Proverbs 11

Shan

← Chapter 10 Jump to: Chapter 12 →

1ယွႆးဢၼ်ဢမ်ႇမၢၼ်ႇဢမ်ႇမႅၼ်ႈၼၼ်ႉ ပဵၼ်တီႈဢၼ် ထႃႇဝရႃႉၽြႃးလီႁင်ႈဢဵတ်ႇသဵတ်ႇလႄႈ လုၵ်ႈၶၼ်ဢၼ်ၸေးၸုမ်ႇၼၼ်ႉၸမ်ႉ၊ ပဵၼ်တီႈဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ဢေႃႈ။-

2မိူဝ်ႈဢၼ်မႃႇၼႃႉပူၵ်းပႅၼ်ၼၼ်ႉၸိုင်၊ ၸၢင်ႈပဵၼ်တၢင်းဢၼ်လီဢူၵ်းလီဢၢႆလႄႈ တီႈၶဝ်ၸိူဝ်းဢၼ် ၸႂ်ၶျႃးတႅမ်ႇၼၼ်ႉၸမ်ႉ၊ ပိင်ႇၺႃႇမီးဢေႃႈ။-

3သၽေႃးတၢင်းဢၼ်ၸေးၸုမ်ႇ ဢၼ်မီးတီႈၶဝ် ၸိူဝ်းဢၼ်သိုဝ်ႈတေႃႇၼၼ်ႉ ၸၢင်ႈဢဝ်ၶဝ်သူင်ႇလႄႈ သၽေႃးတၢင်းဢၼ်ၵူတ်ႉဢၼ်ငေႃး၊ ဢၼ်မီးတီႈၶဝ်ၸိူဝ်းဢၼ်ပႅတ်ႉလႅၼ်ၼၼ်ႉၸမ်ႉ၊ ၸၢင်ႈယႃႉၶဝ်ပႅတ်ႈဢေႃႈ။-

4ၸေးၸိမ်ႇဢုၵ်ႉၸႃႇဢမ်ႇပၼ်ဢၵျူဝ်း ၼႂ်းမိုဝ်ႉဝၼ်းဢၼ်တေႃးသႃႉတၢင်းၸႂ်မႆႈဢွၵ်ႇၼၼ်ႉလႆႈလႄႈ ပႃႇရမီႇတၢင်းဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈၵႄႇသႄႇၼုၵ်ႈဢဝ် သေၵႃႈၼႂ်းတၢင်းတၢႆဢေႃႈ။-

5ပႃႇရမီႇတၢင်းဢၼ်သိုဝ်ႈတေႃႇဢၼ်မီးတီႈၶဝ် ၸိူဝ်းဢၼ်ၸေးၸုမ်ႇၼၼ်ႉ ၸၢင်ႈႁႂ်ႈသဵၼ်ႈတၢင်းၶဝ်သိုဝ်ႈလီလႄႈ၊ ၵေႃႉဢၼ်ဢမ်ႇတြႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်သုမ်းဢၼ်ၸွမ်း ၵွပ်ႈပိူဝ်ႈလွင်ႈတၢင်းဢၼ် ဢမ်ႇတြႃးတူဝ်ၸဝ်ႈၵဝ်ႇၼၼ်ႉဢေႃႈ။-

6ပႃႇရမီႇတၢင်းဢၼ်သိုဝ်ႈတေႃႇ ဢၼ်မီးတီႈၶဝ် ၸိူဝ်းဢၼ်သိုဝ်ႈလီယူဝ်းလီၼၼ်ႉ ၸၢင်ႈၵႄႇသႄႇ ၼုၵ်ႈဢဝ်ၶဝ်လႄႈ၊ ၶဝ်ၸိူဝ်းဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊ ၸၢင်ႈထုၵ်ႇၶဵၼ်းမႅၼ်ႈ ၵွပ်ႈပိူဝ်ႈတၢင်းဢၼ်ၶဝ်တူၵ်းဢၢင်ႈၶႂ်ႈလႆႈၼၼ်ႉဢေႃႈ။-

7မိူဝ်ႈဢၼ်ၵေႃႉဢၼ်ႁၢႆႉဢၼ်ယုတ်ႈၼၼ်ႉ တၢႆၼၼ်ႉၸိုင်၊ တၢင်းဢၼ်မၼ်းမုင်ႈထႃႈမွင်းထႃႈၼၼ်ႉ တၵ်းလူႉတၵ်းလႅဝ်လႄႈ တၢင်းဢၼ်ၵေႃႉဢၼ်ဢမ်ႇတြႃးၼၼ်ႉ တူၵ်းဢၢင်ႈၶႂ်ႈလႆႈၼၼ်ႉၵေႃႈ ၸၢင်ႈလူႉၸၢင်ႈလႅဝ်ဢေႃႈ။-

8ၵေႃႉဢၼ်သိုဝ်ႈတေႃႇၼၼ်ႉ တၵ်းလွတ်ႈဢွၵ်ႇသေၵႃႈၼႂ်းတုၵ်ႉၶႃႉလႄႈ၊ ၵေႃႉဢၼ်ဢမ်ႇတြႃးၼၼ်ႉ တၵ်းလႆႈၶၢမ်ႇပဵၼ်တၢင်တူဝ်မၼ်းဢေႃႈ။-

9ၵူၼ်းဢႃႉထမ်ႇမႃႉၼၼ်ႉ ၸၢင်ႈယႃႉၽဵဝ်ႈ ၵူၼ်းႁိူၼ်းၸမ်ၵၼ်တင်းမၼ်းပႅတ်ႈ ၵွပ်ႈပိူဝ်ႈသူပ်းမၼ်းလႄႈ ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈလွတ်ႈဢွၵ်ႇ ၵွပ်ႈပိူဝ်ႈတၢင်းဢၼ်ႁူႉဢၼ်ၸႅင်ႈၼၼ်ႉဢေႃႈ။-

10မိူဝ်ႈဢၼ်ၵေႃႉဢၼ်တြႃးၼၼ်ႉ လႆႈလီလႆႈပဵၼ်ၼၼ်ႉၸိုင်၊ ၸၢင်ႈဢွၼ်ၵၼ်ၸူမ်းသိူဝ်းတင်းဝဵင်းလႄႈ မိူဝ်ႈဢၼ်ၵေႃႉဢၼ်ဢမ်ႇတြႃးၼၼ်ႉ သုမ်းၸွမ်းၼၼ်ႉၸမ်ႉ၊ မီးတၢင်းဢၼ်ႁုၼ်ႉဢၼ်ႁိူဝ်ႇဢေႃႈ။-

11ၵွပ်ႈပိူဝ်ႈဢၼ်ၵေႃႉဢၼ်တြႃးၼၼ်ႉ ပၼ်တၢင်းလီၼၼ်ႉလႄႈ ဝဵင်းတီႈယူႇမၼ်း ၸၢင်ႈႁွတ်ႈထိုင်တၢင်းဢၼ်ယုၵ်ႉယွင်ႈဢေႃႈ။ ၵွပ်ႈပိူဝ်ႈသူပ်းၵေႃႉဢၼ်ဢမ်ႇတြႃးၼၼ်ႉလႄႈ ၸၢင်ႈႁွတ်ႈထိုင်တၢင်းဢၼ်ၵိူၼ်ႇယႃႉပႅတ်ႈဢေႃႈ။-

12ၵေႃႉဢၼ်ၸၢင်ႈႁဵတ်းဢမ်ႇပေႃးၼင်ႇႁိုဝ် တီႈၵူၼ်းႁိူၼ်းၸမ်ၵၼ်တင်းမၼ်းၼၼ်ႉ ဢမ်ႇမီးပိင်ႇၺႃႇလႄႈ ၵေႃႉဢၼ်ၺၢၼ်ႇလီၼၼ်ႉၸမ်ႉ၊ ၸၢင်ႈယူႇတဵတ်ႇတဵတ်ႇဢေႃႈ။-

13ၵေႃႉဢၼ်ၸၢင်ႈလႄႇလႄႈ လၢတ်ႈၵႂၢမ်းၼမ်ၼႃႇၼၼ်ႉ ၸၢင်ႈၽုၺ်ႇဢွၵ်ႇၼႄပျႃး လွင်ႈတၢင်းဢၼ် လီသိူင်ႇလီမႅပ်ႉဝႆႉတင်းလၢႆ လႄႈ ၵေႃႉဢၼ်ပႂ်ႉသဵတ်ႈၸႃႇၼၼ်ႉၸမ်ႉ၊ ၸၢင်ႈထိမ်ႇဝႆႉဢမ်ဝႆႉဢေႃႈ။-

14ပေႃးၺၢၼ်ႇဢၼ်ၸၢင်ႈပၼ်တၢင်းၵျၢမ်ႇတၢင်းပွင်လႆႈၼၼ်ႉဢမ်ႇမီးၸိုင်၊ ၵူၼ်းဝၢၼ်ႈၵူၼ်းမိူင်းတင်းလၢႆ ၸၢင်ႈသုမ်းၸၢင်ႈၸွမ်းလႄႈ ပေႃးမီးၶဝ်ၸိူဝ်းဢၼ် ပၼ်တၢင်းၵျၢမ်ႇတၢင်းပွင်ၼၼ်ႉၸိုင် ၸၢင်ႈၵၢင်းလွတ်ႈတင်းၽေးဢေႃႈ။

15မိူဝ်ႈဢၼ်ၵေႃႉဢၼ်ဢမ်ႇတြႃးၼၼ်ႉ ဢႃႇမႃႉၶၢမ်ႇဢဝ်ဢမူႉ ၵေႃႉဢၼ်ဢမ်ႇမိုတ်ႈၵၼ်ၵိုဝ်းၵၼ်တင်းမၼ်းၼၼ်ႉၸိုင်၊ မၼ်းၼႄပျႃးလွင်ႈဢၼ် မၼ်းပဵၼ်ဢၼ်ဢမ်ႇတြႃးၼၼ်ႉလႄႈ ၵေႃႉဢၼ်ၸင်းတၢင်းဢၼ်တူပ်းမိုဝ်းၵၼ်ၼၼ်ႉၸမ်ႉ၊ ဢမ်ႇမီးတီႈလီမႆႈၸႂ်ၶီၸႂ်။-

16မႄႈယိင်းဢၼ်လီထုၵ်ႇၸႂ်ၵျိူၵ်ႈၸႂ်ၼၼ်ႉ ၸၢင်ႈလႆႈမုၼ်သရေႇလႄႈ ၵူၼ်းၸၢႆးဢၼ်ႁႅင်းယႂ်ႇၼႃႇၸိူဝ်းၼၼ်ႉ ၸၢင်ႈလႆႈၸေးၸိမ်ႇဢေႃႈ။-

17ၵေႃႉဢၼ်ၸၢင်ႈဢဵတ်းလူႁၵ်ႉပႅင်းၼၼ်ႉ ၸၢင်ႈႁဵတ်းၵျေးၸူးတီႈတူဝ်ၸဝ်ႈၵဝ်ႇလႄႈ ၵေႃႉဢၼ်ႁၢဝ်ႈၵျၢမ်းၼႃႇၼၼ်ႉၸမ်ႉ၊ ၸၢင်ႈယႃႉယူၵ်ႉတူဝ်မၼ်းဢေႃႈ။-

18ၵေႃႉဢၼ်ဢမ်ႇတြႃးၼၼ်ႉ ၸၢင်ႈလႆႈဢၵျူဝ်းဢၼ်ပႅတ်ႉဢၼ်လႅၼ်လႄႈ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းတြႃးတၢင်းဢၼ်သိုဝ်ႈတေႃႇၼၼ်ႉၸမ်ႉ၊ တၵ်းလႆႈၶၢမ်ႇဢၵျူဝ်းဢၼ်မၼ်ႈဢၼ်ၶိူင်ႇဢေႃႈ။-

19ၸိူဝ်ႉၼင်ႇဢၼ် တြႃးတၢင်းဢၼ်သိုဝ်ႈတေႃႇ ၸၢပ်ႈသႅင်ႇၵၼ်တင်း တၢင်းဢၼ်ဢသၢၵ်ႈလိပ်းၼၼ်ႉ၊ ၵေႃႉဢၼ်ၸွမ်းႁႃတူႉၸရိူၵ်ႈၼၼ်ႉၵေႃႈ ၸၢင်ႈၸွမ်းႁႃတေႃႇထိုင်ႁွတ်ႈမၼ်းထၼ်ႈပေႃးတၢႆဢေႃႈ။-

20ၶဝ်ၸိူဝ်းဢၼ်သၽေႃးၵူတ်ႉငေႃးၼၼ်ႉ ပဵၼ်တီႈဢၼ် ထႃႇဝရႃႉၽြႃးလီႁင်ႈဢဵတ်ႇသဵတ်ႇလႄႈ ၶဝ်ၸိူဝ်းဢၼ်သိုဝ်ႈလီယူဝ်းလီ ၵႃႈၼႂ်းသဵၼ်ႈတၢင်းဢၼ်ၶဝ်ၵႂႃႇၼၼ်ႉၸမ်ႉ၊ ပဵၼ်တီႈဢၼ် မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ဢေႃႈ။-

21ပိၵ်ႉသမ်ႉတူပ်းမိုဝ်းၵၼ်ယဝ်ႉသေၵေႃႈ၊ ၵေႃႉဢၼ်ႁၢႆႉဢၼ်ယုတ်ႈၼၼ်ႉ ဢမ်ႇလႆႈၵၢင်းလွတ်ႈတင်းဢပႅတ်ႈလႄႈ ၸိူဝ်ႉၶိူဝ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်ႉ၊ တၵ်းလႆႈလွတ်ႈဢေႃႈ။-

22မႄႈယိင်းဢၼ်ႁၢင်ႈလီၽၢင်လီလႄႈ ၽၢတ်ႇယၢၼ်ၵၼ်တင်း သမ်ႇမႃႇသတီႉလႄႈယူႇၼၼ်ႉ မိူၼ်ၸိူဝ်ႉၼင်ႇၶိူင်ႈၶမ်းဢၼ်ႁွႆႈသႂ်ႇဝႆႉ ၵႃႈတီႈၽၢႆႇၸုၼ်ႇၶူႈလင်မူၼၼ်ႉဢေႃႈ။-

23တၢင်းဢၼ်ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈတူၵ်းဢၢင်ႈၶႂ်ႈလႆႈၼၼ်ႉ ပဵၼ်ဢၼ်မျၢတ်ႈလီၵူၺ်းလႄႈ၊ တၢင်းဢၼ်ၵေႃႉဢၼ်ဢမ်ႇတြႃးၼၼ်ႉ မုင်ႈထႃႈမွင်းထႃႈၼၼ်ႉၸမ်ႉ၊ ၸၢပ်ႈသႅင်ႇၵၼ်တင်းတေႃးသႃႉတၢင်းၸႂ်မႆႈဢေႃႈ။-

24တၢင်းဢၼ်ၽႄၸွၼ်းယိုၼ်ႈမႅင်ႇယူႇသေၵေႃႈ၊ ဢုၵ်ႉၸႃႇၸၢင်ႈယႂ်ႇၽႄႈၼမ်မႃးယူႇၼၼ်ႉမီးလႄႈ တၢင်းဢၼ်ၸူႉသိမ်းဝႆႉ ဢမ်ႇထုၵ်ႇဢမ်ႇတၢၼ်ႇလႄႈ ၸၢင်ႈႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်ၼၼ်ႉၵေႃႈ မီးဢေႃႈ။-

25ၵေႃႉဢၼ်ၸၢင်ႈပၼ်တၢင်းလီၼၼ်ႉ တၵ်းလိူင်ႇၸႂ်လႄႈ ၵေႃႉဢၼ်ဢဝ်ၼမ်ႉႁူတ်းတီႈပိူၼ်ႈၼၼ်ႉ၊ တူဝ်ၸဝ်ႈၵဝ်ႇ တၵ်းလႆႈၶၢမ်ႇဢၵျူဝ်းတၢင်းဢၼ်ဢဝ်ၼမ်ႉႁူတ်းဢေႃႈ။-

26ၵေႃႉဢၼ်သိမ်းၶဝ်ႈပိူၵ်ႇဝႆႉၼၼ်ႉ တၵ်းလႆႈၶၢမ်ႇတၢင်းဢၼ် ၵူၼ်းတင်းလၢႆသႄႉသွမ်းလႄႈ ၵႃႈၼိူဝ်ႁူဝ်ၵေႃႉဢၼ် ဢဝ်ဢွၵ်ႇၶၢႆပၼ်ၼၼ်ႉၸမ်ႉ၊ တၢင်းလီမင်ႇၵလႃႇတၵ်းမီးဢေႃႈ။-

27ၵေႃႉဢၼ်ၵျူဝ်းၸႃးႁႃ လွင်ႈတၢင်းဢၼ်လီဢၼ်ငၢမ်းၼၼ်ႉ တၵ်းလႆႈၶၢမ်ႇၵျေးၸူးလႄႈ ၵေႃႉဢၼ်ၵျၢမ်ႇႁႃႁႂ်ႈလႆႈယႃႉဢၵျူဝ်းပိူၼ်ႈၼၼ်ႉၸမ်ႉ၊ တၵ်းႁွတ်ႈထိုင်တၢင်းဢၼ် ဢၵျူဝ်းတူဝ်ၸဝ်ႈၵဝ်ႇလူႉဢေႃႈ။-

28ၵေႃႉဢၼ်ဢိင်ပိုင်ႈၸေးၸိမ်ႇတူဝ်ၸဝ်ႈၵဝ်ႇၼၼ်ႉ တၵ်းသုမ်းၸွမ်းလႄႈ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ တၵ်းၶဵဝ်လီတင်ႈလီ မိူၼ်ၸိူဝ်ႉၼင်ႇမႂ်မႆႉဢေႃႈ။-

29ၵေႃႉဢၼ်ယႃႉယူၵ်ႉႁိူၼ်းတူဝ်ၸဝ်ႈၵဝ်ႇၼၼ်ႉ တၵ်းလႆႈၶၢမ်ႇဢမူၺ်ႇလူမ်းထူဝ်းလႄႈ ၵေႃႉဢၼ်မိူၵ်ႈၼၼ်ႉၵေႃႈ တၵ်းလႆႈၶၢမ်ႇႁဵတ်းၶႃႈ တီႈၵေႃႉဢၼ်ႁူဝ်ၸႂ်လၵ်းလႅမ်ၼၼ်ႉဢေႃႈ။-

30မၢၵ်ႇဢၼ်ၵေႃႉဢၼ်သိုဝ်ႈတေႃႇမၢၵ်ႇၼၼ်ႉ ပဵၼ်မၢၵ်ႇတူၼ်ႈဢသၢၵ်ႈလႄႈ ၵေႃႉဢၼ်လႆႈၸႂ်ဝီႉၺိၺ်ႇပိူၼ်ႈၼၼ်ႉ ပဵၼ်ၵေႃႉဢၼ်မီးပိင်ႇၺႃႇဢေႃႈ။-

31တူၺ်းလူး၊ တေႃႈၵႃႈ ၵေႃႉဢၼ်သိုဝ်ႈတေႃႇၼၼ်ႉ ယင်းလႆႈၶၢမ်ႇတၢမ်ႇဢပႅတ်ႈ ၵႃႈၼိူဝ်လိၼ်မိူင်းၼႆႉလႄႈ ၵေႃႉဢၼ်ဢမ်ႇတြႃး ဢိၵ်ႇတင်းၵေႃႉဢၼ်ဢပႅတ်ႈထၢင်ႇသႃးၼၼ်ႉၸမ်ႉ၊ တၵ်းမီးတီႈလၢတ်ႈၸိူဝ်ႉၼင်ႇႁိုဝ်။

← Chapter 10 Jump to: Chapter 12 →