Jeremiah 31 — Shan

1ထႃႇဝရႃႉၽြႃး မီးဢမိင်ႉၸမ်ႉ၊ ၶိင်ႇမိူဝ်ႈၼၼ်ႉ ၵဝ်တၵ်းပဵၼ် ၽြႃးပဵၼ်ၸဝ်ႈ တီႈမဵဝ်းပီႈမဵဝ်းၼွင်ႉ ၸိူဝ်ႉၶိူဝ်း ဢီႉသရေႇလႃႉ တင်းသဵင်ႈတင်းလူင်လႄႈ ၶဝ်ၼၼ်ႉ တၵ်းဢွၼ်ၵၼ်ပဵၼ်ၵူၼ်းၵဝ်ဢေႃႈ။-

2လႆႈသမ်ႉ ထႃႇဝရႃႉၽြႃး မီးဢမိင်ႉၸမ်ႉ၊ ၵူၼ်းတင်းလၢႆ ဢၼ်ၵၢင်းလွတ်ႈတင်း ၽေးလၢပ်ႇၽေးလႅဝ်း ဢၼ်ဝႃႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ လႆႈၶၢမ်ႇၵျေးၸူး ၵႃႈတီႈထိူၼ်ႇၼႂ်းမိူဝ်ႈဢၼ်ၵဝ်ၵႂႃႇ ႁႂ်ႈလႆႈပၼ် ၵတ်းယဵၼ်ၶျၢမ်းသႃႇၼၼ်ႉယဝ်ႉ။-

3ထႃႇဝရႃႉၽြႃးပေႃႇမႃးတီႈၵဝ် မိူဝ်ႈၵွၼ်ႇဢွၼ်ၼႆႉၼၼ်ႉလႄႈ မီးဢမိင်ႉဝႃႈၸမ်ႉ၊ ၵဝ်ဢဝ်တင်းမႅတ်ႈတႃႇ ထႃႇဝရႃႉႁၵ်ႉပႅင်းမႂ်း ဢမၢၼ်ႇၶၼ်ပဵၼ်ဢေႃႈ။ ပိူဝ်ႈၼႆလႄႈ ၵဝ်ၼႄပျႃး ၵျေးၸူးၵရူႉၼႃႇၵဝ် တီႈမႂ်းႁိုင်ၼႃႇဢေႃႈ။-

4ၵၼ်ႇၺႃႇလုၵ်ႈယိင်းသၢဝ် ဢီႉသရေႇလႃႉ ဢိူၺ်း၊ ၵဝ်တၵ်းသမ်ႉၶိုၼ်းတႄႇႁဵတ်းမႂ်းလႄႈ မႂ်းတၵ်းႁွတ်ႈထိုင်တၢင်းဢၼ်တႄႇႁဵတ်းဢေႃႈ။ မႂ်းတၵ်းသမ်ႉၶိုၼ်းလႆႈ ႁၢင်ႈၶိူင်ႈၵွင်ၶဵတ်ႇယူႇ၊ ၵႃႈဝႅၼ်ၸွမ်းလူၺ်ႈၵၼ် တင်းၶဝ်ၸိူဝ်းဢၼ်ႁဵတ်း တၢင်းဢၼ်သႂၢင်ႇသိူဝ်းၼၼ်ႉယူႇ သေလႄႈၵႂႃႇပႆဢေႃႈ။-

5မႂ်းတၵ်းသမ်ႉၶိုၼ်း လႆႈၽုၵ်ႇသွမ်ႈ သူၼ်ဢူးယဵၼ်ႇၸပိတ်ႈ ၵႃႈၼိူဝ်လွႆ သမႃႇရီႉ ထႅင်ႈလႄႈ ၶဝ်ၸိူဝ်းဢၼ် ႁဵတ်းသူၼ်ဢူးယဵၼ်ႇၼၼ်ႉ တၵ်းဢွၼ်ၵၼ်ၽုၵ်ႇသွမ်ႈသေလႄႈ ၵိၼ်မၢၵ်ႇမၼ်း ၸွမ်းလူၺ်ႈဢလူဝ်ႇမႂ်းဢေႃႈ။-

6မိုဝ်ႉဝၼ်းဢၼ်ၵူၼ်းပႂ်ႉၵၢင် ၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၸိူဝ်းၼၼ်ႉ တၵ်းႁွင်ႉသႅၼ်ႇလႄႈလၢတ်ႈဝႃႈ၊ ဢွၼ်ၵၼ်လုၵ်ႉလႄႈ ၶိုၼ်ႈၸူးၵႃႈတီႈလွႆ ၸီႉဢုၼ်ႇ တီႈဢၼ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းမီးၼၼ်ႉ တႃႉႁဝ်း၊ ဝႃႈၼင်ႇၼႆၼၼ်ႉ တၵ်းႁွတ်ႈထိုင်ဢေႃႈ။-

7ထႃႇဝရႃႉၽြႃး မီးဢမိင်ႉၸမ်ႉ၊ ဢွၼ်ၵၼ်ႁဵတ်းၵႂၢမ်းဢၼ် သႂၢင်ႇသိူဝ်းၼႃႇလူင်လၢင် တီႈမဵဝ်း ယႃႇၵုပ်ႈ လႄႈ ပၢဝ်ႇသေႃႇတီႈၸိၵ်းၸွမ်ၵူၼ်း ၵူႈၸိူဝ်ႉၵူႈမဵဝ်းၼၼ်ႉတႃႉ။ ဢွၼ်ၵၼ်မွၵ်ႇလၢတ်ႈသေလႄႈ ယွင်ႈယေႃးလႄႈ ဢွၵ်ႇသူပ်းဝႃႈ ထႃႇဝရႃႉၽြႃး တီႈၶႃႈ၊ ၶႅၼ်းတေႃႈ ၵႄႇသႄႇၶျွတ်ႈဢဝ် ၵူၼ်းၸဝ်ႈႁဝ်းဢၼ်ဝႃႈ ၵူၼ်းမဵဝ်း ဢီႉသရေႇလႃႉ ဢၼ်ယင်းၵိုတ်းယင်းၵျၢၼ်ႇ ၸိူဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆတႃႉ။-

8တူၺ်းလူး၊ ၵဝ်တၵ်းဢဝ်ၶဝ် ဢွၵ်ႇသေၵႃႈတီႈမိူင်းတၢင်းႁွင်ႇလႄႈ သိမ်းဢဝ်ၶဝ်ဢွၵ်ႇသေ ၵႃႈတီႈႁိမ်း ၸဵင်ႇသုတ်းလိၼ်မိူင်းပုၼ်ႉ မႃးဢေႃႈ။ ၵေႃႉဢၼ်တႃမွတ်ႇ၊ ၵေႃႉဢၼ်တိၼ်ၵႅင်ႉ၊ မႄႈယိင်းဢၼ်ပႃးတွင်ႉ၊ မႄႈယိင်းဢၼ်ၶၢမ်ႇဝူၺ်ႇတၼႃႇ တၢင်းဢၼ် ၵိူတ်ႇလဵင်ႉလုၵ်ႈလဵင်ႉလၢင်း ၸိူဝ်းၼၼ်ႉၵေႃႈ ပႃးမႃးလူၺ်ႈၵၼ်တင်းၶဝ်လႄႈ ပဵၼ်မုၵ်ႉပဵၼ်ၸိူဝ်း ဢၼ်ယႂ်ႇၼႃႇသေလႄႈ ဢွၼ်ၵၼ်ၶိုၼ်းမႃးဢေႃႈ။-

9ၶဝ်တၵ်းဢွၼ်ၵၼ် ႁႆႈႁွင်ႉယူႇသေလႄႈ မႃးလႄႈ ၵဝ်တၵ်းဢဝ်တၢင်းဢၼ် ၶဝ်ႁဵတ်းသူးတွင်းပထၼႃႇ ၸိူဝ်းၼၼ်ႉ ဢဝ်ၶဝ်သူင်ႇဢေႃႈ။ ၵဝ်တၵ်းႁႂ်ႈၶဝ် တႆႇၸွမ်းႁိမ်းၼမ်ႉႁွင်ႈၼမ်ႉၵႄး ၵႃႈၼႂ်းသဵၼ်ႈတၢင်းဢၼ်သိုဝ်ႈလီ ဢၼ်ဢမ်ႇလႆႈတိူဝ်ႉမႅၼ်ႈလႄႈ လူမ်ႉၼၼ်ႉဢေႃႈ။ လွင်ႈမၼ်းၸမ်ႉ ၵဝ်ပဵၼ်ပေႃႈမဵဝ်း ဢီႉသရေႇလႃႉ လႄႈ မဵဝ်း ဢေႇၽရိမ်ႇ ၼၼ်ႉ ပဵၼ်လုၵ်ႈၸၢႆးတူၼ်ႈၵဝ်ဢေႃႈ။-

10မဵဝ်းၵူၼ်းၼမ်ၼႃႇၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃးလႄႈ ႁွင်ႉပၢဝ်ႇႁွင်ႉသေႃႇ ၵႃႈၼႂ်းၵုၼ်ဢၼ်မီး ၵႃႈၼႂ်းပၢင်ႇလၢႆႇၸိူဝ်းၼၼ်ႉသေလႄႈ မွၵ်ႇလၢတ်ႈလႄႈဝႃႈ၊ ၸဝ်ႈဢၼ်ဢဝ်မဵဝ်း ဢီႉသရေႇလႃႉ ၸၢတ်ႇပိုၼ်ပႅတ်ႈၼၼ်ႉ တၵ်းသမ်ႉၶိုၼ်းၸူႉသိမ်းသေလႄႈ ပႂ်ႉယူႇၸိူဝ်ႉၼင်ႇဢၼ် ၵူၼ်းဢၼ်လဵင်ႉသူဝ်းထိင်းသူဝ်း ပႂ်ႉၽုင်သူဝ်းမၼ်းယူႇၼၼ်ႉဢေႃႈ၊ ဝႃႈၼင်ႇၼႆတႃႉ။-

11လွင်ႈမၼ်းၸမ်ႉ ထႃႇဝရႃႉၽြႃး ထုတ်ႇၼုၵ်ႈဢဝ် မဵဝ်း ယႃႇၵုပ်ႈ လႄႈ ၵႄႇၶျွတ်ႈၼုၵ်ႈဢဝ်မၼ်း ဢွၵ်ႇသေၵႃႈၼႂ်း မိုဝ်းၵေႃႉဢၼ် ႁႅင်းယႂ်ႇၼႃႇသေမၼ်း ၼၼ်ႉယဝ်ႉ။-

12ပိူဝ်ႈၼႆလႄႈမဵဝ်းၵူၼ်းၸိူဝ်းၼၼ်ႉ တၵ်းဢွၼ်ၵၼ်မႃးသေလႄႈ ႁဵတ်းၵႂၢမ်းၵႃႈၼိူဝ်ၸိၵ်းၸွမ်လွႆ ၸီႉဢုၼ်ႇ လႄႈ တၵ်းၸူႉၵၼ်တုမ်ၵၼ် ႁႂ်ႈလႆႈၶၢမ်ႇၵျေးၸူးတၢင်းဢၼ် ထႃႇဝရႃႉၽြႃး ႁဵတ်းဢၼ်ဝႃႈ ၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႈ၊ ၼမ်ႉမၼ်း၊ သူဝ်းဢွၼ်ႇ၊ ဝူဝ်းဢွၼ်ႇၸိူဝ်းၼၼ်ႉဢေႃႈ။ ၸႂ်ဝီႉၺိၺ်ႇၶဝ်ၼၼ်ႉ တၵ်းပဵၼ်ၸိူဝ်ႉၼင်ႇသူၼ်ဢူးယဵၼ်ႇ ဢၼ်ႁူတ်းၼမ်ႉၼၼ်ႉလႄႈ ၵမ်းလိုၼ်းတၵ်းဢမ်ႇလႆႈမီး တၢင်းဢၼ်ႁဵဝ်ႇဢၼ်ၸွပ်ႈ။-

13မိူဝ်ႈၼၼ်ႉၵၼ်ႇၺႃႇလုၵ်ႈယိင်းသၢဝ် တၵ်းၵႃႈဝႅၼ်ယူႇသေလႄႈ မူၼ်ႈပျေႃႇလူၺ်ႈၵၼ် တင်းၵူၼ်းၼုမ်ႇၵူၼ်းၵမ် ၵူၼ်းထဝ်ႈၵူၼ်းၵႄႇတင်းလၢႆလႄႈ ၵဝ်တၵ်းႁႂ်ႈလွင်ႈတၢင်းဢၼ် ၶဝ်ၶၢင်းၶီၶၢင်းၽၢၼ်ၼၼ်ႉ ပဵၼ်တၢင်းဢၼ်ၸူမ်းသိူဝ်းဢေႃႈ။ ၵဝ်တၵ်းႁဵတ်းႁႂ်ႈ ၸႂ်ၶဝ်သၢၵ်ႈသႃႇလႄႈ ႁႂ်ႈၶဝ်သႂၢင်ႇသိူဝ်း ၼႂ်းတၢင်းဢၼ် ငိၼ်းၶီငိၼ်းၽၢၼ် ၶဝ်ၼၼ်ႉဢေႃႈ။-

14ၵဝ်တၵ်းႁႂ်ႈႁူဝ်ၸႂ်ယိတ်ႈပရေႃးႁဵၵ်ႈ တင်းလၢႆ ထၼ်ႈပေႃးမိူဝ်ႇ ပေႃးၸၢၼ်ႈ လူၺ်ႈၼိူဝ်ႉဢၼ်ပီးလီ မၼ်းလီၼၼ်ႉလႄႈ ၵူၼ်းၵဝ်တင်းလၢႆၵေႃႈ တၵ်းဢိမ်ႇတဵမ်ဝႆႉတင်း ၵျေးၸူးၵဝ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

15ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼႂ်းတီႈ ရႃႇမႃႉ လႆႈငိၼ်းသဵင်ပွင်ႉသဵင်ၶၢင်း၊ သဵင်ႁွင်ႉသဵင်ႁႆႈလႄႈ ရႃႇၶေႇလႃႉ ပိူဝ်ႈဢၼ်လုၵ်ႈလၢင်းတူဝ်ၸဝ်ႈၵဝ်ႇတင်းလၢႆ ဢမ်ႇမီးၼၼ်ႉလႄႈႁႆႈယူႇ ဢမ်ႇပေႇၸႂ်လႆႈ။-

16ထႃႇဝရႃႉၽြႃး မီးဢမိင်ႉၸမ်ႉ၊ မႂ်းယိူၼ်ႉၵၼ်ႈသဵင်သူပ်းမႂ်း ၼႂ်းတၢင်းဢၼ်ႁႆႈဢၼ်ႁွင်ႉလႄႈ ယိူၼ်ႉၵၼ်ႈမၢၵ်ႇတႃမႂ်း ၼႂ်းတၢင်းဢၼ်ၼမ်ႉတႃတူၵ်းၼၼ်ႉတႃႉ။ တၢင်းဢၼ်မႂ်းၵမ်ၵျၢင်ႉၼၼ်ႉ တၵ်းပဵၼ်ဢၵျူဝ်းတီႈမႂ်းလႄႈ ၶဝ်ၼၼ်ႉ တၵ်းဢွၼ်ၵၼ်လုၵ်ႉသေ ၵႃႈတီႈမိူင်းရၢၼ်ႇသူႇ ၶိုၼ်းမႃးဢေႃႈ။-

17မီးလွင်ႈဢၼ် မုင်ႈထႃႈမွင်းထႃႈ ၼႂ်းတီႈဢၼ်သုတ်းဢၼ်ၵွႆမႂ်းၼၼ်ႉဢေႃႈ။ လုၵ်ႈမႂ်းလၢင်းမႂ်းၸိူဝ်းၼၼ်ႉ တၵ်းဢွၼ်ၵၼ်ၶိုၼ်းမႃးၵႃႈတီႈ မိူင်းဢၼ်ၶဝ်ယူႇၵဝ်ႇၵဝ်ႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

18ၵဝ်လႆႈငိၼ်း ဢေႇၽရိမ်ႇ တၢင်ႇဢပႅတ်ႈတီႈ တူဝ်ၸဝ်ႈၵဝ်ႇလႄႈ ပွင်ႉၶၢင်းပွင်ႉမိူၼ်ႇလႄႈဝႃႈၸမ်ႉ၊ ၸဝ်ႈႁဝ်းသင်ႇသွၼ်သုင်းမႃႉ ၶႃႈၸဝ်ႈလႄႈ ၶႃႈၸဝ်ႈလႆႈၶၢမ်ႇတၢင်းဢၼ် သင်ႇသွၼ်သုင်းမႃႉ မိူၼ်ၸိူဝ်ႉၼင်ႇဝူဝ်းဢွၼ်ႇ ဢၼ်ႁႄၼၼ်ႉတီႈၶႃႈယဝ်ႉ။ၶႅၼ်းတေႃႈ ဢဝ်ၶႃႈၸဝ်ႈဝၢႆႇၶိုၼ်းသေၵမ်းတီႈၶႃႈ၊ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈတၵ်းဝၢႆႇၶိုၼ်းတီႈၶႃႈဢေႃႈ။ ၸဝ်ႈႁဝ်းပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈ ၵဝ်ၶႃႈတီႈၶႃႈဢေႃႈ။-

19လိုၼ်းသေ ဢၼ်ၶႃႈၸဝ်ႈဝၢႆႇၶိုၼ်းယဝ်ႉၼၼ်ႉ၊ ၶႃႈၸဝ်ႈၶုၵ်းၸႂ်လႆႈမႆႈၸႂ် ဢမၢၼ်ႇၶၼ်ပဵၼ်တီႈၶႃႈဢေႃႈ။ လိုၼ်းသေဢၼ်ၶႃႈၸဝ်ႈလႆႈၶၢမ်ႇတၢင်းဢၼ် မၼ်းၸဝ်ႈသင်ႇသွၼ်သုင်းမႃႉယဝ်ႉၼၼ်ႉ၊ ၶႃႈၸဝ်ႈပေႃႉယႅၼ်ႉသၼ်ၶႃ တူဝ်ၸဝ်ႈၵဝ်ႇတီႈၶႃႈဢေႃႈ။ ၶႃႈၸဝ်ႈဢူၵ်းဢၢႆလႄႈ မီးတၢင်းဢၼ်ငိူဝ်ႈယူႇငဝ်ယူႇ ၵွပ်ႈပိူဝ်ႈဢၼ် ၶႃႈၸဝ်ႈလႆႈၶၢမ်ႇတၢင်းဢၼ် သရေႇလူႉလူၺ်ႈလွင်ႈ ဢပႅတ်ႈဢၼ်ၶႃႈၸဝ်ႈႁဵတ်းမႅၼ်ႈ ၼႂ်းမိူဝ်ႈဢၼ်ဢသၢၵ်ႈ ယင်းလဵၵ်ႉယင်းဢွၼ်ႇၼၼ်ႉ တီႈၶႃႈဢေႃႈ၊ ဝႃႈၼင်ႇၼႆၼၼ်ႉဢမၢၼ်ႇၶၼ်ပဵၼ်ယဝ်ႉ။-

20ဢေႇၽရိမ်ႇ ၼၼ်ႉ ပဵၼ်လုၵ်ႈၸၢႆးဢၼ်ၵဝ်ႁၵ်ႉႁိုဝ်။ ပဵၼ်လုၵ်ႈဢွၼ်ႇ ဢၼ်လီထုၵ်ႇၸႂ်ၵျိူၵ်ႈၸႂ်ႁိုဝ်။ ၵဝ်ၶုၵ်းၸႂ်လႆႈၶႆႈၸႂ်ထူပ်းမၼ်း ၼႂ်းမိူဝ်ႈဢၼ်ၵဝ်လၢတ်ႈလွင်ႈမၼ်းၼၼ်ႉ ၵူႈပွၵ်ႈဢေႃႈ။ ပိူဝ်ႈၼႆလႄႈ ႁူဝ်ၸႂ်ၵဝ်မီးတၢင်းဢၼ် ၸွၼ်မႆႈၸွၼ်ၶီပုၼ်ႈမၼ်းလႄႈ ၵဝ်တၵ်းၵႄႇသႄႇ ဢဵတ်းလူမၼ်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

21မႂ်းပၵ်းသဝ်မၢတ်ႈသဝ်တွင်းတင်းလၢႆ ၵႃႈတီႈသဵၼ်ႈတၢင်းလႄႈ ပူၵ်းသဝ်လိၵ်ႈသဝ်လၢႆးတႃႉ။ ႁႂ်ႈၸႂ်မႂ်းၸပ်းၸွႆး သဵၼ်ႈတၢင်းလူင် ဢၼ်ဝႃႈ သဵၼ်ႈတၢင်းဢၼ်မႂ်း လႆႈၸွမ်းၵႂႃႇၼၼ်ႉတႃႉ။ ၵၼ်ႇၺႃႇလုၵ်ႈယိင်းသၢဝ် ဢီႉသရေႇလႃႉ ဢိူၺ်း၊ ဝၢႆႇၶိုၼ်းမႃးတႃႉ။ ဝၢႆႇၶိုၼ်းမႃးၸူးၵႃႈတီႈဝဵင်းတီႈယူႇတီႈသဝ်းမႂ်းၸိူဝ်းၼႆႉတႃႉ။-

22လုၵ်ႈယိင်းဢၼ်ၽွၵ်ႈပျၢၼ်ႇၶိုၼ်းၼႆႉဢိူၺ်း၊ မႂ်းတၵ်းလႄႇၵႂႃႇလႄႇမႃး ယူႇၶိင်ႇၵႃႇလႃႉႁိုင်ၼႃႇၵႃႈႁိုဝ်။ ထႃႇဝရႃႉၽြႃး တၵ်းၸီႇယၢင်ႇ လွင်ႈတၢင်းဢၼ်မႂ်ႇ ၵႃႈၼိူဝ်လိၼ်မိူင်းလႄႈ မႄႈယိင်းတၵ်းလွမ်ႉလဵပ်ႈႁွပ်ႈၵူၼ်းၸၢႆးဢေႃႈ။

23ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉၸမ်ႉ၊ ယၢမ်းမိူဝ်ႈဢၼ်ၵဝ်သိမ်းဢဝ် ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ ၶိုၼ်းမႃးၼၼ်ႉၸိုင်၊ ၶဝ်ၸိူဝ်းဢၼ်ယူႇၵႃႈၼႂ်းဝၢၼ်ႈဝဵင်း မိူင်း ယူႉတႃႉ တင်းလၢႆၼၼ်ႉ တၵ်းဢွၼ်ၵၼ်သုင်းသွင်ႇ ၵႂၢမ်းဢၼ်လၢတ်ႈလႄႈဝႃႈ၊ ထႃႇၼႃႉတီႈယူႇတၢင်းဢၼ်သိုဝ်ႈတေႃႇဢိူၺ်း၊ လွႆတီႈယူႇတၢင်းဢၼ် မူတ်းၸၢင်ႇဢိူၺ်း၊ ႁႂ်ႈထႃႇဝရႃႉၽြႃး ပၼ်တၢင်းလီတီႈမႂ်း သေၵမ်းလူၺ်ႈ၊ ဝႃႈၼင်ႇၼႆၼၼ်ႉဢေႃႈ။-

24မိူင်း ယူႉတႃႉ ဢိၵ်ႇတင်း ဝၢၼ်ႈဝဵင်းမၼ်းၵႃႈမီးၼၼ်ႉ တၵ်းလႆႈယူႇပႃးလူၺ်ႈၵၼ်တင်း ၶဝ်ၸိူဝ်းဢၼ်ႁဵတ်းႁႆႊႁဵတ်းၼႃး တင်းၶဝ်ၸိူဝ်းဢၼ် ပႃးဢဝ်ၽုင်သူဝ်းလႄႇလဵင်ႉလႄႇၵိၼ်တင်းလၢႆဢေႃႈ။-

25ၵဝ်ႁႂ်ႈၶဝ်ၸိူဝ်းဢၼ် ႁိူဝ်ႉၸႂ်ဢူၼ်ႈၸႂ်ၼၼ်ႉ လႆႈၵိၼ်ဢိမ်ႇၵိၼ်တဵမ်လႄႈ ႁႂ်ႈၶဝ်ၸိူဝ်းဢၼ်ႁဵဝ်ႇၸွပ်ႈၵႃႈမီးၼၼ်ႉ သၢၵ်ႈသႃႇဢေႃႈ၊ ဝႃႈၼင်ႇၼႆဢေႃႈ။-

26လိုၼ်းၼၼ်ႉ ၵဝ်တိုၼ်ႇမႃးလႄႈ လူတူၺ်းသေယဝ်ႉ၊ တၢင်းဢၼ်ၼွၼ်းလပ်းၵဝ်ၼၼ်ႉ ပဵၼ်ဢၼ်ၶိုတ်းၸႂ်ပဵင်းၸႂ်ၵဝ် ဢေႃႈ။-

27ထႃႇဝရႃႉၽြႃး မီးဢမိင်ႉၸမ်ႉ၊ မိုဝ်ႉဝၼ်းဢၼ်ၵဝ် တၵ်းဝၢၼ်ႇပိုၼ်ၸိူဝ်ႉၽၼ်းၵူၼ်း ဢိၵ်ႇတင်း ၸိူဝ်ႉၽၼ်း တရိၵ်ႈသၢၼ်ႇ ၵႃႈတီႈ မဵဝ်း ဢီႉသရေႇလႃႉ တင်းမဵဝ်း ယူႉတႃႉ ၼၼ်ႉ တၵ်းႁွတ်ႈထိုင်ဢေႃႈ။-

28မိူၼ်ၸိူဝ်ႉၼင်ႇဢၼ် ၵဝ်ပႂ်ႉတူၺ်းလုမ်းလႃး တၢင်းဢၼ်ၼုၵ်ႈပႅတ်ႈ၊ ၵိူၼ်ႇတူၵ်း၊ ပိၼ်ႈႁၢႆ၊ ယႃႉပႅတ်ႈ၊ ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉ ၵဝ်တၵ်းပႂ်ႉတူၺ်းလုမ်းလႃး တၢင်းဢၼ်တႄႇႁဵတ်းၽုၵ်ႇသွမ်ႈဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

29ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ ၶဝ်ဢမ်ႇလႆႈဢွၼ်ၵၼ်လၢတ်ႈလႄႈဝႃႈ၊ ၵေႃႉဢၼ်ပဵၼ်ပေႃႈ တင်းလၢႆ ၵိၼ်မၢၵ်ႇၸပိတ်ႈဢၼ်သူမ်ႈလႄႈ ၶဝ်ၸိူဝ်းဢၼ် ပဵၼ်လုၵ်ႈပဵၼ်လၢင်းၼၼ်ႉ လႆႈၶၢမ်ႇတၢင်းဢၼ် ၶဵဝ်ႈမူၺ်ႈၶဵဝ်ႈၵႅၼ်းဢေႃႈ၊ ဝႃႈၼင်ႇၼႆၼၼ်ႉ။-

30ၵူႈၵေႃႉၵူႈၵူၼ်း တၵ်းလႆႈတၢႆၵွပ်ႈပိူဝ်ႈဢပႅတ်ႈ တူဝ်ၸဝ်ႈၵဝ်ႇလႄႈ ၵေႃႉဢၼ်ၵိၼ်မၢၵ်ႇၸပိတ်ႈ ဢၼ်သူမ်ႈၵူႈၵေႃႉၵူႈၵူၼ်းတူဝ်ၸဝ်ႈၵဝ်ႇ တၵ်းလႆႈၶၢမ်ႇတၢင်းဢၼ် ၶဵဝ်ႈမူၺ်ႈၶဵဝ်ႈၵႅၼ်းဢေႃႈ။-

31ထႃႇဝရႃႉၽြႃး မီးဢမိင်ႉၸမ်ႉ၊ ၶိင်ႇၵႃႇလႃႉမိုဝ်ႉဝၼ်းဢၼ် ၵဝ်တၵ်းဢဝ် ပတီႉၺိၺ်ႇတြႃးဢၼ်မႂ်ႇ

32ဢၼ်ပႅၵ်ႇပိူင်ႈၵၼ် တင်း ပတီႉၺိၺ်ႇတြႃး ဢၼ်ၵဝ်ပၼ်တီႈပူႇမွၼ်ႇ ၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆ ယၢမ်းမိူဝ်ႈဢၼ် ၵဝ်တိုတ်ႉၸုင်ဢဝ်မိုဝ်းၶဝ် ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ ၵႂႃႇၼၼ်ႉ ပၼ်တီႈၵူၼ်းမဵဝ်း ဢီႉသရေႇလႃႉ ဢိၵ်ႇတင်း ၵူၼ်းမဵဝ်း ယူႉတႃႉ တင်းလၢႆၼႆႉၼၼ်ႉ တၵ်းႁွတ်ႈထိုင်ဢေႃႈ။ ၶဝ်ယႃႉပႅတ်ႈပတီႉၺိၺ်ႇတြႃး ဢၼ်ယၢမ်ႈပၼ် မိူဝ်ႈဢွၼ်တၢင်း ၼၼ်ႉလႄႈ ၵဝ်ၵေႃႈ လီႁင်ႈဢဵတ်ႇသဵတ်ႇၶဝ်ဢေႃႈ။-

33ပတီႉၺိၺ်ႇတြႃး ဢၼ်ၵဝ်တၵ်းပၼ်တီႈၵူၼ်းမဵဝ်း ဢီႉသရေႇလႃႉ မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်ႉ၊ ၵဝ်ထႃႇဝရႃႉၽြႃး တၵ်းဢဝ်ပိင်းၺၢပ်ႈတြႃးၵဝ် သႂၢင်းသႂ်ႇပၼ်ၵႃႈၼႂ်းၶဝ်ဢေႃႈ။ တၵ်းတႅမ်ႈသႂ်ႇဝႆႉ ၵႃႈၼိူဝ်ႁူဝ်ၸႂ်ၶဝ်ဢေႃႈ။ ၵဝ်တၵ်းပဵၼ်ၽြႃးၶဝ်လႄႈ ၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။-

34ၶဝ်ၼၼ်ႉမဵဝ်းၸိူဝ်ႉၶိူဝ်းၵၼ်၊ ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းဢမ်ႇလႆႈပၼ် သုင်းမႃႉဢေႃးဝႃႇတႃႉ တီႈၵၼ်လႄႈဝႃႈ၊ ႁူႉထႃႇဝရႃႉၽြႃးတႃႉ၊ ဝႃႈၼင်ႇၼႆၼၼ်ႉ။ လွင်ႈမၼ်းၸမ်ႉ ၶဝ်ၵႃႈမီးတင်းသဵင်ႈတင်းလူင် ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈ တေႃႇထိုင်ႁွတ်ႈၵေႃႉဢၼ်ယႂ်ႇသေပိူၼ်ႈၼၼ်ႉ တၵ်းႁူႉၵဝ်ယူႇဢေႃႈ။ မိူဝ်ႈၼၼ်ႉ ၵဝ်တၵ်းယိူၼ်ႉၶၢမ်ႇဢပႅတ်ႈၶဝ်လႄႈ တၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်း တၢင်းဢၼ် ၶဝ်ၽိတ်းပိူင်ႈပူၼ်ႉလိူဝ် တင်းလၢႆၼၼ်ႉ လႄႈယူႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

35ထႃႇဝရႃႉၽြႃး ဢၼ်ၶၢၼ်းၵၢင်ဝၼ်းဝႆႉပုၼ်ႈ ဢၼ်တၵ်းလႅင်းထွင်ႇၶိင်ႇၵႃဝၼ်းလႄႈ ၸီႇယၢင်ႇႁဵတ်းပဵၼ်လိူၼ် ဢိၵ်ႇတင်း လၢဝ်တင်းလၢႆ ပုၼ်ႈဢၼ်တၵ်းလႅင်းထွင်ႇ ၶိင်ႇၵႃၶိုၼ်း၊ ဢၼ်သင်ႇသွၼ်သုင်းမႃႉ သမ်ႇမုၵ်ႉတြႃႇ ၼႂ်းမိူဝ်ႈဢၼ်လႅင်းၼမ်ႉပိူပ်ႈၼမ်ႉ ႁွင်ႉယူႇၶၢင်းယူႇ၊ ဢၼ်မီးၼႃႇမႃႉၸိုဝ်ႈသဵင် ဢၼ်ထႃႇဝရႃႉၽြႃးၼၼ်ႉ မီးဢမိင်ႉၸမ်ႉ၊-

36ပေႃးထုင်းၽိင်ႈတြႃး ၸိူဝ်းၼၼ်ႉလပ်ႉႁၢႆၵႂႃႇသေ ၵႃႈတီႈၽၢႆႇၼႃႈၵဝ်ၸိုင်၊ မဵဝ်း ဢီႉသရေႇလႃႉ တၵ်းလႆႈသုတ်းသေထၢတ်ႇသေ တၢင်းဢၼ်ပဵၼ်မဵဝ်းၵူၼ်းၼၼ်ႉ ၵႃႈတီႈၽၢႆႇၼႃႈၵဝ်ယူႇတႃႇသေႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

37လႆႈသမ်ႉ ထႃႇဝရႃႉၽြႃး မီးဢမိင်ႉၸမ်ႉ၊ ပေႃးတႅၵ်ႈၶိုပ်ႈ ၽႃႉၵၢင်ႁၢဝ်ၵႃႈၼိူဝ်လႆႈ၊ ပေႃးၸွမ်းငဝ်ႈႁၢၵ်ႈလိၼ်မိူင်းၵႃႈတႂ်ႈသုတ်းလႄႈ ၸႅတ်ႈတူၺ်းလႆႈၸိုင်၊ ၵဝ်တၵ်း ၸုၼ်ႉပႅတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၵွပ်ႈပိူဝ်ႈ ဢပႅတ်ႈၵႃႈဢၼ်ၶဝ် ႁဵတ်းမႅၼ်ႈၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

38လႆႈသမ်ႉ ထႃႇဝရႃႉၽြႃး မီးဢမိင်ႉၸမ်ႉ၊ မိုဝ်ႉဝၼ်းဢၼ်တၵ်းလႆႈ ႁဵတ်းဝဵင်းၸဝ်ႈပုၼ်ႈ ထႃႇဝရႃႉၽြႃး ၸႃႉၸဵမ်တိူၵ်ႈတီႈတိုၵ်းသိုၵ်း ႁႃႇၼၼေႇလႃႉ တေႃႇထိုင်ႁွတ်ႈ ၽၵ်းတူဝဵင်းၼၼ်ႉ တၵ်းႁွတ်ႈထိုင်ဢေႃႈ။-

39ၸိူၵ်ႈမႆမီႈ တၵ်းလႆႈမီးတၢင်းဢၼ်ၶဵင်ႈၸူး ၵႃႈတီႈလွႆ ၵႃႇရိပ်ႉ သိုဝ်ႈသိုဝ်ႈလႄႈ သမ်ႉငႅၵ်းၸူးၵႃႈတီႈလွႆ ၵေႃးသႃႉ ဢေႃႈ။-

40ၶူင်ႈႁူၺ်ႈတီႈဢၼ် ဢဝ်တူဝ်တၢႆတင်းလၢႆ ဢိၵ်ႇတင်း တဝ်ႈၸုၼ်ႉပႅတ်ႈၼၼ်ႉတင်းသဵင်ႈတင်းမူတ်း ဢိၵ်ႇတင်း တီႈပၢင်ႇတီႈပဵင်းၵႃႈမီး တေႃႇထိုင်ႁွတ်ႈၼမ်ႉႁွင်ႈ ၵီႉတြုၼ်ႇ ဢၼ်ဝႃႈ ၸဵင်ႇဝဵင်းဢၼ်မီးၽၵ်းတူမႃႉ ၵႃႈတီႈၽၢႆႇဝၼ်းဢွၵ်ႇၼၼ်ႉ ၸိူဝ်းၼၼ်ႉ တၵ်းဢွၼ်ၵၼ်မူတ်းၸၢင်ႇပုၼ်ႈ ထႃႇဝရႃႉၽြႃးဢေႃႈ။ ၵမ်းလိုၼ်းဢမ်ႇလႆႈမီး တၢင်းဢၼ်ထူၺ်ႈထွၼ် ၼုၵ်ႈပႅတ်ႈ တၢင်းဢၼ်ၵိူၼ်ႇယႃႉ ၶျႃးတူၵ်းလႃးလႃး၊ ဝႃႈၼင်ႇၼႆဢေႃႈ။