Jeremiah 15 — Shan

1လႆႈသမ်ႉ ထႃႇဝရႃႉၽြႃး မီးဢမိင်ႉတီႈၵဝ်ၸမ်ႉ၊ ပိၵ်ႉသမ်ႉ မူဝ်းသေႇ ဢိၵ်ႇတင်း သမူၺ်ႇလႃႉ ၸုၵ်းၵူမ်ႈယူႇ ၵႃႈတီႈၽၢႆႇၼႃႈၵဝ်သေၵေႃႈ၊ ႁူဝ်ၸႂ်ၵဝ် တၵ်းဢမ်ႇဝၢႆႇၸူးဝၢႆႇတေႃႇၵူၼ်းမဵဝ်းၼႆႉ။ ႁေႃႈၶဝ်ဢွၵ်ႇသေၵႃႈတီႈၵဝ်လႄႈ ႁႂ်ႈၶဝ်ဢွၵ်ႇၵႂႃႇသေတႃႉ။-

2ပေႃးၶဝ်တွင်ႈထၢမ်တီႈမႂ်းလႄႈဝႃႈ၊ ႁဝ်းၶႃႈတၵ်းလႆႈဢွၵ်ႇၵႂႃႇၸူးၵႃႈတီႈလႂ်ၶႃႈ၊ ဝႃႈၼင်ႇၼႆၸိုင်၊ မႂ်းတၵ်းလႆႈသင်ႇလၢတ်ႈဝႆႉ တီႈၶဝ်လႄႈဝႃႈ၊ ထႃႇဝရႃႉၽြႃး မီးဢမိင်ႉဝႆႉၸမ်ႉ၊ ၶဝ်ၸိူဝ်းဢၼ်ထုၵ်ႇတၢႆၼၼ်ႉ ဢွၵ်ႇၵႂႃႇၸူးၵႃႈတီႈတၢင်းတၢႆ၊ ၶဝ်ၸိူဝ်းဢၼ်ထုၵ်ႇၶၢမ်ႇတၢင်းဢၼ် ၶႃႈၽၼ်းပႅတ်ႈလူၺ်ႈလၢပ်ႇ လူၺ်ႈလႅဝ်းၼၼ်ႉ ဢွၵ်ႇၵႂႃႇၸူး ၵႃႈတီႈတၢင်းဢၼ် ၶၢမ်ႇတၢင်းဢၼ်ၶႃႈၽၼ်းပႅတ်ႈလူၺ်ႈလၢပ်ႇလူၺ်ႈလႅဝ်း၊ ၶဝ်ၸိူဝ်းဢၼ် ထုၵ်ႇဢိုပ်းထုၵ်ႇယၢၵ်ႈၼၼ်ႉ ဢွၵ်ႇၵႂႃႇၸူးၵႃႈတီႈ တၢင်းဢၼ်ဢိုပ်းဢၼ်ယၢၵ်ႈ၊ ၶဝ်ၸိူဝ်းဢၼ် ထုၵ်ႇၶၢမ်ႇတၢင်းဢၼ် သိမ်းဢဝ်ၶျုၵ်ႈဝႆႉၼၼ်ႉ ဢွၵ်ႇၵႂႃႇၸူးၵႃႈတီႈ တၢင်းဢၼ်ၶၢမ်ႇ တၢင်းဢၼ်သိမ်းဢဝ်ၶျုၵ်ႈဝႆႉတႃႉ၊ ဝႃႈၼင်ႇၼႆဢေႃႈ။-

3ၵဝ်တၵ်းၶၢၼ်းဝႆႉ ရၢၼ်ႇသူႇသီႇမဵဝ်းဢၼ်ဝႃႈ လၢပ်ႇလႅဝ်းဢၼ်လႆႈဢဝ်ၶဝ်တၢႆ၊ မႃဢၼ်လႆႈၶူပ်းၸၼ်သိၵ်ႇၶၢတ်ႇ၊ ၼူၵ်ႉၵၢင်ႁၢဝ်၊ ဢိၵ်ႇတင်းတူဝ်ႁၢႆႉ ဢၼ်လႆႈၶူပ်းၵိၼ်လႄႈ ယႃႉပႅတ်ႈၸိူဝ်းၼၼ်ႉ ဝႆႉၵႃႈၼိူဝ်ၶဝ်ဢေႃႈ။-

4ၵဝ်တၵ်း ႁႂ်ႈၶဝ်လႆႈၶၢမ်ႇတၢင်းဢၼ် ဢဝ်ထိမ်ႈၵႂႃႇထိမ်ႈၶိုၼ်း ယူႇၵႃႈၼႂ်းၵူႈသိုင်ႇၵူႈမိူင်း ၵႃႈၼိူဝ်လိၼ်မိူင်းၵွပ်ႈပိူဝ်ႈ လွင်ႈတၢင်းဢၼ်ၶုၼ် မၼႃႇသေႇ လုၵ်ႈၸၢႆး ႁေႇၸၵီႉ ၶုၼ်ႁေႃၶမ်း ယူႉတႃႉ ၼၼ်ႉ ႁဵတ်းၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

5ဝဵင်း ယေႇရူႉသလႅမ်ႇ ဢိူၺ်း၊ ၽူႈလႂ်တၵ်းဢဵတ်းလူမႂ်း။ ၽူႈလႂ်တၵ်းၶၢင်းၶီၶၢင်းၽၢၼ် လူၺ်ႈလွင်ႈမႂ်း။ ၽူႈလႂ်တၵ်းဝႄႈၸူးငႅၵ်းၸူး ႁႂ်ႈလႆႈထၢမ်လႄႈဝႃႈ၊ မႂ်းယူႇလီၵိၼ်ဝၢၼ်ယူႇႁိုဝ်။ ဝႃႈၼင်ႇၼႆၼၼ်ႉ။-

6ထႃႇဝရႃႉၽြႃး မီးဢမိင်ႉၸမ်ႉ၊ မႂ်းၸုၼ်ႉပႅတ်ႈၵဝ်လႄႈ သုတ်ႉၶိုၼ်းၵႂႃႇယဝ်ႉ။ ပိူဝ်ႈၼႆလႄႈ ၵဝ်ယဵတ်ႇမိုဝ်းၵဝ်တေႃႇမႂ်းလႄႈ ယႃႉမႂ်းပႅတ်ႈယဝ်ႉ။ ၵဝ်မိူဝ်ႇၸၢၼ်ႈလွင်ႈဢၼ် ၶုၵ်းၸႂ်လႆႈမႆႈၸႂ်ၵွပ်ႈ ၼၼ်ႉယဝ်ႉ။-

7ၵဝ်ဢဝ်လူင်ႈၽတ်း ၽတ်းၶဝ်ႈၵႃႈၼႂ်းႁူးၽၵ်းတူဝဵင်းယဝ်ႉ။ ၵဝ်ႁႂ်ႈလုၵ်ႈလၢင်းၶဝ် သုမ်းၸွမ်းလႄႈ ယႃႉၵူၼ်းမဵဝ်းၵဝ်ပႅတ်ႈၵွပ်ႈပိူဝ်ႈ ဢၼ်ၶဝ်ဢမ်ႇဝၢႆႇၶိုၼ်းသေၵႃႈတီႈ သဵၼ်ႈတၢင်းဢၼ်ၶဝ်ၸွမ်းၵႂႃႇၼၼ်ႉသေလႄႈမႃး ၼၼ်ႉယဝ်ႉ။-

8မႄႈမူၵ်းမႄႈမၢႆႈၶဝ်ၼၼ်ႉ ပဵၼ်ဢၼ်ၼမ်ၼႃႇ ၵႃႈတီႈၽၢႆႇၼႃႈၵဝ် လိူဝ်တွၼ်းၼႃႇသေ မဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇ ၼၼ်ႉယဝ်ႉ။ ၵဝ်ႁွင်ႉဢဝ်ၵေႃႉဢၼ် ႁိမ်ဢဝ်ႁူင်ႇဢဝ် ၶိင်ႇၵၢင်ဝၼ်းတဵင်ႈၼၼ်ႉ မႃးတိုၵ်းတေႃး မႄႈၵူၼ်းၼုမ်ႇၵူၼ်းၵမ် တင်းလၢႆလႄႈ ႁႂ်ႈပဵၼ် တၢင်းဢၼ်လီၵူဝ်လီႁႄ၊ တၢင်းဢၼ်ယၢပ်ႇၸႂ်ၶၢၼ်ၸႂ်ၶီႉၶႃႉ တူၵ်းႁွတ်ႈၵႃႈၼိူဝ်မၼ်း ၵမ်းလဵဝ်ယဝ်ႉ။-

9မႄႈယိင်း ဢၼ်ၵိူတ်ႇလဵင်ႉလုၵ်ႈလဵင်ႉလၢင်း ၸဵတ်းၵေႃႉၼၼ်ႉ ႁႅင်းဢူၼ်ႈႁႅင်းယွမ်းၵႂႃႇလႄႈ ၶျုၵ်ႈၸႂ်မၼ်းယဝ်ႉ။ ၵၢင်ဝၼ်းမၼ်းၼၼ်ႉ တူၵ်းၸဵမ်မိူဝ်ႈၸူဝ်ႈဢၼ် ဢမ်ႇပႆႇႁွတ်ႈထိုင်ၶိင်ႇၵၢင်ၶမ်ႈယဝ်ႉ။ မၼ်းၼၼ်ႉ လႆႈဢူၵ်းဢၢႆလႄႈ ၵႂင်ၸႂ်ယုင်ႈၸႂ်ယူႇဢေႃႈ။ ၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇ ၸိူဝ်းၼၼ်ႉၵေႃႈ ၵဝ်တၵ်းဢဝ်ဢၢပ်ႈပၼ် တီႈလၢပ်ႇတီႈလႅဝ်း ၵႃႈတီႈၽၢႆႇၼႃႈရၢၼ်ႇသူႇၶဝ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

10မႄႈဢိူၺ်း၊ ၵဝ်ၼႆႉ မီးဢႃႉမင်ႇၵလႃႇဢေႃႈ။ မႄႈႁဝ်းၵိူတ်ႇလဵင်ႉၵဝ် ဢၼ်ပဵၼ်ၵေႃႉဢၼ်တွပ်ႇထဵင်၊ ၵေႃႉဢၼ်ၽိတ်းပိူၼ်ႈ တင်းမိူင်းၼႆႉမႃးယဝ်ႉ။ ၵဝ်ဢမ်ႇၵူႈဢဝ်ယိမ်ဢဝ်တီႈပိူၼ်ႈ။ ပိူၼ်ႈၵေႃႈ ဢမ်ႇၵူႈဢဝ်ယိမ်ဢဝ်တီႈၵဝ်။ ၵူၺ်းၵႃႈ ၵူၼ်းတင်းသဵင်ႈတင်းလူင် ၸၢင်ႈဢွၼ်ၵၼ် ၵိၼ်ႇလႃႇၵိၼ်ႇဝႃႈတီႈၵဝ်ဢေႃႈ။-

11ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းပၼ်ႁႂ်ႈမႂ်း ၵတ်းယဵၼ်ၶျၢမ်းသႃႇ ဢမၢၼ်ႇၶၼ်ပဵၼ်ဢေႃႈ။ ၵဝ်တၵ်း ၸီႇယၢင်ႇႁႂ်ႈရၢၼ်ႇသူႇမႂ်း လႆႈတွင်းပၢၼ်ႇတီႈမႂ်း ၼႂ်းမိူဝ်ႈဢၼ် ၽေးႁွတ်ႈထိုင်၊ ဢိၵ်ႇတင်း မိူဝ်ႈဢၼ်လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးၼၼ်ႉ ဢမၢၼ်ႇၶၼ်ပဵၼ်ဢေႃႈ။-

12လဵၵ်းၸိုင် ဢဝ်လဵၵ်းမိူင်းတၢင်းႁွင်ႇ ဢိၵ်ႇတင်း တွင်းလိူင်ၼၼ်ႉ ႁၵ်းလႆႈႁိုဝ်။-

13ၵဝ်တၵ်းဢဝ် ဢုၵ်ႉၸႃႇၽၼ်ႇတႃႇမႂ်း ဢၢပ်ႈပၼ်ၵႃႈၼႂ်းမိုဝ်း ၵေႃႉဢၼ် ယင်းဢမ်ႇပၼ်ၵႃႈပၼ်ႁူဝ်မၼ်းလႄႈ ႁိမ်ဢဝ်လႆႈၼၼ်ႉ ၵွပ်ႈပိူဝ်ႈဢပႅတ်ႈမႂ်း ၵႃႈဢၼ်မႂ်းႁဵတ်းၵႃႈၼႂ်းမိူင်းမႂ်း ၵူႈတီႈၵူႈလႅၼ်ၼၼ်ႉဢေႃႈ။-

14ၵဝ်တၵ်းႁႂ်ႈမႂ်း ၸွမ်းလူၺ်ႈၵၼ်တင်းရၢၼ်ႇသူႇမႂ်း ၵႂႃႇၵႃႈၼႂ်းမိူင်းဢၼ်မႂ်းဢမ်ႇႁူႉၼၼ်ႉဢေႃႈ။ ၽႆးတၵ်းၸပ်းၵွပ်ႈပိူဝ်ႈ တၢင်းၸႂ်မႆႈၶႆႈၸႃႉၶဝ်ၼၼ်ႉလႄႈ ၽႆးၼၼ်ႉ တၵ်းႁုပ်ႇမႆႈသူဢေႃႈ။-

15ထႃႇဝရႃႉၽြႃး တီႈၶႃႈ၊ ၸဝ်ႈႁဝ်းႁူႉတီႈၶႃႈဢေႃႈ။ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈယူႇသေလႄႈ မႃးလူမႃးတူၺ်းၶႃႈၸဝ်ႈလႄႈ ပၼ်တၢမ်ႇတီႈၶဝ်ၸိူဝ်းဢၼ် ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉ ၸွမ်းၼင်ႇတြႃးသေၵမ်းတီႈၶႃႈ၊ ယႃႇပေယိူၼ်ႉၶၢမ်ႇယူႇ သေလႄႈ တီႇၽဵဝ်ႈၶႃႈၸဝ်ႈပႅတ်ႈသေၵမ်းတီႈၶႃႈ၊ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၶႃႈၸဝ်ႈ လႆႈၶၢမ်ႇတၢင်းဢၼ် သႄႉသွမ်းၵွပ်ႈပိူဝ်ႈၸဝ်ႈႁဝ်းၼၼ်ႉ သေၵမ်းတီႈၶႃႈ၊-

16ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးတီႈၶႃႈ၊ ၶႃႈၸဝ်ႈထူပ်းႁၼ် ၼုၵ်ႈၵပၢတ်ႈၸဝ်ႈႁဝ်းလႄႈ ဢဝ်ၵိၼ်တီႈၶႃႈယဝ်ႉ။ ၼုၵ်ႈၵပၢတ်ႈၸဝ်ႈႁဝ်းၼၼ်ႉ ပဵၼ်လွင်ႈဢၼ် ၶႃႈၸဝ်ႈလီၸူမ်းသိူဝ်း သႂၢင်ႇၸႂ်တီႈၶႃႈဢေႃႈ။ ၶႃႈၸဝ်ႈလႆႈၶၢမ်ႇတၢင်းဢၼ် ႁွင်ႉႁဵၵ်ႈလူၺ်ႈ ၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶႃႈဢေႃႈ။-

17ၶႃႈၸဝ်ႈဢမ်ႇၼင်ႈၵႃႈတီႈၼႂ်း ဢၼ်ၸူႉဢၼ်တုမ်ၶဝ်ၸိူဝ်းဢၼ် ဢမ်ႇၼပ်ႉဢမ်ႇၶၢၼ်းၼၼ်ႉလႄႈ ႁဵတ်းတၢင်းဢၼ်မူၼ်ႈဢၼ်ပျေႃႇတီႈၶႃႈ၊ ၶႃႈၸဝ်ႈၼင်ႈယူႇၵေႃႉလဵဝ်ၵူၺ်းၶႃႈၸဝ်ႈ ၵွပ်ႈပိူဝ်ႈဢၼ်ၸဝ်ႈႁဝ်း ဢဝ်မိုဝ်းတၢင်ႇသႂ်ႇၼၼ်ႉတီႈၶႃႈယဝ်ႉ။ ၸဝ်ႈႁဝ်းႁႂ်ႈၶႃႈၸဝ်ႈတဵမ်ဝႆႉတင်း တေႃးသႃႉတၢင်းၸႂ်မႆႈတီႈၶႃႈယဝ်ႉ။-

18ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ဝူၺ်ႇတၼႃႇ ၶႃႈၸဝ်ႈမၼ်ႈၶိူင်ႇယူႇလႄႈ တၢင်းၸဵပ်းၶႃႈၸဝ်ႈ ဢၼ်ၸၢင်ႈတွပ်ႇၸၢင်ႈထဵင် တၢင်းဢၼ် ၸိုၼ်ႈမႃးၶႅၼ်းမႃးၼၼ်ႉ ယင်းဢမ်ႇႁၢႆၵႂႃႇလႆႈၼၼ်ႉၼင်ႇႁိုဝ်တီႈၶႃႈ၊ ၸဝ်ႈႁဝ်းပဵၼ်ၸိူဝ်ႉၼင်ႇၼမ်ႉႁွင်ႈ ဢၼ်ၸၢင်ႈ ပႅတ်ႉလႅၼ် ဢိၵ်ႇတင်း ၸိူဝ်ႉၼင်ႇၼမ်ႉဢၼ်ႁၢႆၵႂႃႇၼၼ်ႉ တီႈၶႃႈၸဝ်ႈ ဢမၢၼ်ႇၶၼ်ပဵၼ်တီႈၶႃႈႁိုဝ်။-

19ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉၸမ်ႉ၊ ပေႃးမႂ်းၶိုၼ်းမႃးၸိုင်၊ ၵဝ်တၵ်းဢဝ်မႂ်းၶိုၼ်းမႃး ႁႂ်ႈမႂ်းလႆႈၸုၵ်းၵူမ်ႈယူႇ ၵႃႈတီႈၽၢႆႇၼႃႈၵဝ်ဢေႃႈ။ ပေႃးမႂ်းၽႄဢဝ် လွင်ႈတၢင်းဢၼ်မျၢတ်ႈဢွၵ်ႇသေၵႃႈၼႂ်း လွင်ႈတၢင်းဢၼ်ယုတ်ႈတင်းလၢႆၸိုင်၊ မႂ်းတၵ်းလႆႈပဵၼ် မိူၼ်ၸိူဝ်ႉၼင်ႇသူပ်းၵဝ်ဢေႃႈ။ ၶဝ်ၼၼ်ႉ တၵ်းဢွၼ်ၵၼ်ၶိုၼ်းမႃးၸူးတီႈမႂ်းလႄႈ မႂ်းဢမ်ႇလႆႈၶိုၼ်းၵႂႃႇၸူးတီႈၶဝ်။-

20ၵဝ်တၵ်းႁႂ်ႈမႂ်းပဵၼ် လမ်းဝဵင်းတွင်းလိူင် ဢၼ်မၼ်ႈၶိူင်ႇယူႇၽၢႆႇၼိုင်ႈ တင်းၵူၼ်းမဵဝ်းၼႆႉဢေႃႈ။ ၶဝ်တၵ်း ဢွၼ်ၵၼ်တိုၵ်းတေႃးမႂ်းလႄႈ တၵ်းဢမ်ႇလႆႈပႄႉလႆႈၼႅင်ႇမႂ်း။ ၵဝ်မီးယူႇၽၢႆႇမႂ်း ႁႂ်ႈလႆႈၼုၵ်ႈဢဝ်ၶျွတ်ႈဢဝ်မႂ်းဢေႃႈ။-

21ၵဝ်တၵ်းၼုၵ်ႈဢဝ်မႂ်းလွတ်ႈသေ ၵႃႈၼႂ်းမိုဝ်း ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉလႄႈ ထုတ်ႇဢဝ်ၶဝ်ဢွၵ်ႇသေ ၵႃႈၼႂ်းမိုဝ်းၶဝ်ၸိူဝ်းဢၼ် လီၵူဝ်လီႁႄၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။