Jeremiah 52

Shan

← Chapter 51 Jump to:

1ၸေႇတၵီႉ ၼၼ်ႉ မိူဝ်ႈဢၼ် ၸႃႉၼင်ႈႁၢင်ႈၼင်ႈႁေႃ ၼၼ်ႉၸိုင် ဢသၢၵ်ႈမၼ်းလႆႈ သၢဝ်းပၢႆဢဵတ်းပီႊ လႄႈ ဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆဢဵတ်းပီႊ ဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ႁႃႇမူႉတလႃႉ လုၵ်ႈယိင်း ယေႇရမီႉ ၵူၼ်းဝဵင်း လီႉပၼႃႉ ဢေႃႈ။-

2မၼ်းႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃ ထႃႇဝရႃႉၽြႃး ၸွမ်းၵႃႈၼင်ႇဢၼ် ယေႃးယၵိမ်း ႁဵတ်းၵႃႈမီးၼၼ်ႉဢေႃႈ။-

3ၵွပ်ႈပိူဝ်ႈ တၢင်းၸႂ်မႆႈၶႆႈၸႃႉ ထႃႇဝရႃႉၽြႃးလႄႈ ဢမူႉၼၼ်ႉ ပဵၼ်ၵႃႈၼႂ်းဝဵင်း ယေႇရူႉသလႅမ်ႇ တင်းမိူင်း ယူႉတႃႉ ယူႇ တေႃႇထိုင်ႁွတ်ႈ မၼ်းၸဝ်ႈထၼ်ႈပေႃး ႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈမၼ်းၸဝ်ႈ ၼၼ်ႉလႄႈ ၸေႇတၵီႉ ၼၼ်ႉ ပုင်ႇၵၢၼ်ႇ ၶုၼ်ႁေႃၶမ်း ပႃႇပူႉလုၼ်ႇ ဢေႃႈ။-

4ၼႂ်းပီႈဢၼ် မၼ်းၸၢမ်ႇႁၢင်ႈ ၸၢမ်ႇႁေႃၵဝ်ႈပီႊ၊ လိူၼ်တႃႉသမႃႉ သိပ်းဝၼ်းၼၼ်ႉ ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ ပႃးဢဝ်တင်း ပူဝ်ႇပႃႇမၼ်း တင်းသဵင်ႈတင်းလူင် သေလႄႈ ၶီႇသိုၵ်းၸူး ၵႃႈတီႈဝဵင်း ယေႇရူႉသလႅမ်ႇ လႄႈ ၶျႃးတပ်ႉ ယူႇၽၢႆႇၼိုင်ႈ တင်းဝဵင်းသေလႄႈ တႄႇႁဵတ်းလၢင်းၸီး ၵႃႈတီႈႁိမ်းႁွမ်း လဵပ်ႈႁွပ်ႈဝဵင်းဝႆႉသေယဝ်ႉ၊-

5လွမ်ႉဝဵင်းဝႆႉ တေႃႇထိုင်ႁွတ်ႈ ၸေႇတၵီႉ ၸၢမ်ႇႁၢင်ႈၸၢမ်ႇႁေႃလႆႈ သိပ်းပၢႆဢဵတ်းပီႊၼၼ်ႉဢေႃႈ။-

6ၼႂ်းလိူၼ်ၸတုၵ်ႉထႃႉ ၵဝ်ႈဝၼ်း၊ ၵႃႈၼႂ်းဝဵင်းတၢင်းၵိၼ်တၢင်းၶူပ်း ၵႃႈပႅင်း ၼႃႇလူင်လၢင်ထၼ်ႈပေႃး ဢမ်ႇမီး တၢင်းၵိၼ်တၢင်းၶူပ်း ပုၼ်ႈၵူၼ်းၶူးၵူၼ်းဝဵင်း တင်းလၢႆဢေႃႈ။-

7မိူဝ်ႈၼၼ်ႉ ၶဝ်ၼၼ်ႉၵေႃႈ ၸီးမူင်ႇလမ်းဝဵင်းယူႇလႄႈ ႁူဝ်ႁၢၼ်ၵူၼ်းသိုၵ်း ၵူၼ်းဝဵင်းတင်းသဵင်ႈတင်းလူင် ဢွၼ်ၵၼ်ဢွၵ်ႇပၢႆႈ ၶိင်ႇၵၢင်ၶိုၼ်း ၸွမ်းသဵၼ်ႈတၢင်းၽၵ်းတူ ၵႄႈလမ်းဝဵင်းသွင်ထၢပ်ႈ ၵႃႈတီႈႁိမ်းသူၼ်ဢူးယဵၼ်ႇၶုၼ်ႁေႃၶမ်းလႄႈ ၵူၼ်း ၶႃႇလတေး တင်းလၢႆ ယူႇၽၢႆႇၼိုင်ႈ တင်းဝဵင်းသေလႄႈ လွမ်ႉဝဵင်းဝႆႉယူႇလႄႈ ၶုၼ်ႁေႃၶမ်း ၸွမ်းသဵၼ်ႈတၢင်းဢၼ်ၵႂႃႇၸူးၵႃႈတီႈ ပၢင်ႇပဵင်း ဢႃႇရၽႃႉ ဢေႃႈ။-

8တပ်ႉၵူၼ်း ၶႃႇလတေး ၸိူဝ်းၼၼ်ႉ လိုပ်ႈၸွမ်း ၶုၼ်ႁေႃၶမ်းလႄႈ ၶိုတ်းမၼ်းၵႃႈတီႈၼႂ်း ပၢင်ႇပဵင်း ယေႇရီႉၶူဝ်း သေယဝ်ႉ၊ ႁူဝ်ႁၢၼ် ၵူၼ်းသိုၵ်းမၼ်း တင်းသဵင်ႈတင်းလူင် ၽူင်ႉပၢႆႈ ၽၢတ်ႇၽႄၵၼ် တင်းမၼ်းဢေႃႈ။-

9ၶဝ်ဢွၼ်ၵၼ် တီႉၵမ်ဢဝ် ၶုၼ်ႁေႃၶမ်းလႄႈ ဢဝ်ၵႂႃႇၸူးၵႃႈတီႈ ၶုၼ်ႁေႃၶမ်း ပႃႇပူႉလုၼ်ႇ ၵႃႈတီႈ ဝဵင်း ရီႉပလႃႉ မိူင်း ႁႃႇမတ်ႉ ၼၼ်ႉ သေလႄႈ မၼ်းၼၼ်ႉ ၸႅတ်ႈထၢမ် ၸီႇယၢင်ႇဢမူႉ မၼ်းဢေႃႈ။-

10ၶဝ်ဢဝ်လုၵ်ႈၸၢႆး ၸေႇတၵီႉ တင်းလၢႆ တၢႆသိုဝ်ႈၼႃႈတႂ်ႈတႃမၼ်းလႄႈ ဢဝ်မူးမၢတ်ႈၽွင်းမိူင်း မိူင်း ယူႉတႃႉ ၵႃႈမီးတၢႆၵႃႈတီႈဝဵင်း ရီႉပလႃႉ ၼၼ်ႉဢေႃႈ။-

11မၼ်းၼၼ်ႉ ၶွၵ်းမၢၵ်ႇတႃ ၸေႇတၵီႉ ပႅတ်ႈသေယဝ်ႉ၊ ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ ဢဝ်ၸိူၵ်ႈတွင်းလိူင် မတ်ႉၽုၵ်ႇမၼ်းသေလႄႈ ဢဝ်မၼ်းၵႂႃႇၵႃႈတီႈဝဵင်း ပႃႇပူႉလုၼ်ႇ လႄႈ ဢဝ်မၼ်းၶင်ဝႆႉ ၵႃႈၼႂ်းထွင်ႇ တေႃႇထိုင်ႁွတ်ႈ မိုဝ်ႉဝၼ်းဢၼ်မၼ်းတၢႆ ၼၼ်ႉဢေႃႈ။

12ၼႂ်းပီႊဢၼ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၸၢမ်ႇႁၢင်ႈၸၢမ်ႇႁေႃသိပ်းပၢႆၵဝ်ႈပီႊ၊ လိူၼ်ပိၼ်ႇၸမႃႉ သိပ်းဝၼ်းၼၼ်ႉ ၼေႇပူႉၸႃႇရႃႇတၢၼ်ႇ ၵူဝ်ႇရမ်ႇတေႃႇမူး၊ ၵေႃႉဢၼ်ႁၢပ်ႇဢမူႉ ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ မႃးၵႃႈတီႈဝဵင်း ယေႇရူႉသလႅမ်ႇ လႄႈ၊-

13ဢဝ်ၽႆးတုတ်ႇႁိူၼ်း ထႃႇဝရႃႉၽြႃး ဢိၵ်ႇတင်း ႁေႃၸဝ်ႈပႅတ်ႈလႄႈ ႁိူၼ်းဝဵင်း ယေႇရူႉသလႅမ်ႇ ၵႃႈမီး ဢၼ်ဝႃႈႁိူၼ်းယႂ်ႇ၊ ႁိူၼ်းလူင် တင်းသဵင်ႈတင်းလူင်ၵေႃႈ ဢဝ်မႆႈၽႆးပႅတ်ႈဢေႃႈ။-

14တပ်ႉၵူၼ်းသိုၵ်း ၵူၼ်း ၶႃႇလတေး ၵႃႈဢၼ်ပႃးတီႈ ၵူဝ်ႇရမ်ႇတေႃႇမူးၼၼ်ႉၸိူဝ်းၼၼ်ႉ ဢွၼ်ၵၼ်ၵိူၼ်ႇယႃႉလမ်းဝဵင်း ယေႇရူႉသလႅမ်ႇ ၵႃႈမီးပႅတ်ႈဢေႃႈ။-

15မိူဝ်ႈၼၼ်ႉ ၵူဝ်ႇရမ်ႇတေႃႇမူး ၼေႇပူႉၸႃႇရႃႇတၢၼ်ႇ ၼၼ်ႉ သိမ်းဢဝ် ၶဝ်ၸိူဝ်းဢၼ်ယၢၵ်ႈဢၼ်ၽၢၼ် ၵမ်ႈၽွင်ႈ၊ ၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇယူႇ ၵႃႈၼႂ်းဝဵင်း၊ ၶဝ်ၸိူဝ်းဢၼ်ၵႂႃႇၶဝ်ႈလႄႈ ယူႇၽၢႆႇၶုၼ်ႁေႃၶမ်း ပႃႇပူႉလုၼ်ႇ တင်းမုၵ်ႉၵူၼ်း ၸိူဝ်းၵူၼ်း ၵႃႈဢၼ်ယင်းၵိုတ်းယင်းၵျၢၼ်ႇၼၼ်ႉ ၸိူဝ်းၼၼ်ႉၵႂႃႇဢေႃႈ။-

16ၼႂ်းဝႃႈၼၼ်သေၵေႃႈ ၵူဝ်ႇရမ်ႇတေႃႇမူး ၼေႇပူႉၸႃႇရႃႇတၢၼ်ႇ ၼၼ်ႉ ဝႆႉၵိုတ်းၵူၼ်းၽၢၼ်ၵမ်ႈၽွင်ႈ ႁႂ်ႈလႆႈပဵၼ် ၵေႃႉဢၼ်လုမ်းလႃး သူၼ်ဢူးယဵၼ်ႇၸပိတ်ႈ၊ ၵေႃႉဢၼ် ႁဵတ်းႁႆႊႁဵတ်းၼႃးဢေႃႈ။-

17ၵူၼ်း ၶႃႇလတေး ၸိူဝ်းၼၼ်ႉ ဢွၼ်ၵၼ် ဢဝ်သဝ်တွင်းလိူင် ဢၼ်မီးၵႃႈၼႂ်းႁိူၼ်း ထႃႇဝရႃႉၽြႃးလႂ်၊ ၶူင်ႇလႂ်၊ တင်းၼမ်ႉၼွင်တွင်းလိူင်လႂ် ဢၼ်မီးၵႃႈၼႂ်းႁိူၼ်း ထႃႇဝရႃႉၽြႃး ၼၼ်ႉၸိူဝ်းၼၼ်ႉ ႁၵ်းႁဵၵ်းပႅတ်ႈလႄႈ ဢဝ်တွင်းလိူင်ၵႃႈမီးၼၼ်ႉ ၵႂႃႇၵႃႈတီႈဝဵင်း ပႃႇပူႉလုၼ်ႇ ဢေႃႈ။-

18ၸႃႉၸဵမ်မေႃႈလႂ်၊ ၸေႃႉၽႅပ်ႉလႂ်၊ ၵိမ်းၵိပ်ႈၽႆးလႂ်၊ ဝၢၼ်ႇလႂ်၊ ၸေႃႉလႂ်လႄႈ ၶိူင်ႈတွင်းလိူင် ပုၼ်ႈဢၼ်တၵ်းပွင်ဢမူႉၸဝ်ႈ ၵႃႈမီးၼၼ်ႉၵေႃႈ၊ ၶဝ်ဢွၼ်ၵၼ်ဢဝ်ၵႂႃႇဢေႃႈ။-

19မေႃႈမိၼ်ႇလႂ်၊ လၢင်ႇပၢၼ်းလႂ်၊ ဝၢၼ်ႇလႂ်၊ မေႃႈလႂ်၊ ၶူင်ႇတီႈတႆႈၽႆးလႂ်၊ ၸေႃႉလႂ်၊ ၵွၵ်းဢႅင်ႇလႂ် ဢၼ်ဝႃႈၶိူင်ႈၶမ်း၊ ၶိူင်ႈငိုၼ်းၸိူဝ်းၼၼ်ႉၸိုင်၊ ပဵၼ်ၶမ်းသေဢမ်ႇဝႃႈ၊ ပဵၼ်ငိုၼ်းသေဢမ်ႇဝႃႈ၊ ၵူဝ်ႇရမ်ႇတေႃႇမူးၼၼ်ႉ ဢဝ်ၵႂႃႇဢေႃႈ။-

20တွင်းလိူင် ဢၼ်ပႃးၵႃႈတီႈ သဝ်သွင်လႅမ်ႈ၊ ၼမ်ႉၼွင် ဢၼ်ၼိုင်ႈ၊ ဝူဝ်းတွင်းလိူင် သိပ်းသွင်တူဝ် ဢၼ်မီးၵႃႈတႂ်ႈၶူင်ႇ ၼမ်ႉၼွင် ဢၼ် သေႃးလမုၼ်ႇ ႁဵတ်းပုၼ်ႈႁိူၼ်း ထႃႇဝရႃႉၽြႃးၼၼ်ႉ ၸိူဝ်းၼၼ်ႉၵေႃႈ ဢဝ်ၵႂႃႇဢေႃႈ။ ၶၼ်ၸင်ႈ ၶိူင်ႈတွင်းလိူင်ၵႃႈမီး ၸိူဝ်းၼၼ်ႉ ဢမ်ႇႁူႉၼမ်လႂ်လႄႈ ၼမ်ၼႃႇဢေႃႈ။-

21တၢင်းဢၼ်သုင်သဝ်ၼၼ်ႉၸမ်ႉ၊ မီးသိပ်းပႅတ်ႈသွၵ်ႇ ဢေႃႈ။ ဝႅင်းမူၼ်းမၼ်း မီးၸိူၵ်ႈဢၼ်ယၢဝ်း သိပ်းသွင်သွၵ်ႇ ၼၼ်ႉ ႁွပ်ႈၼိုင်ႈ ဢေႃႈ။ တၢင်းဢၼ်ၼႃမၼ်းမီး သီႇၼိဝ်ႉလႄႈ ပဵၼ်ၵူင်ဝႆႉဢေႃႈ။-

22ၵႃႈၼိူဝ်မၼ်း မီးႁူဝ်သဝ်တွင်းလိူင်သေဢေႃႈ။ တၢင်းသုင်ႁူဝ်သဝ်ၼၼ်ႉၸမ်ႉ၊ မီးႁႃႈသွၵ်ႇလႄႈ ၵႃႈတီႈလဵပ်ႈႁွပ်ႈႁူဝ်သဝ်ၼၼ်ႉ ပျေႉၸုမ်ႇဝႆႉတင်းတႃၶႄ ဢိၵ်ႇတင်း မၢၵ်ႇၸင်ႈ တင်းလၢႆ ဢၼ်ပဵၼ်တွင်းလိူင်ၵူၺ်းၵူၺ်းၼၼ်ႉ သေလႄႈ သဝ်တင်းလၢႆၼၼ်ႉၵေႃႈ ပဵၼ်မိူၼ်ၸိူဝ်ႉၼင်ႇၼၼ်လႄႈ ပျေႉၸုမ်ႇဝႆႉတင်း မၢၵ်ႇၸင်ႈ တင်းလၢႆဢေႃႈ။-

23ၵႃႈတီႈသဝ်တင်းသီႇၼႃႈ မီးမၢၵ်ႇၸင်ႈ ၵဝ်ႈသိပ်းပၢႆႁူၵ်း လုၵ်ႈလႄႈ ၵႃႈတီႈတႃၶႄ ဢၼ်လဵပ်ႈႁွပ်ႈၼၼ်ႉ မၢၵ်ႇၸင်ႈပွင်းၵၼ် မီးပၢၵ်ႇၼိုင်ႈ ဢေႃႈ။

24ၵူဝ်ႇရမ်ႇတေႃႇမူးၼၼ်ႉ တီႉၵမ်ဢဝ် ၶုၼ်ယိတ်ႈပရေႃးႁဵၵ်ႈ ၸရႃႇယႃႉ ယိတ်ႈပရေႃးႁဵၵ်ႈ တူႉတီႉယႃႉ ၸေႇၽၼီႉ ဢိၵ်ႇတင်း ၵႄႇၽၵ်းတူၸဝ်ႈသၢမ်ၵေႃႉ ၸိူဝ်းၼၼ်ႉဢေႃႈ။-

25မၼ်းၼၼ်ႉ ႁွင်ႉဢဝ်ပူဝ်ႇဢၼ်ဢုပ်ႉ ၵႃႈၼိူဝ်ႁူဝ်ႁၢၼ်ၵူၼ်းသိုၵ်း တင်းလၢႆၼၼ်ႉ ၵေႃႉၼိုင်ႈ၊ မူးမၢတ်ႈၽွင်းမိူင်း ဢၼ်ယၢမ်ႈလႆႈႁၼ်ၼႃႈ ၶုၼ်ႁေႃၶမ်း ဢၼ်ၶဝ်ထူပ်းႁၼ် ၵႃႈၼႂ်းဝဵင်းၼၼ်ႉ ၸဵတ်းၵေႃႉ၊ ၸရေးလူင်ဢၼ်ဝႃႈ ပူဝ်ႇၶျုၵ်ႈ ဢၼ်လႆႈမၢတ်ႈ လႆႈမၢႆၸရၢင်း ၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉၵေႃႉၼိုင်ႈ ဢိၵ်ႇတင်းၵူၼ်းဝၢၼ်ႈၵူၼ်းမိူင်းဢၼ်ထူပ်းမႅၼ်ႈၵႃႈၼႂ်းဝဵင်း ႁူၵ်းသိပ်းၵေႃႉ ၸိူဝ်းၼၼ်ႉ လႄႈ၊-

26ၼေႇပူႉၸႃႇရႃႇတၢၼ်ႇ ၵူဝ်ႇရမ်ႇတေႃႇမူးၼၼ်ႉ ဢဝ်ၶဝ်ၼၼ်ႉၵႂႃႇသူင်ႇ တီႈၶုၼ်ႁေႃၶမ်း ပႃႇပူႉလုၼ်ႇ ၵႃႈတီႈဝဵင်း ရီႉပလႃႉ သေလႄႈ၊-

27ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ ပၼ်တၢမ်ႇတီႈၶဝ်ၼၼ်ႉလႄႈ ဢဝ်ၶဝ်ၼၼ်ႉတၢႆ ၵႃႈတီႈဝဵင်း ရီႉပလႃႉ မိူင်း ႁႃႇမတ်ႉ ၼၼ်ႉဢေႃႈ။ ၼင်ႇၼၼ်လႄႈ မဵဝ်း ယူႉတႃႉ လႆႈၶၢမ်ႇ တၢင်းဢၼ်သိမ်းဢဝ်ဢွၵ်ႇသေ ၵႃႈၼႂ်းမိူင်းၶဝ်ၵႂႃႇဢေႃႈ။-

28ၶဝ်ၸိူဝ်းဢၼ် ၼေႇပူႉၶတ်ႉၼေႇၸႃႇ သိမ်းဢဝ်ၵႂႃႇ ၼၼ်ႉၸမ်ႉ၊ ၼႂ်းပီႊဢၼ်မၼ်းၼၼ်ႉ ၸၢမ်ႇႁၢင်ႈၸၢမ်ႇႁေႃၸဵတ်းပီႊၼၼ်ႉ မၼ်းသိမ်းဢဝ် ၵူၼ်းမဵဝ်း ယူႉတႃႉ သၢမ်ႁဵင်ပၢႆသၢဝ်းသၢမ်ၵေႃႉ ၵႂႃႇဢေႃႈ။-

29ၼႂ်းပီႊဢၼ် ၼေႇပူႉၶတ်ႉၼေႇၸႃႇ ၸၢမ်ႇႁၢင်ႈၸၢမ်ႇႁေႃ သိပ်းပႅတ်ႈပီႊၼၼ်ႉ၊ မၼ်းသိမ်းဢဝ်ၵူၼ်းပႅတ်ႇ ပၢၵ်ႇသၢမ်သိပ်းပၢႆသွင်ၵေႃႉ ဢွၵ်ႇသေၵႃႈတီႈဝဵင်း ယေႇရူႉသလႅမ်ႇ ၵႂႃႇဢေႃႈ။-

30ၼႂ်းပီႊဢၼ် ၼေႇပူႉၶတ်ႉၼေႇၸႃႇ ၸၢမ်ႇႁၢင်ႈၸၢမ်ႇႁေႃ သၢဝ်းပၢႆသၢမ်ပီႊ ၼၼ်ႉ၊ ၵူဝ်ႇရမ်ႇတေႃႇမူး ၼေႇပူႉၸႃႇရႃႇတၢၼ်ႇ သိမ်းဢဝ် ၵူၼ်းမဵဝ်း ယူႉတႃႉ ၸဵတ်းပၢၵ်ႇသီႇသိပ်းပၢႆႁႃႈၵေႃႉ ၵႂႃႇဢေႃႈ။ ၵူၼ်းတင်းသဵင်ႈတင်းလူင် ပွင်းၵၼ်ၸမ်ႉ၊ မီးသီႇႁဵင်ပၢႆႁူၵ်းပၢၵ်ႇ ဢေႃႈ။-

31ၼႂ်းပီႊဢၼ် ယေႇၶေႃးၼီႉ ၶုၼ်ႁေႃၶမ်း ယူႉတႃႉ ၶၢမ်ႇတၢင်းဢၼ်ၶျုၵ်ႈဝႆႉ သၢမ်သိပ်းပၢႆၸဵတ်းပီႊ၊ လိူၼ်တႂႃႇတႃႉသမႃႉ သၢဝ်းပၢႆႁႃႈဝၼ်းၼၼ်ႉ ဢေဝီႉလႃႉမရေႃးတၵ်ႉ ၶုၼ်ႁေႃၶမ်း ပႃႇပူႉလုၼ်ႇ ၼုၵ်ႈဢဝ် ယေႇၶေႃးၼီႉ ၶုၼ်ႁေႃၶမ်း ယူႉတႃႉ ဢွၵ်ႇသေ ၵႃႈၼႂ်းထွင်ႇ ပၼ်ၵတ်းယဵၼ်ၶျၢမ်းသႃႇ ၼႂ်းပီႊဢၼ်မၼ်း ၸႃႉၼင်ႈႁၢင်ႈၼင်ႈႁေႃၼၼ်ႉလႄႈ၊-

32တၵ်ႉလၢတ်ႈၵၼ် တင်းမၼ်းၼၼ်ႉ လီလီငၢမ်းငၢမ်းသေလႄႈ ယုၵ်ႉယွင်ႈပလၢင်ႇမၼ်းဝႆႉ သုင်သေပလၢင်ႇ ၶုၼ်လူင်တင်းလၢႆ ဢၼ်မီးၵႃႈတီႈမၼ်း ၵႃႈၼႂ်းဝဵင်း ပႃႇပူႉလုၼ်ႇ ၼၼ်ႉဢေႃႈ။-

33မၼ်းၼၼ်ႉ လႆႈပုတ်ႈလႆႈလၢႆႈ ၶူဝ်းၼုင်ႈဢၼ်မၼ်းၼုင်ႈၵႃႈၼႂ်းထွင်ႇၼၼ်ႉ သေလႄႈ လႆႈၵိၼ်လႆႈၶူပ်း ၵႃႈတီႈၽၢႆႇၼႃႈၶုၼ်ၼၼ်ႉ ၸူဝ်ႈဢၼ်ဢသၢၵ်ႈမၼ်း ယင်းယၢဝ်းယိုၼ်းယူႇၼၼ်ႉ တဵမ်တဵမ်ၼၼ်ႉဢေႃႈ။-

34ပုၼ်ႈတႃႇဢၼ်မၼ်း တၵ်းၵိၼ်တၵ်းၶူပ်းၼၼ်ႉၸမ်ႉ၊ ၶုၼ်ႁေႃၶမ်း ပႃႇပူႉလုၼ်ႇ ပၼ်ပုၼ်ႈတႃႇ ဢၼ်သေႇသေႇၼၼ်ႉ တီႈမၼ်းဢၼ်ဝႃႈ ပုၼ်ႈတႃႇယေႈဝၼ်း ယေႈဝၼ်းတေႃႇထိုင်ႁွတ်ႈမၼ်းတၢႆ ၸူဝ်ႈဢၼ်ဢသၢၵ်ႈမၼ်း ယၢဝ်းယိုၼ်းယူႇၼၼ်ႉ တဵမ်တဵမ်ဢေႃႈ။ ၵျၢမ်းဢၼႃႇၵၢတ်ႈတီႉပရေႃးၽႅတ်ႈ ယေႇရမီႉ ယဝ်ႉယဝ်ႉဢေႃႈ။

← Chapter 51 Jump to:

Recommended Reading

Commentary Jeremiah Commentaries → Devotional Jeremiah Devotional Guide → Get This Bible Shan Study Bible →