Jeremiah 44 — Shan

1ၼုၵ်ႈၵပၢတ်ႈၸဝ်ႈဢၼ် ဢဝ်လွင်ႈၵူၼ်း ယူႉတႃႉ ၵႃႈဢၼ်ယူႇၵႃႈၼႂ်း မိူင်း ဢေႇၵိပ်ႉတူႉ ၊ ၵႃႈတီႈဝဵင်း မီႉၵတေႃးလႃႉ ၊ ဝဵင်း တႃႇပၼိတ်ႉ ၊ ဝဵင်း ၼေႃႇၽႃႉ ဢိၵ်ႇတင်းၵႃႈၼႂ်းမိူင်း ပႃႇသရူႉ ၸိူဝ်းၼၼ်ႉလႄႈ ႁွတ်ႈမႃးတီႈ ယေႇရမီႉ ၼၼ်ႉၸမ်ႉ၊-

2ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉလႄႈဝႃႈ၊ သူဢွၼ်ၵၼ်ႁၼ် ၽေးတၢမ်ႇၵႃႈဢၼ်ၵဝ် ႁႂ်ႈႁွတ်ႈထိုင်ၵႃႈၼိူဝ်ဝဵင်း ယေႇရူႉသလႅမ်ႇ ဢိၵ်ႇတင်း ဝၢၼ်ႈဝဵင်း ယူႉတႃႉ တင်းသဵင်ႈတင်းလူင် ၼၼ်ႉယဝ်ႉယဝ်ႉ။ တူၺ်းလူး၊ ဝၼ်းမိူဝ်ႈၼႆႉ ဝၢၼ်ႈဝဵင်းၸိူဝ်းၼၼ်ႉ ပဵၼ်တီႈဢၼ်ပဝ်ႇဢၼ်လၢပ်ႈၵႂႃႇလႄႈ ဢမ်ႇမီးၵေႃႉဢၼ်ယူႇဢၼ်သဝ်း။-

3ၵွပ်ႈပိူဝ်ႈ တူႉၸရိူၵ်ႈဢၼ်ၶဝ် မိူဝ်ႈဢွၼ်တၢင်းၼၼ်ႉ ဢွၼ်ၵၼ်ႁဵတ်းႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ်ၼႂ်းလွင်ႈဢၼ် ၶဝ်ၵႂႃႇဢဝ် ၼၢမ်ႇသႃႇတုတ်ႇၽႆးလႄႈ ႁဵတ်းဝၢတ်ႈတီႈၽြႃး တၢင်ႇသူႇတၢင်ႇပႃး ဢၼ်ၶဝ်ဢမ်ႇႁူႉ၊ ဢၼ်သူ ဢိၵ်ႇတင်း ပူႇသူမွၼ်ႇသူ ဢမ်ႇႁူႉၼၼ်ႉဢေႃႈ။-

4ပိၵ်ႉသမ်ႉၵဝ်လုၵ်ႉၸဝ်ႉၸဝ်ႉလႄႈ ပွႆႇၸႂ်ႉၶႃႈၵဝ်ပရေႃးၽႅတ်ႈ တင်းသဵင်ႈတင်းလူင် ၸူးတီႈသူ ၶိူဝ်းၶိူဝ်းယႂ်းယႂ်းယူႇသေလႄႈ လၢတ်ႈလႄႈဝႃႈ၊ ယႃႇပေႁဵတ်း လွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢၼ်ၵဝ်ၸင်းၼႆႉ၊ ဝႃႈၼင်ႇၼႆသေၵေႃႈ၊-

5ၶဝ်ၼၼ်ႉ ယင်းဢမ်ႇထွမ်ႇဢမ်ႇဢဝ်၊ ယင်းဢမ်ႇဝၢႆႇႁူႁေႈႁူၸူး ႁႂ်ႈလႆႈဝႄႈပႅတ်ႈတူႉၸရိူၵ်ႈဢပႅတ်ႈၶဝ်လႄႈ ဢဝ်ၼၢမ်ႇသႃႇတုတ်ႇၽႆးတီႈၽြႃး တၢင်ႇသူႇတၢင်ႇပႃးၼၼ်ႉလႄႈ ယူႇဢေႃႈ။-

6ပိူဝ်ႈဢၼ် ပဵၼ်ၼင်ႇၼၼ်လႄႈ တၢင်းၶႆႈၸႃႉၶႆႈၸဵတ်ႉၵဝ် ဢိၵ်ႇတင်းဢၢႆႁႅင်းတေႃးသႃႉ တၢင်းၸႂ်မႆႈၵဝ်လႆႈမီး တၢင်းဢၼ်သွၼ်းလေႃႇလႄႈ ဢဝ်ၽႆးတုတ်ႇၵႃႈၼႂ်းဝၢၼ်ႈဝဵင်း ယူႉတႃႉ တင်းလၢႆ ဢိၵ်ႇတင်း ၵႃႈၼႂ်းသဵၼ်ႈတၢင်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈ ၶဝ်ၼၼ်ႉလႆႈပဵၼ် တီႈဢၼ်ၽဵဝ်ႈပႅတ်ႈလႄႈ ပဝ်ႇလၢပ်ႈဝႆႉ ၸိူဝ်ႉၼင်ႇဢၼ်ပဵၼ် ဝၼ်းမိူဝ်ႈၼႆႉၼၼ်ႉဢေႃႈ။-

7မိူဝ်ႈလဵဝ်ၼႆႉၸိုင် ထႃႇဝရႃႉၽြႃး ၽြႃးပဵၼ်ၸဝ်ႈ ပူဝ်ႇပႃႇၵၢင်ႁၢဝ် ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူႁဵတ်းတူႉၸရိူၵ်ႈဢၼ်ယႂ်ႇၼႃႇ ယူႇၽၢႆႇၼိုင်ႈ တင်းၸႂ်ဝီႉၺိၺ်ႇသူ ႁႂ်ႈလႆႈပႄႇတႅပ်းပႅတ်ႈၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇ၊ ၵေႃႉဢၼ်ၵိၼ်ၼူမ်းတင်းလၢႆသေၵႃႈတီႈ မိူင်း ယူႉတႃႉ ထၼ်ႈပေႃး ဢမ်ႇၵိုတ်းဢမ်ႇၵျၢၼ်ႇ သေၵေႃႉသေၵူၼ်း၊-

8ၼႂ်းလွင်ႈဢၼ်သူ ဢဝ်လွင်ႈတၢင်း ဢၼ်မိုဝ်းသူႁဵတ်းယူႇၼၼ်ႉလႄႈ ဢဝ်ၼၢမ်ႇသႃႇတုတ်ႇၽႆးတီႈ ၽြႃး တၢင်ႇသူႇတၢင်ႇပႃးတင်းလၢႆ ၵႃႈၼႂ်းမိူင်း ဢေႇၵိပ်ႉတူႉ တီႈဢၼ်သူၵႂႃႇ ႁႂ်ႈလႆႈသွၼ်ႈပိုင်ႈယူႇၼၼ်ႉ၊ သူလႆႈၶၢမ်ႇတၢင်းဢၼ်ပႄႇတႅပ်းပႅတ်ႈ ဢိၵ်ႇတင်းႁႂ်ႈသူလႆႈပဵၼ် တီႈဢၼ်သႄႉသွမ်း တီႈဢၼ်ၵိၼ်ႇလႃႇ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ၵႃႈၼိူဝ်လိၼ်မိူင်းၼၼ်ႉသေလႄႈ တိုၵ်းယူင်း တၢင်းၸႂ်မႆႈၶႆႈၸႃႉၵဝ်ၼၼ်ႉၼင်ႇႁိုဝ်။-

9သူလူင်လိုမ်းတူႉၸရိူၵ်ႈပူႇသူမွၼ်ႇသူ၊ တူႉၸရိူၵ်ႈၶုၼ်ႁေႃၶမ်း ယူႉတႃႉ တင်းလၢႆ၊ တူႉၸရိူၵ်ႈၼၢင်းႁေႃၶမ်းတင်းလၢႆ၊ တူႉၸရိူၵ်ႈတူဝ်သူ၊ တူႉၸရိူၵ်ႈမေးသူဢၼ် ၶဝ်ႁဵတ်းၵႃႈၼႂ်းမိူင်း ယူႉတႃႉ ဢိၵ်ႇတင်း ၵႃႈၼႂ်းသဵၼ်ႈတၢင်းဝဵင်း ယေႇရူႉသလႅမ်ႇ ၸိူဝ်းၼၼ်ႉယဝ်ႉႁိုဝ်။-

10ၶဝ်ၼၼ်ႉဢမ်ႇမီးၸႂ် ဢၼ်ၶျႃးတႅမ်ႇတေႃႇထိုင်ႁွတ်ႈဝၼ်းမိူဝ်ႈၼႆႉ။ ဢမ်ႇမီးၸႂ်ဢၼ်ၵူဝ်ဢၼ်ႁႄ၊ ဢမ်ႇၸွမ်းသဵၼ်ႈတၢင်းတြႃးၵဝ်။ ဢမ်ႇပႂ်ႉၵမ်ပႂ်ႉၵျၢင်ႉ ပိင်းၺၢပ်ႈၵဝ်တင်းလၢႆ ဢၼ်ၵဝ်ဝႆႉၵႃႈတီႈၽၢႆႇၼႃႈသူ ဢိၵ်ႇတင်း ပူႇသူမွၼ်ႇသူၸိူဝ်းၼၼ်ႉလႄႈယူႇဢေႃႈ။-

11ပိူဝ်ႈဢၼ်ပဵၼ်ၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ တူၺ်းလူး၊ ၵဝ်တၵ်းဝၢႆႇၼႃႈပႅတ်ႈသူ ပုၼ်ႈဢၼ်တၵ်းပဵၼ်ဢၼ် ဢမ်ႇလီဢမ်ႇငၢမ်းတီႈသူလႄႈ ပႄႇတႅပ်းၵူၼ်းမဵဝ်း ယူႉတႃႉ တင်းသဵင်ႈတင်းလူင် ပႅတ်ႈဢေႃႈ။-

12ၵဝ်တၵ်းဢဝ်ၵူၼ်းမဵဝ်း ယူႉတႃႉ ဢၼ်ၵိုတ်းဢၼ်ၵျၢၼ်ႇ ဢၼ်ဝၢႆႇၼႃႈၵႂႃႇၸူး ၵႃႈတီႈမိူင်း ဢေႇၵိပ်ႉတူႉ ႁႂ်ႈလႆႈ သွၼ်ႈပိုင်ႈၵႃႈတီႈၼၼ်ႈလႄႈ ၶဝ်တင်းသဵင်ႈတင်းလူင်ၼၼ်ႉ တၵ်းလႆႈသုမ်းၸွမ်းလႄႈလူမ်ႉတူၵ်း ၵႃႈၼႂ်းမိူင်း ဢေႇၵိပ်ႉတူႉ လႄႈ တၵ်းလႆႈသုမ်းၸွမ်းလူၺ်ႈ ၽေးလၢပ်ႇၽေးလႅဝ်း ဢိၵ်ႇတင်း ၽေးတၢင်းဢၼ်ဢိုပ်းဢၼ်ယၢၵ်ႈဢေႃႈ။ ၶဝ်ၸႃႉၸဵမ် ၵေႃႉဢၼ်လဵၵ်ႉသေပိူၼ်ႈ တေႃႇထိုင်ၵေႃႉဢၼ် ယႂ်ႇသေပိူၼ်ႈၼၼ်ႉ တၵ်းလႆႈတၢႆလူၺ်ႈ ၽေးလၢပ်ႇၽေးလႅဝ်း ဢိၵ်ႇတင်း ၽေးတၢင်းဢၼ်ဢိုပ်းဢၼ်ယၢၵ်ႈ လႄႈ ဢွၼ်ၵၼ်ပဵၼ်တီႈဢၼ်လႃႇ ဢၼ်လင်၊ တီႈဢၼ်လီဢၢမ်း၊ တီႈဢၼ်ၵိၼ်ႇလႃႇ၊ တီႈဢၼ်သႄႉသွမ်းဢေႃႈ။-

13ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ် ယူႇၵႃႈၼႂ်းမိူင်း ဢေႇၵိပ်ႉတူႉ ၼၼ်ႉ မိူၼ်ၸိူဝ်ႉၼင်ႇဢၼ် ၵဝ်ဢဝ်ၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်း ပၼ်တၢမ်ႇတီႈၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉ၊-

14ထၼ်ႈပေႃး ၵူၼ်းမဵဝ်း ယူႉတႃႉ ဢၼ်ၵိုတ်းဢၼ်ၵျၢၼ်ႇ ဢၼ်ၵႂႃႇၵႃႈတီႈမိူင်း ဢေႇၵိပ်ႉတူႉ ႁႂ်ႈလႆႈသွၼ်ႈပိုင်ႈယူႇ ၵႃႈတီႈၼၼ်ႈၸိူဝ်းၼၼ်ႉ ဢမ်ႇလႆႈလွတ်ႈၽေးလွတ်ႈရၢၼ်ႇ၊ ဢမ်ႇလႆႈၵိုတ်းဝႆႉၵျၢၼ်ႇဝႆႉ သေၵေႃႉသေၵူၼ်း ႁႂ်ႈလႆႈၶိုၼ်းမိူဝ်းၵႃႈတီႈမိူင်း ယူႉတႃႉ တီႈဢၼ်ၶဝ် မီးဢလူဝ်ႇ ၶႂ်ႈၶိုၼ်းမိူဝ်းႁႂ်ႈလႆႈယူႇ ၵႃႈတီႈၼၼ်ႈၼၼ်ႉဢေႃႈ။ လွင်ႈမၼ်းၸမ်ႉ ၶဝ်ၸိူဝ်းဢၼ် ၵၢင်းလွတ်ႈတင်းၽေးၼၼ်ႉၵူၺ်း တၵ်းလႆႈဢွၼ်ၵၼ်ၶိုၼ်းမိူဝ်းဢေႃႈ၊ ဝႃႈၼင်ႇၼႆဢေႃႈ။-

15မိူဝ်ႈၼၼ်ႉ ၵူၼ်းၸၢႆးၸိူဝ်းဢၼ်ႁူႉ လွင်ႈဢၼ်မေးၶဝ် ဢဝ်တင်းၼၢမ်ႇသႃႇတုတ်ႇၽႆး တီႈၽြႃးတၢင်ႇသူႇတၢင်ႇပႃး၊ မႄႈယိင်းၵႃႈဢၼ်ၸုၵ်းယူႇ ၵႃႈတီႈႁိမ်းႁွမ်းၼၼ်ႉ၊ မုၵ်ႉၸိူဝ်းဢၼ်ယႂ်ႇၼႃႇဢၼ်ဝႃႈ ၶဝ်ၸိူဝ်းဢၼ်ယူႇ ၵႃႈတီႈ ပႃႇသရူႉ မိူင်း ဢေႇၵိပ်ႉတူႉ တင်းသဵင်ႈတင်းလူင်ၼၼ်ႉ ဢွၼ်ၵၼ်ၶိုၼ်းလၢတ်ႈတီႈ ယေႇရမီႉ လႄႈဝႃႈၸမ်ႉ၊-

16ၵႂၢမ်းဢၼ်မႂ်း ဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး သေလႄႈ ႁေႃးလၢတ်ႈတီႈႁဝ်းၼၼ်ႉၸိုင် ႁဝ်းဢမ်ႇထွမ်ႇဢမ်ႇဢဝ်။-

17ႁဝ်းတၵ်းႁဵတ်းၸွမ်း ၵႃႈၼင်ႇဢၼ်ဢွၵ်ႇသူပ်း ဢွၵ်ႇပၢၵ်ႇႁဝ်းၼၼ်ႉ ႁႂ်ႈလႆႈဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇတီႈမၼ်းၼၢင်း မိူၼ်ၸိူဝ်ႉၼင်ႇဢၼ်ႁဝ်း ဢိၵ်ႇတင်းပူႇႁဝ်းမွၼ်ႇႁဝ်း၊ ၶုၼ်ႁေႃၶမ်းႁဝ်း၊ မူးမၢတ်ႈၽွင်းမိူင်းႁဝ်းတင်းလၢႆ ယၢမ်ႈႁဵတ်းၵႃႈၼႂ်းဝၢၼ်ႈ ၼႂ်းဝဵင်း ယူႉတႃႉ ဢိၵ်ႇတင်း ၵႃႈၼႂ်းသဵၼ်ႈတၢင်း ဝဵင်း ယေႇရူႉသလႅမ်ႇ ၸိူဝ်းၼၼ်ႉ ဢမၢၼ်ႇၶၼ်ပဵၼ်ဢေႃႈ။ မိူဝ်ႈဢွၼ်တၢင်းၼၼ်ႉ ႁဝ်းလႆႈဢွၼ်ၵၼ် ၵိၼ်ၶဝ်ႈမုၼ်း ဢိမ်ႇဢိမ်ႇတဵမ်တဵမ်ဢေႃႈ။ ႁဝ်းလႆႈဢွၼ်ၵၼ်ၵၢင်းလွတ်ႈ တင်းၽေးလႄႈ ၵတ်းယဵၼ်ၶျၢမ်းသႃႇဢေႃႈ။-

18မိူဝ်ႈဢၼ် ႁဝ်းယင်းဢမ်ႇဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ဢမ်ႇႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇတီႈမၼ်းၼၢင်းလႄႈ ယူႇၼၼ်ႉၸိုင်၊ ႁဝ်းလႆႈႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ် ၵူႈၸိူဝ်ႉၵူႈပိူင် ၼႃႇလူင်လၢင်လႄႈ လူႉလႅဝ်လူၺ်ႈၽေးလၢပ်ႇၽေးလႅဝ်း ၽေးတၢင်းဢၼ်ဢိုပ်းဢၼ်ယၢၵ်ႈယဝ်ႉ။-

19မိူဝ်ႈဢၼ် ႁဝ်းယင်းတိုၵ်ႉဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇတီႈမၼ်းၼၢင်းယူႇၼၼ်ႉၸိုင်၊ ၽူဝ်ႁဝ်းယင်းဢမ်ႇပႃးလႄႈ ႁဝ်းႁဵတ်းၶဝ်ႈမုၼ်းၶႅပ်း ႁႂ်ႈလႆႈၵူဝ်းၵႂၢႆႇမၼ်းၼၢင်းလႄႈ ႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇတီႈမၼ်းၼၢင်းယူႇ ဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

20ယေႇရမီႉ ၶိုၼ်းလၢတ်ႈတီႈၵူၼ်း တင်းသဵင်ႈတင်းလူင် ၸဵမ်ယိင်းၸဵမ်ၸၢႆး ဢၼ်ဝႃႈၵူၼ်းတင်းသဵင်ႈတင်းလူင် ဢၼ်ၶိုၼ်းလၢတ်ႈၸိူဝ်ႉၼင်ႇၼၼ်လႄႈ ဝႃႈၼၼ်ႉၸမ်ႉ၊-

21ၼၢမ်ႇသႃႇ ဢၼ်သူ ဢိၵ်ႇတင်းပူႇသူမွၼ်ႇသူ၊ ၶုၼ်ႁေႃၶမ်းသူ၊ မူးမၢတ်ႈၽွင်းမိူင်းသူ၊ ၵူၼ်းဝၢၼ်ႈၵူၼ်းမိူင်းသူၸိူဝ်းၼၼ်ႉ ဢဝ်တုတ်ႇၽႆးၵႃႈၼႂ်းဝၢၼ်ႈၼႂ်းဝဵင်း ယူႉတႃႉ တင်းလၢႆ ဢိၵ်ႇတင်းၵႃႈၼႂ်းသဵၼ်ႈတၢင်း ဝဵင်း ယေႇရူႉသလႅမ်ႇ တင်းလၢႆၼၼ်ႉၸိုင်၊ ထႃႇဝရႃႉၽြႃး ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း၊ ယင်းဢမ်ႇဢဝ်သႂ်ႇၸႂ် သႂၢင်းၸႂ်လႄႈယူႇႁိုဝ်။-

22ပိူဝ်ႈဢၼ်ပဵၼ်ၼင်ႇၼႆလႄႈ ထႃႇဝရႃႉၽြႃး ဢမ်ႇယိူၼ်ႉၶၢမ်ႇလႆႈထႅင်ႈ ၵွပ်ႈပိူဝ်ႈတူႉၸရိူၵ်ႈဢၼ်သူႁဵတ်း ဢိၵ်ႇတင်း ၵွပ်ႈပိူဝ်ႈလွင်ႈတၢင်းဢၼ် လီႁင်ႈဢဵတ်ႇသဵတ်ႇဢၼ်သူၵမ်ၵျၢင်ႉၸိူဝ်းၼၼ်ႉ။ ပိူဝ်ႈၼႆလႄႈ မိူင်းသူၼၼ်ႉ လႆႈပဵၼ်တီႈဢၼ်ပဝ်ႇဢၼ်လၢပ်ႈ၊ တီႈဢၼ်လီဢၢမ်း၊ တီႈဢၼ်ၵိၼ်ႇလႃႇ ဢမ်ႇမီးၵေႃႉဢၼ်ယူႇဢၼ်သဝ်း ၸိူဝ်ႉၼင်ႇဢၼ် ပဵၼ်ဝၼ်းမိူဝ်ႈၼႆႉၼၼ်ႉယဝ်ႉလူင်ပႄႇ။-

23ၵွပ်ႈပိူဝ်ႈဢၼ် သူဢဝ်ၼၢမ်ႇသႃႇတုတ်ႇၽႆးလႄႈ ၽိတ်းပိူင်ႈ ထႃႇဝရႃႉၽြႃး ဢိၵ်ႇတင်း ၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ် သဵင်ၵႂၢမ်း ထႃႇဝရႃႉၽြႃး၊ ဢမ်ႇၸွမ်းဢမ်ႇၵႂႃႇ ၵႃႈၼႂ်းသဵၼ်ႈတၢင်း ပိင်းၺၢပ်ႈတြႃးၸဝ်ႈ ဢိၵ်ႇတင်းထုင်းၽိင်ႈတြႃးၸဝ်ႈ တင်းတီႈဢၼ်ၶၢမ်ႇသၢၵ်ႈသေႇ ၸဝ်ႈၼၼ်ႉလႄႈ၊ ၽေးၼႆႉႁွတ်ႈထိုင် တီႈသူၸိူဝ်ႉၼင်ႇဢၼ်ပဵၼ်ယူႇ ဝၼ်းမိူဝ်ႈၼႆႉၼၼ်ႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

24လႆႈသမ်ႉ ယေႇရမီႉ ႁေႃးလၢတ်ႈတီႈၵူၼ်း တင်းသဵင်ႈတင်းလူင် ဢိၵ်ႇတင်း မႄႈယိင်းတင်းသဵင်ႈတင်းလူင်လႄႈဝႃႈၸမ်ႉ၊ ၵူၼ်း ယူႉတႃႉ ၵႃႈဢၼ်မီး ၵႃႈၼႂ်းမိူင်း ဢေႇၵိပ်ႉတူႉ တင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။-

25ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ သူဢိၵ်ႇတင်းမေးသူ တင်းလၢႆ ဢဝ်သူပ်းသူလၢတ်ႈလႄႈ ဢဝ်မိုဝ်းသူႁဵတ်းၸွမ်းၼၼ်ႉလႄႈဝႃႈ၊ ႁဝ်းတၵ်းႁဵတ်းၵတီႉသဵတ်ႈၸႃႇ ၸွမ်းၵႃႈၼင်ႇဢၼ် ႁဝ်းဝႆႉၵတီႉ သဵတ်ႈၸႃႇ ဢၼ်ဝႃႈႁဝ်းတၵ်းဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇတီႈမၼ်းၼၢင်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။ ၵွပ်ႈႁွႆးၼႆႉလႄႈ သူဢွၼ်ၵၼ်ႁႂ်ႈ ၵတီႉသဵတ်ႈၸႃႇသူၼၼ်ႉ တႄႇလႄႈ ႁဵတ်းၸွမ်းၵႃႈၼင်ႇဢၼ် သူဝႆႉၵတီႉသဵတ်ႈၸႃႇၼၼ်ႉတႃႉ။-

26ပိူဝ်ႈၼႆလႄႈၵူၼ်း ယူႉတႃႉ ၵႃႈဢၼ်ယူႇၵႃႈၼႂ်းမိူင်း ဢေႇၵိပ်ႉတူႉ တင်းသဵင်ႈတင်းလူင် ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။ ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်ဢဝ်မႁႃႇၼႃႇမႃႉ ၸိုဝ်ႈသဵင်ၵဝ် တိူင်ႇဝႃႈၵိၼ်ႇဝႃႈ လူၺ်ႈလွင်ႈဢၼ်ၵူၼ်း ယူႉတႃႉ ဢၼ်မီးၵႃႈၼႂ်းမိူင်း ဢေႇၵိပ်ႉတူႉ ၵူႈတီႈၵူႈလႅၼ်ၸိူဝ်းၼၼ်ႉ တၵ်းဢမ်ႇလႆႈဢဝ်ၼႃႇမႃႉ ၸိုဝ်ႈသဵင်ၵဝ် ဢွၵ်ႇသူပ်းလႄႈဝႃႈ၊ ၵႃႈၼင်ႇဢၼ်ၸဝ်ႈ ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉ၊ ဝႃႈၼင်ႇၼႆၼၼ်ႉ သေၵေႃႉသေၵူၼ်းၼၼ်ႉဢေႃႈ။-

27ၵဝ်ပႂ်ႉၶဝ်ယူႇ ႁႂ်ႈလႆႈႁဵတ်း ဢၼ်လီဢၼ်ငၢမ်း တီႈၶဝ်ဢမ်ႇၸႂ်ႈ၊ ႁႂ်ႈလႆႈႁဵတ်း ဢၼ်ႁၢႆႉဢၼ်ၸႃႉ တီႈၶဝ်လႄႈ၊ ၵူၼ်း ယူႉတႃႉ ၵႃႈဢၼ်မီး ၵႃႈၼႂ်းမိူင်း ဢေႇၵိပ်ႉတူႉ ၸိူဝ်းၼၼ်ႉ တၵ်းဢွၼ်ၵၼ် သုမ်းၸွမ်းလူၺ်ႈ ၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ တေႃႇထိုင်ႁွတ်ႈ ၶဝ်ထၼ်ႈပေႃးသုတ်းပေႃးဝၢႆးဢေႃႈ။-

28ၼႂ်းဝႃႈၼၼ်သေၵေႃႈ ၶဝ်ၸိူဝ်းဢၼ် ၵၢင်းလွတ်ႈတင်းၽေးလၢပ်ႇၽေးလႅဝ်းၼၼ်ႉ တၵ်းလုၵ်ႉသေၵႃႈတီႈမိူင်း ဢေႇၵိပ်ႉတူႉ ၶိုၼ်းမိူဝ်းၸူးၵႃႈတီႈ မိူင်း ယူႉတႃႉ လႄႈ ပဵၼ်ဢၼ်ၵေႇၼႃႇလူင်လၢင်ဢေႃႈ။ ၵူၼ်း ယူႉတႃႉ ဢၼ်ၵိုတ်းဢၼ်ၵျၢၼ်ႇ ဢၼ်ၵႂႃႇၵႃႈတီႈမိူင်း ဢေႇၵိပ်ႉတူႉ ႁႂ်ႈလႆႈသွၼ်ႈပိုင်ႈယူႇ ၵႃႈတီႈၼၼ်ႈ တင်းသဵင်ႈတင်းလူင်ၼၼ်ႉ တၵ်းဢွၼ်ၵၼ်ႁူႉလွင်ႈဢၼ် ၵႂၢမ်းၵဝ် တၵ်းတႄႇယူႇႁိုဝ်။ ၵႂၢမ်းၶဝ်တၵ်းတႄႇယူႇႁိုဝ် ၼၼ်ႉဢေႃႈ။-

29လွင်ႈဢၼ် ထႃႇဝရႃႉၽြႃး မီးဢမိင်ႉလႄႈဝႃႈ၊ ၼီႉမိၵ်ႈလၢၵ်ႈၶၼႃႇ ဢၼ်ၵဝ်ပၼ်တီႈသူလူၺ်ႈလွင်ႈ ဢၼ်ၵဝ်တၵ်းသင်ႇသွၼ်သုင်းမႃႉသူ ၵႃႈတီႈၼႆႈ ႁႂ်ႈသူလႆႈႁူႉ လွင်ႈဢၼ်ၵႂၢမ်းၵဝ် တၵ်းတႄႇယူႇၽၢႆႇၼိုင်ႈ တင်းသူ ပုၼ်ႈဢၼ်တၵ်းႁဵတ်း ဢၼ်ႁၢႆႉဢၼ်ၸႃႉတီႈသူၼၼ်ႉၸမ်ႉ၊-

30ၵဝ်တၵ်းဢဝ် ၽႃႇရေႃး ႁေႃးသၽႃႇ ၶုၼ်ႁေႃၶမ်း ဢေႇၵိပ်ႉတူႉ ဢၢပ်ႈပၼ် ၵႃႈၼႂ်းမိုဝ်းရၢၼ်ႇသူႇမၼ်း ဢိၵ်ႇတင်း ၵႃႈၼႂ်းမိုဝ်း ၶဝ်ၸိူဝ်းဢၼ်ႁႃဢသၢၵ်ႈမၼ်းယူႇၸိူဝ်းၼၼ်ႉ မိူၼ်ၸိူဝ်ႉၼင်ႇဢၼ် ၵဝ်ဢဝ် ၸေႇတၵီႉ ၶုၼ်ႁေႃၶမ်း ယူႉတႃႉ ဢၢပ်ႈပၼ် ၵႃႈၼႂ်းမိုဝ်း ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ဢၼ်ဝႃႈ ရၢၼ်ႇသူႇ ဢၼ်ႁႃဢဝ်ဢသၢၵ်ႈမၼ်းၼၼ်ႉ ယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။