Jeremiah 25

Shan

← Chapter 24 Jump to: Chapter 26 →

1ၼုၵ်ႈၵပၢတ်ႈ ၸဝ်ႈဢၼ်ႁွတ်ႈမႃးတီႈ ယေႇရမီႉ လူၺ်ႈလွင်ႈၵူၼ်းမိူင်း ယူႉတႃႉ ၵႃႈမီးၼႂ်းပီႊဢၼ် ယေႃးယၵိမ်း လုၵ်ႈၸၢႆးၶုၼ်လူင် ယူဝ်းသီႉယႃႉ ၶုၼ်ႁေႃၶမ်းမိူင်း ယူႉတႃႉ ၸၢမ်ႇႁၢင်ႈၸၢမ်ႇႁေႃ ပီႊၸတုၵ်ႉထႃႉ၊ မိူဝ်ႈဢၼ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၸၢမ်ႇႁၢင်ႈၸၢမ်ႇႁေႃပီႊပထမႃႉၼၼ်ႉ။-

2ဢၼ် ယေႇရမီႉ ဢဝ်သင်ႇလၢတ်ႈႁေႃးလၢတ်ႈတီႈၵူၼ်းမိူင်း ယူႉတႃႉ ၵႃႈမီး ဢိၵ်ႇတင်း ၵူၼ်းဝဵင်း ယေႇရူႉသလႅမ်ႇ ၵႃႈမီး ၼၼ်ႉၸမ်ႉ၊-

3ၸႃႉၸဵမ် ယူဝ်းသီႉယႃႉ လုၵ်ႈၸၢႆး ဢႃႇမုၼ်ႇ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသိပ်းသၢမ်ပီႊလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉ သၢဝ်းပၢႆသၢမ်ပီႊ တဵမ်တဵမ်၊ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈ ၵဝ်လုၵ်ႉ ၸဝ်ႉၸဝ်ႉၸဵဝ်းၸဵဝ်း သေလႄႈ ဢဝ်သင်ႇလၢတ်ႈတီႈသူယူႇ ၶိူဝ်းၶိူဝ်းယႂ်းယႂ်းဢေႃႈ။ ၵူၺ်းၵႃႈ သူယင်းဢမ်ႇထွမ်ႇဢမ်ႇဢဝ်လႄႈ ဢွၼ်ၵၼ်ယူႇယဝ်ႉ။-

4ထႃႇဝရႃႉၽြႃးၵေႃႈ လုၵ်ႉၸဝ်ႉၸဝ်ႉလႄႈ ပွႆႇၸႂ်ႉၶႃႈမၼ်းၸဝ်ႈ ပရေႃးၽႅတ်ႈ တင်းသဵင်ႈတင်းလူင် မႃးတီႈသူၶိူဝ်းၶိူဝ်းယႂ်းယႂ်းဢေႃႈ။ ၵူၺ်းၵႃႈ သူယင်းဢမ်ႇထွမ်ႇဢမ်ႇဢဝ်၊ ယင်းဢမ်ႇႁေႈႁူၸူး ႁႂ်ႈလႆႈငိၼ်းလႄႈ ယူႇယဝ်ႉ။-

5ၶဝ်ၼၼ်ႉ ၸၢင်ႈလၢတ်ႈလႄႈဝႃႈ၊ ဢွၼ်ၵၼ်ၶိုၼ်းမႃးသေၵႃႈတီႈ သဵၼ်ႈတၢင်းဢၼ်ႁၢႆႉဢၼ်မိူၵ်ႈသူ ဢိၵ်ႇတင်း သေၵႃႈတီႈတၢင်းၵမ်တၢင်းၵျၢင်ႉဢၼ်ႁၢႆႉဢၼ်ယုတ်ႈၼၼ်ႉ ႁင်းၽႂ်ႁင်းမၼ်းလႄႈ ယူႇၵႃႈၼႂ်းမိူင်းဢၼ် ထႃႇဝရႃႉၽြႃး ပၼ်တီႈသူ ဢိၵ်ႇတင်း ပူႇသူမွၼ်ႇသူၸိူဝ်းၼၼ်ႉ ယူႇသေႇသေႇတႃႉ။-

6ယႃႇပေဢွၼ်ၵၼ်ၸွမ်းလင်ၽြႃး တၢင်ႇသူႇတၢင်ႇပႃးလႄႈ ႁဵတ်းဝၢတ်ႈၵူဝ်းၵႂၢႆႇၶဝ်။ ယႃႇပေဢဝ်လွင်ႈတၢင်းဢၼ် မိုဝ်းသူႁဵတ်းၼၼ်ႉ ႁႂ်ႈတၢင်းၸႂ်မႆႈၶႆႈၸႃႉၵဝ်ဢွၵ်ႇ။ ၵဝ်ၵေႃႈ တၵ်းဢမ်ႇၼိၵ်ႈၸၢၵ်ႈငႅၼ်းသႄးသူ၊ ဝႃႈၼင်ႇၼႆဢေႃႈ။-

7ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းဝႃႈၼၼ်သေၵေႃႈ ယင်းဢမ်ႇထွမ်ႇဢမ်ႇဢဝ် ၵႂၢမ်းၵဝ်လႄႈ ဢွၼ်ၵၼ်ယူႇႁႂ်ႈမီးဢၶႂၢင်ႉ ဢၼ်ဢဝ်လွင်ႈတၢင်းဢၼ်မိုဝ်းသူ ႁဵတ်းၸိူဝ်းၼၼ်ႉ ႁႂ်ႈတၢင်းၸႂ်မႆႈၶႆႈၸႃႉၵဝ်ဢွၵ်ႇ ႁႂ်ႈဢၵျူဝ်းသူလႆႈလဵၵ်ႉၵေႇသုတ်ႈယွမ်းၵႂႃႇယဝ်ႉ။-

8ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈဢၼ်သူ ဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈ၊-

9ၵဝ်သင်ႇလၢတ်ႈၵႂႃႇလႄႈ ဢဝ်ၵူၼ်းမိူင်းတၢင်းႁွင်ႇ ၵူႈၸိူဝ်ႉၵူႈမဵဝ်း ဢိၵ်ႇတင်းၶႃႈၵဝ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၸိူဝ်းၼၼ်ႉ မႃးႁႂ်ႈလႆႈတိုၵ်းတေႃး မိူင်းၼႆႉ ဢိၵ်ႇတင်း ၵူၼ်းဝၢၼ်ႈၵူၼ်းမိူင်း မိူင်းၼႆႉ တင်းၵူၼ်းၵူႈၸိူဝ်ႉၵူႈမဵဝ်း ဢၼ်ယူႇၵႃႈတီႈလဵပ်ႈႁွပ်ႈ ႁိမ်းႁွမ်း ၸိူဝ်းၼၼ်ႉလႄႈ၊ ၵဝ်တၵ်းယႃႉၶဝ်ပႅတ်ႈ မူတ်းမူတ်းသဵင်ႈသဵင်ႈလႄႈ ႁႂ်ႈၶဝ်ပဵၼ် တီႈဢၼ်လီဢၢမ်း၊ တီႈဢၼ်ႁဵတ်းသဵင် သီႉသီႉသေႃႉသေႃႉသႄႉသွမ်း၊ တီႈဢၼ် သဵတ်ႇၵူၼ်းယဵၼ်ၵူၼ်း ယူႇတႃႇသေႇဢေႃႈ။-

10ၵဝ်တၵ်းႁႂ်ႈသဵင်ဢၼ်ၸူမ်းပျေႃႇ၊ သဵင်ဢၼ်သႂၢင်ႇသိူဝ်း၊ သဵင်ၵူၼ်းၸၢႆးဢၼ်သွင်ႇမင်ႇၵလႃႇ၊ သဵင်ၵူၼ်းယိင်းဢၼ်သွင်ႇမင်ႇၵလႃႇ၊ သဵင်လူၺ်ဢၼ်ၶိုတ်ႈ ဢိၵ်ႇတင်း ဢၼ်လႅင်းဝၢၼ်ႇၽႆးတဵၼ်း ၸိူဝ်းၼၼ်ႉ လပ်ႉႁၢႆၵႂႃႇသေၵႃႈၼႂ်းၶဝ်ၼႆႉဢေႃႈ။-

11မိူင်းၼႆႉတင်းမိူင်း တၵ်းပဵၼ်တီႈဢၼ် သဵတ်ႇၵူၼ်းယဵၼ်ၵူၼ်း၊ တီႈဢၼ်လီဢၢမ်းဢေႃႈ။ ၵူၼ်းၵူႈၸိူဝ်ႉၵူႈမဵဝ်းၸိူဝ်းၼႆႉ တၵ်းလႆႈဢွၼ်ၵၼ်ၵိုတ်ႉႁၢပ်ႇဢမူႉ ၶုၼ်ႁေႃၶမ်း ပႃႇပူႉလုၼ်ႇ ၸဵတ်းသိပ်းပီႊတဵမ်တဵမ်ဢေႃႈ။-

12ထႃႇဝရႃႉၽြႃး မီးဢမိင်ႉၸမ်ႉ၊ မိူဝ်ႈဢၼ်ၸေး ၸဵတ်းသိပ်းပီႊယဝ်ႉၼၼ်ႉၸိုင်၊ ၵဝ်တၵ်းပၼ်တၢမ်ႇ တီႈၶုၼ်ႁေႃၶမ်း ပႃႇပူႉလုၼ်ႇ ဢိၵ်ႇတင်းမိူင်းမၼ်းဢၼ်ဝႃႈ သိုင်ႇၸိုင်ႈဝၢၼ်ႈမိူင်း ၶႃႇလတေး ၼၼ်ႉ ၵွပ်ႈပိူဝ်ႈဢပႅတ်ႈၶဝ်လႄႈ ႁႂ်ႈမိူင်းၼၼ်ႉ ပဵၼ်တီႈဢၼ် သဵတ်ႇၵူၼ်းယဵၼ်ၵူၼ်း ယူႇတႃႇသေႇဢေႃႈ။-

13ၵဝ်တၵ်းႁႂ်ႈ ၵႂၢမ်းဢၼ်ၵဝ်မၵ်းၶိၼ်းဝႆႉ တင်းသဵင်ႈတင်းလူင် ဢၼ်ဝႃႈ ၵႂၢမ်းၵႃႈဢၼ် ယေႇရမီႉ ႁေႃးလၢတ်ႈယူႇၽၢႆႇၼိုင်ႈ တင်းသိုင်ႇၸိုင်ႈဝၢၼ်ႈမိူင်း တင်းသဵင်ႈတင်းလူင်လႄႈတႅမ်ႈမၢႆဝႆႉ ၵႃႈၼႂ်းလိၵ်ႈၼႆႉၸိူဝ်းၼၼ်ႉ တူၵ်းႁွတ်ႈၵႃႈၼိူဝ် သိုင်ႇၸိုင်ႈဝၢၼ်ႈမိူင်းၼၼ်ႉဢေႃႈ။-

14ၵူၼ်းမဵဝ်းဢၼ်ၼမ်ၼႃႇ ဢိၵ်ႇတင်း ၶုၼ်ႁေႃၶမ်း ဢၼ်ယႂ်ႇၼႃႇၸိူဝ်းၼၼ်ႉ ဢွၼ်ၵၼ်ၸႂ်ႉၵိၼ်ၶဝ်ၼၼ်ႉလႄႈ ၵဝ်တၵ်းတွပ်ႇတႅၼ်းပၼ် ဢၵျူဝ်းဢပႅတ်ႈ ၸွမ်းၼင်ႇ တၢင်းၵမ်တၢင်းၵျၢင်ႉ ဢၼ်ၶဝ်ၵမ်ၵျၢင်ႉ ဢိၵ်ႇတင်း လွင်ႈတၢင်းဢၼ် ၶဝ်ဢဝ်မိုဝ်းၶဝ်ႁဵတ်း ၼၼ်ႉဢေႃႈ။

15ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉတီႈၵဝ်ၸမ်ႉ၊ ႁပ်ႉၶၢမ်ႇဢဝ်ၵွၵ်းၼမ်ႉၸပိတ်ႈ တၢင်းၸႂ်မႆႈၶႆႈၸႃႉၸဝ်ႈၼႆႉ ၵႃႈတီႈမိုဝ်းၵဝ်လႄႈ ႁႂ်ႈၵူၼ်းၵူႈၸိူဝ်ႉၵူႈမဵဝ်း ဢၼ်ၵဝ်ပွႆႇၸႂ်ႉမႂ်းၸူးၸိူဝ်းၼၼ်ႉ သူတ်ႉၵိၼ်တႃႉ။-

16ၶဝ်ၼၼ်ႉ တၵ်းသူတ်ႉၵိၼ်လႄႈ ႁွတ်ႈထိုင်တၢင်းဢၼ်မဝ်းလဝ်ႈဝၢင်ႇဝီႈဝၢင်ႇဝိူဝ်ႈ ၵွပ်ႈပိူဝ်ႈလၢပ်ႇလႅဝ်း ဢၼ်ၵဝ်ပွႆႇၸႂ်ႉၵႂႃႇၵႃႈၼႂ်းၵၢင်ၶဝ် ၼၼ်ႉဢေႃႈ၊ ဝႃႈၼင်ႇၼႆလႄႈ၊-

17ၵဝ်ႁပ်ႉၶၢမ်ႇဢဝ်ၵွၵ်းၼၼ်ႉ ၵႃႈတီႈမိုဝ်း ထႃႇဝရႃႉၽြႃးလႄႈ ႁႂ်ႈၵူၼ်းမဵဝ်းၵႃႈမီးဢၼ် ထႃႇဝရႃႉၽြႃး ပွႆႇၸႂ်ႉၵဝ်ၵႂႃႇၸူးၸိူဝ်းၼၼ်ႉသူတ်ႉၵိၼ်ဢေႃႈ။-

18ၵူၼ်းမဵဝ်းၸိူဝ်းၼၼ်ႉၸမ်ႉ၊ ပႃးၵူၼ်းဝဵင်း ယေႇရူႉသလႅမ်ႇ လႂ်၊ ၵူၼ်းမိူင်း ယူႉတႃႉ လႂ်၊ ၶုၼ်ႁေႃၶမ်း ယူႉတႃႉ လႂ်၊ မူးမၢတ်ႈၽွင်းမိူင်း ဢၼ်တၵ်းလႆႈၵိၼ် ႁႂ်ႈလႆႈပဵၼ်တီႈဢၼ် သဵတ်ႇၵူၼ်းယဵၼ်ၵူၼ်း၊ တီႈဢၼ်လီဢၢမ်း၊ တီႈဢၼ်ငိၼ်းသဵင် ဢၼ်ႁဵတ်းသီႉသီႉသေႃႉသေႃႉ သႄႉသွမ်း၊ တီႈဢၼ်ၵိၼ်ႇလႃႇ ၵႃႈၼင်ႇဢၼ် ပဵၼ်ဝၼ်းမိူဝ်ႈၼႆႉၼၼ်ႉလႂ်၊-

19ၶုၼ် ၽႃႇရေႃး ဢၼ်လႆႈဢုပ်ႉပိူင်ႇမိူင်း ဢေႇၵိပ်ႉတူႉ ဢိၵ်ႇတင်းၶႃႈမၼ်း ၵူၼ်းမၼ်းလႂ်၊ မူးမၢတ်ႈၽွင်းမိူင်းမၼ်းလႂ်၊ ၵူၼ်းဝၢၼ်ႈမိူင်းမၼ်းၵႃႈမီးလႂ်၊-

20ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်လေႃးလႄး လူၺ်ႈၵၼ် တင်းၶဝ်ၵႃႈမီးလႂ်၊ ၶုၼ်လူင်မိူင်း ဢူႉၸႃႉ ၵႃႈမီးလႂ်၊ ၶုၼ် ၽီႉလိတ်ႉတီႉ ၵႃႈမီးလႂ်၊ ၵူၼ်းမိူင်း ဢႃႇသၵေႇလုၼ်ႇ ၊ ၵူၼ်းမိူင်း ၵႃႇၸႃႉ ၊ ၵူၼ်းမိူင်း ဢေႇၵြုၼ်ႇ ၊ ၵူၼ်းမိူင်း ဢႃႇၸုတ်ႉ ဢၼ်ၵိုတ်းၵျၢၼ်ႇဝႆႉလႂ်၊-

21ၵူၼ်းမိူင်း ဢေႇတုမ်ႇ ၊ ၵူၼ်းမိူင်း မေႃႇၽႃႉ ၊ ၵူၼ်းမိူင်း ဢမ်ႇမုၼ်ႇ ၊-

22ၶုၼ်လူင်မိူင်း တူႉရူႉ ၵႃႈမီး၊ ၶုၼ်လူင်မိူင်း ၸီႉတုမ်ႇ ၵႃႈမီး၊ ၶုၼ်လူင် ဢၼ်လႆႈဢုပ်ႉပိူင်ႇမိူင်း ၵႃႈတီႈၽၢႆႇပုၼ်ႉပၢင်ႇလၢႆႇၸိူဝ်းၼၼ်ႉၵႃႈမီး၊-

23ၵူၼ်းမိူင်း တေႇတၼ်ႇ ၊ ၵူၼ်းမိူင်း တေႇမႃႉ ၊ ၵူၼ်းမိူင်း ပူႉၸႃႉ ၊ မဵဝ်းၵူၼ်းဢၼ်ၸၢင်ႈထႃၶူၼ်ၵႅမ်ႈၶူၼ်ၵၢင်း၊-

24ၶုၼ်လူင် ဢရေႇပျႃႉ ၵႃႈမီး၊ ၶုၼ်လူင် ဢၼ်လႆႈဢုပ်ႉပိူင်ႇ ၵူၼ်းမဵဝ်း ဢၼ်လေႃးလႄးၵၼ်လႄႈ ယူႇၵႃႈတီႈထိူၼ်ႇၸိူဝ်းၼၼ်ႉ ၵႃႈမီး၊-

25ၶုၼ်လူင်မိူင်း ၸီႉမရီႉ ၵႃႈမီး၊ ၶုၼ်လူင်မိူင်း ဢေႇလမ်ႇ ၵႃႈမီး၊ ၶုၼ်လူင်မိူင်း မေႇတီႉ ၵႃႈမီး၊-

26ၶုၼ်လူင် မိူင်းတၢင်းႁွင်ႇၵႃႈမီး ပႃးၼိုင်ႈယဝ်ႉပႃးၼိုင်ႈ၊ ပဵၼ်ဢၼ်ၸမ်သေဢမ်ႇဝႃႈ၊ ပဵၼ်ဢၼ်ၵႆသေဢမ်ႇဝႃႈ၊ ဢိၵ်ႇတင်း သိုင်ႇၸိုင်ႈဝၢၼ်ႈမိူင်းလေႃးၵီႇ ၵႃႈဢၼ်မီးၵႃႈၼိူဝ် ၼႃႈလိၼ်မိူင်းတင်းၼႃႈ လႂ်ၸိူဝ်းၼၼ်ႉဢေႃႈ။ လိုၼ်းသေၶဝ်ၸိူဝ်းၼၼ်ႉယဝ်ႉၼၼ်ႉ ၶုၼ်ႁေႃၶမ်း သေးသိၵ်ႉ တၵ်းလႆႈသူတ်ႉၵိၼ်ဢေႃႈ။-

27မႂ်းသင်ႇလၢတ်ႈဝႆႉ တီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ၵွပ်ႈပိူဝ်ႈ လၢပ်ႇလႅဝ်းဢၼ်ၵဝ်ပွႆႇၸႂ်ႉၸူး ၵႃႈၼႂ်းၵႄႈၵၢင်သူၼၼ်ႉလႄႈ ဢွၼ်ၵၼ်သူတ်ႉၵိၼ်လႄႈ မဝ်းယူႇ၊ တူၼ်ႉႁၢၵ်ႈယူႇ၊ ပဵၼ်လူမ်းယူႇတႃႉ။ ၵမ်းလိုၼ်းယႃႇပေလုၵ်ႉ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆတႃႉ။-

28ပေႃးၶဝ်ဢမ်ႇႁပ်ႉၶၢမ်ႇဢဝ် ၵွၵ်းၼၼ်ႉ တီႈမိုဝ်းမႂ်းႁႂ်ႈလႆႈသူတ်ႉၵိၼ်ၸိုင်၊ မႂ်းၶိုၼ်းလၢတ်ႈတီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ သူတၵ်းလႆႈဢွၼ်ၵၼ် သူတ်ႉၵိၼ် ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။-

29လွင်ႈမၼ်းၸမ်ႉ ပေႃးၵဝ်ၸႃႉႁဵတ်း တၢင်းဢၼ်ပၼ်ဢပႅတ်ႈ တီႈဝဵင်းဢၼ်လႆႈၶၢမ်ႇတၢင်းဢၼ် ႁွင်ႉႁဵၵ်ႈလူၺ်ႈၸိုဝ်ႈသဵင်ၵဝ်ၼၼ်ႉၸိုင်၊ သူယင်းဢမ်ႇလႆႈၶၢမ်ႇ တၢမ်ႇဢပႅတ်ႈလႃးလႃးလႄႈ တၵ်းလႆႈယူႇႁိုဝ်။ သူယင်းဢမ်ႇလႆႈ ၶၢမ်ႇတၢမ်ႇလႄႈဢမ်ႇလႆႈယူႇ။ ၵဝ်တၵ်းႁွင်ႉဢဝ်လၢပ်ႇ ဢဝ်လႅဝ်း ပွႆႇၸႂ်ႉၸူးတီႈ ၵူၼ်းလိၼ်မိူင်းၵႃႈမီး တင်းသဵင်ႈတင်းလူင်ဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

30ပိူဝ်ႈၼႆလႄႈ ၵႂၢမ်းဢၼ်မႂ်း တၵ်းလႆႈႁဵတ်း ပရေႃးၽႅတ်ႈသေလႄႈ ႁေႃးလၢတ်ႈတီႈၶဝ်ၸမ်ႉ၊ ထႃႇဝရႃႉၽြႃး တၵ်းယူႇၵႃႈတီႈဢၼ်သုင်ၼၼ်ႉ ႁွင်ႉပၢဝ်ႇႁွင်ႉသေႃႇလႄႈ မၼ်းၸဝ်ႈတၵ်းယူႇၵႃႈတီႈပိၵ်ႈမၢၼ်ႇၸဝ်ႈ ဢၼ်မူတ်းၸၢင်ႇၼၼ်ႉ ၵိဝ်သဵင်ဢေႃႈ။ မၼ်းၸဝ်ႈတၵ်းႁွင်ႉပၢဝ်ႇႁွင်ႉသေႃႇ ယူႇၽၢႆႇၼိုင်ႈ တင်းတီႈဢၼ်မၼ်းၸဝ်ႈ ၵိင်းဝၢပ်ႈယူႇၼၼ်ႉ ႁႅင်းယႂ်ႇၼႃႇလူင်လၢင်လႄႈ မၼ်းၸဝ်ႈတၵ်းသႅၼ်ႇႁွင်ႉ ယူႇၽၢႆႇၼိုင်ႈ တင်းၵူၼ်းလိၼ်မိူင်း တင်းသဵင်ႈတင်းလူင် မိူၼ်ၸိူဝ်ႉၼင်ႇဢၼ် ၶဝ်ၸိူဝ်းဢၼ်ယဵပ်ႇၼူတ်ႈ မၢၵ်ႇၸပိတ်ႈၼၼ်ႉဢေႃႈ။-

31သဵင်တၵ်းၸွတ်ႇတူဝ်ႈၵႂႃႇ တေႃႇထိုင်ႁွတ်ႈ ႁိမ်းလႅၼ်သုတ်းလိၼ်မိူင်းဢေႃႈ။ ထႃႇဝရႃႉၽြႃး မီးလွင်ႈဢၼ်လီထူပ်းတြႃး ၵၼ်တင်း ၵူၼ်းၵူႈၸိူဝ်ႉၵူႈမဵဝ်းလႄႈ မၼ်းၸဝ်ႈတၵ်းႁဵတ်းဢမူႉသႂ်ႇတီႈ သတ်ႉတဝႃႇ တင်းသဵင်ႈတင်းလူင်ဢေႃႈ။ ၶဝ်ၸိူဝ်းဢၼ်ႁၢႆႉၸိုင်၊ မၼ်းၸဝ်ႈတၵ်းဢဝ်ဢၢပ်ႈပၼ် တီႈလၢပ်ႇတီႈလႅဝ်းဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

32ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး၊ ၽေးၼၼ်ႉ တၵ်းႁွတ်ႈထိုင်ၵႃႈတီႈ မိူင်းၼိုင်ႈယဝ်ႉမိူင်းၼိုင်ႈလႄႈ လူမ်းၽိဝ်ႇႁုင် ဢၼ်ႁႅင်းယႂ်ႇၼႃႇ တၵ်းလုၵ်ႉၶိုၼ်ႈသေ ၵႃႈတီႈႁိမ်းၸဵင်ႇ ႁိမ်းလႅၼ်လိၼ်မိူင်းဢေႃႈ။-

33မိူဝ်ႈၼၼ်ႉ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ထႃႇဝရႃႉၽြႃး ဢဝ်တၢႆၼၼ်ႉ တၵ်းၸွတ်ႇတူဝ်ႈ ဢဝ်ၵႃႈတီႈ ၸႃႉၸဵမ်လိၼ်မိူင်းၽၢႆႇၼိုင်ႈ တေႃႇထိုင်ႁွတ်ႈၽၢႆႇၼိုင်ႈလႄႈ ၽူႈလႂ်ဢမ်ႇလႆႈၶၢင်းၶီၶၢင်းၽၢၼ်ပုၼ်ႈၶဝ်၊ ဢမ်ႇလႆႈဢဝ်ၸူႉၵၼ်ၵွင်ၵၼ်၊ ဢမ်ႇလႆႈဢဝ်သၢင်းၵျူဝ်ႇ။ ၶဝ်တၵ်းဢွၼ်ၵၼ်ပဵၼ်ၸိူဝ်ႉၼင်ႇ ၽၢႆႈလူင်ၵႃႈၼိူဝ်ၼႃႈလိၼ် ၼၼ်ႉဢေႃႈ။-

34သူဢၼ်ပဵၼ် ၵူၼ်းဢၼ်လဵင်ႉသူဝ်းထိင်းသူဝ်းၶဝ်ဢိူၺ်း၊ ဢွၼ်ၵၼ်ဢိုတ်းႁႆႈႁွင်ႉသႅၼ်ႇတႃႉ။ သူဢၼ်ပဵၼ် သူဝ်းလူင်သူဝ်းမျၢတ်ႈၶဝ်ဢိူၺ်း၊ ဢွၼ်ၵၼ်ၵိင်ႈၵိူၵ်ႇယူႇ ၵႃႈၼႂ်းတဝ်ႈတႃႉ။ မိုဝ်ႉဝၼ်း ဢၼ်လႆႈဢဝ်သူတၢႆၼၼ်ႉႁွတ်ႈထိုင်ယဝ်ႉ။ ၵဝ်ႁေႃႈသူၵႂႃႇၵႃႈတီႈ ၵူႈတီႈၵူႈလႅၼ်လႄႈ သူတၵ်းဢွၼ်ၵၼ်တူၵ်း မိူၼ်ၸိူဝ်ႉၼင်ႇ ဢၼ်ၶိူင်ႈပိူင် ဢၼ်ထိူၵ်ႈၵႃႈထိူၵ်ႈၶၼ်တူၵ်း ၼၼ်ႉဢေႃႈ။-

35ၶဝ်ၸိူဝ်းဢၼ် လဵင်ႉသူဝ်းထိင်းသူဝ်းၼၼ်ႉ တၵ်းဢမ်ႇမီးသဵၼ်ႈတၢင်းဢၼ် ဢွၵ်ႇပၢႆႈ။ ၶဝ်ၸိူဝ်းဢၼ်ပဵၼ်သူဝ်းလူင် သူဝ်းမျၢတ်ႈၸိူဝ်းၼၼ်ႉ တၵ်းဢမ်ႇမီး သဵၼ်ႈတၢင်းဢၼ် ပၢႆႈလႄႈလွတ်ႈ။-

36လႆႈငိၼ်းသဵင်ၶဝ်ၸိူဝ်းဢၼ် လဵင်ႉသူဝ်းထိင်းသူဝ်းၼၼ်ႉ ႁႆႈႁွင်ႉ ဢိၵ်ႇတင်း သဵင်ဢၼ်ၶဝ်ၸိူဝ်းဢၼ် ပဵၼ်သူဝ်းလူင် သူဝ်းမျၢတ်ႈၼၼ်ႉ ပွင်ႉၶၢင်းၼၼ်ႉဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃး ယႃႉၽဵဝ်ႈတီႈဢၼ် ၶဝ်ယၢမ်ႈၵိၼ်ယူႇၼၼ်ႉပႅတ်ႈဢေႃႈ။-

37တီႈယူႇတၼ်းသဝ်း ဢၼ်ၼိမ်လီတဵတ်ႇလီၼၼ်ႉၵေႃႈ လႆႈၶၢမ်ႇ တၢင်းဢၼ်သဵတ်ႇဢၼ်ယဵၼ်ၵႂႃႇ ၵွပ်ႈပိူဝ်ႈဢၼ် ထႃႇဝရႃႉၽြႃး ၸႂ်မႆႈၶႆႈၸႃႉ ႁႅင်းယႂ်ႇၼႃႇလူင်လၢင် ၼၼ်ႉဢေႃႈ။-

38မၼ်းၸဝ်ႈၸုၼ်ႉပႅတ်ႈယုမ်း တီႈယူႇမၼ်းၸဝ်ႈ မိူၼ်ၸိူဝ်ႉၼင်ႇ သၢင်ႇသီႈၼုမ်ႇ ၼၼ်ႉယဝ်ႉ။ မိူင်းၶဝ်ၼၼ်ႉ ပဵၼ်တီႈဢၼ်လီဢၢမ်း ၵွပ်ႈပိူဝ်ႈ တၢင်းဢၼ်ႁၢဝ်ႈဢၼ်ၵျၢမ်း ၵေႃႉဢၼ်ၼိၵ်ႈၸၢၵ်ႈငႅၼ်းသႄး ဢိၵ်ႇတင်း တၢင်းဢၼ်မၼ်းၸဝ်ႈ ၸႂ်မႆႈၶႆႈၸႃႉ ႁႅင်းယႂ်ႇၼႃႇၼၼ်ႉဢေႃႈ။

← Chapter 24 Jump to: Chapter 26 →