Jeremiah 40

Shan

← Chapter 39 Jump to: Chapter 41 →

1ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈ ယေႇရမီႉ လိုၼ်းသေ ဢၼ်ၵူဝ်ႇရမ်ႇတေႃႇမူး ၼေႇပူႉၸႃႇရႃႇတၢၼ်ႇ ဢဝ်ပွႆႇၵႂႃႇ ၵႃႈတီႈဝဵင်း ရႃႇမႃႉ ၼႂ်းမိူဝ်ႈဢၼ်မၼ်းၼၼ်ႉ ဢဝ်မၼ်း မိူဝ်ႈဢၼ်မၼ်းလႆႈၶၢမ်ႇတၢင်းဢၼ် ဢဝ်ၸိူၵ်ႈလဵၵ်းမတ်ႉၽုၵ်ႇ ႁူမ်ႈလူၺ်ႈၵၼ် တင်းၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ ၵႃႈဢၼ်လႆႈၶၢမ်ႇတၢင်းဢၼ် သိမ်းဢဝ် ဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ ၸိူဝ်းၼၼ်ႉဢေႃႈ။-

2ၵူဝ်ႇရမ်ႇတေႃႇမူးၼၼ်ႉ ႁွင်ႉဢဝ် ယေႇရမီႉ လႄႈ လၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉ ၸီႇယၢင်ႇမွၵ်ႇလၢတ်ႈဢမူႉဢၼ် ႁွတ်ႈထိုင်ၵႃႈတီႈမိူင်းၼႆႉၼၼ်ႉ ဝႆႉထႃႈယဝ်ႉ။-

3ထႃႇဝရႃႉၽြႃး ႁႂ်ႈဢမူႉၼၼ်ႉ ႁွတ်ႈထိုင်လႄႈ ၸီႇယၢင်ႇႁဵတ်းၸွမ်း ၵႃႈၼင်ႇဢၼ် မၼ်းၸဝ်ႈမွၵ်ႇလၢတ်ႈၼၼ်ႉယဝ်ႉ။ ၵွပ်ႈပိူဝ်ႈဢၼ်သူယင်းဢမ်ႇထွမ်ႇဢဝ် ဢမိင်ႉၸဝ်ႈလႄႈ ၽိတ်းပိူင်ႈ ထႃႇဝရႃႉၽြႃး ၼၼ်ႉလႄႈ၊ ဢမူႉၼႆႉႁွတ်ႈထိုင်ၵႃႈၼိူဝ်သူယဝ်ႉ။-

4မိူဝ်ႈလဵဝ်ၼႆႉ ၵဝ်တၵ်းထွတ်ႇၸိူၵ်ႈလဵၵ်း ဢၼ်မတ်ႉၽုၵ်ႇ ၵႃႈတီႈမိုဝ်းမႂ်းၼၼ်ႉ ပႅတ်ႈဢေႃႈ။ ပေႃးမႂ်းမီးဢလူဝ်ႇ ၶႂ်ႈၸွမ်းလူၺ်ႈၵၼ်တင်းၵဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ ၸိုင်၊ ၸွမ်းသေၵမ်းတႃႉ။ ၵဝ်တၵ်း လူတူၺ်းလုမ်းလႃးမႂ်း လီလီငၢမ်းငၢမ်းဢေႃႈ။ ပေႃးမႂ်းဢမ်ႇမီးဢလူဝ်ႇ ၶႂ်ႈၸွမ်းလူၺ်ႈၵၼ်တင်းၵဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ ၸိုင်၊ ယႃႇပေၸွမ်း။ မိူင်းၼႆႉတင်းမိူင်း မီးယူႇၵႃႈတီႈၽၢႆႇၼႃႈမႂ်းဢေႃႈ။ တီႈဢၼ်မႂ်းထၢင်ႇပဵၼ် ဢၼ်လီဢၼ်ငၢမ်းလႄႈ ထုၵ်ႇလီၵႂႃႇၼၼ်ႉၸိုင်၊ ၵႂႃႇၸူးၵႃႈတီႈၼၼ်ႈသေၵမ်း၊ ဝႃႈၼင်ႇၼႆဢေႃႈ။-

5ၸူဝ်ႈဢၼ် မၼ်းဢမ်ႇပႆႇဝၢႆႇၶိုၼ်းသေ ၵႃႈတီႈမၼ်းၼၼ်ႉၸိုင်၊ မၼ်းၼၼ်ႉလၢတ်ႈထႅင်ႈလႄႈဝႃႈ၊ မႂ်းၶိုၼ်းမိူဝ်းၵႂႃႇၸူးၵႃႈတီႈ ၵေႇတလီႉ လုၵ်ႈၸၢႆး ဢႁီႉၵမ်ႇ ဢၼ်ပဵၼ်လုၵ်ႈၸၢႆး သႃႇၽၢၼ်ႇ ဢၼ်ၶုၼ်ႁေႃၶမ်း ပႃႇပူႉလုၼ်ႇ ၶၢၼ်းဝႆႉ ႁဵတ်းမဵဝ်ႉဢုၵ်ႉ ၵႃႈၼိူဝ်ဝဵင်း ယူႉတႃႉ ၸိူဝ်းၼၼ်ႉ ၼၼ်ႉလႄႈ ယူႇလူၺ်ႈၵၼ်တင်းမၼ်းၼၼ်ႉ ၵႃႈၼႂ်းၵူၼ်းဝၢၼ်ႈ ၵူၼ်းမိူင်းတင်းလၢႆသေၵမ်း။ ဢမ်ႇၼၼ်ၵေႃႈ ၵႂႃႇၵႃႈတီႈဢၼ်မႂ်းထၢင်ႇပဵၼ် ဢၼ်မႂ်းထုၵ်ႇလီၵႂႃႇၼၼ်ႉသေၵမ်း၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၵူဝ်ႇရမ်ႇတေႃႇမူးၼၼ်ႉ ပၼ်ၸရိပ်ႈတၢင်းၵိၼ် ဢိၵ်ႇတင်း လၢၵ်ႈသွင်ႇ တီႈမၼ်းသေလႄႈ ပွႆႇမၼ်းသေဢေႃႈ။-

6မိူဝ်ႈၼၼ်ႉ ယေႇရမီႉ ၵႂႃႇၸူးၵႃႈတီႈ ၵေႇတလီႉ လုၵ်ႈၸၢႆး ဢႁီႉၵမ်ႇ ၵႃႈတီႈဝဵင်း မီႉၸပႃႇ ၼၼ်ႉလႄႈ ယူႇလူၺ်ႈၵၼ်တင်းၵူၼ်း တင်းလၢႆ ဢၼ်ယင်းၵိုတ်းယင်းၵျၢၼ်ႇ ၵႃႈၼႂ်းမိူင်းၸဝ်ႈၼၼ်ႉဢေႃႈ။

7မိူဝ်ႈဢၼ်တပ်ႉမူးၵႃႈမီး ဢိၵ်ႇတင်း ႁူဝ်ႁၢၼ်ၵူၼ်းသိုၵ်း ဢၼ်မီးၵႃႈတီႈထိူၼ်ႇၸိူဝ်းၼၼ်ႉ ငိၼ်းလွင်ႈဢၼ် ၶုၼ်ႁေႃၶမ်း ပႃႇပူႉလုၼ်ႇ ဢဝ် ၵေႇတလီႉ လုၵ်ႈၸၢႆး ဢႁီႉၵမ်ႇ ၶၢၼ်းဝႆႉႁႂ်ႈပဵၼ် ၵေႃႉဢၼ်ဢုပ်ႉ ၵႃႈၼိူဝ်မိူင်းလႄႈ ဢဝ်ၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇ၊ ၵူၼ်းဢၼ်ယၢၵ်ႈဢၼ်ၽၢၼ် ဢၼ်ဢမ်ႇပႃးလူၺ်ႈၵၼ်တင်း ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ ၸိူဝ်းၼၼ်ႉ ဢၢပ်ႈဝႆႉၵႃႈၼႂ်းမိုဝ်းမၼ်းၼၼ်ႉၸိုင်၊-

8ၶဝ်ၼၼ်ႉ ဢၼ်ဝႃႈ ဢီႉသမေႇလႃႉ လုၵ်ႈၸၢႆး ၼႃႇသၼီႉ၊ ယေႃးႁၼၼ်ႇ တင်း ယေႃးၼသၼ်ႇ လုၵ်ႈၸၢႆး ၵႃႇရႃႇ၊ ၸရႃႇယႃႉ လုၵ်ႈၸၢႆး တႃႇၼူႉမိတ်ႉ ၊ လုၵ်ႈၸၢႆး ဢေးၽေႇ ၵူၼ်းမဵဝ်း ၼေႇတေႃႇၽတ်ႉ တင်းလၢႆ ယေႇၸၼီႉ လုၵ်ႈၸၢႆးၵူၼ်းမဵဝ်း မႃႇၶသီႉ ၸိူဝ်းၼၼ်ႉ ဢိၵ်ႇလူၺ်ႈၵၼ် တင်းၵူၼ်းၶဝ်တင်းလၢႆ ဢွၼ်ၵၼ်မႃးၸူး ၵႃႈတီႈ ၵေႇတလီႉ ၵႃႈတီႈဝဵင်း မီႉၸပႃႇ ၼၼ်ႉလႄႈ၊-

9ၵေႇတလီႉ လုၵ်ႈၸၢႆး ဢႁီႉၵမ်ႇ ဢၼ်ပဵၼ် လုၵ်ႈၸၢႆး သႃႇၽၢၼ်ႇ ၼၼ်ႉ တိူင်ႇဝႃႈၵိၼ်ႇဝႃႈတီႈၶဝ် ဢိၵ်ႇတင်း ၵူၼ်းၶဝ်တင်းလၢႆလႄႈဝႃႈ၊ သူယႃႇပေဢွၼ်ၵၼ်မႆႈၸႂ် လူၺ်ႈလွင်ႈဢၼ် တၵ်းလႆႈၵိုတ်ႉႁၢပ်ႇ ဢမူႉၶုၼ် ၶႃႇလတေး ၼၼ်ႉ။ ဢွၼ်ၵၼ်ယူႇ ၵႃႈၼႂ်းမိူင်းၼႆႉလႄႈ ၵိုတ်ႉႁၢပ်ႇဢမူႉၶုၼ်ႁေႃၶမ်း ပႃႇပူႉလုၼ်ႇ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တၵ်းပဵၼ်ဢၼ် ၵတ်းယဵၼ်ၶျၢမ်းသႃႇ ပုၼ်ႈသူဢေႃႈ။-

10ၵဝ်ၸမ်ႉ၊ တၵ်းယူႇၵႃႈတီႈဝဵင်း မီႉၸပႃႇ ၼႆႉ ႁႂ်ႈလႆႈၸုၵ်းၶၢမ်ႇဢဝ် ဢမိင်ႉၵူၼ်း ၶႃႇလတေး တင်းလၢႆ ဢၼ်တၵ်းမႃးၸူးတီႈႁဝ်းၼၼ်ႉဢေႃႈ။ သူၸမ်ႉ၊ ဢွၼ်ၵၼ်သိမ်းဢဝ် ၼမ်ႉၸပိတ်ႈ၊ မၢၵ်ႇၶိင်ႇမႆႈ မၢၵ်ႇၶိင်ႇႁိုဝ်ႉ တင်းၼမ်ႉမၼ်းလႄႈ သႂၢင်းသႂ်ႇဝႆႉၵႃႈၼႂ်းမေႃႈသူ ဢုမ်သူသေလႄႈ ယူႇၵႃႈၼႂ်းဝဵင်း ဢၼ်သူၶိုၼ်းၶဝ်ႈယူႇ မိူဝ်ႈလဵဝ်ၼႆႉၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။-

11လိူဝ်သေၼၼ်ႉ မိူဝ်ႈဢၼ်ၵူၼ်း ယူႉတႃႉ ၵႃႈဢၼ်မီးယူႇၵႃႈၼႂ်း မိူင်း မေႃႇၽႃႉ ၊ ၵႃႈၼႂ်းမိူင်း ဢမ်ႇမုၼ်ႇ ၊ ၵႃႈၼႂ်းမိူင်း ဢေႇတုမ်ႇ ၊ ဢိၵ်ႇတင်းၵႃႈၼႂ်း ၵူႈသိုင်ႇၵူႈမိူင်းၸိူဝ်းၼၼ်ႉ ငိၼ်းလွင်ႈဢၼ် ၶုၼ်ႁေႃၶမ်း ပႃႇပူႉလုၼ်ႇ ႁႂ်ႈၵူၼ်းၵမ်ႈၽွင်ႈ ၵိုတ်းၵျၢၼ်ႇဝႆႉ ၵႃႈၼႂ်းမိူင်း ယူႉတႃႉ လႄႈ ဢဝ် ၵေႇတလီႉ လုၵ်ႈၸၢႆး ဢႁီႉၵမ်ႇ ဢၼ်ပဵၼ်လုၵ်ႈၸၢႆး သႃႇၽၢၼ်ႇ ၶၢၼ်းဝႆႉႁႂ်ႈပဵၼ်ၶုၼ် ၵႃႈၼိူဝ်ၶဝ်ၼၼ်ႉၸိုင်၊-

12ၵူၼ်း ယူႉတႃႉ တင်းသဵင်ႈတင်းလူင် လုၵ်ႉသေၵႃႈတီႈမိူင်း ၵႃႈဢၼ်ၶဝ်လႆႈၶၢမ်ႇတၢင်းဢၼ် ႁေႃႈဢွၵ်ႇၸူးၼၼ်ႉၸိူဝ်းၼၼ်ႉ ၶိုၼ်းမႃးလႄႈ ႁွတ်ႈထိုင်ၵႃႈတီႈမိူင်း ယူႉတႃႉ ၸူးၵႃႈတီႈ ၵေႇတလီႉ ၵႃႈၼႂ်းဝဵင်း မီႉၸပႃႇ ၼၼ်ႉ သေလႄႈ ဢွၼ်ၵၼ်သိမ်းဢဝ် ၼမ်ႉၸပိတ်ႈ ဢိၵ်ႇတင်း မၢၵ်ႇၶိင်ႇမႆႈ မၢၵ်ႇၶိင်ႇႁိုဝ်ႉ ဢၼ်ၼမ်ၼႃႇလူင်လၢင်ၼၼ်ႉ ဢေႃႈ။

13လိုၼ်းၼၼ်ႉ ယေႃးႁၼၼ်ႇ လုၵ်ႈၸၢႆး ၵႃႇရႃႇ ၼၼ်ႉ ဢိၵ်ႇတင်းတပ်ႉမူး ၵႃႈဢၼ်မီးၵႃႈတီႈထိူၼ်ႇ ၸိူဝ်းၼၼ်ႉ ဢွၼ်ၵၼ်မႃးၸူးၵႃႈတီႈ ၵေႇတလီႉ ၵႃႈတီႈဝဵင်း မီႉၸပႃႇ ၼၼ်ႉလႄႈ လဝ်ႊထၢမ်လႄႈဝႃႈ၊-

14ၸဝ်ႈႁဝ်းႁူႉလွင်ႈဢၼ် ပႃလဵတ်ႉ ၶုၼ်ႁေႃၶမ်း ဢမ်ႇမုၼ်ႇ ပွႆႇၸႂ်ႉ ဢီႉသမေႇလႃႉ လုၵ်ႈၸၢႆး ၼႃႇသၼီႉ ၼၼ်ႉ မႃးႁႂ်ႈလႆႈဢဝ် ၸဝ်ႈႁဝ်းတၢႆၼၼ်ႉ ဢမၢၼ်ႇၶၼ်ပဵၼ်ယဝ်ႉၶႃႈႁိုဝ်။ ဝႃႈၼင်ႇၼႆသေၵေႃႈ၊ ၵႂၢမ်းၼၼ်ႉၸိုင်၊ ၵေႇတလီႉ လုၵ်ႈၸၢႆး ဢႁီႉၵမ်ႇ ၼၼ်ႉ ဢမ်ႇယုမ်ႇၶဝ်။-

15မိူဝ်ႈၼၼ်ႉ ယေႃးႁၼၼ်ႇ လုၵ်ႈၸၢႆး ၵႃႇရႃႇ ၼၼ်ႉ တဵတ်ႇတဵတ်ႇလဝ်ႊလၢတ်ႈတီႈ ၵေႇတလီႉ ၵႃႈၼႂ်းဝဵင်း မီႉၸပႃႇ လႄႈဝႃႈ၊ ပၼ်ဢၶႂၢင်ႉ ဢၼ်ၵဝ်ၶႃႈလႆႈၵႂႃႇလႄႈ ဢဝ် ဢီႉသမေႇလႃႉ လုၵ်ႈၸၢႆး ၼႃႇသၼီႉ ၼၼ်ႉတၢႆသေၵမ်း။ ၽူႈလႂ်သေၵေႃႉသေၵူၼ်း ဢမ်ႇလႆႈႁူႉလွင်ႈမၼ်းၶႃႈၵူၺ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းတၵ်းလႆႈဢဝ် ၸဝ်ႈႁဝ်းတၢႆလႄႈ ႁႂ်ႈၵူၼ်း ယူႉတႃႉ ၵႃႈဢၼ်ၸူႉၵၼ်တုမ်ၵၼ် ယူႇၵႃႈတီႈၸဝ်ႈႁဝ်းၸိူဝ်းၼႆႉ လႆႈၶၢမ်ႇတၢင်းဢၼ် ၸၢတ်ႇပိုၼ်ပႅတ်ႈသေယဝ်ႉ၊ ႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇ ၵႃႈတီႈမိူင်း ယူႉတႃႉ ၼႆႉၸိူဝ်းၼၼ်ႉ လႆႈလူႉလႅဝ်ၼင်ႇႁိုဝ်ၶႃႈ၊ ဝႃႈၼင်ႇၼႆသေၵေႃႈ။-

16ၵေႇတလီႉ လုၵ်ႈၸၢႆး ဢႁီႉၵမ်ႇ ၶိုၼ်းလၢတ်ႈတီႈ ယေႃးႁၼၼ်ႇ လုၵ်ႈၸၢႆး ၵႃႇရႃႇ လႄႈဝႃႈ၊ မႂ်းဢမ်ႇလႆႈႁဵတ်း ၸိူဝ်ႉၼင်ႇၼၼ်။ မႂ်းၶိုၼ်းလၢတ်ႈၵႂၢမ်း ဢၼ်ဢမ်ႇၸိုဝ်ႈဢမ်ႇၸႂ်ႈလူၺ်ႈလွင်ႈ ဢီႉသမေႇလႃႉ ၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 39 Jump to: Chapter 41 →