Jeremiah 51 — Shan

1ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး၊ ၵဝ်တၵ်းႁႂ်ႈလူမ်း ဢၼ်ၸၢင်ႈယႃႉပႅတ်ႈၼၼ်ႉ လုၵ်ႉယူႇၽၢႆႇၼိုင်ႈ တင်းဝဵင်း ပႃႇပူႉလုၼ်ႇ ဢိၵ်ႇတင်း ၽၢႆႇၼိုင်ႈ တင်းၶဝ်ၸိူဝ်းဢၼ် ႁူမ်ႈပွင်းလူၺ်ႈၵၼ်တင်း ရၢၼ်ႇသူႇၵဝ်ၼၼ်ႉဢေႃႈ။-

2ၵဝ်တၵ်းပွႆႇၸႂ်ႉ ၶဝ်ၸိူဝ်းဢၼ် ၸၢင်ႈဢဝ်လူင်ႈၽတ်း ၽတ်းၼၼ်ႉ ၸူးၵႃႈတီႈဝဵင်း ပႃႇပူႉလုၼ်ႇ လႄႈ ၶဝ်ၼၼ်ႉ တၵ်းဢွၼ်ၵၼ် ၽတ်းမိူင်းၼၼ်ႉတင်းမိူင်း ႁႂ်ႈထၼ်ႈပေႃး ပဵၼ်ဢၼ်ပဝ်ႇဢၼ်မူတ်း ၵႂႃႇဢေႃႈ။ ၼႂ်းမိုဝ်ႉဝၼ်းဢၼ် ၽေးႁွတ်ႈထိုင်ၼၼ်ႉ၊ ၶဝ်ၼၼ်ႉတၵ်း ဢွၼ်ၵၼ်ႁဵတ်းရၢၼ်ႇသူႇ ယူႇၵႃႈတီႈႁိမ်းႁွမ်း လဵပ်ႈႁွပ်ႈမၼ်းဢေႃႈ။-

3ဢွၼ်ၵၼ်ဝူတ်ႈၵၢင်ႇတၢင်ႇလႄႈ ယိုဝ်းၶဝ်ၸိူဝ်းဢၼ်ယိပ်းၵၢင်ႇ၊ ၶဝ်ၸိူဝ်းဢၼ်ၼုင်ႈ ၶူဝ်းၼုင်ႈၶႅပ်းလဵၵ်း ၸိူဝ်းၼၼ်ႉတႃႉ။ ယင်းဢမ်ႇသေလၢႆၵူၼ်းၼုမ်ႇ ၵူၼ်းၵမ်မၼ်းတင်းလၢႆလႄႈ ဢွၼ်ၵၼ်ယႃႉၽဵဝ်ႈမူႇၽုင် မုၵ်ႉၸိူဝ်းမၼ်း ၵႃႈမီးၼၼ်ႉပႅတ်ႈ မူတ်းမူတ်းသဵင်ႈသဵင်ႈတႃႉ။-

4ၼင်ႇၼၼ်လႄႈ ၶဝ်ၼၼ်ႉ တၵ်းလူမ်ႉတူၵ်းၵႃႈၼႂ်း မိူင်း ၶႃႇလတေး လႄႈ လႆႈၶၢမ်ႇတၢင်းဢၼ် တႅင်းသႂ်ႇၵႃႈၼႂ်း သဵၼ်ႈတၢင်းလူင်မၼ်း ၸိူဝ်းၼၼ်ႉဢေႃႈ။-

5ပိၵ်ႉသမ်ႉ မိူင်းတီႈယူႇမဵဝ်း ဢီႉသရေႇလႃႉ ဢိၵ်ႇတင်း မိူင်းတီႈယူႇမဵဝ်း ယူႉတႃႉ ၼၼ်ႉ မီးတဵမ်ဝႆႉတင်း ဢပႅတ်ႈဢၼ်ၽိတ်းပိူင်ႈ ၽြႃးဢၼ်မူတ်းၸၢင်ႇ မဵဝ်း ဢီႉသရေႇလႃႉ ၼၼ်ႉ သေၵေႃႈ ၽြႃးပဵၼ်ၸဝ်ႈၶဝ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ ဢမ်ႇၸုၼ်ႉပႅတ်ႈၶဝ်။-

6ဢွၼ်ၵၼ်ဢွၵ်ႇပၢႆႈ သေၵႃႈၼႂ်းဝဵင်း ပႃႇပူႉလုၼ်ႇ လႄႈ ၵႄႇသႄႇၼုၵ်ႈဢဝ်ဢသၢၵ်ႈတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းတႃႉ။ ယႃႇပေလေႃးလႄး လူၺ်ႈၵၼ်တင်းဢပႅတ်ႈမၼ်းသေလႄႈ ၶၢမ်ႇတၢင်းဢၼ်သုမ်းဢၼ်ၸွမ်း။ ၶိင်ႇၵႃႇလႃႉၼႆႉၸမ်ႉ၊ ပဵၼ်ၶိင်ႇၵႃႇလႃႉဢၼ် ထႃႇဝရႃႉၽြႃး ပၼ်တၢမ်ႇ ႁႂ်ႈတၢင်းၸႂ်မႆႈၶႆႈၸႃႉမၼ်းၸဝ်ႈ ပေႇလႄႈ မၼ်းၸဝ်ႈတၵ်းတွပ်ႇတႅၼ်းပၼ် ၸွမ်းၼင်ႇဢၵျူဝ်းဢပႅတ်ႈဢေႃႈ။-

7ဝဵင်း ပႃႇပူႉလုၼ်ႇ ပဵၼ်ၵွၵ်းၶမ်းဢၼ် ထႃႇဝရႃႉၽြႃး ယိပ်းၵမ်လႄႈ ႁႂ်ႈလိၼ်မိူင်း တင်းသဵင်ႈတင်းမူတ်း မဝ်းလဝ်ႈမဝ်းၵမ်ဢေႃႈ။ ၵူၼ်းၵူႈၸိူဝ်ႉၵူႈမဵဝ်း ဢွၼ်ၵၼ်သူတ်ႉၵိၼ် ၼမ်ႉၸပိတ်ႈ ဢၼ်ပႃးၵႃႈတီႈၵွၵ်းၼၼ်ႉလႄႈ ၵူၼ်းၵူႈၸိူဝ်ႉၵူႈမဵဝ်း ၸိူဝ်းၼၼ်ႉ ဢွၼ်ၵၼ် ပဵၼ်ၵူၼ်းယွင်ႇ ၵူၼ်းမႃႈၵႂႃႇဢေႃႈ။-

8ဝဵင်း ပႃႇပူႉလုၼ်ႇ ၶီႉၶႃႉလူမ်ႉပင်းၵမ်းလဵဝ်လႄႈ လူႉလႅဝ်ၵႂႃႇဢေႃႈ။ ဢွၼ်ၵၼ်ႁွင်ႉႁႆႈ ပွင်ႉၶၢင်းပုၼ်ႈမၼ်းတႃႉ။ ပေႃးတၢင်းၸဵပ်းမၼ်း ႁၢႆလႆႈၸိုင်၊ ဢွၼ်ၵၼ်ဢဝ်ယၢင် ပႃႇလၸမ်ႇ သႂ်ႇပၼ် ႁႂ်ႈႁၢႆတႃႉ။-

9ပိၵ်ႉသမ်ႉႁဝ်းႁဵတ်းႁႂ်ႈ တၢင်းၸဵပ်းဝဵင်း ပႃႇပူႉလုၼ်ႇ ႁၢႆသေၵေႃႈ တၢင်းၸဵပ်းမၼ်း ဢမ်ႇႁၢႆလႆႈ ဢွၼ်ၵၼ်ၸုၼ်ႉပႅတ်ႈမၼ်း သေလႄႈ ၵႂႃႇၵႃႈတီႈမိူင်းဢၼ်ႁဝ်းယူႇ ႁဝ်းသဝ်းၼၼ်ႉ ႁင်းၽႂ်ႁင်းမၼ်းတႃႉႁဝ်း။ ဢပႅတ်ႈဢၼ်မၼ်းလႆႈၶၢမ်ႇၼၼ်ႉ မီးတၢင်းဢၼ်ၽႅဝ် တေႃႇထိုင်ႁွတ်ႈ ၵၢင်ႁၢဝ်လႄႈ ၶိုၼ်ႈထိုင်ၽႃႈၽူၼ်ယူႇဢေႃႈ။-

10ထႃႇဝရႃႉၽြႃး ၽုၺ်ႇဢွၵ်ႇၼႄပျႃး တၢင်းဢၼ်ႁဝ်းသိုဝ်ႈတေႃႇ ၼၼ်ႉယဝ်ႉယဝ်ႉ။ မႃးမႃးဢိူၺ်း၊ ဢွၼ်ၵၼ်မွၵ်ႇလၢတ်ႈ လွင်ႈတၢင်းဢၼ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ၸီႇယၢင်ႇႁဵတ်းၼၼ်ႉ ၵႃႈၼႂ်းဝဵင်း ၸီႉဢုၼ်ႇ တႃႉႁဝ်း။-

11ဢွၼ်ၵၼ်လပ်ႉ သူၺ်း ပိုၼ် တင်းလၢႆတႃႉ။ ဢွၼ်ၵၼ်ယိပ်းၵမ် ၶိူင်ႈႁႄႉလၢၵ်ႈၼၢၵ်ႈတင်းလၢႆတႃႉ။ ထႃႇဝရႃႉၽြႃး တိုၵ်းယူင်းႁူဝ်ၸႂ် ၶုၼ်ႁေႃၶမ်း မေႇတီႉ ၸိူဝ်းၼၼ်ႉယဝ်ႉ။ မၼ်းၸဝ်ႈ မီးတၢင်းၵျၢမ်ႇတၢင်းပွင် ယူႇၽၢႆႇၼိုင်ႈတင်းဝဵင်း ပႃႇပူႉလုၼ်ႇ ႁႂ်ႈလႆႈယႃႉၽဵဝ်ႈမၼ်းပႅတ်ႈဢေႃႈ။ လွင်ႈမၼ်းၸမ်ႉ ပဵၼ်တၢင်းဢၼ် ထႃႇဝရႃႉၽြႃး ႁႂ်ႈတၢင်းၸႂ်မႆႈၶႆႈၸႃႉမၼ်းၸဝ်ႈပေႇ ဢိၵ်ႇတင်း တၢင်းဢၼ်ပၼ်တၢမ်ႇ ၸွမ်းၼင်ႇဢပႅတ်ႈ ဢၼ်ယႃႉပိၵ်ႈမၢၼ်ႇၸဝ်ႈ ပႅတ်ႈၼၼ်ႉဢေႃႈ။-

12ဢွၼ်ၵၼ် ပူၵ်းလၢမ်ႇ ၵႃႈတီႈၼိူဝ်လမ်းဝဵင်း ပႃႇပူႉလုၼ်ႇ တႃႉ။ ဢွၼ်ၵၼ်ႁႂ်ႈ မီးၵူၼ်းဢၼ်ပႂ်ႉၼမ်ၼမ်လႄႈ ဝႆႉၵူၼ်းဢၼ်လွမ်တူၺ်း သဵၼ်ႈတၢင်းတင်းလၢႆတႃႉ။ ဢွၼ်ၵၼ် ႁႅၼ်းတပ်ႉ သိုၵ်းမူၵ်းတင်းလၢႆတႃႉ။ ထႃႇဝရႃႉၽြႃး ၵျၢမ်ႇပွင်လႄႈ ႁဵတ်းၵႃႈဢၼ်မၼ်းၸဝ်ႈ ဢၢင်ႈတၵ်းႁဵတ်းတီႈဝဵင်း ပႃႇပူႉလုၼ်ႇ ၼၼ်ႉဝႆႉဢေႃႈ။-

13မႂ်းဢၼ်ယူႇၵႃႈတီႈႁိမ်းၼမ်ႉ ဢၼ်ၼမ်ႉၼမ်ၼႃႇလႄႈ ၸေးၸိမ်ႇယႂ်ႇၼႃႇၼႆႉဢိူၺ်း၊ ၶိင်ႇမိူဝ်ႈဢၼ်ပဵၼ်တီႈသုတ်းတီႈၵွႆမႂ်း။ ဢၼ်ဝႃႈ ၸူဝ်ႈတႃႇ တၢင်းဢၼ်တႅၵ်ႈ ဢၼ်ၶိုပ်ႈ လေႃးၽႃႉမႂ်းၼၼ်ႉ ႁွတ်ႈထိုင်ယဝ်ႉ။-

14ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ဢဝ်တူဝ်ၸဝ်ႈၵဝ်ႇ တိူင်ႇဝႃႈ ၵိၼ်ႇဝႃႈလႄႈ ဝႃႈၸမ်ႉ၊ ၵဝ်တၵ်းႁႂ်ႈမႂ်း မီးတဵမ်ဝႆႉ တင်းၵူၼ်း ၼမ်ၼႃႇ မိူၼ်ၸိူဝ်ႉၼင်ႇ ဢၼ်ႁႂ်ႈမီးတဵမ်ဝႆႉတင်း မႅင်းၵႅင်းၼၼ်ႉလႄႈ ၶဝ်ၼၼ်ႉတၵ်းၵိဝ်သဵင် ဢၼ်ပၢဝ်ႇသေႃႇ ယူႇၽၢႆႇၼိုင်ႈ တင်းမႂ်းဢေႃႈ။

15မၼ်းၸဝ်ႈ ဢဝ်တၼ်းၶူဝ်းၸဝ်ႈ ႁဵတ်းပဵၼ်လိၼ်မိူင်းယဝ်ႉ။ မၼ်းၸဝ်ႈ ဢဝ်ပိင်ႇၺႃႇၸဝ်ႈ တႄႇႁဵတ်းလေႃးၵထၢတ်ႈယဝ်ႉ။ မၼ်းၸဝ်ႈဢဝ်ၺၢၼ်ႇၸဝ်ႈ ၶဵင်ႈမုင်းၽႃႉၵၢင်ႁၢဝ်ယဝ်ႉ။-

16ယၢမ်းမိူဝ်ႈဢၼ် မၼ်းၸဝ်ႈပွႆႇသဵင်မၼ်းၸဝ်ႈ ၼၼ်ႉၸိုင် ၸၢင်ႈပဵၼ်ၼမ်ႉၽူၼ် ၼမ်ၵိုၼ်းၼႃႇလူင်လၢင် ၵႃႈၼိူဝ်ၽႃႉၵၢင်ႁၢဝ်လႄႈ မၼ်းၸဝ်ႈႁႂ်ႈၽႃႈၽူၼ် လုၵ်ႉသေၵႃႈတီႈ ႁိမ်းလႅၼ်သုတ်းလိၼ်မိူင်း ၶိုၼ်ႈဢေႃႈ။ မၼ်းၸဝ်ႈ ႁႂ်ႈၽူၼ်တူၵ်းလႄႈ ၽႃႉမႅပ်ႈဢေႃႈ။ လူမ်းၵေႃႈမၼ်းၸဝ်ႈ ဢဝ်ဢွၵ်ႇၵႃႈၼႂ်းတိူၵ်ႈၽၼ်ႇတႃႇ မၼ်းၸဝ်ႈမႃးဢေႃႈ။-

17ၵူၼ်းၸမ်ႉ၊ ပဵၼ်ၸိူဝ်ႉၼင်ႇ တရိၵ်ႈသၢၼ်ႇလႄႈ ဢမ်ႇမီးၺၢၼ်ႇလႃးလႃး။ ၸၢင်ႈၶမ်းၵူႈၵေႃႉၵူႈၵူၼ်း မီးတၢင်းဢၼ်ဢူၵ်းဢၼ်ဢၢႆ ၵွပ်ႈပိူဝ်ႈရုၵ်ႈထူႉ ဢၼ်တူဝ်ၸဝ်ႈၵဝ်ႇႁဵတ်းၼၼ်ႉယူႇဢေႃႈ။ လွင်ႈမၼ်းၸမ်ႉ ရုၵ်ႈထူႉဢၼ်မၼ်းသွၼ်းလေႃႇႁဵတ်းၼၼ်ႉ ပဵၼ်မူႉသႃႇဢေႃႈ။ ဢမ်ႇမီးတၢင်းဢၼ်ထူၺ်ႈၸႂ်ၶဝ်ႈ ထူၺ်ႈၸႂ်ဢွၵ်ႇ ၵႃႈၼႂ်းမၼ်း။-

18ဢၼ်ၸိူဝ်ႉၼင်ႇၼၼ် ၸိူဝ်းၼၼ်ႉ ပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ဢေႃႈ။ ပဵၼ်ၶိူင်ႈပိူင်ဢၼ် ၸၢင်ႈပႅတ်ႉၸၢင်ႈလႅၼ်ၵူၺ်းၵူၺ်းဢေႃႈ။ ၼႂ်းၶိင်ႇမိူဝ်ႈဢၼ်လႆႈၶၢမ်ႇ တၢင်းဢၼ်ၸႅတ်ႈထၢမ်ၼၼ်ႉ၊ ၶဝ်တၵ်းမီးတၢင်းဢၼ် လပ်ႉႁၢႆၵႂႃႇဢေႃႈ။-

19ပုၼ်ႈတႃႇမဵဝ်း ယႃႇၵုပ်ႈ ၸမ်ႉ၊ ဢမ်ႇမိူၼ်ၵၼ်တင်းဢၼ်ၸိူဝ်းၼၼ်ႉ။ လွင်ႈမၼ်းၸမ်ႉ မၼ်းၸဝ်ႈပဵၼ်ၸဝ်ႈဢၼ် ႁဵတ်းပဵၼ်လွင်ႈတၢင်း ၵူႈၸိူဝ်ႉၵူႈပိူင်ဢေႃႈ။ မဵဝ်း ဢီႉသရေႇလႃႉ ပဵၼ်ၶွၼ်ႉဢၼ်တႅၵ်ႈ ဢၼ်ၶိုပ်ႈ တီႈဢၼ်မၼ်းၸဝ်ႈၼၼ်ႉ ၶၢမ်ႇဢမူၺ်ႇဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉ ပဵၼ်ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးဢေႃႈ။

20မႂ်းၼႆႉပဵၼ် ၶွၼ်ႉလဵၵ်းလူင်၊ လၢၵ်ႈၼၢၵ်ႈ ပုၼ်ႈဢၼ်ၵဝ် တၵ်းဢဝ်တိုၵ်းသိုၵ်းဢေႃႈ။ ၵဝ်ယိပ်းၵမ်ဢဝ်မႂ်း သေလႄႈ ႁၵ်းႁဵၵ်းၵူၼ်း ၵူႈၸိူဝ်ႉၵူႈမဵဝ်း ပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်း သေလႄႈ ယႃႉၽဵဝ်ႈသိုင်ႇၸိုင်ႈဝၢၼ်ႈမိူင်း တင်းလၢႆပႅတ်ႈယဝ်ႉ။-

21ၵဝ်ယိပ်းၵမ်ဢဝ်မႂ်း သေလႄႈ ႁၵ်းႁဵၵ်းမႃႉ ဢိၵ်ႇတင်း ၵူၼ်းသိုၵ်းၶီႇမႃႉ တင်းလၢႆပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈ ႁၵ်းႁဵၵ်းလေႃႉရထႃး ဢိၵ်ႇတင်း ၵူၼ်းသိုၵ်းၶီႇလေႃႉရထႃး တင်းလၢႆပႅတ်ႈယဝ်ႉ။-

22ၵဝ်ယိပ်းၵမ်ဢဝ်မႂ်းသေလႄႈ ႁၵ်းႁဵၵ်းၵူၼ်းၸၢႆး ဢိၵ်ႇတင်း ၵူၼ်းယိင်းပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်း သေလႄႈ ႁၵ်းႁဵၵ်းၵေႃႉဢၼ် ဢသၢၵ်ႈယႂ်ႇ ဢိၵ်ႇတင်း ၵေႃႉဢၼ် ဢသၢၵ်ႈလဵၵ်ႉ ပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈ ႁၵ်းႁဵၵ်းၽူႈမၢဝ်ႇ ဢိၵ်ႇတင်း ၽူႈသၢဝ်ပႅတ်ႈယဝ်ႉ။-

23ၵဝ်ယိပ်းၵမ်ဢဝ်မႂ်း သေလႄႈ ႁၵ်းႁဵၵ်းၵေႃႉဢၼ် လဵင်ႉသူဝ်းထိင်းသူဝ်း ဢိၵ်ႇတင်း ၽုင်သူဝ်းမၼ်းပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈ ႁၵ်းႁဵၵ်းၵေႃႉဢၼ်ႁဵတ်းၼႃး ဢိၵ်ႇတင်း ၵူပ်ႉဝူဝ်းၵူႈဝူဝ်းမၼ်း ပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈ ႁၵ်းႁဵၵ်းပူဝ်ႇ တင်းလၢႆ ဢိၵ်ႇတင်း ၶုၼ်တင်းလၢႆပႅတ်ႈယဝ်ႉ။

24ၼႂ်းဝႃႈၼၼ်သေၵေႃႈ ၵဝ်တၵ်းပၼ်ဢပႅတ်ႈတီႈဝဵင်း ပႃႇပူႉလုၼ်ႇ ဢိၵ်ႇတင်း ၵူၼ်းမိူင်း ၶႃႇလတေး တင်းသဵင်ႈတင်းလူင် ၸွမ်းၵႃႈၼင်ႇဢၼ် တူႉၸရိူၵ်ႈ ၵႃႈဢၼ်ၶဝ်ႁဵတ်း တီႈဝဵင်း ၸီႉဢုၼ်ႇ ၼၼ်ႉ သိုဝ်ႈၼႃႈတႂ်ႈတႃသူဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

25ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး၊ လွႆလူင်ဢၼ်မီးသၽေႃး ဢၼ်ၸၢင်ႈယႃႉပႅတ်ႈလႄႈ ၸၢင်ႈယႃႉၽဵဝ်ႈ လိၼ်မိူင်းတင်းသဵင်ႈတင်းမူတ်း ပႅတ်ႈၼႆႉဢိူၺ်း၊ ၵဝ်ယူႇၽၢႆႇၼိုင်ႈတင်းမႂ်းဢေႃႈ။ ၵဝ်တၵ်းယဵတ်ႇမိုဝ်း ယိုၼ်းမိုဝ်းၵဝ် ၵႃႈၼိူဝ်မႂ်းသေလႄႈ ဢဝ်မႂ်းၵိင်ႈတူၵ်းသေ ၵႃႈၼိူဝ်မၢၵ်ႇႁိၼ် မၢၵ်ႇၽႃၸိူဝ်းၼၼ်ႉလႄႈ ႁႂ်ႈပဵၼ်လွႆ ဢၼ်မႆႈသုတ်းလူၺ်ႈၽႆးဢေႃႈ။-

26ၶဝ်ဢမ်ႇလႆႈၼုၵ်ႈ လႆႈဢဝ် မၢၵ်ႇႁိၼ်ႁူဝ်ၸဵင်ႇတိူၵ်ႈ၊ မၢၵ်ႇႁိၼ်ငဝ်ႈႁၢၵ်ႈတိူၵ်ႈ သေၸိူဝ်ႉသေဢၼ် ၵႃႈတီႈမႂ်း။ မႂ်းတၵ်းလႆႈလူႉလႅဝ်ယူႇ သေႇသေႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

27ဢွၼ်ၵၼ်ပူၵ်းလၢမ်ႇ ၵႃႈၼႂ်းမိူင်းၼၼ်ႉတႃႉ။ ဢွၼ်ၵၼ်ပဝ်ႇၼႄးၶရႃႇ ၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်းလႄႈ မႄးႁႅၼ်းၵူၼ်းၵူႈၸိူဝ်ႉၵူႈမဵဝ်း ယူႇၽၢႆႇၼိုင်ႈ တင်းမၼ်းတႃႉ။ ဢွၼ်ၵၼ်ႁႂ်ႈမိူင်း ဢႃႇရရတ်ႉ ၊ မိူင်း မိၼ်ႇၼီႉ ၊ မိူင်း ဢႃႇသၵေႇၼတ်ႉ ၸိူဝ်းၼၼ်ႉၸူႉၵၼ်တုမ်ၵၼ် ယူႇၽၢႆႇၼိုင်ႈ တင်းမၼ်းၼၼ်ႉတႃႉ။ ဢွၼ်ၵၼ်ၶၢၼ်း ၶုၼ်ပူဝ်ႇၶျုၵ်ႈဝႆႉ ၽၢႆႇၼိုင်ႈ တင်းမၼ်းလႄႈ ႁႂ်ႈႁူဝ်ႁၢၼ်ၵူၼ်းသိုၵ်းၶီႇမႃႉ တင်းလၢႆ ၶီႇသိုၵ်းမႃး မိူၼ်ၸိူဝ်ႉၼင်ႇ မႅင်းၵႅင်း ဢၼ်ၶူၼ်ၵျၢမ်းၼႃႇ ၸိူဝ်းၼၼ်ႉတႃႉ။-

28ဢွၼ်ၵၼ်မႄးႁႅၼ်း မဵဝ်းၵူၼ်းတင်းလၢႆ ဢိၵ်ႇတင်း ၶုၼ်ႁေႃၶမ်း မေႇတီႉ တင်းလၢႆ၊ ပူဝ်ႇမၼ်းတင်းလၢႆ၊ ၶုၼ်မၼ်းတင်းလၢႆ၊ ၵူၼ်းသိုင်ႇၵူၼ်းမိူင်းမၼ်း တင်းသဵင်ႈတင်းလူင် ယူႇၽၢႆႇၼိုင်ႈတင်းမၼ်းၼၼ်ႉတႃႉ။-

29မိူင်းၼၼ်ႉတၵ်းသၼ်ႇဝႆလႄႈ ၸဵပ်းၶိုၼ်ႈဢေႃႈ။ တၢင်းၵျၢမ်ႇတၢင်းပွင်ၵႃႈဢၼ် ထႃႇဝရႃႉၽြႃး ၵျၢမ်ႇပွင်ယူႇၽၢႆႇၼိုင်ႈ တင်းမိူင်း ပႃႇပူႉလုၼ်ႇ ႁႂ်ႈမိူင်း ပႃႇပူႉလုၼ်ႇ လႆႈပဵၼ်တီႈဢၼ်ပဝ်ႇဢၼ်လၢပ်ႈ၊ တီႈဢၼ်ဢမ်ႇမီး ၵေႃႉဢၼ်ယူႇ ဢၼ်သဝ်းၼၼ်ႉ တၵ်းလႆႈပျေႉၸုမ်ႇဢေႃႈ။-

30ႁူဝ်ႁၢၼ်ၵူၼ်းသိုၵ်း ပႃႇပူႉလုၼ်ႇ ၸိူဝ်းၼၼ်ႉ ယင်းဢမ်ႇၶေႉၶဵင်ႇသိုၵ်းလႄႈ ဢွၼ်ၵၼ်ယူႇၵႃႈၼႂ်းတိူၵ်ႈ တီႈတိုၵ်းသိုၵ်းၶဝ်ဢေႃႈ။ ႁႅင်းၶဝ်ဢူၼ်ႈၵႂႃႇ ယွမ်းၵႂႃႇလႄႈ ၶဝ်ပဵၼ်ၸိူဝ်ႉၼင်ႇ မႄႈယိင်းၵႂႃႇဢေႃႈ။ ႁိူၼ်းတီႈယူႇၵူၼ်းမၼ်းတင်းလၢႆ လႆႈၶၢမ်ႇတၢင်းဢၼ်ဢဝ်ၽႆးတုတ်ႇပႅတ်ႈလႄႈ ၵိူၼ်ႇၽၵ်းတူမၼ်းတင်းလၢႆ လႆႈၶၢမ်ႇတၢင်းဢၼ် ႁၵ်းႁဵၵ်းပႅတ်ႈဢေႃႈ။-

31ၵူၼ်းဢွၼ်ႇၶုၼ် ၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈ ႁူပ်ႉထူပ်းၵၼ်ယူႇ၊ ၶဝ်ၸိူဝ်းဢၼ်ၶၢမ်ႇ တၢင်းဢၼ်ပွႆႇၸႂ်ႉ ၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈ ႁူပ်ႉထူပ်းၵၼ်ယူႇ သေလႄႈ ဢွၼ်ၵၼ်ၶုၼ်ႇလႅၼ်ႈ ႁႂ်ႈလႆႈလဝ်ႊလၢတ်ႈတီႈ ၶုၼ်ႁေႃၶမ်း ပႃႇပူႉလုၼ်ႇ လူၺ်ႈလွင်ႈ ဢၼ်ရၢၼ်ႇသူႇတိုၵ်းတေႃး သိမ်းဢဝ်ဝဵင်းၸဝ်ႈ ၵူႈတီႈၵူႈလႅၼ်ယဝ်ႉ၊-

32ဢိၵ်ႇတင်း လွင်ႈဢၼ်သူပ်းတၢင်း တင်းလၢႆ လႆႈၶၢမ်ႇတၢင်းဢၼ် ဢိုတ်းဝႆႉလႄႈ ၵႃႈတီႈႁိမ်းၼမ်ႉ ႁိမ်းၼွင်လႆႈၶၢမ်ႇ တၢင်းဢၼ်ၽႆးမႆႈ တင်းလွင်ႈဢၼ် ႁူဝ်ႁၢၼ်ၵူၼ်းသိုၵ်း တင်းလၢႆ လႆႈမီးတၢင်းဢၼ် တူၵ်းၸႂ်ၵူဝ်ႁႄ ယူႇၼၼ်ႉဢေႃႈ။-

33ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးမဵဝ်း ဢီႉသရေႇလႃႉ မီးဢမိင်ႉၸမ်ႉ၊ လုၵ်ႈယိင်း ပႃႇပူႉလုၼ်ႇ ၼၼ်ႉ ပဵၼ်ၸိူဝ်ႉၼင်ႇတလၢင်းယဵပ်ႇၶဝ်ႈ ၼႂ်းၶိင်ႇမိူဝ်ႈဢၼ် လႆႈယဵပ်ႇၼူတ်ႈၶဝ်ႈၼၼ်ႉဢေႃႈ။ ထႅင်ႈၵႅပ်ႉဢွၼ်ႇ ၵမ်းဢွၼ်ႇၼိုင်ႈ ၶိင်ႇမိူဝ်ႈဢၼ် ပၢတ်ႇၶဝ်ႈမၼ်းၼၼ်ႉ တၵ်းႁွတ်ႈထိုင်ဢေႃႈ။-

34ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ ၶူပ်းၵိၼ်ႁဝ်းလႄႈ ၶိုတ်ႈႁဝ်းလႅဝ်ပႅတ်ႈယဝ်ႉ။ မၼ်းႁႂ်ႈႁဝ်းပဵၼ်မေႃႈဢၼ်ပဝ်ႇၵူင်ဝႆႉယဝ်ႉ။ မၼ်းဢိုၼ်ၵိၼ်ႁဝ်း မိူၼ်ၸိူဝ်ႉၼင်ႇဢၼ် ၼၵႃးၸၢင်ႈဢိုၼ်ၼၼ်ႉလႄႈ ဢဝ်လွင်ႈတၢင်းဢၼ်ႁဝ်း လီမူၼ်ႈပျေႃႇ ၸိူဝ်းၼၼ်ႉ သတ်ႉတဵမ်ၵႃႈၼႂ်း တွင်ႉတူဝ်မၼ်းဝႆႉယဝ်ႉ။ မၼ်းႁေႃႈႁဝ်းဢွၵ်ႇပႅတ်ႈယဝ်ႉ။-

35လုၵ်ႈယိင်းဝဵင်း ၸီႉဢုၼ်ႇ တၵ်းလၢတ်ႈလႄႈဝႃႈ၊ ႁႂ်ႈဢမူႉဢႃႉထမ်ႇမႃႉ ဢၼ်ႁဵတ်းတီႈတူဝ်ၶိင်းၵဝ် ဢိၵ်ႇတင်းတီႈၼိူဝ်ႉၵဝ်ၼင်ၵဝ်ၼၼ်ႉ ႁွတ်ႈထိုင် ၵႃႈၼိူဝ်ဝဵင်း ပႃႇပူႉလုၼ်ႇ သေၵမ်းလူၺ်ႈ၊ ဝႃႈၼင်ႇၼႆဢေႃႈ။ ဝဵင်း ယေႇရူႉသလႅမ်ႇ ၵေႃႈ တၵ်းလၢတ်ႈလႄႈဝႃႈ၊ ႁႂ်ႈလိူတ်ႈၵဝ် ႁွတ်ႈထိုင် ၵႃႈၼိူဝ်ၵူၼ်းမိူင်း ၶႃႇလတေး တင်းလၢႆသေၵမ်းလူၺ်ႈ၊ ဝႃႈၼင်ႇၼႆဢေႃႈ။

36ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းပႂ်ႉဢမူႉမႂ်းယူႇလႄႈ တွပ်ႇတႅၼ်းၶိုၼ်းဢပႅတ်ႈ ဢၼ်မႂ်းလႆႈၶၢမ်ႇၼၼ်ႉဢေႃႈ။ ၵဝ်တၵ်းႁႂ်ႈပၢင်ႇလၢႆႇမၼ်း ႁႅင်ႈယူတ်းလႄႈ ႁႂ်ႈၼမ်ႉဢွၵ်ႇႁူးမၼ်း ႁႅင်ႈႁွင်ၵႂႃႇဢေႃႈ။-

37ဝဵင်း ပႃႇပူႉလုၼ်ႇ ၼၼ်ႉ တၵ်းပဵၼ်ၵွင်ၽုၼ်ႇ ၵွင်လိၼ် တီႈဢၼ်မႃလိၼ်ယူႇ၊ တီႈဢၼ်လီဢၢမ်း၊ တီႈဢၼ်ႁဵတ်းသဵင် သီႉသီႉသေႃႉသေႃႉ သႄႉသွမ်း၊ တီႈဢၼ်ဢမ်ႇမီးၵေႃႉဢၼ်ယူႇ ဢၼ်သဝ်းဢေႃႈ။-

38ထႃႇဝရႃႉၽြႃး မီးဢမိင်ႉၸမ်ႉ၊ ၶဝ်ၼၼ်ႉ တၵ်းၽွမ်ႉၵၼ်ႁဵတ်းသဵင် ဢၼ်ႁွင်ႉၶၢင်းၸိူဝ်ႉၼင်ႇ သၢင်ႇသီႈ၊ သဵင်ဢၼ်ႁွင်ႉသႅၼ်ႇ ၸိူဝ်ႉၼင်ႇသၢင်ႇသီႈဢွၼ်ႇဢေႃႈ။-

39မိူဝ်ႈဢၼ် ၶဝ်မီးတၢင်းဢၼ်ၸႂ် ႁႅင်းယႂ်ႇၼႃႇလူင်လၢင်ၼၼ်ႉ၊ ၵဝ်တၵ်းဢဝ် တၢင်းၵိၼ်တိုၵ်းပၼ် ဢွႆႇပၼ်လႄႈ ႁႂ်ႈၶဝ်မဝ်းလဝ်ႈမဝ်းၵမ်ယူႇ လွင်ႈၼင်ႇႁိုဝ် ၶဝ်တၵ်းမူၼ်ႈပျေႃႇလႄႈ ၵမ်းလိုၼ်း ၶဝ်ယင်းဢမ်ႇတိုၼ်ႇလႄႈ တၵ်းၼွၼ်းလပ်းယူႇ သေႇသေႇဢေႃႈ။-

40ၵဝ်တၵ်းတိုတ်ႉၸၼ်ဢဝ်ၶဝ် ၶျႃးတူၵ်းမိူၼ်ၸိူဝ်ႉၼင်ႇ သူဝ်းဢွၼ်ႇ၊ သူဝ်းပေႃႈ၊ ပႄႉပေႃႈၸိူဝ်းၼၼ်ႉ ၸူးတီႈဢၼ် ဢဝ်တၢႆၼၼ်ႉဢေႃႈ။

41ဝဵင်း သေးသိၵ်ႉ လႆႈၶၢမ်ႇတၢင်းဢၼ် တိုတ်ႉဢဝ် သိမ်းဢဝ်ယဝ်ႉ လူင်ပႄႇ။ ဝဵင်းဢၼ်ႁူင်ႁၢင်း ၵႃႈၼိူဝ်ၼႃႈလိၼ်မိူင်း တင်းသဵင်ႈတင်းမူတ်းၼၼ်ႉ လႆႈၶၢမ်ႇတၢင်းဢၼ် ႁိမ်ဢဝ်ႁူင်ႇဢဝ်ယဝ်ႉလူင်ပႄႇ။ ဝဵင်း ပႃႇပူႉလုၼ်ႇ ၼၼ်ႉ ပဵၼ်တီႈဢၼ်လီဢၢမ်း ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းယဝ်ႉ လူင်ပႄႇ။-

42ပၢင်ႇလၢႆႇၶိုၼ်ႈၵႃႈၼိူဝ်ဝဵင်း ပႃႇပူႉလုၼ်ႇ လႄႈ မၼ်းလႆႈၶၢမ်ႇတၢင်းဢၼ် လႅင်းၼမ်ႉပိူပ်ႈၼမ်ႉဢၼ်ၼမ်ၼႃႇၼၼ်ႉ ႁူမ်ႇသုမ်ႇယဝ်ႉလူင်ပႄႇ။-

43ဝဵင်းမၼ်းတင်းလၢႆပဵၼ်တီႈဢၼ်လီဢၢမ်း၊ လိၼ်ဢၼ်ႁႅင်ႈဢၼ်ႁွင်၊ ပၢင်ႇပဵင်းတီႈဢၼ်ၸုၼ်ႉပႅတ်ႈ၊ မိူင်းဢၼ်ၽူႈလႂ် သေၵေႃႉသေၵူၼ်း ဢမ်ႇယူႇဢမ်ႇသဝ်းလႄႈ လုၵ်ႈၵူၼ်းသေၵေႃႉသေၵူၼ်း ဢမ်ႇတႆႇတၢင်းပႆတၢင်း ၵၢႆၵႂႃႇၵႃႈႁိမ်းမၼ်းၼၼ်ႉယဝ်ႉ။-

44ၵဝ်တၵ်းပၼ်တၢမ်ႇတီႈၽြႃး ပေႇလႃႉ ၵႃႈၼႂ်းဝဵင်း ပႃႇပူႉလုၼ်ႇ ၼၼ်ႉလႄႈ ၵဝ်တၵ်းႁႂ်ႈမၼ်းသမ်ႉၶိုၼ်းႁၢၵ်ႈ လွင်ႈတၢင်းဢၼ် မၼ်းဢိုၼ်ၵိၼ်ၼၼ်ႉ ဢွၵ်ႇဢေႃႈ။ ၵမ်းလိုၼ်း ၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉ ဢမ်ႇလႆႈဢွၼ်ၵၼ် ၸူႉၵၼ်တုမ်ၵၼ် ၵႃႈတီႈမၼ်း။ လမ်းဝဵင်း ပႃႇပူႉလုၼ်ႇ ၵေႃႈ တၵ်းမီးတၢင်းဢၼ်လူမ်ႉပင်းဢေႃႈ။-

45ၵူၼ်းၵဝ်တင်းလၢႆၶဝ်ဢိူၺ်း၊ ဢွၼ်ၵၼ်ဢွၵ်ႇသေၵႃႈၼႂ်းမၼ်းလႄႈ ၵႄႇသႄႇၼုၵ်ႈဢဝ် တူဝ်ၸဝ်ႈၵဝ်ႇသေၵႃႈတီႈ တၢင်းၸႂ်မႆႈၶႆႈၸႃႉ ထႃႇဝရႃႉၽြႃး ဢၼ်ႁႅင်းယႂ်ႇၼႃႇၼၼ်ႉ ႁင်းၽႂ်ႁင်းမၼ်းတႃႉ။-

46ယႃႇပေ ဢွၼ်ၵၼ်မီး တၢင်းဢၼ်ၸႂ်လူႉ။ ယႃႇပေၵူဝ်ပေႁႄ ၵွပ်ႈပိူဝ်ႈသတၢင်းသဵင်ၶၢဝ်ႇ ဢၼ်လႆႈငိၼ်းၵႃႈၼႂ်းမိူင်းၼၼ်ႉၼၼ်ႉ။ သတၢင်းသဵင်ၶၢဝ်ႇ တၵ်းငိၼ်းမႃးၼႂ်းပီႊၼႆႉလႄႈ သတၢင်းသဵင်ၶၢဝ်ႇ တၵ်းငိၼ်းမႃးထႅင်ႈ ၼႂ်းပီႊၼႃႈဢေႃႈ။ တၵ်းလႆႈမီးတၢင်းဢၼ် ၼိၵ်ႈၸၢၵ်ႈငႅၼ်းသႄး ၵႃႈတီႈမိူင်းၼၼ်ႉလႄႈ ၶုၼ်ၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈ တၵ်းလႆႈႁိမ်ဢဝ်ၵၼ်ဢေႃႈ။-

47ပိူဝ်ႈၼႆလႄႈ ၶိင်ႇၵႃႇလႃႉ မိုဝ်ႉဝၼ်းဢၼ်ၵဝ် တၵ်းပၼ်တၢမ်ႇ တီႈရုၵ်ႈထူႉသၢင်းထူႉ ဢၼ်တွင်ႈႁဵတ်းၵႃႈတီႈဝဵင်း ပႃႇပူႉလုၼ်ႇ ၸိူဝ်းၼၼ်ႉလႄႈ မိူင်းတင်းမိူင်းတၵ်းဢူၵ်းဢၢႆလႄႈ ႁူဝ်ႁၢၼ်ၵူၼ်းသိုၵ်းမၼ်းတင်းလၢႆ တၵ်းဢွၼ်ၵၼ်လူမ်ႉလႄႈ တၢႆယူႇၵႃႈၼႂ်းမၼ်း ၼၼ်ႉၼၼ်ႉ တၵ်းႁွတ်ႈထိုင်ဢေႃႈ။-

48မိူဝ်ႈၼၼ်ႉ ၽႃႉၵၢင်ႁၢဝ် ဢိၵ်ႇတင်းလိၼ်မိူင်း တင်းၵႃႈဢၼ်မီး ၵႃႈၼႂ်းမၼ်းၼၼ်ႉ တၵ်းဢွၼ်ၵၼ်ႁဵတ်း သဵင်ဢၼ်သႂၢင်ႇသိူဝ်း လူၺ်ႈလွင်ႈဝဵင်း ပႃႇပူႉလုၼ်ႇ ဢေႃႈ။ လွင်ႈမၼ်းၸမ်ႉ ၶဝ်ၸိူဝ်းဢၼ်ႁိမ်ဢဝ်ႁူင်ႇဢဝ်ၼၼ်ႉ တၵ်းလုၵ်ႉသေၵႃႈတီႈ ၼႃႈတၢင်းႁွင်ႇမႃးဢေႃႈ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

49ႁူဝ်ႁၢၼ်ၵူၼ်းသိုၵ်း ၵူၼ်းမဵဝ်း ဢီႉသရေႇလႃႉ ဢၼ်လူမ်ႉလႄႈတၢႆ ၶဝ်ဢိူၺ်း၊ ဝဵင်း ပႃႇပူႉလုၼ်ႇ တၵ်းလူမ်ႉတူၵ်းဢေႃႈ။ ႁူဝ်ႁၢၼ် ၵူၼ်းသိုၵ်း ၵူၼ်းၵူႈဝၢၼ်ႈၵူႈမိူင်း ဢၼ်လူမ်ႉလႄႈတၢႆၶဝ်ဢိူၺ်း၊ ႁူဝ်ႁၢၼ်ၵူၼ်းသိုၵ်းဝဵင်း ပႃႇပူႉလုၼ်ႇ တင်းလၢႆ တၵ်းလူမ်ႉတၢႆဢေႃႈ။

50သူၸိူဝ်းဢၼ် ၵၢင်းလွတ်ႈတင်း ၽေးလၢပ်ႇၽေးလႅဝ်း ၶဝ်ဢိူၺ်း၊ ဢွၼ်ၵၼ်ၵႂႃႇတႃႉ။ ယႃႇပေဢွၼ်ၵၼ် ၵိုတ်းသဝ်းယူႇ၊ ၶုၵ်းၸႂ်လႆႈၶႆႈၸႂ်ထူပ်း ထႃႇဝရႃႉၽြႃး ၼႂ်းတီႈဢၼ်ၵႆၼၼ်ႉလႄႈ ဝဵင်း ယေႇရူႉသလႅမ်ႇ ၵေႃႈ မၢတ်ႈတွင်းဝႆႉတႃႉ။-

51ႁဝ်းဢွၼ်ၵၼ် ဢူၵ်းဢၢႆယူႇ ၵွပ်ႈပိူဝ်ႈဢၼ်ႁဝ်း ငိၼ်းသဵင်ဢၼ် သႄႉသွမ်းၼၼ်ႉလႄႈ ၼႃႈႁဝ်းလူႉယူႇဢေႃႈ။ ၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆ ဢွၼ်ၵၼ် ၶဝ်ႈၵႃႈၼႂ်းထႃႇၼႃႉ တီႈမူတ်းၸၢင်ႇၸဝ်ႈ ၵႃႈၼႂ်းႁိူၼ်း ထႃႇဝရႃႉၽြႃး ယဝ်ႉယဝ်ႉ။-

52ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ ၶိင်ႇၵႃႇလႃႉမိုဝ်ႉဝၼ်းဢၼ် ၵဝ်တၵ်းပၼ်တၢမ်ႇ တီႈရုၵ်ႈထူႉသၢင်းထူႉမၼ်းၼၼ်ႉလႄႈ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇ ၵႃႈၼႂ်းမိူင်းမၼ်းတင်းမိူင်းၼၼ်ႉ တၵ်းဢွၼ်ၵၼ် ၶၢင်းၶီၶၢင်းၽၢၼ်ယူႇၼၼ်ႉ တၵ်းႁွတ်ႈထိုင်ဢေႃႈ။-

53ပိၵ်ႉသမ်ႉ ဝဵင်း ပႃႇပူႉလုၼ်ႇ ၶိုၼ်ႈထိုင်ၵႃႈၼိူဝ် ၽႃႉၵၢင်ႁၢဝ်လႄႈ တႄႇႁဵတ်းၸိၵ်းၸွမ် လမ်းဝဵင်း ဢၼ်မၼ်ႈဢၼ်ၶိူင်ႇဝႆႉ သေၵေႃႈ၊ ၶဝ်ၸိူဝ်းဢၼ် ၵဝ်ပွႆႇၸႂ်ႉလႄႈ ႁိမ်ဢဝ်ႁူင်ႇဢဝ်ၸိူဝ်းၼၼ်ႉ တၵ်းဢွၼ်ၵၼ်ႁွတ်ႈထိုင် ၵႃႈတီႈမၼ်းဢေႃႈ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

54လႆႈငိၼ်းသဵင်ဢၼ်ႁႆႈႁွင်ႉ ၵႃႈတီႈဝဵင်း ပႃႇပူႉလုၼ်ႇ ဢိၵ်ႇတင်း သဵင်တၢင်းဢၼ်လူႉလႅဝ် ဢၼ်ႁႅင်းယႂ်ႇၼႃႇၵႃႈတီႈမိူင်း ၶႃႇလတေး ဢေႃႈ။-

55လွင်ႈမၼ်းၸမ်ႉ ထႃႇဝရႃႉၽြႃး ယႃႉၽဵဝ်ႈဝဵင်း ပႃႇပူႉလုၼ်ႇ ပႅတ်ႈလႄႈ ႁႂ်ႈသဵင်ဢၼ်ယႂ်ႇဢၼ်လူင် ဢၼ်မၼ်းၸၢင်ႈႁဵတ်းၼၼ်ႉ ထၢတ်ႇၵႂႃႇယဵၼ်ၵႂႃႇဢေႃႈ။ လႅင်းၼမ်ႉပိူပ်ႈၼမ်ႉမၼ်း ၸိူဝ်းၼၼ်ႉ လင်မေႃးယူႇႁိုင်းႁိုင်း မိူၼ်ၸိူဝ်ႉၼင်ႇၼမ်ႉ ဢၼ်ႁႅင်းယႂ်ႇၼႃႇၼၼ်ႉလႄႈ ၸၢင်ႈႁဵတ်းသဵင် ဢၼ်ယႂ်ႇဢၼ်လူင်ဢေႃႈ။-

56ၵေႃႉဢၼ် ႁိမ်ဢဝ်ႁူင်ႇဢဝ်ၼၼ်ႉ ႁွတ်ႈထိုင်ၵႃႈတီႈမၼ်းဢၼ်ဝႃႈ ဝဵင်း ပႃႇပူႉလုၼ်ႇ ၼၼ်ႉလႄႈ ႁူဝ်ႁၢၼ်ၵူၼ်းသိုၵ်းမၼ်း ၸိူဝ်းၼၼ်ႉ လႆႈၶၢမ်ႇတၢင်းဢၼ်ရၢၼ်ႇသူႇတီႉလႆႈလႄႈ ၵၢင်ႇဢၼ်ၶဝ်ယိပ်းၵမ်ၸိူဝ်းၼၼ်ႉ လႆႈၶၢမ်ႇတၢင်းဢၼ် ႁၵ်းႁဵၵ်းပႅတ်ႈဢေႃႈ။ ထႃႇဝရႃႉၽြႃး ပဵၼ်ၽြႃးဢၼ်ၸၢင်ႈပၼ် ဢၵျူဝ်းဢပႅတ်ႈလႄႈ မၼ်းၸဝ်ႈတၵ်းတွပ်ႇတႅၼ်းပၼ် ဢမၢၼ်ႇၶၼ်ပဵၼ်ဢေႃႈ။-

57ၵဝ်တၵ်းႁႂ်ႈၶုၼ်မၼ်း၊ မူးမၢတ်ႈၽွင်းမိူင်းမၼ်း၊ ၶဝ်ၸိူဝ်းဢၼ် မီးပိင်ႇၺႃႇမၼ်း၊ ၶုၼ်ဢၼ်မီးဢရႃႇမၼ်း၊ ပူဝ်ႇၶျုၵ်ႈမၼ်း၊ ၵူၼ်းဢၼ်ႁႅင်းယႂ်ႇၼႃႇမၼ်းၼၼ်ႉ ၸိူဝ်းၼၼ်ႉ မဝ်းလဝ်ႈမဝ်းၵမ်လႄႈ ၵမ်းလိုၼ်းၶဝ်ၼၼ်ႉ ယင်းဢမ်ႇတိုၼ်ႇလႄႈ တၵ်းလႆႈၼွၼ်းလပ်းယူႇသေႇသေႇဢေႃႈ၊ ဝႃႈၼင်ႇၼႆလႄႈ ၶုၼ်ႁေႃၶမ်း ဢၼ်မီးၼႃႇမႃႉ ၸိုဝ်ႈသဵင်လႄႈဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး၊ ဝႃႈၼင်ႇၼႆၼၼ်ႉ မီးဢမိင်ႉဢေႃႈ။-

58ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ လမ်းဝဵင်း ပႃႇပူႉလုၼ်ႇ ဢၼ်ၼႃၼႃႇ ယႂ်ႇၼႃႇ ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ၵိူၼ်ႇယႃႉပႅတ်ႈ မူတ်းမူတ်းသဵင်ႈသဵင်ႈလႄႈ ၽၵ်းတူမၼ်း ဢၼ်သုင်ၼႃႇလူင်လၢင်ၸိူဝ်းၼၼ်ႉ တၵ်းလႆႈ ၶၢမ်ႇတၢင်းဢၼ် ဢဝ်ၽႆးတုတ်ႇပႅတ်ႈဢေႃႈ။ မဵဝ်းၵူၼ်းတင်းလၢႆ တၵ်းလႆႈဢွၼ်ၵၼ်သၢင်ႈႁဵတ်း ပုၼ်ႈဢၼ်တၵ်းပဵၼ်ဢၼ်လၢႆလၢႆ ဢမ်ႇပွင်ႇလွင်ႈ ၵႃႈသင်လႄႈ ၵူၼ်းၵူႈၸိူဝ်ႉၵူႈမဵဝ်း တၵ်းလႆႈဢွၼ်ၵၼ်သၢင်ႈႁဵတ်း ပုၼ်ႈဢၼ်ၽႆးတၵ်းမႆႈၼၼ်ႉလႄႈ ၶဝ်တၵ်းလႆႈ မီးတၢင်းဢၼ်ႁိူဝ်ႉၸႂ်ဢူၼ်ႈၸႂ်ဢေႃႈ။

59ဢၼ်ၼႆႉ ပဵၼ်ၵႂၢမ်းဢၼ် ပရေႃးၽႅတ်ႈ ယေႇရမီႉ သင်ႇလၢတ်ႈဝႆႉတီႈ ၸရႃႇယႃႉ လုၵ်ႈၸၢႆး ၼေႇရီႉ ဢၼ်ပဵၼ်လုၵ်ႈၸၢႆး မႃႇသေႇယႃႉ ၼႂ်းမိူဝ်ႈဢၼ် မၼ်းၸွမ်းလူၺ်ႈၵၼ်တင်း ၸေႇတၵီႉ ၶုၼ်ႁေႃၶမ်း ယူႉတႃႉ ၵႂႃႇၵႃႈတီႈဝဵင်း ပႃႇပူႉလုၼ်ႇ ၼႂ်းပီႊဢၼ်ၶုၼ်ၼၼ်ႉ ၸၢမ်ႇႁၢင်ႈၸၢမ်ႇႁေႃ သီႇပီႊၼၼ်ႉဢေႃႈ။ ၸရႃႇယႃႉ ၸမ်ႉ၊ ပဵၼ်ဢတႂၢင်းဝုၼ်ႇလူင်ဢေႃႈ။-

60ယေႇရမီႉ ဢဝ်လွင်ႈၽေးဢူႉပၢတ်ႈ ၵႃႈဢၼ်တၵ်းႁွတ်ႈထိုင် ၵႃႈၼိူဝ်ဝဵင်း ပႃႇပူႉလုၼ်ႇ ဢၼ်ဝႃႈ ၵႂၢမ်းၵႃႈဢၼ်တႅမ်ႈဝႆႉ လူၺ်ႈလွင်ႈ ဝဵင်း ပႃႇပူႉလုၼ်ႇ ၼၼ်ႉ သေလႄႈ ၵူးတႅမ်ႈဝႆႉ ၵႃႈၼႂ်းလိၵ်ႈၽိုၼ်ၼိုင်ႈ ဢေႃႈ။-

61ယေႇရမီႉ လၢတ်ႈတီႈ ၸရႃႇယႃႉ လႄႈဝႃႈ၊ မိူဝ်ႈဢၼ်မႂ်းႁွတ်ႈထိုင်ၵႃႈတီႈဝဵင်း ပႃႇပူႉလုၼ်ႇ ၼၼ်ႉၸိုင် မႂ်းတၵ်းလႆႈလူတူၺ်းလႄႈ ၽတ်းႁေႃးၵႂၢမ်း ၵႃႈမီးၼႆႉဢေႃႈ။-

62မိူဝ်ႈၼၼ်ႉ မႂ်းတၵ်းလႆႈလဝ်ႊလၢတ်ႈလႄႈဝႃႈ၊ ထႃႇဝရႃႉၽြႃး တီႈၶႃႈ၊ ၸဝ်ႈႁဝ်းမီးဢမိင်ႉ လူၺ်ႈလွင်ႈ ဢၼ်ၸဝ်ႈႁဝ်းတၵ်းပႄႇၽဵဝ်ႈတီႈၼႆႈ ပႅတ်ႈလႄႈ ႁႂ်ႈပဵၼ်တီႈဢၼ်ၽူႈလႂ်ဢမ်ႇယူႇ ဢမ်ႇသဝ်း၊ ဢမ်ႇမီးၵူၼ်း၊ ဢမ်ႇမီးတရိၵ်ႈသၢၼ်ႇ၊ ပဵၼ်တီႈဢၼ်သဵတ်ႇ ဢၼ်ယဵၼ်ယူႇ သေႇသေႇၼၼ်ႉ ဝႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

63မႂ်းၽတ်းႁေႃးလိၵ်ႈၼႆႉ တင်းသဵင်ႈတင်းမူတ်းသေယဝ်ႉ၊ ဢဝ်မၢၵ်ႇႁိၼ်မတ်ႉၸပ်းသႂ်ႇ လိၵ်ႈၼႆႉလႄႈ ဢဝ်ၶျႃးတူၵ်းပႅတ်ႈ ၵႃႈၼႂ်းၵၢင်ၼမ်ႉႁွင်ႈ ဢူႉၽရတ်ႉ ယူႇသေလႄႈ၊-

64ဢွၵ်ႇသူပ်း လၢတ်ႈလႄႈဝႃႈ၊ ဝဵင်း ပႃႇပူႉလုၼ်ႇ ၼႆႉ တၵ်းလႆႈ ၸူမ်တူၵ်းပႅတ်ႈ မိူၼ်ၸိူဝ်ႉၼင်ႇၼႆလႄႈ ၵမ်းလိုၼ်းဢမ်ႇလႆႈလုၵ်ႉၶိုၼ်း ၵွပ်ႈပိူဝ်ႈၽေးဢူႉပၢတ်ႈ ဢၼ်ၵဝ်တၵ်း ႁႂ်ႈႁွတ်ႈထိုင်ၵႃႈၼိူဝ်မၼ်းၼၼ်ႉ။ ၶဝ်တၵ်းလႆႈ မီးတၢင်းဢၼ်ႁိူဝ်ႉၸႂ်ဢူၼ်ႈၸႂ်ဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။ ၵႂၢမ်းဢၼ်ဝႃႈမႃး ၸိူဝ်းၼႆႉၸမ်ႉ၊ ပဵၼ်ၵႂၢမ်း ယေႇရမီႉ ဢေႃႈ။