Jeremiah 35

Shan

← Chapter 34 Jump to: Chapter 36 →

1ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ ၼႂ်းၸူဝ်ႈပၢၼ် ၶုၼ် ယေႃးယၵိမ်း လုၵ်ႈၸၢႆး ယူဝ်းသီႉယႃႉ ၶုၼ်ႁေႃၶမ်း ယူႉတႃႉ ၼၼ်ႉ လႄႈဝႃႈၸမ်ႉ၊-

2မႂ်းၵႂႃႇၸူး ၵႃႈတီႈႁိူၼ်း ၵူၼ်းမဵဝ်း ရေႇၶပ်ႉ တင်းလၢႆလႄႈ တၵ်ႉလၢတ်ႈၵၼ်တင်းၶဝ်သေယဝ်ႉ၊ ႁွင်ႉဢဝ်ၶဝ်သႂၢင်းၶဝ်ႈၵႃႈၼႂ်း လုၵ်းႁိူၼ်း ထႃႇဝရႃႉၽြႃး လုၵ်းၼိုင်ႈ သေလႄႈ ဢဝ်ၼမ်ႉၸပိတ်ႈ တိုၵ်းပၼ်တီႈၶဝ်တႃႉ၊ ဝႃႈၼင်ႇၼႆဢေႃႈ။-

3မိူဝ်ႈၼၼ်ႉ ၵဝ်ႁွင်ႉဢဝ် ၸႃႉၸဵမ် ယႃႇၸၺႃႇ လုၵ်ႈၸၢႆး ယေႇရမီႉ ဢၼ်ပဵၼ်လုၵ်ႈၸၢႆး ႁႃႇပၸီႉၺႃႇ လႄႈ ပီႈမၼ်းၼွင်ႉမၼ်း လုၵ်ႈၸၢႆးမၼ်းၵႃႈမီး ဢိၵ်ႇတင်းၵူၼ်းမဵဝ်း ရေႇၶပ်ႉ တင်းသဵင်ႈတင်းလူင်သေလႄႈ၊-

4ဢဝ်ၵႂႃႇသႂၢင်းၶဝ်ႈ ၵႃႈၼႂ်းႁိူၼ်း ထႃႇဝရႃႉၽြႃး ၸူးၵႃႈၼႂ်းလုၵ်းတီႈယူႇ လုၵ်ႈၸၢႆး ႁႃႇၼၼ်ႇ ဢၼ်ပဵၼ်လုၵ်ႈၸၢႆး ဢီႉၵတႃႇလီႉ ၵူၼ်းၽြႃးပဵၼ်ၸဝ်ႈ ၵႃႈတီႈႁိမ်းလုၵ်း တီႈဢၼ်မူးမၢတ်ႈၽွင်းမိူင်း ၸူႉၵၼ်တုမ်ၵၼ်၊ ၵႃႈတီႈၼိူဝ်လုၵ်း မႃႇသေႇယႃႉ လုၵ်ႈၸၢႆး သႃႇလုမ်ႇ ဢၼ်ပဵၼ် ၵေႃႉဢၼ်ပႂ်ႉၽၵ်းတူၼၼ်ႉသေယဝ်ႉ၊-

5ဢဝ်မေႃႈ ဢိၵ်ႇတင်း ၵွၵ်းဢၼ်တဵမ်ဝႆႉတင်း ၼမ်ႉၸပိတ်ႈတင်းလၢႆ သႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းမဵဝ်း ရေႇၶပ်ႉ ၸိူဝ်းၼၼ်ႉလႄႈ လၢတ်ႈတီႈၶဝ်လႄႈဝႃႈ၊ ဢွၼ်ၵၼ်သူတ်ႉၵိၼ် ၼမ်ႉၸပိတ်ႈသေၵမ်း၊ ဝႃႈၼင်ႇၼႆဢေႃႈ။-

6ၶဝ်ၼၼ်ႉၵေႃႈ ဢွၼ်ၵၼ်လၢတ်ႈလႄႈဝႃႈ၊ ႁဝ်းၶႃႈၼႆႉဢမ်ႇသူတ်ႉဢမ်ႇၵိၼ် ၼမ်ႉၸပိတ်ႈၶႃႈ။ လွင်ႈမၼ်းၸမ်ႉ ယေႃးၼတပ်ႉ လုၵ်ႈၸၢႆး ရေႇၶပ်ႉ ပေႃႈၵူၼ်းမဵဝ်းႁဝ်းၶႃႈၼၼ်ႉ သင်ႇလၢတ်ႈဝႆႉလႄႈဝႃႈ၊ ၸႃႉၸဵမ်သူလႄႈ ၸူဝ်ႈလုၵ်ႈပၢၼ်လၢၼ်သူၼၼ်ႉ ဢမ်ႇလႆႈၵိၼ်ၼမ်ႉၸပိတ်ႈလႃးလႃး။-

7ႁိူၼ်းၵေႃႈဢမ်ႇလႆႈႁဵတ်း။ ၸိူဝ်ႉၽၼ်းၵေႃႈဢမ်ႇလႆႈဝၢၼ်ႇလႆႈပိုၼ်။ သူၼ်ဢူးယဵၼ်ႇၸပိတ်ႈၵေႃႈ ဢမ်ႇလႆႈၽုၵ်ႇလႆႈသွမ်ႈ။ ဢမ်ႇလႆႈႁႂ်ႈမီးလႃးလႃး။ လွင်ႈၼင်ႇႁိုဝ် ၸူဝ်ႈဢသၢၵ်ႈသူ တၵ်းယၢဝ်းယိုၼ်းယူႇ ၵႃႈၼႂ်းတီႈဢၼ်သူ ပဵၼ်ၶႅၵ်ႇယူႇၼႆႉၸိုင်၊ ၸူဝ်ႈဢသၢၵ်ႈသူၼၼ်ႉ သူတၵ်းလႆႈဢွၼ်ၵၼ်ယူႇ ၵႃႈၼႂ်းမူဝ်းၵႃႇၵူၺ်းဢေႃႈ၊ ဝႃႈၼင်ႇၼႆဝႆႉ တီႈႁဝ်းၶႃႈယဝ်ႉ ၶႃႈယဝ်ႉ။-

8ပိူဝ်ႈၼႆလႄႈ ႁဝ်းၶႃႈၼႆႉ လႆႈထွမ်ႇဢဝ်ၵႂၢမ်း ယေႃးၼတပ်ႉ လုၵ်ႈၸၢႆး ရေႇၶပ်ႉ ပေႃႈၵူၼ်းမဵဝ်းႁဝ်းၶႃႈၼၼ်ႉ ၼႂ်းၵႃႈဢၼ်မၼ်းသင်ႇလၢတ်ႈဝႆႉ တီႈႁဝ်းၶႃႈလူၺ်ႈလွင်ႈ ဢၼ်ႁဝ်းၶႃႈ ဢိၵ်ႇတင်း မေးႁဝ်းၶႃႈ လုၵ်ႈၸၢႆးႁဝ်းၶႃႈ လုၵ်ႈယိင်းႁဝ်းၶႃႈ ဢမ်ႇလႆႈၵိၼ် ၼမ်ႉၸပိတ်ႈ ၸူဝ်ႈဢသၢၵ်ႈ၊-

9ဢမ်ႇလႆႈႁဵတ်းႁိူၼ်းႁဵတ်းယေး ပုၼ်ႈဢၼ်တၵ်းယူႇတၵ်းသဝ်း၊ ဢမ်ႇလႆႈမီး သူၼ်ဢူးယဵၼ်ႇၸပိတ်ႈ၊ ဢမ်ႇလႆႈမီးႁႆႊမီးၼႃး၊ ဢမ်ႇမီးၸိူဝ်ႉမီးၽၼ်းၼၼ်ႉ ၶႃႈယဝ်ႉ။-

10ႁဝ်းၶႃႈယူႇ ၵႃႈၼႂ်းမူဝ်းၵႃႇသေလႄႈ ထွမ်ႇဢဝ်လႄႈႁဵတ်းၸွမ်း ၵႃႈၼင်ႇဢၼ် ယေႃးၼတပ်ႉ ပေႃႈၵူၼ်းမဵဝ်းႁဝ်းၶႃႈ သင်ႇလၢတ်ႈဝႆႉၼၼ်ႉၶႃႈယဝ်ႉ။-

11မိူဝ်ႈဢၼ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၶီႇၶိုၼ်းမႃးၸူး ၵႃႈတီႈမိူင်းၼႆႉၼၼ်ႉ၊ ႁဝ်းၶႃႈၼင်ႇၵၼ်ၵၼ် လၢတ်ႈၵၼ်လႄႈဝႃႈ၊ မႃးမႃးဢိူၺ်း၊ ဢွၼ်ၵၼ်ၶိုၼ်ႈၸူးၵႃႈတီႈဝဵင်း ယေႇရူႉသလႅမ်ႇ တႃႉႁဝ်း။ မီးတီႈဢၼ်လီၵူဝ်လီႁႄ ၵူၼ်းသိုၵ်း ၶႃႇလတေး ဢိၵ်ႇတင်း ၵူၼ်းသိုၵ်း သူႉရီႉ တင်းလၢႆဢေႃႈ၊ ဝႃႈၼင်ႇၼႆလႄႈ မိူဝ်ႈလဵဝ်ၼႆႉ ႁဝ်းၶႃႈယူႇၵႃႈတီႈဝဵင်း ယေႇရူႉသလႅမ်ႇ ၶႃႈယဝ်ႉ၊ ဝႃႈၼင်ႇၼႆဢေႃႈ။-

12မိူဝ်ႈၼၼ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ လႄႈဝႃႈ၊-

13ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ မႂ်းၵႂႃႇလႄႈ လၢတ်ႈတီႈၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ တင်းလၢႆလႄႈဝႃႈ၊ သူၼႆႉဢမ်ႇလႆႈၶၢမ်ႇ တၢင်းဢၼ်သင်ႇသွၼ်သုင်းမႃႉ ႁႂ်ႈလႆႈထွမ်ႇဢဝ်ၵႂၢမ်းၵဝ်ႁိုဝ်။ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ ထႃႇဝရႃႉၽြႃး ထၢမ်ဢေႃႈ။-

14ၵႂၢမ်း ယေႃးၼတပ်ႉ လုၵ်ႈၸၢႆး ရေႇၶပ်ႉ ဢၼ်မၼ်းပိင်းၺၢပ်ႈဝႆႉ တီႈလုၵ်ႈမၼ်းလၢင်းမၼ်း လူၺ်ႈလွင်ႈဢၼ်ၶဝ်ဢမ်ႇလႆႈသူတ်ႉလႆႈၵိၼ် ၼမ်ႉၸပိတ်ႈၼၼ်ႉ ပဵၼ်တီႈဢၼ် ၶဝ်ၵမ်ၶဝ်ၵျၢင်ႉလႄႈ ၶဝ်ယင်းဢမ်ႇသူတ်ႉ ဢမ်ႇၵိၼ်ၼမ်ႉၸပိတ်ႈလႄႈ ယူႇတေႃႇထိုင်ႁွတ်ႈ ဝၼ်းမိူဝ်ႈၼႆႉသေလႄႈ ဢွၼ်ၵၼ်ထွမ်ႇဢဝ် ၵႂၢမ်းပိင်းၺၢပ်ႈပေႃႈၶဝ်ဢေႃႈ။ ပိၵ်ႉသမ်ႉၵဝ်လုၵ်ႉၸဝ်ႉၸဝ်ႉလႄႈ လၢတ်ႈတီႈသူယူႇ ၶိူဝ်းၶိူဝ်းယႂ်းယႂ်းသေၵေႃႈ သူဢမ်ႇဢွၼ်ၵၼ်ထွမ်ႇဢဝ် ၵႂၢမ်းၵဝ်။-

15ၵဝ်လုၵ်ႉၸဝ်ႉၸဝ်ႉလႄႈ ပွႆႇၸႂ်ႉၶႃႈၵဝ် ပရေႃးၽႅတ်ႈ တင်းသဵင်ႈတင်းလူင် မႃးၸူးတီႈသူ ၶိူဝ်းၶိူဝ်းယႂ်းယႂ်းသေလႄႈ သင်ႇလၢတ်ႈလႄႈဝႃႈ၊ ဢွၼ်ၵၼ်ဝၢႆႇၶိုၼ်းသေၵႃႈတီႈ သဵၼ်ႈတၢင်းဢၼ်ႁၢႆႉဢၼ်ယုတ်ႈ ဢၼ်သူၸွမ်းယူႇ ႁင်းၽႂ်ႁင်းမၼ်းၼၼ်ႉလႄႈ မႄးပွင်မႄးႁဵတ်း တၢင်းၵမ်တၢင်းၵျၢင်ႉသူတႃႉ။ ယႃႇပေဢွၼ်ၵၼ် ၸွမ်းလင်ၽြႃးတၢင်ႇသူႇတၢင်ႇပႃး ႁႂ်ႈလႆႈႁဵတ်းဝူတ်ႈ ႁဵတ်းဝၢတ်ႈတီႈၶဝ်။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ သူတၵ်းလႆႈဢွၼ်ၵၼ်ယူႇ ၵႃႈတီႈမိူင်းဢၼ်ၵဝ်ပၼ်တီႈသူ ဢိၵ်ႇတင်းတီႈပူႇသူမွၼ်ႇသူၼၼ်ႉဢေႃႈ၊ ဝႃႈၼင်ႇၼႆသေၵေႃႈ သူဢွၼ်ၵၼ် ဝၢႆႇႁူႁေႈႁူသူၸူးလႄႈ ယင်းဢမ်ႇထွမ်ႇဢဝ် ၵႂၢမ်းၵဝ်လႄႈ ယူႇယဝ်ႉ။-

16ၵွပ်ႈပိူဝ်ႈဢၼ် လုၵ်ႈလၢၼ် ယေႃးၼတပ်ႉ ဢၼ်ပဵၼ်လုၵ်ႈၸၢႆး ရေႇၶပ်ႉ ၸိူဝ်းၼၼ်ႉ ဢွၼ်ၵၼ် ၵမ်ၵျၢင်ႉၸွမ်းၼင်ႇပိင်းၺၢပ်ႈ ဢၼ်ပေႃႈၶဝ်သင်ႇလၢတ်ႈဝႆႉ ၼၼ်ႉလႄႈ ၵူၼ်းမဵဝ်းၼႆႉယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈ ယူႇၼၼ်ႉလႄႈ၊-

17ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ တူၺ်းလူး၊ ၵဝ်တၵ်းႁႂ်ႈ ၽေးဢူႉပၢတ်ႈ ၵႃႈဢၼ်ၵဝ်လၢတ်ႈဝႆႉ လူၺ်ႈလွင်ႈၶဝ်ၼၼ်ႉ ႁွတ်ႈထိုင်ၵႃႈၼိူဝ်ၵူၼ်းမိူင်း ယူႉတႃႉ ဢိၵ်ႇတင်း ၵူၼ်းဝဵင်း ယေႇရူႉသလႅမ်ႇ တင်းလၢႆဢေႃႈ။ လွင်ႈမၼ်းၸမ်ႉ ပိၵ်ႉသမ်ႉၵဝ်လၢတ်ႈ တီႈၶဝ်သေၵေႃႈ ၶဝ်ဢမ်ႇထွမ်ႇဢမ်ႇငိၼ်း။ ပိၵ်ႉသမ်ႉၵဝ်ႁွင်ႉ တီႈၶဝ်သေၵေႃႈ ၶဝ်ဢမ်ႇၶိုၼ်းဢိူဝ်၊ ဝႃႈၼင်ႇၼႆဢေႃႈ။-

18ယေႇရမီႉ သင်ႇလၢတ်ႈဝႆႉ တီႈၵူၼ်းမဵဝ်း ရေႇၶပ်ႉ ၸိူဝ်းၼၼ်ႉလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ၵွပ်ႈပိူဝ်ႈဢၼ် သူထွမ်ႇဢဝ်ၵႂၢမ်းပိင်းၺၢပ်ႈ ယေႃးၼတပ်ႉ ပေႃႈသူလႄႈ ပႂ်ႉၵမ်ပႂ်ႉၵျၢင်ႉၸွမ်း ၵႃႈၼင်ႇဢၼ်မၼ်း ၸီႇယၢင်ႇႁဵတ်းထုင်းဝႆႉ ၸိူဝ်းၼၼ်ႉလႄႈ၊-

19သိုပ်ႇၵူၼ်းၶိူဝ်းၵူၼ်း ယေႃးၼတပ်ႉ လုၵ်ႈၸၢႆး ရေႇၶပ်ႉ ဢၼ်လႆႈၸုၵ်းယူႇ ၵႃႈတီႈၽၢႆႇၼႃႈၵဝ် ဢမ်ႇလႆႈသုတ်း လႆႈထၢတ်ႇလႃးလႃး၊ ဝႃႈၼင်ႇၼႆလႄႈ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉဢေႃႈ။

← Chapter 34 Jump to: Chapter 36 →