Jeremiah 34

Shan

← Chapter 33 Jump to: Chapter 35 →

1ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ ၼႂ်းမိူဝ်ႈဢၼ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ဢိၵ်ႇတင်းပူဝ်ႇပႃႇမၼ်းၵႃႈမီး၊ သိုင်ႇၸိုင်ႈဝၢၼ်ႈမိူင်း ၵႃႈဢၼ်မၼ်းလႆႈဢုပ်ႉပိူင်ႇ၊ မဵဝ်းၵူၼ်း ၵူႈၸိူဝ်ႉၵူႈမဵဝ်းၸိူဝ်းၼၼ်ႉ ဢွၼ်ၵၼ်မႃးတိုၵ်းတေႃး ဝဵင်း ယေႇရူႉသလႅမ်ႇ ဢိၵ်ႇတင်း ဝၢၼ်ႈဝဵင်းၵႃႈဢၼ် ၸၢပ်ႈသႅင်ႇၵၼ်တင်းမၼ်းၼၼ်ႉ ယူႇၼၼ်ႉ လႄႈဝႃႈ၊-

2ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ မႂ်းၵႂႃႇလႄႈမွၵ်ႇလၢတ်ႈတီႈ ၸေႇတၵီႉ ၶုၼ်ႁေႃၶမ်း ယူႉတႃႉ လႄႈဝႃႈ၊ ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး၊ ၵဝ်တၵ်းဢဝ်ဝဵင်းၼႆႉ ဢၢပ်ႈပၼ်ၵႃႈၼႂ်းမိုဝ်း ၶုၼ်ႁေႃၶမ်း ပႃႇပူႉလုၼ်ႇ လႄႈ၊ မၼ်းၼၼ်ႉ တၵ်းဢဝ်ၽႆးတုတ်ႇပႅတ်ႈဢေႃႈ။-

3မႂ်းဢမ်ႇလႆႈၵၢင်းလွတ်ႈတင်း မိုဝ်းမၼ်းၼၼ်ႉ။ မႂ်းတၵ်းလႆႈၶၢမ်ႇတၢင်းဢၼ်တီႉၵမ်ဢဝ်သေလႄႈ ဢၢပ်ႈပၼ်ၵႃႈၼႂ်း မိုဝ်းမၼ်းၼၼ်ႉ ဢမၢၼ်ႇၶၼ်ပဵၼ်ဢေႃႈ။ တႃမႂ်းတၵ်းလႆႈႁၼ် တႃၶုၼ်ႁေႃၶမ်း ပႃႇပူႉလုၼ်ႇ လႄႈ သူပ်းတေႃႇသူပ်း မၼ်းတၵ်းလၢတ်ႈတေႃႇၵၼ် တင်းမႂ်းလႄႈ မႂ်းတၵ်းလႆႈၵႂႃႇၵႃႈတီႈဝဵင်း ပႃႇပူႉလုၼ်ႇ ပုၼ်ႉဢေႃႈ။-

4ၵူၺ်းၵႃႈ ၸေႇတၵီႉ ၶုၼ်ႁေႃၶမ်း ယူႉတႃႉ တီႈၶႃႈဢိူၺ်း၊ ထွမ်ႇငိၼ်းၵႂၢမ်း ထႃႇဝရႃႉၽြႃးတႃႉ။ ထႃႇဝရႃႉၽြႃး ဢဝ်လွင်ႈၸဝ်ႈၶုၼ်လူင်လႄႈ မီးဢမိင်ႉၸမ်ႉ၊ မႂ်းဢမ်ႇလႆႈၶၢမ်ႇတၢႆ လူၺ်ႈလၢပ်ႇလူၺ်ႈလႅဝ်း။-

5မႂ်းတၵ်းတၢႆၼိမ်ၼိမ်လီလီလႄႈ ၶဝ်တၵ်းဢွၼ်ၵၼ်ဢဝ် ၼၢမ်ႇသႃႇတုတ်ႇၽႆးပုၼ်ႈမႂ်း မိူၼ်ၸိူဝ်ႉၼင်ႇ ဢၼ်ယၢမ်ႈႁဵတ်းပုၼ်ႈ ပူႇမႂ်းမွၼ်ႇမႂ်း ဢၼ်ဝႃႈၶုၼ်ႁေႃၶမ်း ဢၼ်ဢုပ်ႉပိူင်ႇၸၢမ်ႇၸႃးမိူဝ်ႈဢွၼ်တၢင်းမႂ်း ၸိူဝ်းၼၼ်ႉယူႇသေလႄႈဝႃႈ၊ ၸဝ်ႈဢိူၺ်း၊ ၸဝ်ႈဢိူၺ်း၊ ဝႃႈၼင်ႇၼႆလႄႈ ႁႆႈႁွင်ႉပွင်ႉၶၢင်းပုၼ်ႈမႂ်းဢေႃႈ။ ၵဝ်လၢတ်ႈဝႆႉယဝ်ႉယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

6ပရေႃးၽႅတ်ႈ ယေႇရမီႉ ဢဝ်ၵႂၢမ်းၵႃႈမီးၼႆႉသင်ႇလၢတ်ႈဝႆႉတီႈ ၸေႇတၵီႉ ၶုၼ်ႁေႃၶမ်း ယူႉတႃႉ ၵႃႈၼႂ်းဝဵင်း ယေႇရူႉသလႅမ်ႇ ၊-

7ၼႂ်းမိူဝ်ႈဢၼ်ပူဝ်ႇပႃႇ ၶုၼ်ႁေႃၶမ်း ပႃႇပူႉလုၼ်ႇ ၸိူဝ်းၼၼ်ႉ ယင်းတိုၵ်းဢဝ်ဝဵင်း ယေႇရူႉသလႅမ်ႇ ဢိၵ်ႇတင်းဝဵင်း ယူႉတႃႉ ဢၼ်ယင်းၵိုတ်းယင်းၵျၢၼ်ႇ ဢၼ်ဝႃႈ ဝဵင်း လႃႇၶီႉသႃႉ ၊ ဝဵင်း ဢၸေႇၵႃႇ ဢၼ်မၼ်ႈၶိူင်ႇလႄႈ ယင်းၵိုတ်းဝႆႉၼႂ်းဝဵင်း ယူႉတႃႉ ၸိူဝ်းၼၼ်ႉယူႇ ၼၼ်ႉဢေႃႈ။

8ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ လိုၼ်းသေဢၼ် ၶုၼ်လူင် ၸေႇတၵီႉ ႁဵတ်းပတီႉၺိၺ်ႇ လူၺ်ႈၵၼ်တင်း ၵူၼ်းတင်းသဵင်ႈတင်းလူင် ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၊-

9လူၺ်ႈလွင်ႈ ဢၼ်တၵ်းၸီႇယၢင်ႇမွၵ်ႇလၢတ်ႈ တြႃးတၢင်းဢၼ်လွတ်ႈႁႂ်ႈၶဝ်ၼၼ်ႉ ႁင်းၽႂ်ႁင်းမၼ်း ၵမ်းလိုၼ်းယင်းဢမ်ႇၸႂ်ႉၵိၼ် ပီႈမၼ်းၼွင်ႉမၼ်း ဢၼ်ဝႃႈၵူၼ်း ယူႉတႃႉ ၼင်ႇၵၼ်ၵၼ်လႄႈ ပွႆႇလွတ်ႈၶႃႈၵူၼ်းၸၢႆး ၶႃႈၵူၼ်းယိင်း မဵဝ်း ႁေႇပြႄး ဢၼ်လႆႈၶၢမ်ႇတၢင်းဢၼ် ၸႂ်ႉၵိၼ်သွႆၵိၼ်ယူႇ ၸိူဝ်းၼၼ်ႉယဝ်ႉၼၼ်ႉဢေႃႈ။-

10လွင်ႈမၼ်းၸမ်ႉ မူးမၢတ်ႈၽွင်းမိူင်းၵႃႈမီး ဢိၵ်ႇတင်း ၵူၼ်းတင်းလၢႆ ဢၼ်ႁပ်ႉတုင်းဢဝ်ပတီႉၺိၺ်ႇ လူၺ်ႈလွင်ႈဢၼ်ၶဝ် ႁင်းၽႂ်ႁင်းမၼ်းၵမ်းလိုၼ်း ယင်းဢမ်ႇၸႂ်ႉၵိၼ် ပီႈမၼ်းၼွင်ႉမၼ်း ၼင်ႇၵၼ်ၵၼ်လႄႈ တၵ်းပွႆႇလွတ်ႈၶႃႈၵူၼ်းၸၢႆးမၼ်း ၶႃႈၵူၼ်းယိင်း မၼ်းတင်းလၢႆၼၼ်ႉၸိူဝ်းၼၼ်ႉ ၽွမ်ႉၵၼ်ထွမ်ႇဢဝ်လႄႈ ဢွၼ်ၵၼ်ပွႆႇလွတ်ႈဢေႃႈ။-

11ၵမ်းလိုၼ်းၶဝ် ၶၢႆႉပုတ်ႈလႄႈ သမ်ႉၶိုၼ်းႁွင်ႉဢဝ် ၶႃႈၵူၼ်းၸၢႆး ၶႃႈၵူၼ်းယိင်း ဢၼ်ၶဝ်ပွႆႇလွတ်ႈယဝ်ႉ ၸိူဝ်းၼၼ်ႉမႃးလႄႈ ႁႂ်ႈၶၢမ်ႇႁဵတ်း ၶႃႈၵူၼ်းၸၢႆး ၶႃႈၵူၼ်းယိင်း ထႅင်ႈဢေႃႈ။-

12ပိူဝ်ႈၼႆလႄႈ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ လႄႈဝႃႈ၊-

13ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ၵဝ်ႁဵတ်းပတီႉၺိၺ်ႇလူၺ်ႈၵၼ် တင်းပူႇသူမွၼ်ႇသူၼႂ်းမိူဝ်ႈဢၼ်ၵဝ်ၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ တီႈဢၼ်ၶဝ်ၶၢမ်ႇႁဵတ်းၶႃႈၼၼ်ႉလႄႈဝႃႈ၊-

14ပေႃးၸေးၸဵတ်းပီႊယဝ်ႉၸိုင် သူတၵ်းလႆႈပွႆႇပီႈသူၼွင်ႉသူ ဢၼ်ပဵၼ်ၵူၼ်းမဵဝ်း ႁေႇပြႄး ၼင်ႇၵၼ်ၵၼ် ဢၼ်လႆႈၶၢမ်ႇတၢင်းဢၼ် ၶၢႆတေႃႇသူလႄႈ ၶၢမ်ႇႁဵတ်းၶႃႈတီႈသူ ႁူၵ်းပီႊတဵမ်တဵမ်ယဝ်ႉၼၼ်ႉလွတ်ႈ ႁင်းၽႂ်ႁင်းမၼ်းဢေႃႈ။ ပိၵ်ႉသမ်ႉဝႃႈ၊ သူတၵ်းလႆႈ ပၼ်ဢၶႂၢင်ႉ ဢၼ်လွတ်ႈဢေႃႈ၊ ဝႃႈၼင်ႇၼႆသေၵေႃႈ၊ ပူႇသူမွၼ်ႇသူၸိူဝ်းၼၼ်ႉ ဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ ဢမ်ႇဝၢႆႇႁူႁေႈႁူၸူးလႄႈယူႇဢေႃႈ။-

15မိူဝ်ႈလဵဝ်ၼႆႉ ပိၵ်ႉသမ်ႉသူမီးတၢင်းဢၼ် ၶၢႆႉပုတ်ႈလႄႈ ႁဵတ်းလွင်ႈတၢင်းဢၼ်တြႃး သိုဝ်ႈၼႃႈတႂ်ႈတႃၵဝ် ၼႂ်းလွင်ႈဢၼ် ၸီႇယၢင်ႇမွၵ်ႇလၢတ်ႈ ဢၶႂၢင်ႉတၢင်းဢၼ်ပွႆႇလွတ်ႈ တီႈၵူၼ်းႁိူၼ်းၸမ်ၵၼ် ႁင်းၽႂ်ႁင်းမၼ်းလႄႈ ဢွၼ်ၵၼ်ႁဵတ်းပတီႉၺိၺ်ႇ တၢင်းဢၼ်ႁပ်ႉတုင်းဢဝ် ၵႃႈတီႈၽၢႆႇၼႃႈၵဝ် ၵႃႈၼႂ်းႁိူၼ်းဢၼ်ႁွင်ႉႁဵၵ်ႈလူၺ်ႈ ၼႃႇမႃႉၸိုဝ်ႈသဵင်ၵဝ်ၼၼ်ႉ သေၵေႃႈ၊-

16သမ်ႉၶၢႆႉပုတ်ႈလႄႈ ၶျႃးၼႃႇမႃႉၸိုဝ်ႈသဵင်ၵဝ် တူၵ်းတီႈတႅမ်ႇ သေလႄႈ သမ်ႉၶိုၼ်းဢွၼ်ၵၼ် ႁွင်ႉဢဝ်ၶႃႈၵူၼ်းၸၢႆးၶႃႈၵူၼ်းယိင်း ဢၼ်ပွႆႇလွတ်ႈ မူတ်းမူတ်းသဵင်ႈသဵင်ႈ ႁင်းၽႂ်ႁင်းမၼ်းၸိူဝ်းၼၼ်ႉ ၶိုၼ်းမႃးလႄႈ ႁႂ်ႈၶၢမ်ႇႁဵတ်း ၶႃႈၵူၼ်းၸၢႆး ၶႃႈၵူၼ်းယိင်းထႅင်ႈယဝ်ႉ လူင်ပႄႇ။-

17ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ သူဢမ်ႇထွမ်ႇဢဝ် ၵႂၢမ်းၵဝ်လူၺ်ႈလွင်ႈ ဢၼ်တၵ်းၸီႇယၢင်ႇမွၵ်ႇလၢတ်ႈ ဢၶႂၢင်ႉ တၢင်းဢၼ်ပွႆႇလွတ်ႈ တီႈပီႈသူၼွင်ႉသူၼင်ႇၵၼ်ၵၼ် ၵူၼ်းႁိူၼ်းၸမ်ၵၼ် ႁင်းၽႂ်ႁင်းမၼ်းၼၼ်ႉလႄႈ ထႃႇဝရႃႉၽြႃးမီးဢမိင်ႉၸမ်ႉ၊ တူၺ်းလူး၊ ၵဝ်တၵ်းၸီႇယၢင်ႇမွၵ်ႇလၢတ်ႈ ဢၶႂၢင်ႉဢၼ်လွတ်ႈ တီႈၽေးလၢပ်ႇၽေးလႅဝ်း ၽေးၵႃႇလႃႉႁႃႈလႅင်မိူင်း၊ ၽေးတၢင်းဢၼ်ဢိုပ်းဢၼ်ယၢၵ်ႈ ပုၼ်ႈသူလႄႈ ႁႂ်ႈသူၶၢမ်ႇတၢင်းဢၼ် ဢဝ်ထိမ်ႈၵႂႃႇထိမ်ႈမႃး ယူႇၵႃႈတီႈၵူႈသိုင်ႇၵူႈမိူင်း ၵႃႈၼိူဝ်လိၼ်မိူင်းဢေႃႈ။-

18ၵဝ်တၵ်း ဢဝ်ၶဝ်ၸိူဝ်းဢၼ်ပူၼ်ႉလိူဝ် ပတီႉၺိၺ်ႇၵဝ်လႄႈ ဢမ်ႇၵမ်ဢမ်ႇၵျၢင်ႉၸွမ်းၼင်ႇပတီႉၺိၺ်ႇ ဢၼ်ၶဝ်ၽႃႇဝူဝ်းဢွၼ်ႇ ႁဵတ်းသွင်ၽၢၵ်ႇသေလႄႈ တႆႇလတ်းၵႂႃႇၵႃႈၼႂ်း ၵႄႈဝူင်ႈၵၢင် သွင်ၽၢၵ်ႇၼၼ်ႉလႄႈ ႁဵတ်းၵႃႈတီႈၽၢႆႇၼႃႈၵဝ်ၼၼ်ႉ၊-

19ဢၼ်ဝႃႈ ၶုၼ် ယူႉတႃႉ ၊ ၶုၼ် ယေႇရူႉသလႅမ်ႇ ၊ မူးမၢတ်ႈၽွင်းမိူင်း၊ ယိတ်ႈပရေႃးႁဵၵ်ႈ၊ ၵူၼ်းထိင်းၼၢင်း၊ ၵူၼ်းဝၢၼ်ႈၵူၼ်းမိူင်း ဢၼ်တႆႇလတ်းၵႂႃႇ ၵႃႈၼႂ်းၵႄႈဝူင်ႈၵၢင်ဝူဝ်းဢွၼ်ႇ ဢၼ်ၽႃႇႁဵတ်းသွင်ၽၢၵ်ႇၼၼ်ႉ ၸိူဝ်းၼၼ်ႉ၊-

20ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ် ဢိၵ်ႇတင်း ၵႃႈၼႂ်းမိုဝ်းၶဝ်ၸိူဝ်းဢၼ် ႁႃဢဝ်ဢသၢၵ်ႈၶဝ်ၼၼ်ႉဢေႃႈ။ တူဝ်တၢႆၶဝ်ၼၼ်ႉ တၵ်းပဵၼ်ပုၼ်ႈဢၼ်ၼူၵ်ႉၵၢင်ႁၢဝ် တင်းတူဝ်ထိူၼ်ႇႁၢႆႉ တင်းလၢႆတၵ်းၵိၼ်ဢေႃႈ။-

21ၵဝ်တၵ်းဢဝ် ၸေႇတၵီႉ ၶုၼ်ႁေႃၶမ်း ယူႉတႃႉ ဢိၵ်ႇတင်းမူးမၢတ်ႈၽွင်းမိူင်းမၼ်း တင်းလၢႆ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်၊ ၵႃႈၼႂ်းမိုဝ်းၶဝ်ၸိူဝ်းဢၼ် ႁႃဢဝ်ဢသၢၵ်ႈၶဝ်၊ ၵႃႈၼႂ်းမိုဝ်းပူဝ်ႇပႃႇ ၶုၼ်ႁေႃၶမ်း ပႃႇပူႉလုၼ်ႇ ဢၼ်ဝၢႆႇၶိုၼ်းၵႂႃႇသေ ၵႃႈတီႈသူယဝ်ႉၼၼ်ႉ ၸိူဝ်းၼၼ်ႉဢေႃႈ။-

22တူၺ်းလူး၊ ၵဝ်တၵ်းပၼ်ဢမိင်ႉလႄႈ ႁႂ်ႈၶဝ်ၼၼ်ႉၶိုၼ်းမႃးၵႃႈတီႈဝဵင်းၼႆႉဢေႃႈ။ ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးလႄႈ သိမ်းဢဝ်သေယဝ်ႉ၊ ဢဝ်ၽႆးတုတ်ႇဢေႃႈ။ ၵဝ်တၵ်းႁႂ်ႈဝၢၼ်ႈဝဵင်း ယူႉတႃႉ တင်းလၢႆ ပဵၼ်တီႈဢၼ်ပဝ်ႇ ဢၼ်လၢပ်ႈလႄႈ ဢမ်ႇမီးၵေႃႉဢၼ်ယူႇ ဢၼ်သဝ်းလႃးလႃးဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

← Chapter 33 Jump to: Chapter 35 →