Jeremiah 32 — Shan

1ၼုၵ်ႈၵပၢတ်ႈၸဝ်ႈ လုၵ်ႉသေၵႃႈတီႈ ထႃႇဝရႃႉၽြႃး ႁွတ်ႈမႃးၵႃႈတီႈ ယေႇရမီႉ ၼႂ်းပီႊဢၼ် ၸေႇတၵီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ သိပ်းပီႊ၊ ၼေႇပူႉၶတ်ႉၼေႇၸႃႇ ၸၢမ်ႇႁၢင်ႈၸၢမ်ႇႁေႃ သိပ်းပၢႆပႅတ်ႈပီႊၼၼ်ႉဢေႃႈ။-

2ၼႂ်းၶိင်ႇမိူဝ်ႈၼၼ်ႉ ႁူဝ်ႁၢၼ်ၵူၼ်းသိုၵ်း ၶုၼ်ႁေႃၶမ်း ပႃႇပူႉလုၼ်ႇ တင်းလၢႆ ဢွၼ်ၵၼ် လွမ်ႉလဵပ်ႈႁွပ်ႈဝဵင်း ယေႇရူႉသလႅမ်ႇ ဝႆႉယဝ်ႉလႄႈ ပရေႃးၽႅတ်ႈ ယေႇရမီႉ ၼၼ်ႉ လႆႈၶၢမ်ႇတၢင်းဢၼ်ၶျုၵ်ႈဝႆႉ ၵႃႈၼႂ်းဝၢင်းထွင်ႇ ဢၼ်မီးၵႃႈၼႂ်းႁေႃၸဝ်ႈ ၶုၼ်ႁေႃၶမ်း ယူႉတႃႉ ၼၼ်ႉယူႇဢေႃႈ။-

3လွင်ႈမၼ်းၸမ်ႉ ၸေႇတၵီႉ ၶုၼ်ႁေႃၶမ်း ယူႉတႃႉ ၼၼ်ႉ ဢဝ်မၼ်းၶင်ဝႆႉ ၵႃႈၼႂ်းထွင်ႇလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁဵတ်းပရေႃးၽႅတ်ႈသေလႄႈ ႁေႃးလၢတ်ႈလႄႈဝႃႈ ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းဢဝ်ဝဵင်းၼႆႉဢၢပ်ႈပၼ် ၵႃႈၼႂ်းမိုဝ်းၶုၼ်ႁေႃၶမ်း ပႃႇပူႉလုၼ်ႇ လႄႈ မၼ်းၼၼ်ႉ တၵ်းသိမ်းဢဝ်ဢေႃႈ။-

4ၸေႇတၵီႉ ၶုၼ်ႁေႃၶမ်း ယူႉတႃႉ တၵ်းဢမ်ႇၵၢင်းလွတ်ႈသေ ၵႃႈၼႂ်းမိုဝ်းၵူၼ်း ၶႃႇလတေး တင်းလၢႆလႄႈ တၵ်းလႆႈႁွတ်ႈထိုင် ၵႃႈၼႂ်းမိုဝ်းၶုၼ်ႁေႃၶမ်း ပႃႇပူႉလုၼ်ႇ ဢမၢၼ်ႇၶၼ်ပဵၼ်ဢေႃႈ။ သွင်ၶႃတၵ်းဢဝ်သူပ်းတေႃႇသူပ်း လၢတ်ႈၵၼ်လႄႈ ဢဝ်တႃတေႃႇတႃ လူတူၺ်းၵၼ်ယူႇဢေႃႈ။-

5မၼ်းၼၼ်ႉ တၵ်းဢဝ် ၸေႇတၵီႉ ၵႂႃႇၵႃႈတီႈဝဵင်း ပႃႇပူႉလုၼ်ႇ လႄႈ မၼ်းတၵ်းလႆႈယူႇ ၵႃႈတီႈမိူင်းၼၼ်ႉတေႃႇထိုင်ႁွတ်ႈ ၵဝ်မႃးလူမႃးတူၺ်းမၼ်းၼၼ်ႉဢေႃႈ။ ပိၵ်ႉသမ်ႉသူတိုၵ်းသိုၵ်းၵၼ် တင်းၵူၼ်း ၶႃႇလတေး တင်းလၢႆသေၵေႃႈ သူဢမ်ႇလႆႈပႄႉလႆႈၼႅင်ႇ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆၼင်ႇႁိုဝ်။ ဝႃႈၼင်ႇၼႆဢေႃႈ။-

6မိူဝ်ႈၼၼ်ႉ ယေႇရမီႉ လၢတ်ႈလႄႈဝႃႈ၊ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်ၸမ်ႉ၊-

7တူၺ်းလူး၊ ႁႃႇၼမေႇလႃႉ လုၵ်ႈၸၢႆး သႃႇလုမ်ႇ ပေႃႈၼႃႉမႂ်းၼၼ်ႉ တၵ်းမႃးတီႈမႂ်းလႄႈလၢတ်ႈလႄႈဝႃႈ၊ သိုဝ်ႉဢဝ်တူင်ႈၼႃးၵဝ်ဢၼ်မီးၵႃႈတီႈဝဵင်း ဢႃႇၼသုတ်ႉ ၼၼ်ႉသေၵမ်း။ လွင်ႈမၼ်းၸမ်ႉ မႂ်းပိူင်ႇတၢင်းဢၼ် ထုတ်ႇၼုၵ်ႈဢဝ်လႄႈ သိုဝ်ႉဢဝ်ၼၼ်ႉဢေႃႈ၊ ဝႃႈၼင်ႇၼႆလႄႈ၊-

8ႁႃႇၼမေႇလႃႉ လုၵ်ႈၸၢႆးပေႃႈၼႃႉၵဝ်ၼၼ်ႉ မႃးၸူးတီႈၵဝ် ၵႃႈၼႂ်းဝၢင်းထွင်ႇမႅၼ်ႈၼင်ႇဢၼ် ထႃႇဝရႃႉၽြႃး မီးဢမိင်ႉၼၼ်ႉလႄႈ လၢတ်ႈတီႈၵဝ်လႄႈဝႃႈ၊ ၶႅၼ်းတေႃႈသိုဝ်ႉဢဝ် တူင်ႈၼႃးၵဝ်ဢၼ်မီးၵႃႈတီႈဝဵင်း ဢႃႇၼသုတ်ႉ ၼႂ်းဢိူင်ႇ ပိၼ်ႇယႃႇမိၼ်ႇ ၼၼ်ႉသေၵမ်း။ မႂ်းမီးဢၶႂၢင်ႉဢၼ်ပိူင်ႇၶၢမ်ႇဢမူၺ်ႇ ဢိၵ်ႇတင်း ဢၶႂၢင်ႉဢၼ်ပိူင်ႇ တၢင်းဢၼ်ထုတ်ႇဢဝ် ၼုၵ်ႈဢဝ်ၼၼ်ႉလႄႈ သိုဝ်ႉဢဝ်ပုၼ်ႈတူဝ်မႂ်းသေၵမ်း၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ ၵဝ်ႁူႉလွင်ႈဢၼ် ၵႂၢမ်းၼႆႉပဵၼ် ၼုၵ်ႈၵပၢတ်ႈထႃႇဝရႃႉၽြႃးၼၼ်ႉလႄႈ၊-

9ၵဝ်သိုဝ်ႉဢဝ်ၼႃး ႁႃႇၼမေႇလႃႉ လုၵ်ႈၸၢႆးပေႃႈၼႃႉၵဝ် ဢၼ်မီးၵႃႈတီႈဝဵင်း ဢႃႇၼသုတ်ႉ ၼၼ်ႉလႄႈ ၸင်ႈႁိဝ်ႈပၼ် ၵႃႈမၼ်းၶၼ်မၼ်း သိပ်းပၢႆၸဵတ်းၵျၢပ်ႈ သၶေးလႃႉ ဢေႃႈ။-

10လိၵ်ႈၶျုၵ်ႈၵေႃႈ ၵဝ်ၸီႇယၢင်ႇတႅမ်ႈလႄႈ တွၵ်ႇတၼ်းသိၵ်ႈသေယဝ်ႉ၊ ႁွင်ႉဢဝ်သၢၵ်ႈသေႇ လႄႈ ဢဝ်ယွႆးၸင်ႈႁိဝ်ႈငိုၼ်းပၼ်ဢေႃႈ။-

11ၵဝ်ဢဝ်လိၵ်ႈၶျုၵ်ႈ ဢၼ်တွၵ်ႇတၼ်းသိၵ်ႈၽိုၼ်ၼိုင်ႈ ဢိၵ်ႇတင်း လၢၵ်ႈၶၢမ်ႇမၼ်း ဢၼ်ၽုၺ်ႇပိုတ်ႇဝႆႉၽိုၼ်ၼိုင်ႈ ၸွမ်းၼင်ႇ ထုင်းၸၢမ်ႇထမ်ႇမသၢတ်ႈၼၼ်ႉ သေလႄႈ၊-

12ဢဝ်လိၵ်ႈၶျုၵ်ႈၼၼ်ႉ ဢၢပ်ႈပၼ်တီႈ ပႃႇရုၵ်ႉ လုၵ်ႈၸၢႆး ၼေႇရီႉ ဢၼ်ပဵၼ်လုၵ်ႈၸၢႆး မႃႇသေႇယႃႉ ၼၼ်ႉ သိုဝ်ႈၼႃႈတႂ်ႈတႃ ႁႃႇၼမေႇလႃႉ လုၵ်ႈၸၢႆးပေႃႈၼႃႉၵဝ် ဢိၵ်ႇတင်းသိုဝ်ႈၼႃႈတႂ်ႈတႃ သၢၵ်ႈသေႇ ဢၼ်ထူဝ်းလၢၵ်ႈမၢတ်ႈတီႈလိၵ်ႈၶျုၵ်ႈၼၼ်ႉ တင်းၵူၼ်း ယူႉတႃႉ ဢၼ်ၼင်ႈယူႇၵႃႈၼႂ်းဝၢင်းထွင်ႇ တင်းသဵင်ႈတင်းလူင်ၼၼ်ႉသေလႄႈ၊-

13သင်ႇလၢတ်ႈဝႆႉတီႈ ပႃႇရုၵ်ႉ ၵႃႈတီႈၽၢႆႇၼႃႈၶဝ်ၼၼ်ႉလႄႈဝႃႈ၊-

14ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ဢဝ်လိၵ်ႈၶျုၵ်ႈၸိူဝ်းၼႆႉ ဢၼ်ဝႃႈလိၵ်ႈ ဢၼ်တွၵ်ႇတၼ်းသိၵ်ႈ ၽိုၼ်ၼိုင်ႈ ဢိၵ်ႇတင်း လၢၵ်ႈၶၢမ်ႇမၼ်း ဢၼ်ၽုၺ်ႇပိုတ်ႇဝႆႉ ၽိုၼ်ၼိုင်ႈလႄႈ ဢဝ်သႂ်ႇဝႆႉၵႃႈၼႂ်းမေႃႈလိၼ် ႁႂ်ႈတႄႇယူႇၶိင်ႇၵႃႇလႃႉႁိုင်ၼႃႇတႃႉ။-

15ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ တၵ်းမီးတၢင်းဢၼ်သိုဝ်ႉဢဝ်ႁိူၼ်း၊ ၼႃးႁႆႊ၊ သူၼ်ဢူးယဵၼ်ႇၸပိတ်ႈ ၵႃႈၼႂ်းမိူင်းၼႆႉထႅင်ႈ လူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။

16ၵဝ်ဢဝ်လိၵ်ႈၶျုၵ်ႈဢၢပ်ႈပၼ် တီႈ ပႃႇရုၵ်ႉ လုၵ်ႈၸၢႆး ၼေႇရီႉ ၼၼ်ႉ သေယဝ်ႉ၊ ၵဝ်သူးတွင်းႁဵတ်းပထၼႃႇတီႈ ထႃႇဝရႃႉၽြႃး လႄႈဝႃႈ၊-

17ၸဝ်ႈထႃႇဝရႃႉၽြႃး တီႈၶႃႈ၊ ၸဝ်ႈႁဝ်းဢဝ်တင်း မႁႃႇတၼ်းၶူဝ်း ဢိၵ်ႇတင်း တၢင်းဢၼ်ယိုၼ်ႈၶႅၼ် ယိုၼ်ႈမိုဝ်းၸဝ်ႈႁဝ်း ႁဵတ်းပဵၼ် ၽႃႉၵၢင်ႁၢဝ် တင်းလိၼ်မိူင်းတီႈၶႃႈယဝ်ႉ။ လွင်ႈတၢင်းဢၼ် ၸဝ်ႈႁဝ်းဢမ်ႇတၢတ်ႈၼိူင်ႇလႆႈၼၼ်ႉ ဢမ်ႇမီးသေၸိူဝ်ႉသေဢၼ်တီႈၶႃႈ၊-

18ၸဝ်ႈႁဝ်း ႁဵတ်းၵျေးၸူးၵရူႉၼႃႇ တီႈၵူၼ်း ပဵၼ်ႁဵင်ပဵၼ်မိုၼ်ႇယူႇသေလႄႈ ႁႂ်ႈဢပႅတ်ႈပေႃႈတင်းလၢႆ တူၵ်းႁွတ်ႈၵႃႈၼႂ်းႁူဝ်ဢူၵ်းလုၵ်ႈၶဝ်လၢၼ်ၶဝ် ဢၼ်ပဵၼ်လိုၼ်းၶဝ်ၼၼ်ႉတီႈၶႃႈဢေႃႈ။ ၸဝ်ႈႁဝ်းပဵၼ်ၽြႃး ဢၼ်ယႂ်ႇမျၢတ်ႈၼႃႇ၊ ၽြႃးဢၼ်ပျေႉၸုမ်ႇတင်း မႁႃႇတၼ်းၶူဝ်းလႄႈ မီးၼႃႇမႃႉၸိုဝ်ႈသဵင်ဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး တီႈၶႃႈဢေႃႈ။-

19ၸဝ်ႈႁဝ်းၵျၢမ်ႇပွင် တၢင်းၵျၢမ်ႇတၢင်းပွင်ဢၼ်လၢၵ်ႇလၢႆးလႄႈ ၸီႇယၢင်ႇလွင်ႈတၢင်းဢၼ် ႁႅင်းယႂ်ႇယူႇသေလႄႈ ၽုၺ်ႇတႃ မိုၼ်းတႃၸူး သဵၼ်ႈတၢင်းဢၼ် လုၵ်ႈၵူၼ်းတင်းလၢႆၵႂႃႇမႃးၵႃႈမီး ႁႂ်ႈလႆႈပၼ်ဢပႅတ်ႈ တီႈၵူၼ်းႁင်းၽႂ်ႁင်းမၼ်း ၸွမ်းၼင်ႇ သဵၼ်ႈတၢင်းၶဝ် ဢိၵ်ႇတင်း ဢၵျူဝ်းတၢင်းၵမ်တၢင်းၵျၢင်ႉၶဝ်ၼၼ်ႉတီႈၶႃႈဢေႃႈ။-

20ၸဝ်ႈႁဝ်း ၼႄပျႃးၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈ တၢင်းဢၼ်လီဢၢမ်းတင်းလၢႆ ၵႃႈတီႈမိူင်း ဢေႇၵိပ်ႉတူႉ ၊ ၵႃႈၼႂ်းၵူၼ်းမဵဝ်း ဢီႉသရေႇလႃႉ ဢိၵ်ႇတင်း ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ တေႃႇထိုင်ႁွတ်ႈ ဝၼ်းမိူဝ်ႈၼႆႉလႄႈ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်း ႁူင်ႁၢင်းယူႇတႃႇသေႇ မိူၼ်ၸိူဝ်ႉၼင်ႇဝၼ်းမိူဝ်ႈၼႆႉ တီႈၶႃႈဢေႃႈ။-

21ၸဝ်ႈႁဝ်းဢဝ်တင်းၼီႉမိၵ်ႈလၢၵ်ႈၶၼႃႇ၊ လွင်ႈတၢင်းဢၼ်လီဢၢမ်း၊ မိုဝ်းၸဝ်ႈဢၼ်ႁႅင်းယႂ်ႇ၊ ၶႅၼ်ၸဝ်ႈဢၼ်ယဵတ်ႇယိုၼ်ႈ၊ လွင်ႈတၢင်းဢၼ်လီၵူဝ်လီႁႄ ၸိူဝ်းၼၼ်ႉ ၼုၵ်ႈဢဝ်ၵူၼ်းၸဝ်ႈႁဝ်း ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးလႄႈ၊-

22ဢဵတ်းလူပၼ်မိူင်းၼႆႉ ဢၼ်ၸဝ်ႈႁဝ်းတိူင်ႇဝႃႈဝႆႉ တီႈပူႇၶဝ်မွၼ်ႇၶဝ် လူၺ်ႈလွင်ႈဢၼ် တၵ်းပၼ်တီႈၶဝ် ဢၼ်ဝႃႈ မိူင်းဢၼ်ၼမ်ႉၼူမ်း တင်းၼမ်ႉၽိုင်ႈၸၢင်ႈလႆယူႇၼႆႉတီႈၶဝ်သေယဝ်ႉ၊-

23ၶဝ်ဢွၼ်ၵၼ်ၶဝ်ႈလႄႈ သိမ်းဢဝ်ယဝ်ႉသေၵေႃႈ၊ ၶဝ်ဢမ်ႇထွမ်ႇဢမ်ႇဢဝ် ဢမိင်ႉၸဝ်ႈ၊ ဢမ်ႇၸွမ်းသဵၼ်ႈတၢင်းတြႃးၸဝ်ႈ၊ ဢမ်ႇၵမ်ဢမ်ႇၵျၢင်ႉ တၢင်းၵမ်တၢင်းၵျၢင်ႉ ဢၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉ လႃးလႃးလႄႈ၊ ၸဝ်ႈႁဝ်းႁႂ်ႈၽေးဢူႉပၢတ်ႈ ၵႃႈဢၼ်ၶဝ်လႆႈၶၢမ်ႇၼႆႉႁွတ်ႈထိုင် ၵႃႈၼိူဝ်ၶဝ်တီႈၶႃႈယဝ်ႉ။-

24ၶႅၼ်းတေႃႈ လူတူၺ်းတႅၼ်ႈလိၼ် လၢင်းၸီးၸိူဝ်းၼႆႉသေၵမ်းတီႈၶႃႈ၊ ၶဝ်ဢွၼ်ၵၼ်ႁွတ်ႈမႃး ႁႂ်ႈလႆႈတိုၵ်းဢဝ်ဝဵင်းၸဝ်ႈၼႆႉ တီႈၶႃႈယဝ်ႉ။ ဝဵင်းၸဝ်ႈၼႆႉ လႆႈၶၢမ်ႇတၢင်းဢၼ်ဢၢပ်ႈပၼ် ၵႃႈၼႂ်းမိုဝ်းၵူၼ်း ၶႃႇလတေး ဢၼ်ပႃးဢဝ်ၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်း မႃးတိုၵ်းတေႃးၸိူဝ်းၼၼ်ႉတီႈၶႃႈယဝ်ႉ။ လွင်ႈတၢင်းဢၼ် ၸဝ်ႈႁဝ်းမီးဢမိင်ႉဝႆႉၸိူဝ်းၼၼ်ႉလႆႈပျေႉၸုမ်ႇယဝ်ႉလႄႈ တူဝ်ၸဝ်ႈႁဝ်းႁၼ်ယူႇတီႈၶႃႈဢေႃႈ။-

25ၸဝ်ႈထႃႇဝရႃႉၽြႃး တီႈၶႃႈ၊ ၸဝ်ႈႁဝ်းမီးဢမိင်ႉတီႈၶႃႈၸဝ်ႈလႄႈဝႃႈ၊ ဢဝ်ငိုၼ်းသိုဝ်ႉဢဝ်ၵႂၢၵ်ႈလိၼ်လႄႈ ႁွင်ႉဢဝ်သၢၵ်ႈသေႇဝႆႉတႃႉ၊ ဝႃႈၼင်ႇၼႆတီႈၶႃႈဢေႃႈ။ ၵူၺ်းၵႃႈ ဝဵင်းၸဝ်ႈၼႆႉလႆႈႁွတ်ႈထိုင်ၵႃႈၼႂ်းမိုဝ်း ၵူၼ်း ၶႃႇလတေး ၸိူဝ်းၼၼ်ႉယဝ်ႉ တီႈၶႃႈလူင်ပႄႇ၊ ဝႃႈၼင်ႇၼႆဢေႃႈ။-

26မိူဝ်ႈၼၼ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ ၸမ်ႉ၊-

27ၵဝ်ထႃႇဝရႃႉၽြႃးၼႆႉ ပဵၼ်ၽြႃးပဵၼ်ၸဝ်ႈဢၼ် ဢုပ်ႉပိူင်ႇသတ်ႉတဝႃႇ တင်းသဵင်ႈတင်းလူင်ဢေႃႈ။ လွင်ႈတၢင်းဢၼ် ၵဝ်ဢမ်ႇတၢတ်ႈၼိူင်ႇလႆႈၼၼ်ႉ မီးသေၸိူဝ်ႉသေပိူင်ႁိုဝ်။-

28ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ။ တူၺ်းလူး၊ ၵဝ်တၵ်းဢဝ်ဝဵင်းၼႆႉ ဢၢပ်ႈပၼ်ၵႃႈၼႂ်းမိုဝ်း ၵူၼ်း ၶႃႇလတေး တင်းလၢႆဢိၵ်ႇတင်း ၵႃႈၼႂ်းမိုဝ်း ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ လႄႈ မၼ်းၼၼ်ႉ တၵ်းသိမ်းဢဝ်ဢေႃႈ။-

29ၵူၼ်း ၶႃႇလတေး ဢၼ်တိုၵ်းဝဵင်းၼႆႉၸိူဝ်းၼၼ်ႉ တၵ်းဢွၼ်ၵၼ်ၶဝ်ႈသေလႄႈ ဢဝ်ၽႆးတုတ်ႇလႄႈမႆႈဝဵင်းၼႆႉတင်းဝဵင်းဢိၵ်ႇလူၺ်ႈၵၼ် တင်းႁိူၼ်းတီႈဢၼ်ၶဝ်ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်မုင်းမၼ်း ပုၼ်ႈၽြႃး ပႃႇလႃႉ လႄႈ ႁဵတ်းၶိူင်ႈပုၵ်ႈၸေႃႇ ဢၼ်သွၼ်းလေႃႇ ပုၼ်ႈၽြႃးတၢင်ႇသူႇတၢင်ႇပႃး ႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ် ၸိူဝ်းၼၼ်ႉဢေႃႈ။-

30လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃၵဝ် ၸဵမ်မိူဝ်ႈဢၼ်ဢသၢၵ်ႈၶဝ် ယင်းလဵၵ်ႉယင်းဢွၼ်ႇၼၼ်ႉယဝ်ႉ။ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁဵတ်းႁႂ်ႈလႆႈ တိုၵ်းယူင်းတၢင်းၸႂ်မႆႈၶႆႈၸႃႉၵဝ်ၵူၺ်း ၼႂ်းၵႃႈဢၼ်မိုဝ်းၶဝ်ႁဵတ်းၼၼ်ႉယဝ်ႉ။-

31ဝဵင်းၼႆႉပဵၼ်ဝဵင်းဢၼ် ႁႂ်ႈတၢင်းဢၼ်ၶႆႈၸႃႉၵဝ်ဢွၵ်ႇလႄႈ ႁႂ်ႈဢၢႆႁႅင်းတေႃးသႃႉ တၢင်းၸႂ်မႆႈၵဝ်ႁႅင်းယႂ်ႇၼႃႇ ႁႂ်ႈၵဝ်လႆႈ ပႄႇၽဵဝ်ႈမၼ်းပႅတ်ႈသေ ၵႃႈတီႈသိုဝ်ႈၼႃႈတႂ်ႈတႃၵဝ်၊-

32ၵွပ်ႈပိူဝ်ႈတူႉၸရိူၵ်ႈဢၼ် ၵူၼ်းမဵဝ်း ဢီႉသရေႇလႃႉ ၸႃႉၸဵမ်မိုဝ်ႉဝၼ်းဢၼ်တႄႇႁဵတ်းမၼ်းၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆဢၼ်ဝႃႈ ၶုၼ်ႁေႃၶမ်းၶဝ်၊ ယိတ်ႈပရေႃးႁဵၵ်ႈၶဝ် ပရေႃးၽႅတ်ႈၶဝ်၊ ၵူၼ်းမိူင်း ယူႉတႃႉ ဢိၵ်ႇတင်း ၶဝ်ၸိူဝ်းဢၼ်ယူႇၵႃႈၼႂ်းဝဵင်း ယေႇရူႉသလႅမ်ႇ တင်းလၢႆၸိူဝ်းၼၼ်ႉ ႁဵတ်းႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ် ၼၼ်ႉဢေႃႈ။-

33ၶဝ်ၼၼ်ႉ ယင်းဢမ်ႇဝၢႆႇၼႃႈတေႃႇၵဝ်လႄႈ ဢွၼ်ၵၼ်ၵွင်လင်ပၼ်တီႈၵဝ်ယဝ်ႉ။ ပိၵ်ႉသမ်ႉ ၵဝ်လုၵ်ႉၸဝ်ႉၸဝ်ႉလႄႈ သင်ႇသွၼ်သုင်းမႃႉပၼ်ၶဝ်သေၵေႃႈ ၶဝ်ဢမ်ႇဢွၼ်ၵၼ်ထွမ်ႇငိၼ်း ႁႂ်ႈလႆႈၶၢမ်ႇဢဝ်ဢေႃးဝႃႇတႃႉၵဝ်။-

34ၶဝ်ဢွၼ်ၵၼ်ဢဝ်လွင်ႈတၢင်းဢၼ် လီႁင်ႈဢဵတ်ႇသဵတ်ႇသႂၢင်းသႂ်ႇဝႆႉၼႂ်းႁိူၼ်း ဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ၼၼ်ႉ ႁႂ်ႈမၼ်းလႆႈၵူဝ်ႈၵိူၵ်ႇယဝ်ႉလူင်ပႄႇ။-

35ၶဝ်ဢွၼ်ၵၼ် တႄႇႁဵတ်းထႃႇၼႃႉတီႈသုင်ၽြႃး ပႃႇလႃႉ ဢၼ်မီးၵႃႈၼႂ်းၶူင်ႈႁူၺ်ႈ လုၵ်ႈၸၢႆး ႁိၼ်ႇၼုမ်ႇ ၼၼ်ႉ ႁႂ်ႈလႆႈဢဝ်လုၵ်ႈၸၢႆးၶဝ်လုၵ်ႈယိင်းၶဝ် ပုၵ်ႈၸေႃႇတီႈၽြႃး မူးလွၵ်ႉ ဢၼ်ၵဝ်ဢမ်ႇသင်ႇလၢတ်ႈဝႆႉတီႈၶဝ်လႄႈ ဢမ်ႇဢဝ်သႂ်ႇၸႂ်ၶဝ်ႈၸႂ်လူၺ်ႈလွင်ႈဢၼ် ၶဝ်တၵ်းႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇၼႆႉ ႁႂ်ႈမဵဝ်း ယူႉတႃႉ မီးတူႉၸရိူၵ်ႈၼၼ်ႉယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

36ၼႂ်းဝႃႈၼၼ်သေၵေႃႈ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢဝ်လွင်ႈဝဵင်းၼႆႉ ဢၼ်သူၸၢင်ႈလၢတ်ႈလႄႈဝႃႈ၊ ဝဵင်းၼႆႉတၵ်းႁွတ်ႈထိုင် ၵႃႈၼႂ်းမိုဝ်းၶုၼ်ႁေႃၶမ်း ပႃႇပူႉလုၼ်ႇ လူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႈလႅင်မိူင်းဢေႃႈ၊ ဝႃႈၼင်ႇၼႆၼၼ်ႉလႄႈ မီးဢမိင်ႉၸမ်ႉ၊-

37တူၺ်းလူး၊ ၵဝ်တၵ်းသမ်ႉသိမ်းဢဝ်ၶဝ် ဢွၵ်ႇသေၵႃႈၼႂ်းဝၢၼ်ႈမိူင်း တီႈဢၼ်ၵဝ်ပႃးတင်း တၢင်းဢၼ်ၶႆႈၸႃႉၶႆႈၸဵတ်ႉ၊ တၢင်းဢၼ်ဢၢႆႁႅင်းတေႃးသႃႉၵဝ်ဢွၵ်ႇ၊ တၢင်းဢၼ် ၸႂ်မႆႈၶႆႈၸႃႉႁႅင်းယႂ်ႇၼႃႇ သေလႄႈ ႁေႃႈၶဝ်ဢွၵ်ႇၸူးၼၼ်ႉသေလႄႈ ဢဝ်ၶိုၼ်းမႃးၵႃႈတီႈၼႆႈလႄႈ ႁႂ်ႈၶဝ်ယူႇတဵတ်ႇလီၼိမ်လီဢေႃႈ။-

38ၶဝ်တၵ်းပဵၼ်ၵူၼ်းၵဝ်လႄႈ ၵဝ်ၵေႃႈတၵ်းပဵၼ် ၽြႃးပဵၼ်ၸဝ်ႈ ၶဝ်ဢေႃႈ။-

39ႁႂ်ႈၶဝ်လႆႈၵူဝ်ႁႄၵဝ်ယူႇ သေႇသေႇၸိုင်၊ ၵဝ်တၵ်းပၼ်သၽေႃး ဢၼ်လဵဝ်ၵၼ် ဢိၵ်ႇတင်းသဵၼ်ႈတၢင်းလဵဝ်ၵၼ်တီႈၶဝ် ပုၼ်ႈဢၼ်တၵ်းပဵၼ်ဢၵျူဝ်းတီႈၶဝ် ဢိၵ်ႇတင်း တီႈလုၵ်ႈၶဝ်လၢင်းၶဝ် ဢၼ်တၵ်းပဵၼ်မႃးလိုၼ်းၶဝ်ၼၼ်ႉဢေႃႈ။-

40ၵဝ်တၵ်းႁဵတ်း ပတီႉၺိၺ်ႇထႃႇဝရႃႉ လူၺ်ႈၵၼ်တင်းၶဝ် ႁႂ်ႈၵဝ်ဢမ်ႇလႆႈၸုၼ်ႉပႅတ်ႈၶဝ်လႄႈ ႁဵတ်းၵျေးၸူးယူႇသေႇသေႇလႄႈ ႁႂ်ႈၶဝ်ပျေႉၸုမ်ႇဝႆႉ တင်းသၽေႃးဢၼ်ၵူဝ်ႁႄၵဝ် ႁႂ်ႈၶဝ်ဢမ်ႇဢွၵ်ႇသေၵႃႈတီႈၵဝ်ၵႂႃႇဢေႃႈ။-

41ၵဝ်တၵ်းၶိုတ်းၸႂ်ပဵင်းၸႂ်လူၺ်ႈ လွင်ႈတၢင်းဢၼ် ႁဵတ်းၵျေးၸူးတီႈၶဝ်ၼၼ်ႉလႄႈ ပႃးတင်းႁူဝ်ၸႂ်ၵဝ် တင်းၸႂ်ဝီႉၺိၺ်ႇၵဝ် သဵင်ႈသဵင်ႈမူတ်းမူတ်း ယူႇသေလႄႈ တၵ်းဢဝ်ၶဝ်ၶျႃးတီႈယူႇပၼ် ၵႃႈၼႂ်းမိူင်းၼႆႉဢမၢၼ်ႇၶၼ်ပဵၼ်ဢေႃႈ။-

42ထႃႇဝရႃႉၽြႃး မီးဢမိင်ႉၸမ်ႉ၊ မိူၼ်ၸိူဝ်ႉၼင်ႇဢၼ် ၵဝ်ႁႂ်ႈၽေးဢူႉပၢတ်ႈဢၼ်ယႂ်ႇၼႃႇလူင်လၢင် ႁွတ်ႈထိုင်ၵႃႈၼိူဝ်ၵူၼ်းမဵဝ်းၼႆႉၼၼ်ႉ ၵဝ်တၵ်းႁႂ်ႈတၢင်းလီဢၼ်ၵဝ်ဝႆႉၵတီႉတီႈၵဝ် တင်းသဵင်ႈတင်းလူင်ၼၼ်ႉ ႁွတ်ႈထိုင်ၵႃႈၼိူဝ်ၶဝ်ဢေႃႈ။-

43တၵ်းမီးတၢင်းဢၼ်သိုဝ်ႉဢဝ်ႁႆႊၼႃး ၵႃႈၼႂ်းမိူင်းဢၼ်သူ ၸၢင်ႈလၢတ်ႈလႄႈဝႃႈ၊ ပဵၼ်တီႈဢၼ်ပဝ်ႇ ဢၼ်လၢပ်ႈလႄႈ ဢမ်ႇမီးၵူၼ်း ဢမ်ႇမီးတရိၵ်ႈသၢၼ်ႇ။ ႁွတ်ႈထိုင်ၵႃႈၼႂ်းမိုဝ်းၵူၼ်း ၶႃႇလတေး တင်းလၢႆယဝ်ႉ၊ ဝႃႈၼင်ႇၼႆၼၼ်ႉဢေႃႈ။-

44ၵူၼ်းတင်းလၢႆ တၵ်းဢွၼ်ၵၼ် ႁဵတ်းတၢင်းဢၼ် ဢဝ်ငိုၼ်းသိုဝ်ႉဢဝ်ႁႆႊဢဝ်ၼႃး၊ တၢင်းဢၼ် ၸီႇယၢင်ႇ တႅမ်ႈလိၵ်ႈၶျုၵ်ႈဝႆႉ၊ တၢင်းဢၼ်တွၵ်ႇတၼ်းသိၵ်ႈ၊ တၢင်းဢၼ် ႁွင်ႉဢဝ်သၢၵ်ႈသေႇဝႆႉ ၸိူဝ်းၼၼ်ႉ ယူႇၵႃႈၼႂ်းမိူင်း ပိၼ်ႇယႃႇမိၼ်ႇ ဢိၵ်ႇတင်း ၵႃႈၼႂ်းတီႈဢၼ်လဵပ်ႈႁွပ်ႈဝဵင်း ယေႇရူႉသလႅမ်ႇ တင်းလၢႆ တင်းၵႃႈတီႈဝဵင်းဢၼ်မီး ၵႃႈၼႂ်းမိူင်း ယူႉတႃႉ ၊ ၵႃႈတီႈဝဵင်းၼိူဝ်ႁၢၼ်ႉလွႆ၊ ၵႃႈတီႈဝဵင်း ဢၼ်မီးၵႃႈတႂ်ႈ တီႈပၢင်ႇတီႈပဵင်း၊ ၵႃႈတီႈဝဵင်းဢၼ် မီးၵႃႈၼႂ်းပွတ်းတၢင်းၸၢၼ်းၼၼ်ႉ ၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၵဝ်သမ်ႉတၵ်းဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ် သိမ်းဢဝ်ၵႂႃႇၼၼ်ႉ ၶိုၼ်းမႃးဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။