Jeremiah 20

Shan

← Chapter 19 Jump to: Chapter 21 →

1ၼင်ႇၼၼ်လႄႈ ပႃႇသူႉရႃႉ လုၵ်ႈၸၢႆးယိတ်ႈပရေႃးႁဵၵ်ႈ ဢီႉမေႇရႃႉ ဢၼ်ပဵၼ်ၶုၼ်ပိၵ်ႈမၢၼ်ႇ ထႃႇဝရႃႉၽြႃး ၼၼ်ႉငိၼ်း ယေႇရမီႉ ႁေႃးလၢတ်ႈၸိူဝ်ႉၼင်ႇၼၼ် ၼၼ်ႉလႄႈ၊-

2ပႃႇသူႉရႃႉ ၼၼ်ႉ ပေႃႉထုပ်ႉပရေႃးၽႅတ်ႈ ယေႇရမီႉ သေလႄႈ ဢဝ်သႂ်ႇထိၵ်ႈဝႆႉ ၵႃႈၼႂ်းႁူးၽၵ်းတူ ပိၼ်ႇယႃႇမိၼ်ႇ ႁၢၼ်ႉၼိူဝ်ၵႃႈတီႈႁိမ်းႁိူၼ်း ထႃႇဝရႃႉၽြႃး ၼၼ်ႉဢေႃႈ။-

3ဝၼ်းမိူဝ်ႈၽုၵ်ႈ၊ ပႃႇသူႉရႃႉ ပွႆႇ ယေႇရမီႉ သေၵႃႈတီႈထိၵ်ႈၼၼ်ႉလႄႈ၊ ယေႇရမီႉ လၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ဢမ်ႇႁွင်ႉႁဵၵ်ႈတၢင်ႇပၼ်ၸိုဝ်ႈမႂ်းလႄႈဝႃႈ၊ ပႃႇသူႉရႃႉ ၊ မၼ်းၸဝ်ႈႁွင်ႉႁဵၵ်ႈ တၢင်ႇပၼ်ၸိုဝ်ႈမႂ်ႇလႄႈဝႃႈ၊ မႃႇၵေႃးမဵတ်ႈသၽႅပ်ႉ ၊ ဝႃႈၼင်ႇၼႆဢေႃႈ။-

4ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းႁႂ်ႈမႂ်းပဵၼ် လွင်ႈဢၼ်လီၵူဝ်လီႁႄတူဝ်မႂ်း ဢိၵ်ႇတင်း တီႈၵေႃႉသေႈမႂ်းတင်းလၢႆဢေႃႈ။ ၶဝ်တၵ်းဢွၼ်ၵၼ်တူၵ်းသုမ်းလူၺ်ႈလၢပ်ႇလူၺ်ႈလႅဝ်းရၢၼ်ႇသူႇၶဝ်လႄႈ မၢၵ်ႇတႃမႂ်းတၵ်းလႆႈႁၼ်ဢေႃႈ။ ၵဝ်တၵ်းဢဝ် မိူင်း ယူႉတႃႉ တင်းမိူင်း ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်း ပႃႇပူႉလုၼ်ႇ လႄႈ၊ မၼ်းၼၼ်ႉတၵ်းသိမ်းဢဝ်ၶဝ် ၵႂႃႇတီႈမိူင်း ပႃႇပူႉလုၼ်ႇ သေလႄႈ၊ ဢဝ်ၶဝ်တၢႆ လူၺ်ႈလၢပ်ႇလူၺ်ႈလႅဝ်းဢေႃႈ။-

5ၵဝ်တၵ်းဢဝ် ၸေးၸိမ်ႇဝဵင်းၼႆႉၵႃႈမီး၊ ဢုၵ်ႉၸႃႇၵႃႈဢၼ်ႁဵတ်းလႄႈလႆႈ၊ ရတ်ႈတၼႃႇၵႃႈဢၼ်ၵဵပ်းဝႆႉႁွမ်ဝႆႉ ဢၼ်ဝႃႈၽၼ်ႇတႃႇၶုၼ်ႁေႃၶမ်း ယူႉတႃႉ ၵူႈၸိူဝ်ႉၵူႈပိူင် ၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ် ဢၼ်တၵ်းႁိမ်ႁူင်ႇဢဝ်ၶဝ်လႄႈ သိမ်းဢဝ်ၶဝ်ၵႂႃႇၵႃႈတီႈဝဵင်း ပႃႇပူႉလုၼ်ႇ ၸိူဝ်းၼၼ်ႉဢေႃႈ။-

6မႂ်း ပႃႇသူႉရႃႉ ဢိၵ်ႇတင်းၵူၼ်းႁိူၼ်းၵူၼ်းယေးမႂ်း တင်းသဵင်ႈတင်းလူင်ၵေႃႈ တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ။ မႂ်းတၵ်းလႆႈႁွတ်ႈထိုင် ၵႃႈတီႈဝဵင်း ပႃႇပူႉလုၼ်ႇ ပုၼ်ႉလႄႈ မႂ်းဢိၵ်ႇတင်း ၵေႃႉသေႈမႂ်း ဢၼ်မႂ်းဢဝ်ၵႂၢမ်းမူႉသႃႇ ႁေႃးလၢတ်ႈတီႈၶဝ်ၼၼ်ႉ တင်းသဵင်ႈတင်းလူင်ၼၼ်ႉ တၵ်းလႆႈတၢႆ ၵႃႈတီႈဝဵင်းၼၼ်ႉသေ ၶၢမ်ႇတၢင်းဢၼ်သၢင်းၵျူဝ်ႇ ၵႃႈတီႈၼၼ်ႈဢေႃႈ၊ ဝႃႈၼင်ႇၼႆဢေႃႈ။

7ထႃႇဝရႃႉၽြႃး တီႈၶႃႈ၊ ၸဝ်ႈႁဝ်းတိုၵ်းယူင်းၸူဝ်းဢဝ် ၶႃႈၸဝ်ႈလႄႈ၊ ၶႃႈၸဝ်ႈၸွမ်းတီႈၶႃႈယဝ်ႉ။ ၸဝ်ႈႁဝ်းႁႅင်းယႂ်ႇ လိူဝ်တွၼ်းၼႃႇသေ ၶႃႈၸဝ်ႈလႄႈ ပႄႉၼႅင်ႇတီႈၶႃႈယဝ်ႉ ၶႃႈၸဝ်ႈလႆႈၶၢမ်ႇတၢင်းဢၼ် သႄႉသွမ်းယူႇ တင်းဝၼ်းတင်းဝၼ်းလႄႈ၊ ၵူႈၵေႃႉၵူႈၵူၼ်း ၸၢင်ႈဢွၼ်ၵၼ်ႁဵတ်းတၢင်းဢၼ် ယဝ်ႉလဵၼ်ႈယွၵ်ႇလဵၼ်ႈ ၶႃႈၸဝ်ႈတီႈၶႃႈဢေႃႈ။-

8ၼႂ်းမိူဝ်ႈဢၼ် ၶႃႈၸဝ်ႈႁေႃးလၢတ်ႈ ၵူႈပွၵ်ႈၵူႈပွၵ်ႈၼၼ်ႉ ၶႃႈၸဝ်ႈသႅၼ်ႇႁွင်ႉတီႈၶႃႈဢေႃႈ။ ၶႃႈၸဝ်ႈႁွင်ႉပၢဝ်ႇႁွင်ႉသေႃႇလႄႈဝႃႈ၊ ပဵၼ်ဢမူႉတၢင်းဢၼ်ၼိၵ်ႈၸၢၵ်ႈငႅၼ်းသႄး၊ ဢမူႉတၢင်းဢၼ် ႁိမ်ဢဝ်ႁူင်ႇဢဝ်ဢေႃႈ၊ ဝႃႈၼင်ႇၼႆတီႈၶႃႈဢေႃႈ။ လွင်ႈမၼ်းၸမ်ႉ ၼုၵ်ႈၵပၢတ်ႈ ထႃႇဝရႃႉၽြႃးၼၼ်ႉ ပဵၼ်လွင်ႈဢၼ်လီသႄႉသွမ်း၊ လွင်ႈဢၼ်လီ ယဝ်ႉလဵၼ်ႈယွၵ်ႇလဵၼ်ႈ တီႈၶႃႈၸဝ်ႈယူႇၵူႈဝၼ်း ၵူႈဝၼ်း တီႈၶႃႈဢေႃႈ။-

9ပိူဝ်ႈၼႆလႄႈ ပိၵ်ႉသမ်ႉၵဝ် ဝႆႉသၽေႃးလႄႈဝႃႈ၊ ၵဝ်ယင်းဢမ်ႇမွၵ်ႇဢမ်ႇလၢတ်ႈလွင်ႈမၼ်းၸဝ်ႈ၊ ယင်းဢမ်ႇဢိင် ၼႃႇမႃႉၸိုဝ်ႈသဵင်မၼ်းၸဝ်ႈ သေလႄႈ ႁေႃးလၢတ်ႈလႄႈတၵ်းယူႇယဝ်ႉ၊ ဝႃႈၼင်ႇၼႆသေၵေႃႈ၊ ၵႃႈၼႂ်းႁူဝ်ၸႂ်ၵဝ်ၼႆႉ ပဵၼ်ၸိူဝ်ႉၼင်ႇၽႆးဢၼ်မႆႈယူႇလႄႈ မူၵ်းဝႆႉၵႃႈၼႂ်းလုပ်ႇၵဝ်တင်းလၢႆၼၼ်ႉလႄႈ ပဵၼ်ဢၼ်ႁိူဝ်ႉဢူၼ်ႈၼႃႇလူင်လၢင် ၵွပ်ႈပိူဝ်ႈ ဢၼ်ယိူၼ်ႉၵၼ်ႈယူႇၼၼ်ႉလႄႈ ဢမ်ႇၶၢမ်ႇလႆႈ။-

10ၵဝ်လႆႈငိၼ်း တၢင်းဢၼ်ပိူၼ်ႈသႄႉသွမ်း တၢင်ႇဢပႅတ်ႈ၊ တၢင်းဢၼ်မီးလွင်ႈဢၼ် လီၵူဝ်လီႁႄ ၵူႈၽၢႆႇၵူႈပႃႈဢေႃႈ။ ပိူၼ်ႈဢွၼ်ၵၼ်လၢတ်ႈလႄႈဝႃႈ၊ ဢွၼ်ၵၼ်လၢတ်ႈၵႂၢမ်းတၢင်ႇဢပႅတ်ႈတႃႉ။ ႁဝ်းတၵ်ႉလၢတ်ႈ ၵႂၢမ်းတၢင်ႇဢပႅတ်ႈတီႈမၼ်းဢေႃႈ၊ ဝႃႈၼင်ႇၼႆဢေႃႈ။ ၵေႃႉသေႈၵဝ် တင်းသဵင်ႈတင်းလူင် ဢွၼ်ၵၼ်ပႂ်ႉထႃႈလွင်ႈဢၼ် ၵဝ်တၵ်းလူမ်ႉတၵ်းတူၵ်းၼၼ်ႉ ယူႇသေလႄႈဝႃႈ၊ မၼ်းၸၢင်ႈၶႄး တၵ်းၶၢမ်ႇတၢင်းဢၼ် တိုၵ်းယူင်းၸူဝ်းဢဝ်လႄႈ ႁဝ်းတၵ်းပႄႉၼႅင်ႇမၼ်းလႄႈ ႁႂ်ႈၸႂ်ဢၼ်ဝႆႉတၢင်းၽိတ်းႁဝ်းၼၼ်ႉ ထၼ်ႈပေႃးပေႇဢေႃႈ၊ ဝႃႈၼင်ႇၼႆဢေႃႈ။-

11ၼႂ်းဝႃႈၼၼ်သေၵေႃႈ ထႃႇဝရႃႉၽြႃး ပဵၼ်ၵူၼ်းသိုၵ်း ဢၼ်ႁႅင်းယႂ်ႇၼႃႇလႄႈ လီၵူဝ်လီႁႄၼၼ်ႉ ယူႇၽၢႆႇၵဝ်ဢေႃႈ။ ပိူဝ်ႈၼႆလႄႈ ၶဝ်ၸိူဝ်းဢၼ် ၼိၵ်ႈၸၢၵ်ႈငႅၼ်းသႄးၵဝ်ၼၼ်ႉ ယင်းဢမ်ႇပႄႉဢမ်ႇၼႅင်ႇလႄႈ တၵ်းဢွၼ်ၵၼ် တိူဝ်ႉမႅၼ်ႈလႄႈလူမ်ႉဢေႃႈ။ ၵွပ်ႈပိူဝ်ႈဢၼ် တၢင်းၵျၢမ်ႇတၢင်းပွင်ၶဝ် ဢမ်ႇထိုင်တီႈၼၼ်ႈလႄႈ ၶဝ်တၵ်းမီး တၢင်းဢၼ်ဢူၵ်းဢၼ်ဢၢႆ ထႃႇဝရႃႉ ဢၼ်ဢမ်ႇပေႇဢမ်ႇႁၢႆလႆႈၼၼ်ႉလႄႈ ဢွၼ်ၵၼ်ဢူၵ်းဢၢႆၼႃႇလူင်လၢင်ဢေႃႈ။-

12ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ဢၼ်ၸၢမ်းတူၺ်း ၶဝ်ၸိူဝ်းဢၼ်သိုဝ်ႈတေႃႇၼၼ်ႉလႄႈ ႁူႉႁၼ်သၽေႃးမၢၵ်ႇလၼ်း ႁူဝ်ၸႂ်တီႈၶႃႈ၊ ႁႂ်ႈၶႃႈၸဝ်ႈလႆႈႁၼ်လွင်ႈဢၼ်ၸဝ်ႈႁဝ်း ၸီႇယၢင်ႇတၢမ်ႇဢပႅတ်ႈတီႈၶဝ်ၼၼ်ႉ သေၵမ်းလူၺ်ႈ။ လွင်ႈမၼ်းၸမ်ႉ ၶႃႈၸဝ်ႈၽုၺ်ႇဢွၵ်ႇၼႄပျႃးဢမူႉၶႃႈၸဝ်ႈ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈယဝ်ႉ။-

13ဢွၼ်ၵၼ်ႁဵတ်းၵႂၢမ်းတီႈ ထႃႇဝရႃႉၽြႃးတႃႉ။ ဢွၼ်ၵၼ်ယွင်ႈယေႃး ထႃႇဝရႃႉၽြႃးတႃႉ။ လွင်ႈမၼ်းၸမ်ႉ မၼ်းၸဝ်ႈၵႄႇသႄႇၼုၵ်ႈဢဝ် ဝီႉၺိၺ်ႇၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ ဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ် ႁဵတ်းဢမ်ႇတြႃးၼၼ်ႉဢေႃႈ။-

14ႁႂ်ႈမိုဝ်ႉဝၼ်းဢၼ်ၵဝ် ၵိူတ်ႇလဵင်ႉမႃးၼၼ်ႉ မီးဢႃႉမင်ႇၵလႃႇသေၵမ်းလူၺ်ႈ။ ယႃႇပေႁႂ်ႈမိုဝ်ႉဝၼ်းဢၼ် မႄႈၵဝ်ၵိူတ်ႇလဵင်ႉၵဝ်မႃးၼၼ်ႉ မီးမင်ႇၵလႃႇသေၵမ်း။-

15ႁႂ်ႈၵေႃႉဢၼ်မွၵ်ႇလၢတ်ႈ သတၢင်းသဵင်ၶၢဝ်ႇ တီႈပေႃႈၵဝ်လႄႈဝႃႈ၊ ၸဝ်ႈလႆႈလုၵ်ႈၸၢႆးယဝ်ႉ၊ ဝႃႈၼင်ႇၼႆသေလႄႈ ႁႂ်ႈမၼ်းၸူမ်းသိူဝ်း ၼႃႇလူင်လၢင်ၼၼ်ႉ မီးဢႃႉမင်ႇၵလႃႇ သေၵမ်းလူၺ်ႈ။-

16ႁႂ်ႈၵေႃႉၼၼ်ႉ ပဵၼ်ၸိူဝ်ႉၼင်ႇ ဝဵင်းဢၼ် ထႃႇဝရႃႉၽြႃး ယႃႉပႅတ်ႈလႄႈ ဢမ်ႇၶိုၼ်းၶုၵ်းၸႂ်လႆႈမႆႈၸႂ်လူၺ်ႈ ၸိူဝ်းၼၼ်ႉသေၵမ်းလူၺ်ႈ။ ႁႂ်ႈမၼ်းငိၼ်းသဵင်ဢၼ် ႁွင်ႉပၢဝ်ႇႁွင်ႉသေႃႇၶိင်ႇၵၢင်ၼႂ်လႄႈ ငိၼ်းသဵင်ဢၼ်ႁွင်ႉသႅၼ်ႇ ႁွင်ႉၵိဝ် ၶိင်ႇၵၢင်ဝၼ်းတဵင်ႈသေၵမ်းလူၺ်ႈ။-

17လွင်ႈမၼ်းၸမ်ႉ မၼ်းယင်းဢမ်ႇဢဝ်ၵဝ်တၢႆ ၸႃႉၸဵမ်မိူဝ်ႈဢၼ်ၵဝ်ယင်း မီးယူႇၵႃႈၼႂ်း တွင်ႉမႄႈၵဝ်ၼၼ်ႉ ႁႂ်ႈတွင်ႉမႄႈၵဝ်ၼၼ်ႉ ပဵၼ်ပႃႇႁဵဝ်ႈသၢင်းၶႅင်းၵဝ်လႄႈ တွင်ႉမၼ်းၼၼ်ႉ ပဵၼ်ဢၼ်ယႂ်ႇယူႇၵႂ်ႈယူႇသေႇသေႇ လူင်ပႄႇ။-

18ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၵဝ်လႆႈဢွၵ်ႇၵႃႈၼႂ်းတွင်ႉမႃး ႁႂ်ႈၵဝ်လႆႈထူပ်းႁၼ် ၵၢၼ်တၢင်းႁဵတ်းတၢင်းသၢင်ႈ ဢၼ်ယၢပ်ႇ ဢၼ်ၽိုတ်ႇ ဢိၵ်ႇတင်း တၢင်းဢၼ်မႆႈၸႂ်ၶီၸႂ် ႁႂ်ႈထၼ်ႈပေႃး မိုဝ်ႉဝၼ်းၵဝ် ဢူၵ်းဢၢႆယူႇသေလႄႈ ပူၼ်ႉၵႂႃႇ ၼင်ႇႁိုဝ်။

← Chapter 19 Jump to: Chapter 21 →

Recommended Reading

Commentary Jeremiah Commentaries → Devotional Jeremiah Devotional Guide → Get This Bible Shan Study Bible →