Jeremiah 23 — Shan

1ထႃႇဝရႃႉၽြႃး မီးဢမိင်ႉၸမ်ႉ၊ ၶဝ်ၸိူဝ်းဢၼ် လဵင်ႉသူဝ်းထိင်းသူဝ်း ဢၼ်ယႃႉပႅတ်ႈလႄႈ ႁႂ်ႈသူဝ်းဢၼ်ယၢမ်ႈၵိၼ်ယူႇ ၵႃႈတီႈၵဝ်တင်းလၢႆ မၢၵ်ႇမိူဝ်ၵႂႃႇၼၼ်ႉ မီးဢႃႉမင်ႇၵလႃႇဢေႃႈ။-

2ပိူဝ်ႈၼႆလႄႈ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉ လူၺ်ႈလွင်ႈၶဝ်ၸိူဝ်းဢၼ် လဵင်ႉသူဝ်းထိင်းသူဝ်းဢၼ်လႆႈလဵင်ႉလူၵူၼ်းၵဝ် တင်းလၢႆၼၼ်ႉၸမ်ႉ၊ သူႁႂ်ႈၽုင်သူဝ်းၵဝ်မၢၵ်ႇမိူဝ်ၵႂႃႇ၊ ႁေႃႈၶဝ်ပႅတ်ႈ၊ ဢမ်ႇလူတူၺ်းလုမ်းလႃးၶဝ်လႄႈ၊ တူၺ်းလူး၊ ၵဝ်တၵ်းႁႂ်ႈ တူႉၸရိူၵ်ႈဢပႅတ်ႈ ဢၼ်သူႁဵတ်းၼၼ်ႉ တူၵ်းႁွတ်ႈၵႃႈၼိူဝ်သူဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

3ၵဝ်တၵ်းႁႂ်ႈ ၽုင်သူဝ်းဢၼ် ယင်းၵိုတ်းယင်းၵျၢၼ်ႇၼၼ်ႉ ဢွၵ်ႇသေၵႃႈၼႂ်းမိူင်းၵႃႈမီး ဢၼ်ၵဝ်ႁေႃႈၶဝ်ၵႂႃႇၸူးၼၼ်ႉ မႃးၸူႉၵၼ်တုမ်ၵၼ်လႄႈ သမ်ႉတၵ်းဢဝ်ၶဝ်ၶိုၼ်းမႃးၸူး ၵႃႈတီႈၶွၵ်ႈသူဝ်း တီႈယူႇၶဝ်ၼၼ်ႉဢေႃႈ။ ၶဝ်ၵေႃႈတၵ်းဢွၼ်ၵၼ် ၵိူတ်ႇလဵင်ႉလုၵ်ႈလဵင်ႉလၢင်းလႄႈ ၼမ်ၵိုၼ်းမႃးဢေႃႈ။-

4ၵဝ်တၵ်းၶၢၼ်းၶဝ်ၸိူဝ်းဢၼ် လဵင်ႉသူဝ်းထိင်းသူဝ်းဢၼ်လဵင်ႉလူၶဝ်ၼၼ်ႉဝႆႉ ၵႃႈၼိူဝ်ၶဝ်လႄႈ ၶဝ်ၼၼ်ႉ ၵမ်းလိုၼ်း ဢမ်ႇလႆႈၵူဝ်လႆႈႁႄ။ ဢမ်ႇလႆႈတူၵ်းၸႂ်လႂ်တိုၼ်ႇ။ ဢမ်ႇလႆႈၶၢမ်ႇတၢင်းဢၼ် ႁူင်ႈၵႂႃႇႁၢႆၵႂႃႇ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

5ထႃႇဝရႃႉၽြႃး မီးဢမိင်ႉၸမ်ႉ၊ မိုဝ်ႉဝၼ်းဢၼ်ၵဝ် တၵ်းႁႂ်ႈယွတ်ႈဢၼ်သိုဝ်ႈတေႃႇ တႅၵ်ႇဢွၵ်ႇပုၼ်ႈ တႃႇဝိတ်ႈ လႄႈ မၼ်းၼၼ်ႉ တၵ်းႁဵတ်းၶုၼ်ႁေႃၶမ်းလႄႈ ၸွမ်းလူၺ်ႈၺၢၼ်ႇသေလႄႈ ၸီႇယၢင်ႇတႅပ်းတတ်းၸွမ်း တၢင်းဢၼ်ႁဵတ်းၸွမ်းၼင်ႇတြႃး ဢိၵ်ႇတင်း တၢင်းဢၼ်သိုဝ်ႈဢၼ်တေႃႇ ၵႃႈၼိူဝ်လိၼ်မိူင်းၼႆႉၼၼ်ႉ တၵ်းႁွတ်ႈထိုင်ဢေႃႈ။-

6ၼႂ်းၸူဝ်ႈပၢၼ်မၼ်းၼၼ်ႉ မိူင်း ယူႉတႃႉ တၵ်းႁွတ်ႈထိုင် တၢင်းဢၼ် ၵႄႇသႄႇၶျွတ်ႈဢဝ်လႄႈ၊ မိူင်း ဢီႉသရေႇလႃႉ ၵေႃႈ တၵ်းလႆႈယူႇၼိမ်ၼိမ်လီလီဢေႃႈ။ ၼႃႇမႃႉၸိုဝ်ႈသဵင်ဢၼ် မၼ်းတၵ်းလႆႈၶၢမ်ႇ တၢင်းဢၼ်ႁွင်ႉႁဵၵ်ႈၼၼ်ႉၸမ်ႉ၊ ပဵၼ် ယေႇႁေႃးဝႃႇ ၸေႇတႃႉၵၼူႉ ဢေႃႈ။-

7ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉၸမ်ႉ၊ တူၺ်းလူး၊ မိုဝ်ႉဝၼ်းဢၼ် ယင်းဢမ်ႇလႆႈတိူင်ႇဝႃႈလႄႈဝႃႈ၊ ၵႃႈၼင်ႇဢၼ် ထႃႇဝရႃႉၽြႃး ဢၼ်ၼုၵ်ႈဢဝ်ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ ဢသၢၵ်ႈလိပ်းယူႇၼၼ်ႉ၊ ဝႃႈၼင်ႇၼႆလႄႈ၊-

8တၵ်းလႆႈတိူင်ႇဝႃႈလႄႈဝႃႈ၊ ၵႃႈၼင်ႇဢၼ် ထႃႇဝရႃႉၽြႃး ဢၼ်ဢဝ်မဵဝ်းၸိူဝ်ႉၶိူဝ်း ဢီႉသရေႇလႃႉ လုၵ်ႉသေၵႃႈတီႈ မိူင်းတၢင်းၸၢၼ်း ဢိၵ်ႇတင်း မိူင်းတီႈဢၼ်ႁေႃႈၶဝ်ဢွၵ်ႇၸူး ၵႃႈမီးၼၼ်ႉမႃးၼၼ်ႉ ဢသၢၵ်ႈလိပ်းယူႇၼၼ်ႉ၊ ဝႃႈၼင်ႇၼႆၼၼ်ႉ တၵ်းႁွတ်ႈထိုင်ဢေႃႈ။ ၶဝ်ၼၼ်ႉတၵ်းသမ်ႉဢွၼ်ၵၼ်ၶိုၼ်း လႆႈယူႇၵႃႈၼႂ်းမိူင်း တီႈယူႇၶဝ်ဢေႃႈ။

9ၵႂၢမ်းဢၼ်ဢဝ်လွင်ႈ ပရေႃးၽႅတ်ႈတင်းလၢႆဝႃႈၸမ်ႉ၊ ၵွပ်ႈပိူဝ်ႈထႃႇဝရႃႉၽြႃး ဢိၵ်ႇတင်း ၵွပ်ႈပိူဝ်ႈၵႂၢမ်းမၼ်းၸဝ်ႈ ဢၼ်မူတ်းၸၢင်ႇၼၼ်ႉလႄႈ၊ ႁူဝ်ၸႂ်ၵဝ်မီးတၢင်းဢၼ် တႅၵ်ႇလႅဝ်ယူႇဢေႃႈ။ လုပ်ႇၵဝ်ၵႃႈမီး ဢွၼ်ၵၼ်သၼ်ႇဝႆလႄႈ ၵဝ်ပဵၼ်ၸိူဝ်ႉၼင်ႇ ၵေႃႉဢၼ်မဝ်းလဝ်ႈ ဢိၵ်ႇတင်း ၸိူဝ်ႉၼင်ႇၵေႃႉဢၼ် ၼမ်ႉၸပိတ်ႈပႄႉၼႅင်ႇ ၼၼ်ႉယူႇဢေႃႈ။-

10လွင်ႈမၼ်းၸမ်ႉ မိူင်းၸဝ်ႈမီးတၢင်းဢၼ်တဵမ်ဝႆႉ တင်းၶဝ်ၸိူဝ်းဢၼ်ႁဵတ်းလူၺ်ႈမေႇထုင်ႇဢၼ်ဢမ်ႇတြႃးၼၼ်ႉလႄႈ မိူင်းၸဝ်ႈလႆႈမီးတၢင်းဢၼ် ၶၢင်းၶီၶၢင်းၽၢၼ်ယူႇ ၵွပ်ႈပိူဝ်ႈ တၢင်းဢၼ်ၵိၼ်ႇဢၼ်ဝႃႈဢေႃႈ။ တီႈဢၼ်ယၢမ်ႈၵိၼ်ယူႇ ၵႃႈတီႈထိူၼ်ႇတီႈၶိူဝ်းၸိူဝ်းၼၼ်ႉ မီးတၢင်းဢၼ်ယူတ်းႁႅင်ႈၵႂႃႇဢေႃႈ။ သဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉ ပဵၼ်ဢၼ်ႁၢႆႉဢၼ်ယုတ်ႈလႄႈ တၢင်းၵတ်ႉတၢင်းၶၼ်ၶဝ် ဢမ်ႇၸၢင်ႈယူႇၽၢႆႇတြႃး။-

11ပရေႃးၽႅတ်ႈ ဢိၵ်ႇတင်း ယိတ်ႈပရေႃးႁဵၵ်ႈ သွင်မဵဝ်းၼၼ်ႉ ဢွၼ်ၵၼ်ႁဵတ်း ဢမ်ႇရူဝ်ႇသေႇၵူဝ်ယမ်ၽြႃးယဝ်ႉ။ တေႃႈၵႃႈ၊ ၵႃႈၼႂ်းႁိူၼ်းၵဝ်ၼၼ်ႉ၊ ၵဝ်ယင်းထူပ်းႁၼ် လွင်ႈတၢင်းဢၼ်ႁၢႆႉဢၼ်မိူၵ်ႈ ဢၼ်ၶဝ်ႁဵတ်းၼၼ်ႉယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

12ပိူဝ်ႈၼႆလႄႈ သဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉ တၵ်းပဵၼ်ၸိူဝ်ႉၼင်ႇ တီႈဢၼ်မိုၼ်ႈၶျေႃး ၵႃႈၼႂ်းလပ်းသိင်ႇၼၼ်ႉလႄႈ ၶဝ်ၼၼ်ႉတၵ်းလႆႈဢွၼ်ၵၼ်ၶၢမ်ႇ တၢင်းဢၼ် တွၵ်ႉဢီးလႄႈလူမ်ႉဢေႃႈ။ လွင်ႈမၼ်းၸမ်ႉ ၵဝ်တၵ်းႁႂ်ႈၽေးဢူႉပၢတ်ႈဢၼ်ဝႃႈ ၶူပ်ႇပီႊ ဢၼ်လႆႈၶၢမ်ႇတၢင်းဢၼ် သင်ႇသွၼ်သုင်းမႃႉၼၼ်ႉ ႁွတ်ႈထိုင်ၵႃႈၼိူဝ်ၶဝ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

13ၵဝ်ႁၼ်သၽေႃးဢၼ်မိူၵ်ႈ ၵႃႈၼႂ်းပရေႃးၽႅတ်ႈ ၵူၼ်းဝဵင်း သမႃႇရီႉ ၸိူဝ်းၼၼ်ႉယဝ်ႉ။ ၶဝ်ၼၼ်ႉဢိင်ၽြႃး ပႃႇလႃႉ သေလႄႈႁဵတ်းပရေႃးၽႅတ်ႈလႄႈ ဢွၼ်ၵၼ်ႁဵတ်းႁႂ်ႈ ၵူၼ်းၵဝ်မဵဝ်း ဢီႉသရေႇလႃႉ ၽိတ်းပိူင်ႈယဝ်ႉ။-

14ၵႃႈၼႂ်းပရေႃးၽႅတ်ႈ ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉၵေႃႈ ၵဝ်ႁၼ်သၽေႃးဢၼ်လီႁင်ႈဢဵတ်ႇသဵတ်ႇယဝ်ႉ။ ၶဝ်ၼၼ်ႉႁဵတ်းလူၺ်ႈမေႇထုင်ႇ ဢၼ်ဢမ်ႇတြႃးယူႇ၊ သုင်းသွင်ႇမူႉသႃႇယူႇသေလႄႈ ၸၢင်ႈပၼ်ႁႅင်းတီႈမိုဝ်းၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉ ထၼ်ႈပေႃးၽူႈလႂ်သေၵေႃႉသေၵူၼ်း ဢမ်ႇၸုၼ်ႉပႅတ်ႈတၢင်းဢၼ်ႁၢႆႉဢၼ်မိူၵ်ႈ ဢၼ်မၼ်းႁဵတ်းၼၼ်ႉဢေႃႈ။ ၶဝ်ၵႃႈမီးၼၼ်ႉ ပဵၼ်ၸိူဝ်ႉၼင်ႇ ၵူၼ်းဝဵင်း သေႃးတုမ်ႇ လႄႈ ၵူၼ်းဝဵင်း ယေႇရူႉသလႅမ်ႇ တင်းလၢႆၸမ်ႉ၊ ပဵၼ်ၸိူဝ်ႉၼင်ႇၵူၼ်းဝဵင်း ၵေႃးမေႃးရႃႉ ၼၼ်ႉတီႈၵဝ်ဢေႃႈ။-

15ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉလူၺ်ႈလွင်ႈ ပရေႃးၽႅတ်ႈၸိူဝ်းၼၼ်ႉၸမ်ႉ၊ တူၺ်းလူး၊ ၵဝ်တၵ်းဢဝ်မႂ်တေႃးၼႃႉ လဵင်ႉလူၶဝ်လႄႈ ႁႂ်ႈၶဝ်သူတ်ႉၵိၼ် ယႃႈၶူမ်ဢေႃႈ။ တၢင်းဢၼ်ႁဵတ်း ဢမ်ႇရူဝ်ႇသေႇၵူဝ်ယမ်ၼၼ်ႉ ဢွၵ်ႇသေၵႃႈတီႈ ပရေႃးၽႅတ်ႈ ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈ ၸွတ်ႇတူဝ်ႈၵႂႃႇတင်းမိူင်းယဝ်ႉ။-

16ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ယႃႇပေဢွၼ်ၵၼ် ထွမ်ႇဢဝ်ၵႂၢမ်းသြႃႇ တင်းလၢႆ ဢၼ်ၸၢင်ႈႁဵတ်း ပရေႃးၽႅတ်ႈလႄႈ ႁေႃးလၢတ်ႈတီႈသူၼၼ်ႉ။ ၶဝ်ၼၼ်ႉၸၢင်ႈ ဢွၼ်ၵၼ်ႁေႃးလၢတ်ႈ လွင်ႈတၢင်းဢၼ်လၢႆလၢႆ လွၵ်ႇလွၵ်ႇ တီႈသူဢေႃႈ။ ၶဝ်ယင်းဢမ်ႇၸွမ်း ၵႂၢမ်းဢၼ်ဢွၵ်ႇသူပ်း ထႃႇဝရႃႉၽြႃး ၼၼ်ႉလႄႈ ၸၢင်ႈဢွၼ်ၵၼ်ႁေႃးလၢတ်ႈၸွမ်း ရူႇပႃႇရူင်ႇႁူဝ်ၸႂ်ၶဝ်ဢေႃႈ။-

17ၶဝ်ၸၢင်ႈဢွၼ်ၵၼ်ႁေႃးလၢတ်ႈ တီႈၶဝ်ၸိူဝ်းဢၼ်ႁဵတ်း ဢမ်ႇပေႃးၼင်ႇႁိုဝ်တီႈၵဝ် လႄႈဝႃႈ၊ ထႃႇဝရႃႉၽြႃး မီးဢမိင်ႉၸမ်ႉ၊ သူတၵ်းမီးတၢင်းဢၼ်ၼိမ် ဢၼ်လီဢေႃႈ၊ ဝႃႈၼင်ႇၼႆဢေႃႈ။ ၶဝ်ၸၢင်ႈႁေႃးလၢတ်ႈ တီႈၶဝ်ၸိူဝ်းဢၼ် ၸွမ်းသၽေႃး တၢင်းဢၼ်ႁူဝ်ၸႂ်တူဝ်ၸဝ်ႈၵဝ်ႇ ၵႅၼ်ႇၶႅင်ၼၼ်ႉလႄႈဝႃႈ၊ သူဢမ်ႇလႆႈထူပ်းၽေးဢူႉပၢတ်ႈ၊ ဝႃႈၼင်ႇၼႆဢေႃႈ။-

18ၽူႈလႂ်ႁဵတ်းတၢင်းဢၼ်တိူင်ႇပၢင်ႇ ႁူမ်ႈလူၺ်ႈၵၼ်တင်း ထႃႇဝရႃႉၽြႃး ႁႂ်ႈလႆႈႁူႉႁၼ်လႄႈ ငိၼ်းၼုၵ်ႈၵပၢတ်ႈမၼ်းၸဝ်ႈ။ ၽူႈလႂ် ထွမ်ႇဢဝ်ၼုၵ်ႈၵပၢတ်ႈမၼ်းၸဝ်ႈလႄႈငိၼ်း။-

19တူၺ်းလူး၊ လူမ်းၽိဝ်ႇႁုင် ထႃႇဝရႃႉၽြႃး ဢၼ်ဝႃႈ ဢၢႆတၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉ ဢွၵ်ႇမႃးလႄႈ ပဵၼ်လူမ်းၽိဝ်ႇႁုင် ဢၼ်ပၼ်ႇၵၢဝ်ႉပတ်ႉထူဝ်းၼၼ်ႉဢေႃႈ။ တၵ်းပတ်ႉထူဝ်းသႂ်ႇၵႃႈၼိူဝ် ႁူဝ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ႁႅင်းယႂ်ႇၼႃႇလူင်လၢင်ဢေႃႈ။-

20တၢင်းၸႂ်မႆႈၶႆႈၸႃႉ ထႃႇဝရႃႉၽြႃး တၵ်းဢမ်ႇဝၢႆႇဢမ်ႇၶိုၼ်း တေႃႇထိုင်ႁွတ်ႈမၼ်းၸဝ်ႈ ထၼ်ႈပေႃးၵွႆမိုဝ်းမၼ်းၸဝ်ႈလႄႈ ႁႂ်ႈတၢင်းၵျၢမ်ႇတၢင်းပွင်မၼ်းၸဝ်ႈ လႆႈပျေႉၸုမ်ႇၼၼ်ႉဢေႃႈ။ ၶိင်ႇမိုဝ်ႉဝၼ်းလိုၼ်းၼၼ်ႉ သူတၵ်းႁူႉၸႅင်ႈလီလီငၢမ်းငၢမ်းဢေႃႈ။-

21ပရေႃးၽႅတ်ႈၸိူဝ်းၼၼ်ႉ ၵဝ်ယင်းဢမ်ႇပွႆႇၸႂ်ႉလႄႈ ၶဝ်ဢွၼ်ၵၼ်ၶုၼ်ႇလႅၼ်ႈယဝ်ႉ။ ၵဝ်ယင်းဢမ်ႇသင်ႇလၢတ်ႈဝႆႉတီႈၶဝ်လႄႈ၊ ၶဝ်ဢွၼ်ၵၼ်ႁေႃးလၢတ်ႈယဝ်ႉ။-

22သင်ၶဝ်ႁဵတ်း ၵေႃႉဢၼ် တိူင်ႇပၢင်ႇႁူမ်ႈလူၺ်ႈၵၼ်တင်းၵဝ်ၸိုင်၊ ၶဝ်ႁႂ်ႈၵူၼ်းၵဝ်တင်းလၢႆ လႆႈငိၼ်းၵႂၢမ်းၵဝ်လႄႈ ႁႂ်ႈၶဝ်ဝႄႈပိူင်ႈသေၵႃႈတီႈ သဵၼ်ႈတၢင်းဢၼ်ဢမ်ႇတြႃးၶဝ် ဢိၵ်ႇတင်း သေၵႃႈတီႈတၢင်းၵမ်တၢင်းၵျၢင်ႉ ဢၼ်ဢမ်ႇလီဢမ်ႇငၢမ်းၶဝ်ၼၼ်ႉယဝ်ႉ။-

23ၵဝ်ပဵၼ်ၽြႃး ၵႃႈတီႈဢၼ်ၸမ်ၵူၺ်းႁိုဝ်။ ၵႃႈတီႈဢၼ်ၵႆၵေႃႈ ပဵၼ်ၽြႃးယူႇဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃး ထၢမ်ဢေႃႈ။-

24ၽူႈလႂ်တဵတ်ႇမႅပ်ႉယူႇ ၵႃႈတီႈဢၼ်သိူင်ႇ ဢၼ်လပ်ႉၼၼ်ႉ ႁႂ်ႈၵဝ်ထၼ်ႈပေႃး ဢမ်ႇႁၼ်မၼ်းလႆႈ၊ ဝႃႈၼင်ႇၼႆလႄႈ ထႃႇဝရႃႉၽြႃး ထၢမ်ဢေႃႈ။ ၵဝ်ၸွတ်ႇတူဝ်ႈၽႃႉၵၢင်ႁၢဝ် ဢိၵ်ႇတင်းလိၼ်မိူင်းယူႇ ဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃး ထၢမ်ဢေႃႈ။-

25ၵဝ်လႆႈငိၼ်းၵႂၢမ်း ပရေႃးၽႅတ်ႈ ဢၼ်ဢိင်ၼႃႇမႃႉၸိုဝ်ႈသဵင်ၵဝ်သေလႄႈ ဢဝ်ၵႂၢမ်းမူႉသႃႇႁေႃးလၢတ်ႈလႄႈဝႃႈ၊ ၵဝ်ၼွၼ်းၽၼ်ႁၼ်ယဝ်ႉ၊ ၵဝ်ၼွၼ်းၽၼ်ႁၼ်ယဝ်ႉ၊ ဝႃႈၼင်ႇၼႆၼၼ်ႉယဝ်ႉ။-

26ပရေႃးၽႅတ်ႈ ဢၼ်ၸၢင်ႈႁေႃးလၢတ်ႈၵႂၢမ်း မူႉသႃႇၸိူဝ်းၼၼ်ႉ တၵ်းဢွၼ်ၵၼ် ၵျၢမ်ႇပွင်ၸိူဝ်ႉၼင်ႇၼႆ ယူႇၶိင်ႇၵႃႇလႃႉႁိုင်ၵႃႈႁိုဝ်။ ၸၢင်ႈႁေႃးလၢတ်ႈၸွမ်းၵႃႈၼင်ႇဢၼ် ႁူဝ်ၸႂ်ၶဝ်ပႅတ်ႉလႅၼ်ၼၼ်ႉဢေႃႈ။-

27ၶဝ်မီးတၢင်းၵျၢမ်ႇတၢင်းပွင် တၵ်းႁႂ်ႈၵူၼ်းၵဝ်တင်းလၢႆ လူင်လိုမ်းၼႃႇမႃႉၸိုဝ်ႈသဵင်ၵဝ် ၵွပ်ႈပိူဝ်ႈတၢင်းဢၼ်ၼွၼ်းၽၼ်ႁၼ် ဢၼ်ၵေႃႉၼိုင်ႈလႄႈၵေႃႉၼိုင်ႈ ၸၢင်ႈလၢတ်ႈတီႈၵူၼ်းႁိူၼ်းၸမ်ၵၼ်ၼၼ်ႉ မိူၼ်ၸိူဝ်ႉၼင်ႇဢၼ်ပူႇၶဝ်မွၼ်ႇၶဝ် လူင်လိုမ်းၼႃႇမႃႉၸိုဝ်ႈသဵင်ၵဝ် ၵွပ်ႈပိူဝ်ႈၽြႃး ပႃႇလႃႉ ၼၼ်ႉလူင်ပႄႇ။-

28ႁႂ်ႈပရေႃးၽႅတ်ႈ ဢၼ်မီးတၢင်းဢၼ်ၼွၼ်းၽၼ်ႁၼ်ၼၼ်ႉ လၢတ်ႈၵႂၢမ်းဢၼ် ၼွၼ်းၽၼ်ႁၼ်ၼၼ်ႉ သေၵမ်း၊ ႁႂ်ႈၵေႃႉဢၼ်လႆႈၶၢမ်ႇဢဝ် ၼုၵ်ႈၵပၢတ်ႈၵဝ်ၼၼ်ႉ ႁေႃးလၢတ်ႈၵႂၢမ်းၼုၵ်ႈၵပၢတ်ႈၵဝ် မၢၼ်ႇမၢၼ်ႇမႅၼ်ႈမႅၼ်ႈ သေၵမ်း။ ၶဝ်ႈဢၼ်လိပ်ႈဢၼ်ၽၢင်းၼၼ်ႉ ၸၢပ်ႈသႅင်ႇၵၼ်တင်း ၶဝ်ႈပိူၵ်ႇၸိူဝ်ႉၼင်ႇႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

29ၼုၵ်ႈၵပၢတ်ႈၵဝ် ပဵၼ်ၸိူဝ်ႉၼင်ႇၽႆး ဢိၵ်ႇတင်း ၸိူဝ်ႉၼင်ႇၶွၼ်ႉလဵၵ်း ဢၼ်ပေႃႉထုပ်ႉမၢၵ်ႇႁိၼ် ႁႂ်ႈလႅဝ်ၼၼ်ႉ ဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃး ထၢမ်ဢေႃႈ။-

30ပိူဝ်ႈၼႆလႄႈ ၵဝ်တၵ်းႁဵတ်းၶတ်းၵၼ်တင်း ပရေႃးၽႅတ်ႈ ဢၼ်ၵူႈၵေႃႉၵူႈၵူၼ်း ၼင်ႇၵၼ်ၵၼ် လၵ်ႉဢဝ်ၵႂၢမ်းၵဝ် တီႈၵူၼ်းႁိူၼ်း ၸမ်ၵၼ်ၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

31တူၺ်းလူး၊ ၵဝ်တၵ်းႁဵတ်းၶတ်းၵၼ်တင်းပရေႃးၽႅတ်ႈ ဢၼ်ဢဝ်သူပ်းဢဝ်လိၼ်ႉၶဝ်သေလႄႈဝႃႈ မၼ်းၸဝ်ႈမီးဢမိင်ႉယဝ်ႉ၊ ဝႃႈၼင်ႇၼႆၼၼ်ႉ ၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

32ၵဝ်တၵ်း ႁဵတ်းၶတ်းၵၼ်တင်းပရေႃးၽႅတ်ႈ ဢၼ်ႁေႃးလၢတ်ႈတၢင်းဢၼ်ၼွၼ်းၽၼ်ႁၼ် ဢၼ်ဢမ်ႇၸိုဝ်ႈဢမ်ႇၸႂ်ႈလႄႈ ဢဝ်တင်းၵႂၢမ်းမူႉသႃႇ တင်းၵႂၢမ်းဢၼ်လၢႆလၢႆ ဢမ်ႇပွင်လွင်ႈၵႃႈသင် ႁႂ်ႈၵူၼ်းၵဝ်တင်းလၢႆ ၽိတ်းပိူင်ႈၼၼ်ႉၸိူဝ်းၼၼ်ႉဢေႃႈ။ ၵဝ်ဢမ်ႇပွႆႇၸႂ်ႉၶဝ်၊ ၵဝ်ဢမ်ႇသင်ႇလၢတ်ႈဝႆႉတီႈၶဝ်လႄႈ ၶဝ်တၵ်းဢမ်ႇပဵၼ်ဢၵျူဝ်း တီႈၵူၼ်းမဵဝ်းၼႆႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

33ပဵၼ်မဵဝ်းၵူၼ်းၼႆႉ သေဢမ်ႇဝႃႈ၊ ပဵၼ်ပရေႃးၽႅတ်ႈ သေဢမ်ႇဝႃႈ၊ ပဵၼ်ယိတ်ႈပရေႃးႁဵၵ်ႈ သေဢမ်ႇဝႃႈ၊ ပေႃးသေၵေႃႉသေၵူၼ်း ထၢမ်တီႈမႂ်းလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃး ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆၸိုင်၊ မႂ်းတၵ်းလႆႈၶိုၼ်းလၢတ်ႈလႄႈဝႃႈ၊ ပျႃႇတိၵ်ႈၸဝ်ႈဢၼ်လႂ်။ ထႃႇဝရႃႉၽြႃး မီးဢမိင်ႉလႄႈဝႃႈ၊ ၵဝ်တၵ်းၸုၼ်ႉပႅတ်ႈသူဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

34ပရေႃးၽႅတ်ႈ၊ ယိတ်ႈပရေႃးႁဵၵ်ႈ၊ ၵူႈဝၢၼ်ႈၵူႈမိူင်းဢၼ်လၢတ်ႈလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃး မီးယဝ်ႉ၊ ဝႃႈၼင်ႇၼႆၼၼ်ႉၸမ်ႉ၊ ၵဝ်တၵ်းပၼ်တၢမ်ႇတီႈမၼ်း ဢိၵ်ႇတင်း တီႈၵူၼ်းႁိူၼ်းၵူၼ်းယေးမၼ်း ၼၼ်ႉဢေႃႈ။-

35သူၵူႈၵေႃႉၵူႈၵူၼ်း တီႈၵူၼ်းႁိူၼ်းၸမ်ၵၼ်၊ ၵူႈၵေႃႉၵူႈၵူၼ်းတီႈပီႈၼွင်ႉၵၼ် ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ် တၵ်းလႆႈတွင်ႈထၢမ်တီႈၵၼ်လႄႈဝႃႈ၊ ထႃႇဝရႃႉၽြႃး ၶိုၼ်းလၢတ်ႈၸိူဝ်ႉၼင်ႇႁိုဝ်ယဝ်ႉ။ ထႃႇဝရႃႉၽြႃး မီးဢမိင်ႉၸိူဝ်ႉၼင်ႇႁိုဝ်ယဝ်ႉ၊ ဝႃႈၼင်ႇၼႆဢေႃႈ။-

36ၵမ်းလိုၼ်း ဢမ်ႇလႆႈလၢတ်ႈလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃး မီးယဝ်ႉ၊ ဝႃႈၼင်ႇၼႆၼၼ်ႉ။ ၵႂၢမ်းၵူႈၵေႃႉၵူႈၵူၼ်းၼၼ်ႉ ပဵၼ်ပျႃႇတိၵ်ႈတူဝ်မၼ်းၵူၺ်းဢေႃႈ။ လွင်ႈမၼ်းၸမ်ႉ သူဢွၼ်ၵၼ်ယႃႉၵႂၢမ်းၽြႃးဢၼ် ဢသၢၵ်ႈလိပ်းယူႇဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၼၼ်ႉပႅတ်ႈယဝ်ႉ။-

37မႂ်းတၵ်းလႆႈ တွင်ႈထၢမ်တီႈပရေႃးၽႅတ်ႈ လႄႈဝႃႈ၊ ထႃႇဝရႃႉၽြႃး ၶိုၼ်းလၢတ်ႈၸိူဝ်ႉၼင်ႇႁိုဝ် တီႈမႂ်းယဝ်ႉ။ ထႃႇဝရႃႉၽြႃး မီးဢမိင်ႉ ၸိူဝ်ႉၼင်ႇႁိုဝ်ယဝ်ႉ၊ ဝႃႈၼင်ႇၼႆဢေႃႈ။-

38ပေႃးသူဢွၼ်ၵၼ်လၢတ်ႈလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃး မီးယဝ်ႉ။ ထႃႇဝရႃႉၽြႃး မီးဢမိင်ႉယဝ်ႉ၊ ဝႃႈၼင်ႇၼႆၸိုင်၊ ထႃႇဝရႃႉၽြႃး မီးဢမိင်ႉၸမ်ႉ၊ ပိၵ်ႉသမ်ႉၵဝ်ပိင်းၺၢပ်ႈဝႆႉ ႁႂ်ႈသူဢမ်ႇလႆႈလၢတ်ႈလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃး မီးယဝ်ႉ၊ ဝႃႈၼင်ႇၼႆသေၵေႃႈ၊ ၵွပ်ႈပိူဝ်ႈ ဢၼ်သူဢွၼ်ၵၼ် သုင်းသွင်ႇၵႂၢမ်းဢၼ်လၢတ်ႈလႄႈဝႃႈ၊ ပျႃႇတိၵ်ႈ ထႃႇဝရႃႉၽြႃးမီးယဝ်ႉ၊ ဝႃႈၼင်ႇၼႆၼၼ်ႉလႄႈ၊-

39ၵဝ်တၵ်းၵွပ်ႇဢဝ်သူ ဢိၵ်ႇတင်း ဝဵင်းဢၼ်ၵဝ်ပၼ်တီႈသူ ဢိၵ်ႇတင်း ပူႇသူမွၼ်ႇသူၼၼ်ႉလႄႈ ဢဝ်သူထိမ်ႈပႅတ်ႈသေၵႃႈတီႈၵဝ် သဵင်ႈသဵင်ႈမူတ်းမူတ်းဢေႃႈ။-

40ၵဝ်တၵ်းႁႂ်ႈတၢင်းဢၼ် သႄႉသွမ်းထႃႇဝရႃႉ ဢိၵ်ႇတင်း တၢင်းဢၼ်ဢူၵ်းဢၢႆ ဢၼ်သိုပ်ႇတၢမ်းယူႇတႃႇသေႇ ဢၼ်ဢမ်ႇလူင်လႆႈလိုမ်းလႆႈၼၼ်ႉ တူၵ်းႁွတ်ႈၵႃႈၼိူဝ်သူဢေႃႈ။