Jeremiah 22

Shan

← Chapter 21 Jump to: Chapter 23 →

1ထႃႇဝရႃႉၽြႃး မီးဢမိင်ႉၸမ်ႉ၊ မႂ်းလူင်းၸူးၵႃႈတီႈႁေႃ ၶုၼ်ႁေႃၶမ်း ယူႉတႃႉ ၼၼ်ႉ သေလႄႈ ဢဝ်ၵႂၢမ်းၼႆႉသင်ႇလၢတ်ႈဝႆႉလႄႈဝႃႈ၊-

2ၶုၼ်ႁေႃၶမ်း ယူႉတႃႉ ဢၼ်ၼင်ႈၵႃႈၼိူဝ် ရႃႇၸႃႉပလၢင်ႇ ၶုၼ်လူင် တႃႇဝိတ်ႈ ၊ တူဝ်မႂ်းဢိၵ်ႇတင်း ၶႃႈမႂ်းတင်းလၢႆ တင်းၵူၼ်းမိူင်းမႂ်း ဢၼ်ၶဝ်ႈၵႃႈၼႂ်းၽၵ်းတူဝဵင်း ၸိူဝ်းၼႆႉၶဝ်ဢိူၺ်း၊ ဢွၼ်ၵၼ်ထွမ်ႇငိၼ်း ၼုၵ်ႈၵပၢတ်ႈ ထႃႇဝရႃႉၽြႃးတႃႉ။-

3ထႃႇဝရႃႉၽြႃး မီးဢမိင်ႉၸမ်ႉ၊ ဢွၼ်ၵၼ် ၸီႇယၢင်ႇၸွမ်းၼင်ႇတြႃးလႄႈ တႅပ်းတတ်း သိုဝ်ႈသိုဝ်ႈတေႃႇတေႃႇတႃႉ။ ဢွၼ်ၵၼ်ၵႄႇသႄႇၼုၵ်ႈဢဝ် ၵေႃႉဢၼ် လႆႈၶၢမ်ႇတၢင်းဢၼ်ႁိမ်ႁူင်ႇၼၼ်ႉ လွတ်ႈသေၵႃႈၼႂ်းမိုဝ်းၵေႃႉဢၼ် ၼိၵ်ႈၸၢၵ်ႈငႅၼ်းသႄးၼၼ်ႉတႃႉ။ ယႃႇပေဢွၼ်ၵၼ်ႁဵတ်း ဢၼ်ဢမ်ႇၸွမ်းၼင်ႇတြႃးသေလႄႈ ၼိၵ်ႈၸၢၵ်ႈငႅၼ်းသႄး ၵေႃႉဢၼ်ပဵၼ်ၶႅၵ်ႇ၊ ၵေႃႉဢၼ် ဢမ်ႇမီးပေႃႈမီးမႄႈ၊ မႄႈမူၵ်းမႄႈမၢႆႈတင်းလၢႆ၊ ယႃႇပေဢွၼ်ၵၼ် ထွၵ်ႇလိူတ်ႈ ၶဝ်ၸိူဝ်းဢၼ် ဢမ်ႇမီးဢပႅတ်ႈၼၼ်ႉ ဢၼ်ၼင်ႈၵႃႈၼိူဝ် ရႃႇၸႃႉပလၢင်ႇၶုၼ်လူင် တႃႇဝိတ်ႈ ၵႃႈတီႈၼႆႈ။-

4လွင်ႈမၼ်းၸမ်ႉ ပေႃးသူႁဵတ်းမႅၼ်ႈၸွမ်းၵႃႈၼင်ႇ ပိင်းၺၢပ်ႈၸဝ်ႈၼႆႉၸိုင်၊ ၶုၼ်ႁေႃၶမ်းဢၼ်ၶီႇလေႃႉရထႃး၊ ဢၼ်ၶီႇမႃႉၸိူဝ်းၼၼ်ႉ ဢိၵ်ႇတင်းၶႃႈမၼ်းတင်းလၢႆ တင်းၵူၼ်းဝၢၼ်ႈၵူၼ်းမိူင်းၸဝ်ႈတင်းလၢႆ တၵ်းလႆႈဢွၼ်ၵၼ် မီးတၢင်းဢၼ် ၶဝ်ႈၵႃႈၼႂ်းႁူးၽၵ်းတူ ႁိူၼ်းၸဝ်ႈၼႆႉၸိူဝ်းၼႆႉဢေႃႈ။-

5ပေႃးဢမ်ႇၼၼ် ပေႃးသူယင်းဢမ်ႇထွမ်ႇဢမ်ႇဢဝ် ဢမိင်ႉၸဝ်ႈၼႆႉလႄႈယူႇၸိုင်၊ ၵဝ်ထႃႇဝရႃႉၽြႃး ဢဝ်တူဝ်ၸဝ်ႈၵဝ်ႇ တိူင်ႇဝႃႈ လႄႈဝႃႈ၊ ႁိူၼ်းၸဝ်ႈၼႆႉ တၵ်းလႆႈပဵၼ်တီႈဢၼ် သဵတ်ႇၵူၼ်းယဵၼ်ၵူၼ်းဢေႃႈ၊ ဝႃႈၼင်ႇၼႆဢေႃႈ။-

6ထႃႇဝရႃႉၽြႃး မီးဢမိင်ႉလူၺ်ႈလွင်ႈ ႁေႃၶုၼ်ႁေႃၶမ်း ယူႉတႃႉ ၸမ်ႉ၊ ပိၵ်ႉသမ်ႉမႂ်းပဵၼ်ၸိူဝ်ႉၼင်ႇ ၵႃႈတီႈမိူင်း ၵီႉလတ်ႉ ဢိၵ်ႇတင်း ၸိူဝ်ႉၼင်ႇၵႃႈတီႈပၢႆၸိၵ်းလွႆ လေႇပၼုၼ်ႇ ၼၼ်ႉ တီႈၵဝ်သေၵေႃႈ၊ ၵဝ်တၵ်းႁႂ်ႈမႂ်း ပဵၼ်ထိူၼ်ႇပဵၼ်ၶိူဝ်း၊ ဝဵင်းဢၼ်ၵူၼ်းဢမ်ႇယူႇဢမ်ႇသဝ်းဢေႃႈ။-

7ၵဝ်တၵ်းပွင်ႁႅၼ်းၶဝ်ၸိူဝ်းဢၼ်ပႃးၽႆး ဢိၵ်ႇတင်း တႃမၢတ်ႇၼၼ်ႉ ႁႂ်ႈလႆႈယႃႉၽဵဝ်ႈမႂ်းလႄႈ ၶဝ်ၼၼ်ႉတၵ်းဢွၼ်ၵၼ် ပမ်ႈတူၼ်ႈ ဢႃႇရိတ်ႉ ဢၼ်မျၢတ်ႈလီသေပိူၼ်ႈ တီႈမႂ်းၸိူဝ်းၼၼ်ႉ လူမ်ႉသေလႄႈ ဢဝ်ၶျႃးတူၵ်းသႂ်ႇၵႃႈၼႂ်းၽႆးဢေႃႈ။-

8ၵူၼ်းမဵဝ်းၼမ်ၼႃႇ တၵ်းတႆႇတၢင်းပႆတၢင်းၵႂႃႇ ၵႃႈတီႈႁိမ်းဝဵင်းၼႆႉသေလႄႈ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်ၵၼ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃး ႁဵတ်းၸိူဝ်ႉၼင်ႇၼႆ တီႈဝဵင်းလူင်ၼႆႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

9ၶဝ်တၵ်း ဢွၼ်ၵၼ်ၶိုၼ်းလၢတ်ႈတီႈၵၼ်လႄႈဝႃႈ၊ ၵွပ်ႈပိူဝ်ႈ ဢၼ်ၶဝ်ၸိူဝ်းၼႆႉ ၸုၼ်ႉပႅတ်ႈပတီႉၺိၺ်ႇ ထႃႇဝရႃႉၽြႃး ၽြႃးပဵၼ်ၸဝ်ႈ ၶဝ်သေလႄႈ ဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇ ၽြႃးတၢင်ႇသူႇတၢင်ႇပႃး တင်းလၢႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။

10ယႃႇပေဢွၼ်ၵၼ်ႁႆႈႁွင်ႉလႄႈ ၶၢင်းၶီၶၢင်းၽၢၼ် ၵွပ်ႈပိူဝ်ႈ ၵေႃႉဢၼ်တၢႆၼၼ်ႉ။ ဢွၼ်ၵၼ်ႁႆႈႁွင်ႉ ၵွပ်ႈပိူဝ်ႈၵေႃႉဢၼ်ၵႂႃႇတၢင်ႇတီႈတၢင်ႇလႅၼ်ၼၼ်ႉတႃႉ။ မၼ်းၼၼ်ႉ ၵမ်းလိုၼ်းဢမ်ႇလႆႈၶိုၼ်းမႃး။ ဢမ်ႇလႆႈႁၼ် မိူင်းတီႈဢၼ်တူဝ်ၸဝ်ႈၵဝ်ႇ ၵိူတ်ႇလဵင်ႉၼၼ်ႉ။-

11ထႃႇဝရႃႉၽြႃး ဢဝ်လွင်ႈ သႃႇလုမ်ႇ လုၵ်ႈၸၢႆးၶုၼ်လူင် ယူဝ်းသီႉယႃႉ ဢၼ်ၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်း ယူဝ်းသီႉယႃႉ လႄႈ ဢွၵ်ႇသေၵႃႈတီႈမိူင်းၼႆႉၵႂႃႇၼၼ်ႉလႄႈ မီးဢမိင်ႉဝႆႉၸမ်ႉ၊ ၶုၼ်ၼၼ်ႉၵမ်းလိုၼ်း ဢမ်ႇလႆႈၶိုၼ်းလႆႈမႃးၵႃႈတီႈမိူင်းၼႆႉ။-

12မၼ်းတၵ်းလႆႈတၢႆ ၵႃႈၼႂ်းမိူင်းတီႈဢၼ်ၶဝ် သိမ်းဢဝ်မၼ်းၵႂႃႇၼၼ်ႉလႄႈ ၵမ်းလိုၼ်းမၼ်းဢမ်ႇလႆႈၶိုၼ်းႁၼ်မိူင်းၼႆႉ။

13ၵေႃႉဢၼ်ဢဝ် လွင်ႈတၢင်းဢၼ်ဢမ်ႇတြႃး တႄႇႁဵတ်းႁိူၼ်းမၼ်းလႄႈ ဢဝ်လွင်ႈတၢင်းဢၼ် ဢမ်ႇသိုဝ်ႈဢမ်ႇတေႃႇ ႁဵတ်းႁၢၼ်ႉ ၼိူဝ်မၼ်းၸိူဝ်းၼၼ်ႉၼၼ်ႉ၊ ၵေႃႉဢၼ် ဢမ်ႇပၼ်ၵႃႈပၼ်ၶၼ်မၼ်း ၸႂ်ႉၵိၼ်ၵူၼ်းႁိူၼ်းၸမ်ၵၼ်လႄႈ ဢမ်ႇၶျႃးပၼ်သူးပုၼ်ႈတၢင်းႁဵတ်းၼၼ်ႉ၊-

14ၵေႃႉဢၼ်လၢတ်ႈလႄႈဝႃႈ၊ ၵဝ်တၵ်းႁဵတ်းႁိူၼ်းဢၼ်ယႂ်ႇဢၼ်လူင်၊ လုၵ်းႁၢၼ်ႉၼိူဝ် ဢၼ်ၵႂၢင်ႈလီလႃးလီဢေႃႈ၊ ဝႃႈၼင်ႇၼႆသေလႄႈ မုင်းႁူးလၢင်းတဵၼ်လႄႈဢဝ်မႆႉ ဢႃႇရိတ်ႉ မုင်းသေယဝ်ႉ၊ ဢဝ်ႁၢၼ်လႅင်တႃးၼၼ်ႉ မီးဢႃႉမင်ႇၵလႃႇဢေႃႈ။-

15ထႃႇဝရႃႉၽြႃး မီးဢမိင်ႉၸမ်ႉ၊ မႂ်းတၵ်းလႆႈဢုပ်ႉပိူင်ႇၸၢမ်ႇၸႃး ၵွပ်ႈပိူဝ်ႈဢၼ် ၸႂ်ပိုင်ႈၸႂ်လီမုၼ်ၵုင်ႇမႆႉ ဢႃႇရိတ်ႉ ၼၼ်ႉႁိုဝ်။ပေႃႈမႂ်းၼၼ်ႉ လႆႈၵိၼ်လႆႈၶူပ်း လႆႈသူတ်ႉလႆႈဢိုၵ်ႉ ဢိမ်ႇဢိမ်ႇတဵမ်တဵမ်ယူႇ ဢမ်ႇၸႂ်ႈႁိုဝ်။ မၼ်းၸီႇယၢင်ႇလႄႈ တႅပ်းတတ်းၸွမ်းၼင်ႇတြႃး ဢမ်ႇၸႂ်ႈႁိုဝ်။ မိူဝ်ႈၼၼ်ႉမၼ်းမီးတၢင်းဢၼ် လႆႈလီလႆႈပဵၼ်ဢေႃႈ။-

16မၼ်းပႂ်ႉဢမူႉၶဝ်ၸိူဝ်းဢၼ်ယၢၵ်ႈဢၼ်ၽၢၼ် ဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈ ၸီႇယၢင်ႇၸွမ်းၼင်ႇတြႃးဢေႃႈ။ မိူဝ်ႈၼၼ်ႉမၼ်းမီးတၢင်းဢၼ် လႆႈလီလႆႈပဵၼ်ဢေႃႈ။ လွင်ႈတၢင်းၼႆႉ ပဵၼ်ဢၵျူဝ်း ဢၼ်ႁူႉၸၵ်းၵဝ် ဢမ်ႇၸႂ်ႈႁိုဝ်။-

17မၢၵ်ႇတႃမႂ်း ဢိၵ်ႇတင်း ႁူဝ်ၸႂ်မႂ်းၸမ်ႉ၊ ၼွၵ်ႈသေတၢင်းဢၼ်လေႃးၽႃႉပူၼ်ႉလိူဝ်၊ တၢင်းဢၼ်ထွၵ်ႇလိူတ်ႈၵေႃႉဢၼ်ဢမ်ႇမီးဢပႅတ်ႈ၊ တၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ၊ ဢမ်ႇၸၢင်ႈဝႆႉဢမူႉတီႈလွင်ႈတၢင်းဢၼ်လႂ်လႃးလႃး။-

18ပိူဝ်ႈၼႆလႄႈ ထႃႇဝရႃႉၽြႃး ဢဝ်လွင်ႈ ယေႃးယၵိမ်း လုၵ်ႈၸၢႆးၶုၼ်လူင် ယူဝ်းသီႉယႃႉ ၶုၼ်ႁေႃၶမ်း ယူႉတႃႉ လႄႈမီးဢမိင်ႉၸမ်ႉ၊ၶဝ်ဢမ်ႇလႆႈဢွၼ်ၵၼ်ႁွင်ႉႁႆႈလႄႈဝႃႈ၊ ပီႈၸၢႆးၵဝ်ဢိူၺ်း၊ ၼွင်ႉယိင်းၵဝ်ဢိူၺ်း၊ ဝႃႈၼင်ႇၼႆလႄႈ ၶၢင်းၶီၶၢင်းၽၢၼ်ပုၼ်ႈမၼ်းလႄႈဝႃႈ၊ ၸဝ်ႈၵဝ်ဢိူၺ်း၊ မုၼ်ၽုင်းၵဝ်ဢိူၺ်း၊ ဝႃႈၼင်ႇၼႆၼၼ်ႉ။-

19ၶုၼ်ၼၼ်ႉ တၵ်းလႆႈၶၢမ်ႇတၢင်းဢၼ် တိုတ်ႉလၢၵ်ႈလႄႈ ဢဝ်ဢွၵ်ႇၵႂႃႇၸူး ၵႃႈတီႈၼွၵ်ႈၽၵ်းတူ ဝဵင်း ယေႇရူႉသလႅမ်ႇ သေလႄႈ ဢဝ်သၢင်းၵျူဝ်ႇ မိူၼ်ၸိူဝ်ႉၼင်ႇဢၼ်သၢင်းၵျူဝ်ႇ တူဝ်လီႈၼၼ်ႉဢေႃႈ။

20ၶိုၼ်ႈၵႃႈၼိူဝ်လွႆ လေႇပၼုၼ်ႇ လႄႈ ပၢဝ်ႇသေႃႇတႃႉ။ သႅၼ်ႇႁွင်ႉၵႃႈၼႂ်းမိူင်း ပႃႇသၢၼ်ႇ တႃႉ။ ယူႇၵႃႈတီႈ ဢႃႇပရိမ်ႇ ၵိဝ်သဵင်တႃႉ။ လွင်ႈမၼ်းၸမ်ႉ ၵေႃႉသေႈမႂ်းၸိူဝ်းၼၼ်ႉ ႁွတ်ႈထိုင်တၢင်းဢၼ်လူႉဢၼ်လႅဝ်ယဝ်ႉ။-

21ၵဝ်ပၼ်သတီႉၼႂ်းမိူဝ်ႈဢၼ် မႂ်းလႆႈလီလႆႈပဵၼ်ၼၼ်ႉလႄႈ မႂ်းၶိုၼ်းလၢတ်ႈလႄႈဝႃႈ၊ ၵဝ်ဢမ်ႇထွမ်ႇဢမ်ႇဢဝ်၊ ဝႃႈၼင်ႇၼႆဢေႃႈ။ မႂ်းယင်းဢမ်ႇထွမ်ႇ ဢမ်ႇဢဝ်ၵႂၢမ်းၵဝ် ၸႃႉၸဵမ်မိူဝ်ႈဢၼ်မႂ်း ယင်းလဵၵ်ႉယင်းဢွၼ်ႇၼၼ်ႉလႄႈ ယူႇၵႃႈၼင်ႇဢၼ်ယူႇၼၼ်ႉယဝ်ႉ။-

22လူမ်းတၵ်းၵိၼ် ၶဝ်ၸိူဝ်းဢၼ်လဵင်ႉထိင်းမႂ်း ၸိူဝ်းၼၼ်ႉလႄႈ ၵေႃႉသေႈမႂ်းၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် သိမ်းဢဝ်ၵႂႃႇဢေႃႈ။ မိူဝ်ႈၼၼ်ႉ မႂ်းတၵ်းမီးတၢင်းဢၼ်ဢူၵ်းဢၼ်ဢၢႆလႄႈ ၸႂ်လူႉၵွပ်ႈပိူဝ်ႈ တူႉၸရိူၵ်ႈမႂ်းၵႃႈမီးၼၼ်ႉ ဢမၢၼ်ႇၶၼ်ပဵၼ်ဢေႃႈ။-

23ၵေႃႉဢၼ်ၸၢင်ႈယူႇၵႃႈတီႈလွႆ လေႇပၼုၼ်ႇ လႄႈ ႁဵတ်းႁင်းယူႇၵႃႈတီႈတူၼ်ႈ ဢႃႇရိတ်ႉ တင်းလၢႆၼႆႉဢိူၺ်း၊ ယၢမ်းမိူဝ်ႈဢၼ်မႂ်း လႆႈၶၢမ်ႇဝူၺ်ႇတၼႃႇ ဢၼ်ၶူပ်းၶိုၼ်ႈၼႃႇ မိူၼ်ၸိူဝ်ႉၼင်ႇ ဢၼ်မႄႈယိင်းလႆႈၶၢမ်ႇဝူၺ်ႇတၼႃႇ တၢင်းဢၼ် ၵိူတ်ႇလဵင်ႉလုၵ်ႈၼၼ်ႉၸိုင်၊ မႂ်းတၵ်းပဵၼ်လွင်ႈ ဢၼ်လီဢဵတ်းလူၼႃႇလူင်လၢင်ထၢၼ်ႇႁိုဝ် လူင်ပႄႇ။

24ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ်ၵဝ် ဢသၢၵ်ႈလိပ်းယူႇၼၼ်ႉ ပိၵ်ႉသမ်ႉ ၶေႃးၼီႉ လုၵ်ႈၸၢႆးၶုၼ်လူင် ယေႃးယၵိမ်း ၶုၼ်ႁေႃၶမ်း ယူႉတႃႉ ၼၼ်ႉၼႆႉ ပဵၼ်လၢၵ်ႈၸွပ်ႈတၼ်းသိၵ်ႈ ဢၼ်ပႃးၵႃႈတီႈမိုဝ်းၽၢႆႇၶႂႃၵဝ် ဢမၢၼ်ႇၶၼ်ပဵၼ်သေၵေႃႈ ၵဝ်တၵ်းပႄႇမႂ်းပႅတ်ႈဢေႃႈ။-

25ၵဝ်တၵ်းဢဝ်မႂ်းဢၢပ်ႈပၼ် ၵႃႈၼႂ်းမိုဝ်းၵေႃႉဢၼ်ၸွမ်းႁႃဢသၢၵ်ႈမႂ်း၊ ၵေႃႉဢၼ်မႂ်းၵူဝ်ႁႄၼႃႇ လူင်လၢင်ဢၼ်ဝႃႈ ၵႃႈၼႂ်းမိုဝ်း ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ဢိၵ်ႇတင်း ၵူၼ်း ၶႃႇလတေး တင်းလၢႆ ၼၼ်ႉဢေႃႈ။-

26ၵဝ်တၵ်းဢဝ်မႂ်း ဢိၵ်ႇတင်းမႄႈမႂ်း ဢၼ်ၵိူတ်ႇလဵင်ႉမႂ်းမႃးၼၼ်ႉ ႁေႃႈဢွၵ်ႇၸူးၵႃႈတီႈမိူင်း ဢၼ်ဢမ်ႇၸႂ်ႈထႃႇၼႃႉ တီႈဢၼ်သူၵိူတ်ႇလဵင်ႉမႃးၼၼ်ႉလႄႈ သူတၵ်းလႆႈတၢႆ ၵႃႈတီႈၼၼ်ႈဢေႃႈ။-

27ၵမ်းလိုၼ်း ၶဝ်ဢမ်ႇလႆႈဢွၼ်ၵၼ်ၶိုၼ်းမႃး ၵႃႈတီႈမိူင်းတီႈဢၼ်ၶဝ် မီးဢလူဝ်ႇၶႂ်ႈၶိုၼ်းမႃးၼၼ်ႉ။-

28ၵူၼ်းၵေႃႉၼႆႉဢၼ်ဝႃႈ ၶေႃးၼီႉ ၼႆႉ ပဵၼ်မေႃႈလိၼ် တီႈဢၼ်ႁဵတ်းဢမ်ႇပေႃးၼင်ႇႁိုဝ်လႄႈ တႅၵ်ႇလႅဝ်ႁိုဝ်။ ပဵၼ်ၶိူင်ႈပိူင်ဢၼ်ၽူႈလႂ် ဢမ်ႇထုၵ်ႇၸႂ်ၵျိူၵ်ႈၸႂ်ၼၼ်ႉႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းဢိၵ်ႇတင်းၸိူဝ်ႉၶိူဝ်းမၼ်း လႆႈၶၢမ်ႇတၢင်းဢၼ်ႁေႃႈဢွၵ်ႇၸူး ၵႃႈတီႈမိူင်း ဢၼ်ၶဝ်ဢမ်ႇႁူႉၼၼ်ႉၼင်ႇႁိုဝ်။-

29လိၼ်မိူင်းဢိူၺ်း၊ လိၼ်မိူင်းဢိူၺ်း၊ လိၼ်မိူင်းဢိူၺ်း၊ ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။-

30ထႃႇဝရႃႉၽြႃး မီးဢမိင်ႉၸမ်ႉ၊ တႅမ်ႈမၢႆလွင်ႈ ဢၼ်ၵူၼ်းၵေႃႉၼႆႉ ပဵၼ်ၵေႃႉဢၼ် ဢမ်ႇမီးလုၵ်ႈမီးလၢင်း၊ ၵေႃႉဢၼ် ဢမ်ႇလႆႈလီလႆႈပဵၼ် ၸူဝ်ႈဢသၢၵ်ႈမၼ်းၼၼ်ႉဝႆႉတႃႉ။ ၵေႃႉဢၼ်ပဵၼ် ၸိူဝ်ႉၶိူဝ်းမၼ်းၼၼ်ႉ ဢမ်ႇလႆႈမီးဢၶႂၢင်ႉ ဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇၶုၼ် တႃႇဝိတ်ႈ ဢိၵ်ႇတင်း ဢၶႂၢင်ႉဢၼ်လႆႈဢုပ်ႉပိူင်ႇ ၸၢမ်ႇၸႃးမိူင်း ယူႉတႃႉ သေၵေႃႉသေၵူၼ်း။

← Chapter 21 Jump to: Chapter 23 →