Jeremiah 38

Shan

← Chapter 37 Jump to: Chapter 39 →

1မိူဝ်ႈဢၼ် သေႇၽတီႉ လုၵ်ႈၸၢႆး မတ်ႉထၼ်ႇ၊ ၵေႇတလီႉ လုၵ်ႈၸၢႆး ပႃႇသူႉရႃႉ၊ ယေႇႁူႉၵလႃႉ လုၵ်ႈၸၢႆး သေႇလမီႉ၊ ပႃႇသူႉရႃႉ လုၵ်ႈၸၢႆး မႃႇလၶီႉ ၸိူဝ်းၼၼ်ႉ ငိၼ်းၵႂၢမ်းဢၼ် ယေႇရမီႉ ၸၢင်ႈႁေႃးလၢတ်ႈတီႈ ၵူၼ်းတင်းသဵင်ႈတင်းလူင်လႄႈဝႃႈ၊-

2ထႃႇဝရႃႉၽြႃး မီးဢမိင်ႉၸမ်ႉ၊ ၵေႃႉဢၼ်ယူႇၵႃႈၼႂ်းဝဵင်းၼႆႉၼၼ်ႉ တၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်းဢေႃႈ။ ၵေႃႉဢၼ်ဢွၵ်ႇၵႂႃႇ ၶဝ်ႈယူႇၽၢႆႇၵူၼ်း ၶႃႇလတေး ၼၼ်ႉၸမ်ႉ၊ ဢသၢၵ်ႈတၵ်းၵတ်းယဵၼ် ၶျၢမ်းသႃႇလႄႈ တၵ်းလႆႈဢသၢၵ်ႈမၼ်းမိူၼ်ၸိူဝ်ႉၼင်ႇ ဢုၵ်ႉၸႃႇဢၼ်ႁိမ်ဢဝ်လႆႈၼၼ်ႉလႄႈ တၵ်းလႆႈဢသၢၵ်ႈလိပ်းယူႇဢေႃႈ။-

3ထႃႇဝရႃႉၽြႃး မီးဢမိင်ႉၸမ်ႉ၊ ဝဵင်းၼႆႉတၵ်းလႆႈၶၢမ်ႇတၢင်းဢၼ် ဢဝ်ဢၢပ်ႈပၼ် ၵႃႈၼႂ်းမိုဝ်းၵူၼ်းသိုၵ်း ၶုၼ်ႁေႃၶမ်း ပႃႇပူႉလုၼ်ႇ တင်းလၢႆ ဢမၢၼ်ႇၶၼ်ပဵၼ်လႄႈ မၼ်းၼၼ်ႉတၵ်းသိမ်းဢဝ်ဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆၼၼ်ႉၸိုင်၊-

4မူးမၢတ်ႈၽွင်းမိူင်းၸိူဝ်းၼၼ်ႉ ဢွၼ်ၵၼ်လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ႁႂ်ႈၵေႃႉၼႆႉ လႆႈၶၢမ်ႇတၢင်းဢၼ်ဢဝ်တၢႆသေၵမ်း တီႈၶႃႈ၊ ၶႃႈၸဝ်ႈႁဝ်းၶဝ်တွင်းပၢၼ်ႇတီႈၶႃႈဢေႃႈ။ မၼ်းၼႆႉႁေႃးလၢတ်ႈၵႂၢမ်းၸိူဝ်ႉၼင်ႇၼႆသေလႄႈ ၸၢင်ႈႁႂ်ႈမိုဝ်း ႁူဝ်ႁၢၼ်ၵူၼ်းသိုၵ်း ဢၼ်ယင်းၵိုတ်းယင်းၵျၢၼ်ႇယူႇ ၵႃႈၼႂ်းဝဵင်းၼႆႉတင်းလၢႆ ဢိၵ်ႇတင်း ၵူၼ်းတင်းသဵင်ႈတင်းလူင် ႁႅင်းဢူၼ်ႈၵႂႃႇတီႈၶႃႈဢေႃႈ။ မၼ်းၼႆႉဢမ်ႇၸၢင်ႈလုမ်းလႃး ပွင်ႁဵတ်းဢၵျူဝ်း ၵူၼ်းမဵဝ်းၼႆႉတီႈၶႃႈ၊ ၸၢင်ႈယႃႉပႅတ်ႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

5ၶုၼ်လူင် ၸေႇတၵီႉ မီးဢမိင်ႉလႄႈဝႃႈ၊ မၼ်းၼၼ်ႉ မီးယူႇၵႃႈၼႂ်းမိုဝ်းသူဢေႃႈ။ ၶုၼ်ႁေႃၶမ်း ဢမ်ႇႁၢမ်ႈတၢပ်ႈႁႄႉၶႅၼ် ဢလူဝ်ႇသူလႆႈ၊ ဝႃႈၼင်ႇၼႆဢေႃႈ။-

6မိူဝ်ႈၼၼ်ႉ ၶဝ်ဢွၼ်ၵၼ်ဢဝ် ယေႇရမီႉ ၶျႃးတူၵ်း ၵႃႈၼႂ်းႁူးလိၼ်ၶုမ်လိၼ် မႃႇလၶီႉ လုၵ်ႈၸၢႆးၸဝ်ႈ ဢၼ်မီးၵႃႈၼႂ်းဝၢင်းထွင်ႇၼၼ်ႉလႄႈ ဢွၼ်ၵၼ်ဢဝ်ၸိူၵ်ႈသေလႄႈ ဢဝ် ယေႇရမီႉ ယွၼ်ႇတူၵ်းဢေႃႈ။ ၵႃႈၼႂ်းႁူးလိၼ်ၶုမ်လိၼ်ၼၼ်ႉ၊ ဢမ်ႇမီးၼမ်ႉ၊ မီးၵူမ်ႇၵူၺ်းလႄႈ ယေႇရမီႉ ၼၼ်ႉ လူမ်ႇၶဝ်ႈၵႃႈၼႂ်းၵူမ်ႇယူႇဢေႃႈ။-

7မိူဝ်ႈဢၼ် ဢေးပတႃႉမေႇလႅၵ်ႉ ၵူၼ်းမဵဝ်း ၵူႉသႃႉ ဢၼ်ပဵၼ်ၵူၼ်းထိင်းၼၢင်း ၵႃႈၼႂ်းႁေႃၶမ်းၼၼ်ႉ ႁူႉငိၼ်းလွင်ႈဢၼ် ၶဝ်ဢဝ် ယေႇရမီႉ ၶျႃးတူၵ်းသႂ်ႇဝႆႉ ၵႃႈၼႂ်းႁူးလိၼ်ၶုမ်လိၼ် ၸိူဝ်ႉၼင်ႇၼၼ်လႄႈ ၶုၼ်ႁေႃၶမ်းၼင်ႈယူႇ ၵႃႈၼႂ်းႁူးၽၵ်းတူ ပိၼ်ႇယႃႇမိၼ်ႇ ၼၼ်ႉၸိုင်၊-

8ဢေးပတႃႉမေႇလႅၵ်ႉ ၼၼ်ႉ ဢွၵ်ႇသေၵႃႈၼႂ်း ႁေႃၶမ်းလႄႈ ၵႂႃႇၸူးၵႃႈတီႈ ၶုၼ်ႁေႃၶမ်းသေယဝ်ႉ၊ လဝ်ႊလၢတ်ႈလႄႈဝႃႈ၊-

9ၸဝ်ႈၵဝ်ၶႃႈ ၸဝ်ႈၶုၼ်လူင်တီႈၶႃႈ၊ ၶဝ်ၼၼ်ႉဢွၼ်ၵၼ်ၽိတ်းပိူင်ႈ ၼႂ်းလွင်ႈၵႃႈဢၼ်ၶဝ်ႁဵတ်းတီႈပရေႃးၽႅတ်ႈ ယေႇရမီႉ ဢၼ်ၶဝ်ဢွၼ်ၵၼ် ဢဝ်ၶျႃးတူၵ်းသႂ်ႇဝႆႉ ၵႃႈၼႂ်းႁူးလိၼ်ၶုမ်လိၼ်ၼၼ်ႉတီႈၶႃႈယဝ်ႉ။ မၼ်းတၵ်းတၢႆၵႃႈၼႂ်း တီႈဢၼ်မၼ်းမီးၼၼ်ႉ ၵွပ်ႈပိူဝ်ႈ တၢင်းဢၼ်ဢိုပ်းဢၼ်ယၢၵ်ႈ တီႈၶႃႈဢေႃႈ။ လွင်ႈမၼ်းၸမ်ႉ ၶဝ်ႈမုၼ်းသဵင်ႈမူတ်းသေ ၵႃႈၼႂ်းဝဵင်းၼႆႉယဝ်ႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

10ၶုၼ်ႁေႃၶမ်း မီးဢမိင်ႉတီႈ ဢေးပတႃႉမေႇလႅၵ်ႉ ၵူၼ်းမဵဝ်း ၵူႉသႃႉ ၼၼ်ႉလႄႈဝႃႈ၊ ႁွင်ႉဢဝ်ၵူၼ်းသၢမ်သိပ်းသေ ၵႃႈတီႈၼႆႈၵႂႃႇလႄႈ ၼုၵ်ႈဢဝ်ပရေႃးၽႅတ်ႈ ယေႇရမီႉ ဢွၵ်ႇသေ ၵႃႈၼႂ်းႁူးလိၼ်ၶုမ်လိၼ်ၼၼ်ႉ ၸူဝ်ႈဢၼ်မၼ်းဢမ်ႇပႆႇတၢႆၼၼ်ႉတႃႉ၊ ဝႃႈၼင်ႇၼႆဢေႃႈ။-

11ၼင်ႇၼၼ်လႄႈ ဢေးပတႃႉမေႇလႅၵ်ႉ ႁွင်ႉဢဝ်ၵူၼ်းသေလႄႈ ၶဝ်ႈၵႃႈၼႂ်းႁေႃၶမ်း ၵႃႈတႂ်ႈတိူၵ်ႈၽၼ်ႇတႃႇသေလႄႈ ဢဝ်ၶူဝ်းၼုင်ႈဢၼ်ၵဝ်ႇဢၼ်မွင် ၶူဝ်းလဵင်းဢၼ်သိၵ်ႇ ဢၼ်ၶၢတ်ႇၼၼ်ႉမႃးလႄႈ ဢဝ်တင်းၸိူၵ်ႈ ဢိၵ်ႇတင်း ၸိူဝ်းၼၼ်ႉ ယွၼ်ႇတူၵ်း ၵႃႈၼႂ်းႁူးလိၼ်ၶုမ်လိၼ်ၸူး တီႈ ယေႇရမီႉ ၼၼ်ႉဢေႃႈ။-

12မိူဝ်ႈၼၼ်ႉ ဢေးပတႃႉမေႇလႅၵ်ႉ ၵူၼ်းမဵဝ်း ၵူႉသႃႉ ၼၼ်ႉ လၢတ်ႈတီႈ ယေႇရမီႉ လႄႈဝႃႈ၊ ဢဝ်ၶူဝ်းၼုင်ႈဢၼ်ၵဝ်ႇဢၼ်မွင် ၶူဝ်းလဵင်း ဢၼ်သိၵ်ႇဢၼ်ၶၢတ်ႇၼႆႉ လွင်ၸိူၵ်ႈၵႃႈတီႈၵႄႈၵၢပ်ႇၵိင်ႇႁႄႉမႂ်းတႃႉ၊ ဝႃႈၼင်ႇၼႆလႄႈ၊ ယေႇရမီႉ ႁဵတ်းၸွမ်းၵႃႈၼင်ႇဢၼ်ဝႃႈၼၼ်ႉဢေႃႈ။-

13ၼင်ႇၼၼ်လႄႈ ၶဝ်ဢွၼ်ၵၼ် ဢဝ်တင်းၸိူၵ်ႈတိုတ်ႉၸၼ်ဢဝ် ယေႇရမီႉ လႄႈ ဢဝ် ယေႇရမီႉ ဢွၵ်ႇသေၵႃႈၼႂ်းႁူးလိၼ် ၶုမ်လိၼ်ၼၼ်ႉဢေႃႈ။ လိုၼ်းၼၼ်ႉ ယေႇရမီႉ လႆႈယူႇ ၵႃႈၼႂ်းဝၢင်းထွင်ႇဢေႃႈ။

14လႆႈသမ်ႉ ၶုၼ်လူင် ၸေႇတၵီႉ ပွႆႇၸႂ်ႉလႄႈႁွင်ႉဢဝ် ယေႇရမီႉ မႃး ၵႃႈၼႂ်းလုၵ်းတႃႉတီႉယႃႉ ၵႃႈၼႂ်းႁိူၼ်း ထႃႇဝရႃႉၽြႃး သေယဝ်ႉ၊ ၶုၼ်ႁေႃၶမ်း လၢတ်ႈတီႈ ယေႇရမီႉ လႄႈဝႃႈ၊ ၵဝ်တၵ်း တွင်ႈထၢမ်သေၸိူဝ်ႉသေပိူင် တီႈမႂ်းဢေႃႈ။ ယႃႇပေသိူင်ႇမႅပ်ႉဝႆႉ လွင်ႈတၢင်း သေၸိူဝ်ႉသေပိူင်တီႈၵဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

15ယေႇရမီႉ လဝ်ႊထၢမ်တီႈ ၸေႇတၵီႉ လႄႈဝႃႈ၊ ပေႃးၶႃႈၸဝ်ႈ ဢဝ်လွင်ႈၼၼ်ႉ လဝ်ႊလၢတ်ႈတီႈၸဝ်ႈႁဝ်းၸိုင်၊ ၸဝ်ႈႁဝ်းတၵ်းဢဝ်ၶႃႈၸဝ်ႈတၢႆ ဢမၢၼ်ႇၶၼ်ပဵၼ် ဢမ်ႇၸႂ်ႈတီႈၶႃႈႁိုဝ်။ ပေႃးၶႃႈၸဝ်ႈပၼ် တၢင်းၵျၢမ်ႇတၢင်းပွင် တီႈၸဝ်ႈႁဝ်းၸိုင် ၸဝ်ႈႁဝ်း တၵ်းဢမ်ႇထွမ်ႇဢမ်ႇဢဝ် ၵႂၢမ်းၶႃႈၸဝ်ႈလႄႈ ယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

16ၶုၼ်လူင် ၸေႇတၵီႉ ၼၼ်ႉ တဵတ်ႇတဵတ်ႇတိူင်ႇဝႃႈၵိၼ်ႇဝႃႈ တီႈ ယေႇရမီႉ လႄႈဝႃႈ၊ ၵႃႈၼင်ႇဢၼ် ထႃႇဝရႃႉၽြႃး ဢၼ်ႁဵတ်းပဵၼ် ဢသၢၵ်ႈဝီႉၺိၺ်ႇ တီႈႁဝ်းၼႆႉၼၼ်ႉ ဢသၢၵ်ႈလိပ်းယူႇၼၼ်ႉ၊ ၵဝ်တၵ်းဢမ်ႇဢဝ်မႂ်းတၢႆ။ ၵဝ်တၵ်း ဢမ်ႇဢဝ်မႂ်းဢၢပ်ႈပၼ် ၵႃႈၼႂ်းမိုဝ်းၶဝ်ၸိူဝ်းဢၼ် ႁႃဢဝ်ဢသၢၵ်ႈမႂ်းယူႇ ၸိူဝ်းၼၼ်ႉၵူၺ်ႉ၊ ဝႃႈၼင်ႇၼႆဢေႃႈ။-

17မိူဝ်ႈၼၼ်ႉ ယေႇရမီႉ လဝ်ႊလၢတ်ႈတီႈ ၸေႇတၵီႉ လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ပေႃးၸဝ်ႈႁဝ်းဢွၵ်ႇၵႂႃႇၸူး ၵႃႈတီႈမူးမၢတ်ႈၽွင်းမိူင်း ၶုၼ်ႁေႃၶမ်း ပႃႇပူႉလုၼ်ႇ ၸိူဝ်းၼၼ်ႉဢမၢၼ်ႇၶၼ်ပဵၼ်ၸိုင်၊ ၸဝ်ႈႁဝ်းတၵ်းလႆႈ ဢသၢၵ်ႈၵတ်းယဵၼ်ၶျၢမ်းသႃႇ တီႈၶႃႈလႄႈ ဝဵင်းၼႆႉၵေႃႈတၵ်းလွတ်ႈတင်း တၢင်းဢၼ်ဢဝ်ၽႆးတုတ်ႇ တီႈၶႃႈဢေႃႈ။ ၸဝ်ႈႁဝ်းဢိၵ်ႇတင်း ပီႈၼွင်ႉၸိူဝ်ႉၶိူဝ်းၸဝ်ႈႁဝ်း ၸိူဝ်းၼၼ်ႉ တၵ်းဢွၼ်ၵၼ်လႆႈ ဢသၢၵ်ႈၵတ်းယဵၼ်ၶျၢမ်းသႃႇ တီႈၶႃႈဢေႃႈ။-

18ပေႃးဢမ်ႇၼၼ် ပေႃးၸဝ်ႈႁဝ်းဢမ်ႇဢွၵ်ႇၵႂႃႇၸူး ၵႃႈတီႈမူးမၢတ်ႈၽွင်းမိူင်း ၶုၼ်ႁေႃၶမ်း ပႃႇပူႉလုၼ်ႇ ၸိူဝ်းၼၼ်ႉၸိုင်၊ ဝဵင်းၼႆႉတၵ်းလႆႈၶၢမ်ႇ တၢင်းဢၼ်ဢဝ်ဢၢပ်ႈ ၵႃႈၼႂ်းမိုဝ်းၵူၼ်း ၶႃႇလတေး တင်းလၢႆလႄႈ ၶဝ်ၼၼ်ႉတၵ်းဢွၼ်ၵၼ် ဢဝ်ၽႆးတုတ်ႇလႄႈ ၸဝ်ႈႁဝ်းၵေႃႈ တၵ်းဢမ်ႇလွတ်ႈသေၵႃႈၼႂ်း မိုဝ်းၶဝ်ၼၼ်ႉတီႈၶႃႈ၊ ဝႃႈၼင်ႇၼႆဢေႃႈ။-

19ၶုၼ်လူင် ၸေႇတၵီႉ ၵေႃႈ လၢတ်ႈတီႈ ယေႇရမီႉ လႄႈဝႃႈ၊ ၵဝ်ၵူဝ်ႁႄၵူၼ်း ယူႉတႃႉ ဢၼ်ၵႂႃႇၶဝ်ႈယူႇၽၢႆႇ ၵူၼ်း ၶႃႇလတေး ၸိူဝ်းၼၼ်ႉလႄႈ ၵူဝ်ၶဝ်တၵ်းဢဝ်ၵဝ်ဢၢပ်ႈပၼ် ၵႃႈၼႂ်းမိုဝ်းၶဝ်ၼၼ်ႉလႄႈ ၶဝ်ၼၼ်ႉတၵ်းဢွၼ်ၵၼ် ႁဵတ်းပျၢၵ်ႈသႄႉသွမ်းၵဝ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

20ယေႇရမီႉ လဝ်ႊလၢတ်ႈလႄႈဝႃႈ၊ ၶဝ်ဢမ်ႇလႆႈဢဝ်ၸဝ်ႈႁဝ်းဢၢပ်ႈတီႈၶႃႈၵူၺ်ႉ။ ၶႅၼ်းတေႃႈ ထွမ်ႇဢဝ်ၵႂၢမ်း ထႃႇဝရႃႉၽြႃး ဢၼ်ၶႃႈၸဝ်ႈသင်ႇလၢတ်ႈတီႈၸဝ်ႈႁဝ်းၼႆႉသေၵမ်းတီႈၶႃႈ၊ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၸဝ်ႈႁဝ်းတၵ်းလႆႈ ၵတ်းယဵၼ်ၶျၢမ်းသႃႇလႄႈ ဢသၢၵ်ႈတၵ်းလႆႈလိပ်းတီႈၶႃႈဢေႃႈ။-

21ပေႃးဢမ်ႇၼၼ် ပေႃးၸဝ်ႈႁဝ်းထဵင်ပႅတ်ႈ လူၺ်ႈလွင်ႈဢၼ် တၵ်းဢွၵ်ႇၵႂႃႇၸူးၼၼ်ႉၸိုင်၊ ၵႂၢမ်းဢၼ် ထႃႇဝရႃႉၽြႃး ၼႄပျႃးတီႈၶႃႈၸဝ်ႈၸမ်ႉ၊-

22တူၺ်းလူး၊ မႄႈယိင်းဢၼ်ယင်းၵိုတ်းယင်းၵျၢၼ်ႇ ၵႃႈၼႂ်းႁေႃၶုၼ်ႁေႃၶမ်း ယူႉတႃႉ ၼၼ်ႉ ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်ဢွၵ်ႇၸူး ၵႃႈတီႈမူးမၢတ်ႈၽွင်းမိူင်းၶုၼ်ႁေႃၶမ်း ပႃႇပူႉလုၼ်ႇ ၸိူဝ်းၼၼ်ႉလႄႈ မႄႈယိင်းၸိူဝ်းၼၼ်ႉ တၵ်းဢွၼ်ၵၼ် လၢတ်ႈတီႈၸဝ်ႈႁဝ်းလႄႈဝႃႈ၊ ၵေႃႉသေႈၸဝ်ႈႁဝ်း ၸိူဝ်းၼၼ်ႉ တိုၵ်းယူင်းၸူဝ်းဢဝ် ၸဝ်ႈႁဝ်းလႄႈ ပႄႉၼႅင်ႇၸဝ်ႈႁဝ်း တီႈၶႃႈယဝ်ႉ။ တေႃႈလဵဝ်ၼႆႉ တိၼ်ၸဝ်ႈႁဝ်း လူမ်ႇၶဝ်ႈၵႃႈၼႂ်းၵူမ်ႇ ၼႂ်းဢုင်လႄႈ ၶဝ်ၼၼ်ႉ ဢွၼ်ၵၼ်သုတ်ႉယိုတ်းၶိုၼ်းၵႂႃႇ တီႈၶႃႈယဝ်ႉ၊ ဝႃႈၼင်ႇၼႆတီႈၶႃႈဢေႃႈ။-

23ၼင်ႇၼၼ်လႄႈ ၶဝ်တၵ်းဢွၼ်ၵၼ်ဢဝ် မေးၸဝ်ႈႁဝ်း လုၵ်ႈလၢင်းၸဝ်ႈႁဝ်း ၵႃႈမီးဢွၵ်ႇၸူးၵႃႈတီႈၵူၼ်း ၶႃႇလတေး ၸိူဝ်းၼၼ်ႉ တီႈၶႃႈဢေႃႈ။ ၸဝ်ႈႁဝ်းၵေႃႈ ယင်းၵၢင်းလွတ်ႈသေ ၵႃႈၼႂ်းမိုဝ်းၶဝ်ၼၼ်ႉလႄႈ တၵ်းႁွတ်ႈထိုင် ၵႃႈၼႂ်းမိုဝ်း ၶုၼ်ႁေႃၶမ်း ပႃႇပူႉလုၼ်ႇ လႄႈ တၵ်းႁႂ်ႈဝဵင်းၼႆႉ လႆႈၶၢမ်ႇတၢင်းဢၼ် ဢဝ်ၽႆးတုတ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

24ၸေႇတၵီႉ ၵေႃႈ မီးဢမိင်ႉတီႈ ယေႇရမီႉ လႄႈဝႃႈ၊ ယႃႇပေႁႂ်ႈၽူႈလႂ်သေၵေႃႉသေၵူၼ်း လႆႈႁူႉလႆႈငိၼ်းလွင်ႈၵႂၢမ်းၼႆႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မႂ်းဢမ်ႇလႆႈတၢႆ။-

25ပေႃးမူးမၢတ်ႈၽွင်းမိူင်း တင်းလၢႆ ငိၼ်းလွင်ႈဢၼ်ၵဝ် လၢတ်ႈၵႂၢမ်းတေႃႇၵၼ်တင်းမႂ်းလႄႈ ဢွၼ်ၵၼ်မႃးတီႈမႂ်းလႄႈ ထၢမ်လႄႈဝႃႈ၊ မွၵ်ႇလၢတ်ႈလွင်ႈဢၼ် မႂ်းလဝ်ႊလၢတ်ႈၵႃႈသင် တီႈၶုၼ်ႁေႃၶမ်းလႄႈ ၶုၼ်ႁေႃၶမ်းလၢတ်ႈၵႃႈသင် တီႈမႂ်းၼၼ်ႉ တီႈႁဝ်းသေၵမ်း။ ယႃႇပေသိူင်ႇပေဢမ်ဝႆႉသေၵမ်း။ ႁဝ်းတၵ်းဢမ်ႇဢဝ်မႂ်းတၢႆၵူၺ်ႉ၊ ဝႃႈၼင်ႇၼႆၸိုင်၊-

26မႂ်းၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်တွင်းပၢၼ်ႇလဝ်ႊလၢတ်ႈယွၼ်းဢဝ် ၵႃႈတီႈၽၢႆႇၼႃႈၶုၼ်ႁေႃၶမ်း ႁႂ်ႈမၼ်းၸဝ်ႈ ဢမ်ႇႁႂ်ႈၵဝ်လႆႈၶိုၼ်းၵႂႃႇ ၵႃႈတီႈႁိူၼ်း ယေႃးၼသၼ်ႇ ႁႂ်ႈလႆႈတၢႆၵႃႈတီႈၼၼ်ႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

27မိူဝ်ႈၼၼ်ႉ မူးမၢတ်ႈၽွင်းမိူင်း တင်းသဵင်ႈတင်းလူင် ဢွၼ်ၵၼ်မႃးတီႈ ယေႇရမီႉ လႄႈ ၸႅတ်ႈထၢမ်မၼ်းဢေႃႈ။ မၼ်းၵေႃႈ ၶိုၼ်းလၢတ်ႈၸွမ်းၵႃႈၼင်ႇဢၼ် ၶုၼ်ႁေႃၶမ်း မီးဢမိင်ႉ သင်ႇလၢတ်ႈဝႆႉၼၼ်ႉ သေယဝ်ႉ၊ ၶဝ်ၼၼ်ႉ ယင်းဢမ်ႇဢွၼ်ၵၼ် ၸႅတ်ႈထၢမ်ထႅင်ႈလႄႈ ယူႇဢေႃႈ။ ၽူႈလႂ်သေၵေႃႉသေၵူၼ်း ဢမ်ႇႁူႉသၢႆငၢႆႈလွင်ႈတၢင်းၼၼ်ႉ။-

28ၼင်ႇၼၼ်လႄႈ ယေႇရမီႉ လႆႈယူႇၵႃႈၼႂ်းဝၢင်းထွင်ႇ တေႃႇထိုင်ႁွတ်ႈဝၼ်းဢၼ်ဝဵင်း ယေႇရူႉသလႅမ်ႇ လႆႈၶၢမ်ႇတၢင်းဢၼ်သိမ်းဢဝ်ၼၼ်ႉလႄႈ၊ မိူဝ်ႈဢၼ်ဝဵင်း ယေႇရူႉသလႅမ်ႇ လႆႈၶၢမ်ႇတၢင်းဢၼ် သိမ်းဢဝ်ၼၼ်ႉ၊ မၼ်းမီးယူႇၵႃႈၼႂ်း ဝၢင်းထွင်ႇၼၼ်ႉဢေႃႈ။

← Chapter 37 Jump to: Chapter 39 →