမိူင်းၼၼ်ႉ ဢမၢၼ်ႇၶၼ်ပဵၼ်ၸိုင်၊-

16ၽေးလၢပ်ႇၽေးလႅဝ်း ဢၼ်သူၵူဝ်ႁႄၼၼ်ႉ တၵ်းၶိုတ်းသူၵႃႈတီႈမိူင်း ဢေႇၵိပ်ႉတူႉ လႄႈ ၽေးတၢင်းဢၼ်ဢိုပ်းဢၼ်ယၢၵ်ႈဢၼ်သူၵူဝ်ႁႄၼၼ်ႉၵေႃႈ တၵ်းလိုပ်ႈၸွမ်းလမ်းၸွမ်းသူၵႂႃႇ ၵႃႈတီႈမိူင်း ဢေႇၵိပ်ႉတူႉ ၼၼ်ႉ တိၵ်းတိၵ်းလႄႈ သူတၵ်းလႆႈတၢႆ ၵႃႈတီႈမိူင်းၼၼ်ႉဢေႃႈ။-

17ၶဝ်ၸိူဝ်းဢၼ် ဝၢႆႇၼႃႈၶဝ်ၵႂႃႇၸူး ၵႃႈတီႈမိူင်း ဢေႇၵိပ်ႉတူႉ ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႈ ၵႃႈမီးၼၼ်ႉ တၵ်းလႆႈဢွၼ်ၵၼ်တၢႆလူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်းဢေႃႈ။ ၽူႈလႂ်သေၵေႃႉသေၵူၼ်း ဢမ်ႇလႆႈလွတ်ႈတင်း ၽေးတၢမ်ႇဢၼ်ၵဝ် တၵ်းႁႂ်ႈႁွတ်ႈထိုင် ၵႃႈၼိူဝ်ၶဝ်ၼၼ်ႉ။ ဢမ်ႇလႆႈမီးၵေႃႉဢၼ်ၵိုတ်းဝႆႉၵျၢၼ်ႇဝႆႉသေၵေႃႉသေၵူၼ်း။-

18ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ မိူၼ်ၸိူဝ်ႉၼင်ႇဢၼ် တၢင်းၶႆႈၸႃႉၶႆႈၸဵတ်ႈၵဝ် ဢိၵ်ႇတင်း ဢၢႆႁႅင်းတေႃးသႃႉ တၢင်းၸႂ်မႆႈၵဝ် မီးတၢင်းဢၼ်သွၼ်းလေႃႇ ၵႃႈၼိူဝ်ၵူၼ်းဝဵင်း ယေႇရူႉသလႅမ်ႇ တင်းလၢႆၼၼ်ႉ၊ တေႃးသႃႉ တၢင်းၸႂ်မႆႈၵဝ် တၵ်းမီးတၢင်းဢၼ် သွၼ်းလေႃႇ ၵႃႈၼိူဝ်သူ ၼႂ်းမိူဝ်ႈဢၼ်သူ ၶဝ်ႈၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈ သူတၵ်းလႆႈပဵၼ် တီႈဢၼ်လႃႇလင်၊ တီႈဢၼ်လီဢၢမ်း၊ တီႈဢၼ်ၵိၼ်ႇဝႃႈ၊ တီႈဢၼ်သႄႉသွမ်းဢေႃႈ။ ၵမ်းလိုၼ်းသူ ဢမ်ႇလႆႈၶိုၼ်းထူပ်း ၶိုၼ်းႁၼ် ၵႃႈတီႈၼႆႈ။-

19ၵူၼ်းမဵဝ်း ယူႉတႃႉ ဢၼ်ယင်းၵိုတ်းယင်းၵျၢၼ်ႇၶဝ်ဢိူၺ်း၊ ထႃႇဝရႃႉၽြႃး မီးဢမိင်ႉလူၺ်ႈလွင်ႈသူလႄႈဝႃႈ၊ ယႃႇပေဢွၼ်ၵၼ်ၵႂႃႇ ၵႃႈတီႈမိူင်း ဢေႇၵိပ်ႉတူႉ ပုၼ်ႉ၊ ဝႃႈၼင်ႇၼႆဢေႃႈ။ သူဢွၼ်ၵၼ်ႁူႉမၢတ်ႈလွင်ႈဢၼ်ၵဝ်ၼႆႉ ၶၢမ်ႇသၢၵ်ႈသေႇတီႈသူ ဝၼ်းမိူဝ်ႈၼႆႉၼၼ်ႉဝႆႉတႃႉ။-

20တူဝ်သူပႅတ်ႉလႅၼ်ႁူဝ်ၸႂ်သူယဝ်ႉ။ လွင်ႈမၼ်းၸမ်ႉ သူပွႆႇၸႂ်ႉၵဝ်ၸူး ၵႃႈတီႈ ထႃႇဝရႃႉၽြႃး ၽြႃးပဵၼ်ၸဝ်ႈ သူလႄႈဢွၼ်ၵၼ်လၢတ်ႈလႄႈဝႃႈ၊ သူးတွင်းတီႈ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ ပုၼ်ႈႁဝ်းၶႃႈသေၵမ်း။ ၶိုၼ်းမွၵ်ႇလၢတ်ႈၸွမ်းၵႃႈဢၼ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ မီးဢမိင်ႉၼၼ်ႉ သေၵမ်း။ ႁဝ်းၶႃႈတၵ်းထွမ်ႇဢဝ် ၸွမ်းဢဝ်ဢေႃႈ၊ ဝႃႈၼင်ႇၼႆလႄႈ၊-

21ၵဝ်ၶိုၼ်း မွၵ်ႇလၢတ်ႈလွင်ႈမၼ်းတီႈသူ ဝၼ်းမိူဝ်ႈၼႆႉဢေႃႈ။ ၵူၺ်းၵႃႈ သူယင်းဢမ်ႇထွမ်ႇဢမ်ႇဢဝ် ဢမိင်ႉ ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်မၼ်းၸဝ်ႈဢဝ်ၵဝ်သင်ႇလၢတ်ႈဝႆႉ တီႈသူၼၼ်ႉ သေၸိူဝ်ႉသေပိူင်လႄႈ ယူႇလူင်ပႄႇ။-

22ပိူဝ်ႈဢၼ် ပဵၼ်ၼင်ႇၼၼ်လႄႈ သူဢွၼ်ၵၼ်ႁူႉမၢတ်ႈလွင်ႈ ဢၼ်သူတၵ်းလႆႈ တၢႆလူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်း ၵႃႈၼႂ်းတီႈဢၼ်သူၶၢႆႉၵႂႃႇ သွၼ်ႈပိုင်ႈယူႇၼၼ်ႉ ဢမၢၼ်ႇၶၼ်ပဵၼ်တႃႉ၊ ဝႃႈၼင်ႇၼႆဢေႃႈ။

← Chapter 41 Jump to: Chapter 43 →