Proverbs 19

Shan

← Chapter 18 Jump to: Chapter 20 →

1ၵေႃႉဢၼ်ယၢၵ်ႈဢၼ်ၽၢၼ် ဢၼ်ၸွမ်းသဵၼ်ႈတၢင်းဢၼ်ၸေးၸုမ်ႇၼၼ်ႉ ယဵင်ႈၶႅၼ်းလီၼႃႇသေၵေႃႉဢၼ်မိူၵ်ႈ ဢၼ်ၸၢင်ႈသုင်းသွင်ႇၵႂၢမ်းဢၼ်ၵူတ်ႉဢၼ်ငေႃးၼၼ်ႉဢေႃႈ။-

2ၸႂ်ဝီႉၺိၺ်ႇယင်းဢမ်ႇမီးပိင်ႇၺႃႇ တၢင်းဢၼ်ႁူႉဢၼ်ၸႅင်ႈလႄႈ ဢမ်ႇထုၵ်ႇဢမ်ႇလီ။ ၵေႃႉဢၼ်ယၢင်ႈတိၼ်ၵႂႃႇ ၶၼ်ၶၼ်ၽႂ်းၽႂ်းၼၼ်ႉၵေႃႈ ၸၢင်ႈၽိတ်းပိူင်ႈဢေႃႈ။-

3သၽေႃးတၢင်းဢၼ်မိူၵ်ႈၵူၼ်းၼၼ်ႉ ၸၢင်ႈႁႂ်ႈသဵၼ်ႈတၢင်းမၼ်းပိူင်ႈၵႂႃႇလႄႈ ႁူဝ်ၸႂ်မၼ်းၸၢင်ႈသႄႉသွမ်းတၢင်ႇဢပႅတ်ႈ တီႈထႃႇဝရႃႉၽြႃးဢေႃႈ။-

4ၸေးၸိမ်ႇၸၢင်ႈႁႂ်ႈမီးၵေႃႉမီးသေႈၼမ်ၼႃႇလႄႈ ၵေႃႉဢၼ်ယၢၵ်ႈဢၼ်ၽၢၼ်ၸမ်ႉ၊ ဢမ်ႇလႆႈႁူမ်ႈလူၺ်ႈၵၼ်တင်းၵူၼ်းႁိူၼ်း ၸမ်ၵၼ်တင်းမၼ်း။-

5ၵေႃႉဢၼ်ၶၢမ်ႇသၢၵ်ႈသေႇ ဢၼ်ဢမ်ႇမၢၼ်ႇဢမ်ႇမႅၼ်ႈၼၼ်ႉ ယင်းဢမ်ႇလႆႈၶၢမ်ႇဢပႅတ်ႈလႄႈ ဢမ်ႇလႆႈယူႇလႄႈ ၵေႃႉဢၼ်လၢတ်ႈမူႉသႃႇၼၼ်ႉၵေႃႈ ဢမ်ႇလႆႈၵၢင်းလွတ်ႈတင်းတၢမ်ႇ။-

6ၵူၼ်းဢၼ်ၸၢင်ႈၶျေႃးဝွၼ်း ၸူဝ်းဢဝ်ၶုၼ်မီးၼမ်ၼႃႇလႄႈ ၵူႈၵေႃႉၵူႈၵူၼ်း ၸၢင်ႈႁဵတ်းၵေႃႉႁဵတ်းသေႈ လူၺ်ႈၵၼ် တင်းၵေႃႉဢၼ်ပၼ်လၢၵ်ႈသွင်ႇၼၼ်ႉဢေႃႈ။-

7ၵႃႈပဵၼ်ပီႈၼွင်ႉ ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ၸၢင်ႈဢွၼ်ၵၼ်ၸင်းမၼ်းလႄႈ ၵေႃႉမၼ်းသေႈမၼ်း ယဵင်ႈၶႅၼ်းဢွၼ်ၵၼ်ဝႄႈပႅတ်ႈမၼ်းၵႆၼႃႇဢေႃႈ။ ပိၵ်ႉသမ်ႉမၼ်းၸွမ်းလႄႈႁွင်ႉသေၵေႃႈ၊ ၶဝ်လပ်ႉပႅတ်ႈတဵတ်ႇပႅတ်ႈသေဢေႃႈ။-

8ၵေႃႉဢၼ်လႆႈပိင်ႇၺႃႇၼၼ်ႉ ႁၵ်ႉပႅင်းဢသၢၵ်ႈဝီႉၺိၺ်ႇမၼ်းလႄႈ ၵေႃႉဢၼ်ၸပ်းၸွႆးလူၺ်ႈၺၢၼ်ႇၼၼ်ႉၵေႃႈ တၵ်းလႆႈၶၢမ်ႇဢဝ်တၢင်းလီဢေႃႈ။-

9ၵေႃႉဢၼ်ၶၢမ်ႇသၢၵ်ႈသေႇ ဢၼ်ဢမ်ႇမၢၼ်ႇဢမ်ႇမႅၼ်ႈၼၼ်ႉ ယင်းဢမ်ႇလႆႈၶၢမ်ႇဢပႅတ်ႈလႄႈဢမ်ႇလႆႈယူႇလႄႈ ၵေႃႉဢၼ်လၢတ်ႈမူႉသႃႇၼၼ်ႉၵေႃႈ တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။-

10တၢင်းဢၼ်မူၼ်ႈပျေႃႇၼႂ်းၸေးၸိမ်ႇလေႃးၵီႇၼၼ်ႉ ဢမ်ႇထုၵ်ႇၵၼ်တင်းၵေႃႉဢၼ်မိူၵ်ႈၼၼ်ႉလႄႈ၊ လိူဝ်သေၼၼ်ႉဢမ်ႇၵႃး ၶႃႈဢမ်ႇထုၵ်ႇလီဢုပ်ႉပိူင်ႇၵႃႈၼိူဝ်ၸဝ်ႈၼိူဝ်ၶုၼ်။-

11သမ်ႇမႃႇသတီႉၵူၼ်း ၸၢင်ႈၶျုၵ်ႈဝႆႉတေႃးသႃႉတၢင်းၸႂ်မႆႈမၼ်းလႄႈ တၢင်းဢၼ်ယိူၼ်ႉၶၢမ်ႇ တၢင်းဢၼ်ပိူၼ်ႈၽိတ်းပိူင်ႈမၼ်းၼၼ်ႉၵေႃႈ မီးမုၼ်သရေႇတီႈမၼ်းဢေႃႈ။-

12တၢင်းၸႂ်မႆႈၶႆႈၸႃႉၶုၼ်ႁေႃၶမ်း ပဵၼ်ၸိူဝ်ႉၼင်ႇ တၢင်းဢၼ်သၢင်ႇသီႈႁွင်ႉၼၼ်ႉလႄႈ ၵျေးၸူးမၼ်းၸဝ်ႈၸမ်ႉ၊ ပဵၼ်ၸိူဝ်ႉၼင်ႇၼမ်ႉၼၢႆး ၵႃႈၼိူဝ်တူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။-

13လုၵ်ႈၸၢႆးဢၼ်မိူၵ်ႈၼၼ်ႉ ပဵၼ်လွင်ႈဢၼ်ပေႃႈမၼ်း ယၢပ်ႇၸႂ်ၽၢၼ်ၸႂ်လႄႈ တၢင်းဢၼ်မေး ၸၢင်ႈႁဵတ်းတၢင်းဢၼ်ၽိတ်းၵၼ်ၼၼ်ႉၵေႃႈ မိူၼ်ၸိူဝ်ႉၼင်ႇ ဢၼ်မဵတ်ႉၽူၼ်ယွတ်ႇႁူဝ်ႈတူၵ်းယူႇ ၸိၵ်းၸိၵ်းၼၼ်ႉဢေႃႈ။-

14ႁိူၼ်းဢိၵ်ႇတင်းၸေးၸိမ်ႇ ပဵၼ်ဢမူၺ်ႇဢုၵ်ႉၸႃႇ ဢၼ်လႆႈၶၢမ်ႇဢဝ်တီႈပေႃႈမႄႈလႄႈ မေးဢၼ်မီးသမ်ႇမႃႇသတီႉၸမ်ႉ၊ ပဵၼ်ဢၼ်ထႃႇဝရႃႉၽြႃး ဢဵတ်းလူပၼ်ဢေႃႈ။

15သၽေႃးဢၼ်ၶၢၼ်ႉဢၼ်ဢိူၼ်ၼၼ်ႉ ႁႂ်ႈၼွၼ်းပူၼ်ႉၼွၼ်းလိူဝ်လႄႈ၊ ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ တၵ်းလႆႈၶၢမ်ႇတၢင်းဢၼ်ဢိုပ်းဢၼ်ယၢၵ်ႈဢေႃႈ။-

16ၵေႃႉဢၼ်ပႂ်ႉပိင်းၺၢပ်ႈတြႃးၼၼ်ႉ ပႂ်ႉဢသၢၵ်ႈဝီႉၺိၺ်ႇမၼ်းယူႇလႄႈ ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်လႄႈ ဢမ်ႇၶႆႈၸႂ်လူၺ်ႈသဵၼ်ႈတၢင်းမၼ်းၵႂႃႇၼၼ်ႉၸမ်ႉ၊ တၵ်းလႆႈၶၢမ်ႇတၢႆဢေႃႈ။-

17ၵေႃႉဢၼ်ဢဵတ်းလူၵူၼ်းယၢၵ်ႈၵူၼ်းၽၢၼ်ၼၼ်ႉ ပဵၼ်ၵေႃႉဢၼ်ပၼ်ၵူႈပၼ်ယိမ်ဝႆႉ တီႈထႃႇဝရႃႉၽြႃးလႄႈ၊ မၼ်းၸဝ်ႈတၵ်းတွပ်ႇတႅၼ်းပၼ် ဢၵျူဝ်းတၢင်းဢၼ်မၼ်းႁဵတ်းၼၼ်ႉဢေႃႈ။-

18ပိူဝ်ႈဢၼ်ယင်းမီးတီႈဢၼ် မုင်ႈထႃႈမွင်းထႃႈယူႇလႄႈ သင်ႇသွၼ်သုင်းမႃႉလုၵ်ႈၸၢႆးမႂ်းတႃႉ။ ယႃႇပေႁႂ်ႈမီးၸႂ်ဢၼ်ဢဵတ်းလူယူႇ တေႃႇထိုင်ႁွတ်ႈႁႂ်ႈဢၵျူဝ်းမၼ်းထၼ်ႈပေႃးလူႉ။-

19ၵေႃႉဢၼ်တေႃးသႃႉတၢင်းၸႂ်မႆႈယႂ်ႇၼႃႇၼၼ်ႉ တၵ်းလႆႈၶၢမ်ႇတၢမ်ႇဢပႅတ်ႈလႄႈ ပေႃးမႂ်းၵႄႇသႄႇၼုၵ်ႈဢဝ်မၼ်းၸိုင်၊ တၵ်းလႆႈၵႄႇသႄႇၼုၵ်ႈဢဝ်ယူႇ ၶိူဝ်းၶိူဝ်းယႂ်းယႂ်းဢေႃႈ။-

20ထွမ်ႇဢဝ်ၵႂၢမ်းဢၼ်သင်ႇသွၼ်ပၼ်လႄႈ ၶၢမ်ႇဢဝ်တၢင်းဢၼ်သုင်းမႃႉပၼ် ႁႂ်ႈမႂ်းလႆႈပဵၼ်ၵေႃႉဢၼ်မီးပိင်ႇၺႃႇ ၼႂ်းမိူဝ်ႈၵမ်းလိုၼ်းသုတ်းဢသၢၵ်ႈမႂ်းၼၼ်ႉတႃႉ။-

21တၢင်းဢၼ်ၵူၼ်းၸၢင်ႈၵျၢမ်ႇၸၢင်ႈပွင်ယူႇၵႃႈၼႂ်းႁူဝ်ၸႂ်ၼၼ်ႉ မီးၼမ်ၼႃႇလႄႈ ၵူၺ်းၵႃႈ တၢင်းဢၼ်ထႃႇဝရႃႉၽြႃးၵျၢမ်ႇပွင်ၼၼ်ႉ တၵ်းတႄႇယူႇဢေႃႈ။-

22တၢင်းဢၼ်ၵူၼ်းမီးၸႂ်ၸေႇတၼႃႇၼၼ်ႉ ပဵၼ်တၢင်းဢၼ်မၼ်းႁဵတ်းၵျေးၸူးၵႃႈႁိုဝ်ၼၼ်ႉလႄႈ ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ယဵင်ႈၶႅၼ်းလီၼႃႇသေၵေႃႉဢၼ်လၢတ်ႈမူႉသႃႇဢေႃႈ။-

23တၢင်းဢၼ်ၵူဝ်ဢၼ်ႁႄထႃႇဝရႃႉၽြႃးၼၼ်ႉ ၸၢပ်ႈသႅင်ႇၵၼ်တင်းတၢင်းဢၼ်ဢသၢၵ်ႈလိပ်းလႄႈ ၵေႃႉဢၼ်မီးသၽေႃးၼၼ်ႉၸမ်ႉ၊ ဢလူဝ်ႇသၼ်ႇတႃႉတၵ်းပျေႉၸုမ်ႇလႄႈ မၼ်းတၵ်းဢမ်ႇလႆႈထူပ်းလႆႈႁၼ်ၽေးဢူႉပၢတ်ႈ။-

24ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ဢဝ်မိုဝ်းမၼ်းၸူၵ်းၶဝ်ႈၵႃႈၼႂ်းမေႃႈသေလႄႈ ဢမ်ႇၶႂ်ႈသမ်ႉၶိုၼ်းဢဝ်ဢွၵ်ႇလႄႈ ပွၼ်ႈသႂ်ႇၵႃႈၼႂ်းသူပ်းမၼ်း။-

25ပေႃးပေႃႉယႅၼ်ႉ ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်ၼၼ်ႉၸိုင်၊ ၵေႃႉဢၼ်ငိူဝ်ႈငႃႉၼၼ်ႉ တၵ်းလႆႈသတီႉလႄႈ၊ ပေႃးသင်ႇသွၼ်သုင်းမႃႉ ၵေႃႉဢၼ်ၺၢၼ်ႇလီၼၼ်ႉၸိုင်၊ မၼ်းတၵ်းႁူႉပိင်ႇၺႃႇ တၢင်းဢၼ်ႁူႉဢၼ်ၸႅင်ႈဢေႃႈ။-

26ၵေႃႉဢၼ် ႁဵတ်းဢၼ်ယၢပ်ႇဢၼ်ၽိုတ်ႇ သႂ်ႇတီႈပေႃႈမၼ်းလႄႈ၊ ႁေႃႈမႄႈမၼ်းဢွၵ်ႇပႅတ်ႈၼၼ်ႉ ပဵၼ်လုၵ်ႈၸၢႆး ဢၼ်ႁဵတ်းႁႂ်ႈလီဢူၵ်းလီဢၢႆလႄႈ ႁႂ်ႈၶၢမ်ႇတၢင်းဢၼ်ၼႃႈမႆႈဢေႃႈ။-

27လုၵ်ႈၸၢႆးၵဝ်ဢိူၺ်း၊ ယႃႇပေထွမ်ႇပေဢဝ် ၵႂၢမ်းသင်ႇသွၼ်သုင်းမႃႉသေလႄႈ ၵႂႃႇႁႂ်ႈလႆႈဝႄႈပႅတ်ႈသေၵႂၢမ်းပိင်ႇၺႃႇ တၢင်းဢၼ်ႁူႉဢၼ်ၸႅင်ႈၼၼ်ႉၵူၺ်းတႃႉ။-

28ၵူၼ်းမဝ်မၢင်ဢၼ်ၶၢမ်ႇသၢၵ်ႈသေႇၼၼ်ႉ ၸၢင်ႈႁဵတ်းဢမ်ႇပေႃးၼင်ႇႁိုဝ် တီႈတြႃးတၢင်းဢၼ်ၸီႇယၢင်ႇလႄႈ သူပ်းၶဝ်ၸိူဝ်းဢၼ်ဢမ်ႇတြႃးၼၼ်ႉၵေႃႈ၊ ၸၢင်ႈဢိုၼ်ၵိၼ်တူႉၸရိူၵ်ႈဢေႃႈ။-

29တၢင်းဢၼ်ၸီႇယၢင်ႇဢပႅတ်ႈ မႄးႁႅၼ်းဝႆႉ ပုၼ်ႈၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်ယူႇၼၼ်ႉလႄႈ တၢင်းဢၼ်ပၼ်ၶၢမ်ႇတၢမ်ႇ မႄးႁႅၼ်းဝႆႉ ပုၼ်ႈပႄလင်ၶဝ်ၸိူဝ်းဢၼ်မိူၵ်ႈၼၼ်ႉယူႇဢေႃႈ။

← Chapter 18 Jump to: Chapter 20 →