Proverbs 18

Shan

← Chapter 17 Jump to: Chapter 19 →

1ၵေႃႉဢၼ်ၽၢတ်ႇယၢၼ်ၵၼ်တင်းပိူၼ်ႈသေလႄႈ ယူႇၶေႃၶေႃၵူၺ်းမၼ်းၼၼ်ႉ ႁႃဢဝ်ၵႃႈၼင်ႇဢၼ်ဢလူဝ်ႇၸေႇတၼႃႇမၼ်းမီးၼၼ်ႉလႄႈ ၸၢင်ႈၽၢင်ႈတိူဝ်ႉပိင်ႇၺႃႇရတ်ႈတၼႃႇ ၵူႈၸိူဝ်ႉၵူႈပိူင်ဢေႃႈ။-

2ၵေႃႉဢၼ်မိူၵ်ႈၸမ်ႉ၊ ၼွၵ်ႈသေဢၶႂၢင်ႉ ဢၼ်လႆႈၼႄပျႃး ၸႂ်သၽေႃးမၼ်းၼၼ်ႉ ဢမ်ႇၸၢင်ႈမူၼ်ႈပျေႃႇၵႃႈၼႂ်းၺၢၼ်ႇလႃးလႃး။-

3မိူဝ်ႈဢၼ်ၵေႃႉဢၼ်ဢမ်ႇတြႃးၼၼ်ႉမႃးၼၼ်ႉ၊ တၢင်းဢၼ်ႁဵတ်းဢမ်ႇပေႃးၼင်ႇႁိုဝ်ၵေႃႈမႃးလႄႈ မိူဝ်ႈဢၼ်မုၼ်သရေႇလူႉၼၼ်ႉၸမ်ႉ၊ တၢင်းဢၼ်သႄႉသွမ်းၵေႃႈမႃးဢေႃႈ။-

4ၵႂၢမ်းဢၼ်ဢွၵ်ႇသူပ်းၵူၼ်းမႃးၼၼ်ႉ ပဵၼ်ၸိူဝ်ႉၼင်ႇၼမ်ႉဢၼ်လိုၵ်ႉၼႃႇလႄႈ၊ ၼမ်ႉဢွၵ်ႇႁူးပိင်ႇၺႃႇၼၼ်ႉ ပဵၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄး ဢၼ်လႆၸႅဝ်ႈၼၼ်ႉဢေႃႈ။-

5တၢင်းဢၼ်ထွၵ်ႈလူၺ်ႈၼႃႈၵေႃႉဢၼ်ဢမ်ႇတြႃးၼၼ်ႉ ပဵၼ်ဢၼ်ဢမ်ႇလီလႄႈ တၢင်းဢၼ်ႁႂ်ႈၵေႃႉဢၼ်ၸွမ်းတြႃးၼၼ်ႉ သုမ်းၸွမ်းၼႂ်းဢမူႉဢၼ်ထူပ်းတြႃးၼၼ်ႉၵေႃႈ ပဵၼ်ဢၼ်ဢမ်ႇလီ။-

6သီႇသူပ်းၵေႃႉဢၼ်မိူၵ်ႈၼၼ်ႉ ၸၢင်ႈႁဵတ်းတၢင်းဢၼ်ၽိတ်းၵၼ်လႄႈ သူပ်းမၼ်းၵေႃႈ ၸၢင်ႈယွၼ်းဢဝ်တၢမ်ႇဢပႅတ်ႈယူႇဢေႃႈ။-

7သူပ်းၵေႃႉဢၼ်မိူၵ်ႈၼၼ်ႉ ပဵၼ်လွင်ႈတၢင်းဢၼ်လူႉဢၼ်လႅဝ်တီႈမၼ်းလႄႈ သီႇသူပ်းမၼ်းၵေႃႈ၊ ပဵၼ်တူင်ႇႁႅဝ်ႉတူင်ႇၶိုမ်းတီႈဢသၢၵ်ႈမၼ်းဢေႃႈ။-

8ၵႂၢမ်းၵေႃႉဢၼ်သႄႇယူင်းပူင်ၸႃႉၼၼ်ႉ ပဵၼ်ၸိူဝ်ႉၼင်ႇ တၢင်းၵိၼ်ယွႆႈဢၼ်ဝၢၼ်ဢၼ်မၼ်းလႄႈ ၸၢင်ႈၶဝ်ႈၵႂႃႇၵႃႈၼႂ်းတွင်ႉၼႂ်းပုမ်ဢေႃႈ။-

9ၵေႃႉဢၼ်ၶၢၼ်ႉဢၼ်ဢိူၼ် ၼႂ်းမိူဝ်ႈဢၼ်ႁဵတ်းတၢင်းႁဵတ်းၼၼ်ႉ ထုၵ်ႇပဵၼ်ပီႈပဵၼ်ၼွင်ႉၵၼ်တင်းၵေႃႉဢၼ် ႁႂ်ႈဢုၵ်ႉၸႃႇမၼ်း သုမ်းပႅတ်ႈလၢႆလၢႆလွၵ်ႇလွၵ်ႇ ဢမ်ႇပွင်ႇလွင်ႈၵႃႈသင်ၼၼ်ႉဢေႃႈ။-

10ၼႃႇမႃႉၸိုဝ်ႈသဵင်ထႃႇဝရႃႉၽြႃး ပဵၼ်တိူၵ်ႈတီႈတိုၵ်းသိုၵ်းဢၼ်မၼ်ႈဢၼ်ၶိူင်ႇလႄႈ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ ဢွၼ်ၵၼ်ၶုၼ်ႇလႅၼ်ႈၶဝ်ႈသေလႄႈ ၵၢင်းလွတ်ႈတင်းၽေးလႄႈယူႇဢေႃႈ။-

11ၸေးၸိမ်ႇၵေႃႉဢၼ်ၸၢင်ႈမၢၵ်ႈၸၢင်ႈမီးၼၼ်ႉ ပဵၼ်ဝဵင်းဢၼ်မၼ်ႈၶိူင်ႇတီႈမၼ်းလႄႈ ပဵၼ်မိူၼ်ၸိူဝ်ႉၼင်ႇ လမ်းဝဵင်းဢၼ်သုင်ၼႃႇတီႈမၼ်း ၼႂ်းတၢင်းဢၼ်မၼ်းထၢင်ႇၼၼ်ႉဢေႃႈ။-

12တၢင်းဢၼ်ၵူၼ်းၸႂ်သုင်ၼၼ်ႉ ၸၢင်ႈတူၵ်းတီႈတူၵ်းလႅၼ် ဢွၼ်တၢင်းတၢင်းလူႉတၢင်းလႅဝ်လႄႈ တၢင်းဢၼ်ၶျႃးတႅမ်ႇၼၼ်ႉ တူၵ်းတီႈတူၵ်းလႅၼ် ဢွၼ်တၢင်းမုၼ်သရေႇဢေႃႈ။-

13ၵေႃႉဢၼ်ၸီႇယၢင်ႇဢမူႉ ၸူဝ်ႈဢၼ်ဢမ်ႇပႆႇၸႅတ်ႈပႆႇထၢမ် လွင်ႈမၼ်းတၢင်းမၼ်းၼၼ်ႉ မီးဢပႅတ်ႈဢၼ်မိူၵ်ႈ ဢိၵ်ႇတင်း ဢပႅတ်ႈဢၼ်လီဢူၵ်းလီဢၢႆဢေႃႈ။

14ဝီႉၺိၺ်ႇၵူၼ်းၶၢမ်ႇဝူၺ်ႇတၼႃႇမၼ်းလႆႈယူႇလႄႈ ၸႂ်ဢၼ်တႅၵ်ႇလႅဝ်ၼၼ်ႉၸမ်ႉ၊ ၽူႈလႂ်တၵ်းၶၢမ်ႇလႆႈ။-

15ႁူဝ်ၸႂ်ၵေႃႉဢၼ်မီးသမ်ႇမႃႇသတီႉၼၼ်ႉ ၸၢင်ႈသိမ်းတၢင်းဢၼ်ႁူႉဢၼ်ၸႅင်ႈၼၼ်ႉဝႆႉလႄႈ ႁူၵေႃႉဢၼ်မီးပိင်ႇၺႃႇၼၼ်ႉၵေႃႈ ၸၢင်ႈႁႃဢဝ်တၢင်းဢၼ်ႁူႉဢၼ်ၸႅင်ႈဢေႃႈ။-

16လၢၵ်ႈသွင်ႇဢၼ်ပႃးတီႈၵူၼ်းၼၼ်ႉ ၸၢင်ႈႁႂ်ႈသဵၼ်ႈတၢင်းမၼ်းၵဵင်ႈလီၶျေႃးလီလႄႈ ပၼ်ဢၶႂၢင်ႉဢၼ်လႆႈၶဝ်ႈၸူး ၵႃႈတီႈၵူၼ်းယႂ်ႇၵူၼ်းလူင်တင်းလၢႆဢေႃႈ။-

17ၵေႃႉဢၼ်ပႂ်ႉလၢတ်ႈဢမူႉမၼ်းဢွၼ်တၢင်းၼၼ်ႉ၊ ပိၵ်ႉသမ်ႉႁွတ်ႈထိုင်တီႈဢၼ်သိုဝ်ႈတေႃႇသေၵေႃႈ၊ ၵူၼ်းႁိူၼ်းၸမ်ၵၼ်ၸၢင်ႈမႃးလႄႈ ၸႅတ်ႈထၢမ်ၸႅတ်ႈတူၺ်းမၼ်းဢေႃႈ။-

18တၢင်းဢၼ်ႁဵတ်းလိၵ်ႈတူၵ်းၸႃႇၵွၵ်ႈၼၼ်ႉ ၸၢင်ႈႁႂ်ႈတၢင်းဢၼ်တွပ်ႇၵၼ်ထဵင်ၵၼ်ထၢတ်ႇယဵၼ်လႄႈ တႅပ်းတတ်းဢမူႉၶဝ်ၸိူဝ်းဢၼ်ႁႅင်းယႂ်ႇၼၼ်ႉဢေႃႈ။-

19ပီႈၼွင်ႉဢၼ်ဝႆႉတၢင်းၽိတ်းၼၼ်ႉ ယဵင်ႈၶႅၼ်းယၢပ်ႇသေ ဝဵင်းဢၼ်မၼ်ႈယူႇၶိူင်ႇယူႇၼၼ်ႉလႄႈ ဢမူႉတၢင်းဢၼ်တွပ်ႇၵၼ်ထဵင်ၵၼ်ၼၼ်ႉ ပဵၼ်ၸိူဝ်ႉၼင်ႇၵိူၼ်ႇၽၵ်းတူ တိူၵ်ႈတီႈတိုၵ်းသိုၵ်းဢေႃႈ။-

20တွင်ႉၵူၼ်းပုမ်ၵူၼ်း လႆႈတဵမ်ဝႆႉတင်းမၢၵ်ႇသူပ်းမၼ်းလႄႈ လႆႈဢိမ်ႇဝႆႉတင်းၸီးပႂႃး သီႇသူပ်းမၼ်းဢေႃႈ။-

21လိၼ်ႉလႆႈဢုပ်ႉပိူင်ႇတၢင်းဢၼ်ဢသၢၵ်ႈတၢႆ ဢိၵ်ႇတင်းတၢင်းဢၼ်ဢသၢၵ်ႈလိပ်းလႄႈ ၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ်လိၼ်ႉၼၼ်ႉၵေႃႈ လႆႈၵိၼ်မၢၵ်ႇမၼ်းဢေႃႈ။-

22ၵေႃႉဢၼ်လႆႈမေးၼၼ်ႉလႆႈလွင်ႈတၢင်းဢၼ်လီလႄႈ လႆႈၶၢမ်ႇဢဝ်ၵျေးၸူးထႃႇဝရႃႉၽြႃးဢေႃႈ။-

23ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ၸၢင်ႈတွင်းပၢၼ်ႇလႄႈ၊ ၵေႃႉဢၼ်ၸၢင်ႈမၢၵ်ႈၸၢင်ႈမီးၼၼ်ႉၸမ်ႉ၊ ၸၢင်ႈၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်ဢေႃႈ။-

24ၵေႃႉဢၼ်ၵေႃႉသေႈၼမ်ၼႃႇၼၼ်ႉ ၸၢင်ႈမီးတၢင်းဢၼ်ဢၵျူဝ်းမၼ်းလူႉလႅဝ်လႄႈ ၵေႃႉဢၼ်မိုတ်ႈၵိုဝ်းႁူႉၸၵ်းဢၼ်ယဵင်ႈၶႅၼ်း ၸၢင်ႈၸွႆးၸပ်းၼႃႇသေပီႈၼွင်ႉၵၼ်ၼၼ်ႉၵေႃႈမီးဢေႃႈ။

← Chapter 17 Jump to: Chapter 19 →