Jeremiah 33 — Shan

4ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢဝ်လွင်ႈႁိူၼ်းၵႃႈၼႂ်းဝဵင်းၼႆႉတင်းလၢႆ ဢိၵ်ႇတင်း ႁေႃၸဝ်ႈၶုၼ်ႁေႃၶမ်း ယူႉတႃႉ ဢၼ်ၵိူၼ်ႇလူႉၵွပ်ႈပိူဝ်ႈတႅၼ်ႈလိၼ်လၢင်းၸီး ဢိၵ်ႇတင်း လၢပ်ႇလႅဝ်းၼၼ်ႉၸိူဝ်းၼၼ်ႉလႄႈ မီးဢမိင်ႉၸမ်ႉ၊-

5ၶဝ်ဢွၼ်ၵၼ်မႃးႁႂ်ႈလႆႈ တိုၵ်းသိုၵ်းၵၼ်တင်းၵူၼ်း ၶႃႇလတေး တင်းလၢႆဢေႃႈ။ ၵူၺ်းၵႃႈ ၶဝ်တၵ်းမီးတဵမ်ဝႆႉတင်းတူဝ်တၢႆ ဢၼ်ၵဝ်ပႃးတင်းတၢင်းဢၼ် ၶႆႈၸႃႉၶႆႈၸဵတ်ႉ တၢင်းဢၼ်တေႃးသႃႉတၢင်းၸႂ်မႆႈဢွၵ်ႇႁႅင်းယႂ်ႇၼႃႇသေလႄႈ ဢဝ်တၢႆၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈတူႉၸရိူၵ်ႈၶဝ် တင်းသဵင်ႈတင်းလူင်ၼၼ်ႉလႄႈ ၵဝ်ဝၢႆႇၼႃႈပႅတ်ႈသေၵႃႈတီႈဝဵင်းၼႆႉယဝ်ႉ။-

6ၵူၺ်းၵႃႈ ၵဝ်တၵ်းႁႂ်ႈတၢင်းဢၼ်ယူႇလီၵိၼ်ဝၢၼ်၊ တၢင်းဢၼ်ႁႂ်ႈ တၢင်းၸဵပ်းတၢင်းသႅပ်ႇႁၢႆၼၼ်ႉ ႁွတ်ႈထိုင်ၵႃႈၼိူဝ်မၼ်းလႄႈ ႁႂ်ႈၶဝ်သၢၵ်ႈသႃႇၶႅၼ်းမႃးဢေႃႈ။ ၵဝ်တၵ်းၼႄပျႃးၸေးၸိမ်ႇတၢင်းဢၼ်ၼိမ်ဢၼ်လီ ဢိၵ်ႇတင်း သဵတ်ႈၸႃႇတြႃး ဢၼ်လိူင်ႇၼမ်ၼႃႇ လူင်လၢင်ၼၼ်ႉဢေႃႈ။-

7ၵဝ်တၵ်း သမ်ႉဢဝ်မဵဝ်း ယူႉတႃႉ ဢိၵ်ႇတင်း မဵဝ်း ဢီႉသရေႇလႃႉ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ၶိုၼ်းမႃးလႄႈ တႄႇႁဵတ်းၶဝ် မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ။-

8ၵဝ်တၵ်း ၽေႇဢပႅတ်ႈ ၵႃႈဢၼ်ၶဝ်ၽိတ်းပိူင်ႈၵဝ်ၼၼ်ႉလႄႈ တၵ်းပွႆႇဢပႅတ်ႈ ၵႃႈဢၼ်ၶဝ်ၽိတ်းပိူင်ႈၵဝ်လႄႈ ပူၼ်ႉလိူဝ်တြႃးၵဝ်ၸိူဝ်းၼၼ်ႉလွတ်ႈဢေႃႈ။-

9ဝဵင်းၼႆႉ တၵ်းပဵၼ်လွင်ႈဢၼ်ၵဝ်လီၸူမ်းလီသိူဝ်း၊ လွင်ႈဢၼ်လီယွင်ႈလီယေႃး၊ လွင်ႈဢၼ်ၵုင်ႇသရေႇႁူင်ႁၢင်း ၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်း ၵႃႈၼိူဝ်လိၼ်မိူင်း ဢၼ်တၵ်းငိၼ်းလွင်ႈၵျေးၸူး ၵႃႈဢၼ်ၵဝ်ႁဵတ်းတီႈၶဝ်ၼႆႉ တင်းသဵင်ႈတင်းလူင်ၼၼ်ႉလႄႈ ထွၵ်ႈလူၺ်ႈ တၢင်းဢၼ်လီဢၼ်ငၢမ်းၵႃႈမီး ဢိၵ်ႇတင်း ၵတ်းယဵၼ်ၶျၢမ်းသႃႇၵႃႈမီး ဢၼ်ၵဝ်လုမ်းလႃးတီႈဝဵင်းၼႆႉၼၼ်ႉ သေလႄႈ သၼ်ႇဝႆၵူဝ်ႁႄဢေႃႈ။-

10ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈတီႈၼႆႈ ဢၼ်သူၸၢင်ႈလၢတ်ႈလႄႈဝႃႈ၊ ပဵၼ်တီႈဢၼ်ပဝ်ႇဢၼ်လၢပ်ႈလႄႈ ဢမ်ႇမီးၵူၼ်း ဢမ်ႇမီးတရိၵ်ႈသၢၼ်ႇ၊ ဝႃႈၼင်ႇၼႆၼၼ်ႉ ဢၼ်ဝႃႈ၊ ၵႃႈတီႈဝဵင်း ယူႉတႃႉ တင်းလၢႆ ဢိၵ်ႇတင်းၵႃႈၼႂ်းသဵၼ်ႈတၢင်း ဝဵင်း ယေႇရူႉသလႅမ်ႇ တင်းလၢႆ ဢၼ်ပဵၼ်တီႈဢၼ်ပဝ်ႇဢၼ်လၢပ်ႈလႄႈ ဢမ်ႇမီးၵူၼ်း၊ ဢမ်ႇမီးၵေႃႉဢၼ်ယူႇဢၼ်သဝ်း၊ ဢမ်ႇမီးတရိၵ်ႈသၢၼ်ႇၼၼ်ႉၼႆႉ။-

11ၵမ်းလိုၼ်းတၵ်းလႆႈဢွၼ်ၵၼ်ငိၼ်း သဵင်ဢၼ်မူၼ်ႈပျေႃႇ၊ သဵင်ဢၼ်ၸူမ်းသိူဝ်း၊ သဵင်ၵူၼ်းၸၢႆး ဢၼ်သွင်ႇမင်ႇၵလႃႇ၊ သဵင်ၵူၼ်းယိင်း ဢၼ်သွင်ႇမင်ႇၵလႃႇ၊ သဵင်ၶဝ်ၸိူဝ်းဢၼ်လၢတ်ႈလႄႈဝႃႈ၊ ဢွၼ်ၵၼ်ယွင်ႈယေႃးၵျေးၸူး ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၵွပ်ႈပိူဝ်ႈဢၼ် ထႃႇဝရႃႉၽြႃး ပဵၼ်ဢၼ်မျၢတ်ႈလီလႄႈ ၵရူႉၼႃႇမၼ်းၸဝ်ႈ တႄႇယူႇတႃႇသေႇ ဢမ်ႇထၢတ်ႇၼၼ်ႉတႃႉ၊ ဝႃႈၼင်ႇၼႆၼၼ်ႉ ဢိၵ်ႇတင်း သဵင်ၶဝ်ၸိူဝ်းဢၼ် ဢဝ်ၶိူင်ႈပုၵ်ႈၸေႃႇ ဢၼ်ယွင်ႈယေႃးၸိူဝ်းၼၼ်ႉ မႃးၵႃႈၼႂ်းႁိူၼ်း ထႃႇဝရႃႉၽြႃး ၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၵဝ်တၵ်းသမ်ႉဢဝ် ၵူၼ်းဝၢၼ်ႈၵူၼ်းမိူင်း ဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇၼၼ်ႉ ၶိုၼ်းမႃးလႄႈ ႁႂ်ႈယူႇ မိူၼ်ၸိူဝ်ႉၼင်ႇ ပၵ်းၵဝ်ႇပိူင်ၵဝ်ႇၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

12ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼႂ်းတီႈဢၼ်ပဵၼ်ဢၼ်ပဝ်ႇ ဢၼ်လၢပ်ႈလႄႈ ဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇၼႆႉ ဢိၵ်ႇတင်း ၵႃႈၼႂ်းဝဵင်းမၼ်းၵႃႈမီးၼၼ်ႉ တၵ်းမီးတီႈဢၼ် ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉ တၵ်းဢဝ်ၽုင်သူဝ်းၶဝ် ၼွၼ်းၼၼ်ႉထႅင်ႈလူးၵွၼ်ႇဢေႃႈ။-

13ၵႃႈတီႈဝဵင်းၼိူဝ်ႁၢၼ်ႉလွႆ၊ ၵႃႈတီႈဝဵင်း ဢၼ်မီးၵႃႈတႂ်ႈတီႈပၢင်ႇတီႈပဵင်း၊ ၵႃႈတီႈဝဵင်းဢၼ် မီးၵႃႈၼႂ်းပွတ်းတၢင်းၸၢၼ်း တင်းလၢႆ၊ ၵႃႈၼႂ်းမိူင်း ပိၼ်ႇယႃႇမိၼ်ႇ ၊ ၵႃႈၼႂ်းတီႈဢၼ်လဵပ်ႈႁွပ်ႈဝဵင်း ယေႇရူႉသလႅမ်ႇ တင်းလၢႆ၊ ၵႃႈၼႂ်းဝဵင်း ယူႉတႃႉ တင်းလၢႆၸိူဝ်းၼၼ်ႉ၊ ၽုင်သူဝ်းတင်းလၢႆ သမ်ႉတၵ်းလႆႈဢွၼ်ၵၼ် တႆႇၵႂႃႇပႆၵႂႃႇ ၵႃႈတႂ်ႈမိုဝ်းၵေႃႉဢၼ် ၼပ်ႉဢၢၼ်ႇၶဝ်ၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

14ထႃႇဝရႃႉၽြႃး မီးဢမိင်ႉၸမ်ႉ၊ မိုဝ်ႉဝၼ်းဢၼ်ၵဝ်တၵ်းႁဵတ်းၵျေးၸူး ၸွမ်းၼင်ႇၵတီႉဢၼ်ၵဝ်ဝႆႉ တီႈၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆၼၼ်ႉ တၵ်းႁွတ်ႈထိုင်ဢေႃႈ။-

15ၼႂ်းမိုဝ်ႉဝၼ်းၼၼ်ႉ ၼႂ်းၶိင်ႇၵႃႇလႃႉၼၼ်ႉ၊ ၵဝ်တၵ်းႁႂ်ႈ ယွတ်ႈတၢင်းဢၼ်သိုဝ်ႈတေႃႇ တႅၵ်ႇဢွၵ်ႇမႃးပုၼ်ႈ တႃႇဝိတ်ႈ လႄႈ မၼ်းၼၼ်ႉတၵ်းၸီႇယၢင်ႇ တႅပ်းတတ်းၸွမ်းတၢင်းဢၼ် ႁဵတ်းၸွမ်းၼင်ႇတြႃး ဢိၵ်ႇတင်း တၢင်းဢၼ်သိုဝ်ႈဢၼ်တေႃႇ ၵႃႈၼိူဝ်လိၼ်မိူင်းဢေႃႈ။-

16ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ မိူင်း ယူႉတႃႉ တၵ်းႁွတ်ႈထိုင် တၢင်းဢၼ်ၵႄႇသႄႇၶျွတ်ႈဢဝ်လႄႈ ဝဵင်း ယေႇရူႉသလႅမ်ႇ ၵေႃႈ တၵ်းမီးတၢင်းဢၼ်တဵတ်ႇလီ ၼိမ်လီလႄႈ ၼႃႇမႃႉၸိုဝ်ႈသဵင်မၼ်း တၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလႄႈဝႃႈ၊ ယေႇႁေႃးဝႃႇ ၸေႇတႃႉၵၼူႉ ၊ ဝႃႈၼင်ႇၼႆဢေႃႈ။-

17ထႃႇဝရႃႉၽြႃး မီးဢမိင်ႉၸမ်ႉ၊ သိုပ်ႇၶုၼ်ၶိူဝ်းၶုၼ် တႃႇဝိတ်ႈ ဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇ ဢီႉသရေႇလႃႉ ၼၼ်ႉ ဢမ်ႇလႆႈသုတ်းလႆႈထၢတ်ႇလႃးလႃး။-

18ၶိူဝ်းယိတ်ႈပရေႃးႁဵၵ်ႈ ၵူၼ်း လေႇဝီႉ ဢၼ်ပုၵ်ႈၸေႃႇယိတ်ႈ ဢၼ်တုတ်ႇၽႆးယူႇ၊ ဢဝ်ၶိူင်ႈပုၵ်ႈၸေႃႇတုတ်ႇၽႆးယူႇသေလႄႈ လႆႈႁဵတ်းဝၢတ်ႈဢၼ်ပုၵ်ႈၸေႃႇယူႇတႃႇသေႇၼၼ်ႉၵေႃႈ ဢမ်ႇလႆႈသုတ်းလႆႈထၢတ်ႇလႃးလႃး၊ ဝႃႈၼင်ႇၼႆဢေႃႈ။-

19လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃး တီႈ ယေႇရမီႉ လႄႈဝႃႈ၊-

20ထႃႇဝရႃႉၽြႃး မီးဢမိင်ႉၸမ်ႉ၊ ပေႃးသူ တၢတ်ႈၼိူင်ႇႁႂ်ႈလႆႈယႃႉ ပတီႉၺိၺ်ႇတြႃး ၵႃဝၼ်း ဢိၵ်ႇတင်း ပတီႉၺိၺ်ႇတြႃး ၵႃၶိုၼ်း ဢၼ်ၵဝ်ဝႆႉၼၼ်ႉပႅတ်ႈ ထၼ်ႈပေႃး ဢမ်ႇႁႂ်ႈမီး ဢၼ်ၶၼ်ႈဢၼ်ၶႅၼ်ႈ ၵႃဝၼ်းဢိၵ်ႇတင်းၵႃၶိုၼ်းၼၼ်ႉ လႆႈၸိုင်၊-

21ပတီႉၺိၺ်ႇဢၼ်ၵဝ်ဝႆႉ တီႈၶႃႈၵဝ် တႃႇဝိတ်ႈ ၼၼ်ႉ တၵ်းလူႉထၼ်ႈပေႃး ၶိူဝ်းၶုၼ်မၼ်း ဢၼ်လႆႈဢုပ်ႉၸၢမ်ႇၸႃးပလၢင်ႇမၼ်း ၼၼ်ႉ တၵ်းသုတ်းလႆႈထၢတ်ႇလႆႈလႄႈ ၶိူဝ်းယိတ်ႈပရေႃးႁဵၵ်ႈၵူၼ်း လေႇဝီႉ ဢၼ်ၵိုတ်ႉႁၢပ်ႇဢမူႉၵဝ်ၵေႃႈ တၵ်းသုတ်းလႆႈထၢတ်ႇလႆႈဢေႃႈ။-

22ၸိူဝ်ႉၼင်ႇဢၼ်ၶိူင်ႈပိူင်ၽႃႉၵၢင်ႁၢဝ် ၼမ်ၵိုၼ်းၼႃႇထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ ဢိၵ်ႇတင်းၸိူဝ်ႉၼင်ႇဢၼ်မဵတ်ႉႁိၼ်မဵတ်ႉသၢႆး ၼမ်ႉသမ်ႇမုၵ်ႉတြႃႇ ၼမ်ၵိုၼ်းၼႃႇထၼ်ႈပေႃး ဢမ်ႇဢဝ်ၵွၵ်းတူင်တူၺ်းလႆႈၼၼ်ႉ၊ ၵဝ်တၵ်းႁႂ်ႈမဵဝ်းၶႃႈၵဝ် တႃႇဝိတ်ႈ ဢိၵ်ႇတင်း ၵူၼ်း လေႇဝီႉ ဢၼ်ၵိုတ်ႉႁၢပ်ႇဢမူႉၵဝ် ၸိူဝ်းၼၼ်ႉ ၼမ်ၵိုၼ်းၼႃႇဢေႃႈ၊ ဝႃႈၼင်ႇၼႆဢေႃႈ။-

23လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃး တီႈ ယေႇရမီႉ ၸမ်ႉ၊-

24မႂ်းဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈ ဢၼ်ၵူၼ်းတင်းလၢႆၸိူဝ်းၼႆႉ ၸၢင်ႈလၢတ်ႈလႄႈဝႃႈ၊ ၵူၼ်းမဵဝ်းဢၼ် ထႃႇဝရႃႉၽြႃး လိူၵ်ႈၵဵပ်းဢဝ် သွင်မဵဝ်းၼႆႉၸိုင် မၼ်းၸဝ်ႈသမ်ႉပႄႇပႅတ်ႈယဝ်ႉ၊ ဝႃႈၼင်ႇၼႆၼၼ်ႉႁိုဝ်။ ၼင်ႇၼၼ်လႄႈ ၶဝ်ၼၼ်ႉဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ် တီႈၵူၼ်းၵဝ်တင်းလၢႆ ထၼ်ႈပေႃးဢမ်ႇမၢတ်ႈပဵၼ်မဵဝ်းၵူၼ်း သိုဝ်ႈၼႃႈတႂ်ႈတႃၶဝ်ယဝ်ႉ။-

25ထႃႇဝရႃႉၽြႃး မီးဢမိင်ႉၸမ်ႉ၊ ပေႃးပတီႉၺိၺ်ႇတြႃးၵႃဝၼ်း ဢိၵ်ႇတင်းၵႃၶိုၼ်းၼၼ်ႉ ဢမ်ႇမီး၊ ပေႃးၵဝ်ဢမ်ႇၸီႇယၢင်ႇတြႃး ၽႃႉၵၢင်ႁၢဝ် ဢိၵ်ႇတင်း လိၼ်မိူင်းယူႇၸိုင်၊-

26ၵဝ်တၵ်းပႄႇပႅတ်ႈၸုၼ်ႉပႅတ်ႈ မဵဝ်း ယႃႇၵုပ်ႈ ဢိၵ်ႇတင်း ၸိူဝ်ႉၶိူဝ်းၶႃႈၵဝ် တႃႇဝိတ်ႈ ထၼ်ႈပေႃးၵဝ်ဢမ်ႇလိူၵ်ႈၵဵပ်းဢဝ် ၶုၼ်ဢၼ်လႆႈဢုပ်ႉပိူင်ႇ မဵဝ်း ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ၼၼ်ႉၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။ ဢမ်ႇၼၼ်ၵေႃႈ ၵဝ်တၵ်းဢဝ် ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ ၶိုၼ်းမႃးလႄႈ ဢဵတ်းလူ မီးၵရူႉၼႃႇတီႈၶဝ်ဢေႃႈ၊ ဝႃႈၼင်ႇၼႆဢေႃႈ။