Proverbs 14

Shan

← Chapter 13 Jump to: Chapter 15 →

1မႄႈယိင်းဢၼ်မီးပိင်ႇၺႃႇၼၼ်ႉ ၸၢင်ႈတႄႇၸၢင်ႈႁဵတ်းႁိူၼ်းမၼ်းလႄႈ မႄႈယိင်းဢၼ်မိူၵ်ႈၸမ်ႉ ၸၢင်ႈဢဝ်တင်းမိုဝ်းမၼ်းၵိူၼ်ႇယႃႉပႅတ်ႈဢေႃႈ။-

2ၵေႃႉဢၼ်ၸွမ်းသဵၼ်ႈတၢင်းဢၼ်သိုဝ်ႈလီယူဝ်းလီၼၼ်ႉ ၸၢင်ႈၵူဝ်ႁႄထႃႇဝရႃႉၽြႃးလႄႈ ၵေႃႉဢၼ်ၸွမ်းသဵၼ်ႈတၢင်းဢၼ်ၵူတ်ႉဢၼ်ငေႃးၼၼ်ႉၸမ်ႉ၊ ၸၢင်ႈႁဵတ်းဢမ်ႇပေႃးၼင်ႇႁိုဝ်တီႈမၼ်းၸဝ်ႈဢေႃႈ။-

3ၵႃႈၼႂ်းသူပ်းၵေႃႉဢၼ်မိူၵ်ႈၼၼ်ႉ မႃႇၼႃႉၸႂ်သုင်ပဵၼ်ၶွၼ်ႉဝၢႆတီႈမၼ်းလႄႈ သီႇသူပ်းၶဝ်ၸိူဝ်းဢၼ်မီးပိင်ႇၺႃႇၼၼ်ႉၸမ်ႉ၊ ၸၢင်ႈပႂ်ႉၵႄႇသႄႇၼုၵ်ႈဢဝ်ၶဝ်ယူႇဢေႃႈ။-

4သိုင်ႇဢၼ်ဢမ်ႇမီးဝူဝ်းပေႃႈၼၼ်ႉ ပဵၼ်ဢၼ်မူတ်းၵဵင်ႈလႄႈ တၢင်းဢၼ်သုင်းသွင်ႇႁႅင်းဝူဝ်းၸမ်ႉ၊ ၸၢင်ႈပဵၼ်ၸီးပႂႃးၼမ်ၼႃႇဢေႃႈ။-

5ၵေႃႉဢၼ်ၶၢမ်ႇသၢၵ်ႈသေႇဢၼ်မီးသဵတ်ႈၸႃႇၼၼ်ႉ ဢမ်ႇၸၢင်ႈလၢတ်ႈမူႉသႃႇလႄႈ ၵေႃႉဢၼ်ၶၢမ်ႇသၢၵ်ႈသေႇ ဢၼ်ယႃႉသဵတ်ႈၸႃႇၼၼ်ႉၸမ်ႉ၊ ၸၢင်ႈလၢတ်ႈမူႉသႃႇဢေႃႈ။-

6ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်ယူႇၼၼ်ႉ ႁႃပိင်ႇၺႃႇလႄႈဢမ်ႇၸၢင်ႈထူပ်းၸၢင်ႈလႆႈ။ ၵေႃႉဢၼ်မီးၺၢၼ်ႇၸမ်ႉ၊ လႆႈတၢင်းဢၼ်ႁူႉဢၼ်ၸႅင်ႈၼၼ်ႉငၢႆႈဢေႃႈ။-

7ဝႄႈပႅတ်ႈသေၵေႃႉဢၼ်မိူၵ်ႈၼၼ်ႉ ၵွပ်ႈပိူဝ်ႈဢၼ်မႂ်းတၵ်းဢမ်ႇထူပ်းဢမ်ႇႁၼ် တၢင်းဢၼ်ႁူႉဢၼ်ၸႅင်ႈ တီႈသူပ်းမၼ်းၼၼ်ႉလႄႈ ၵႂႃႇသေတႃႉ။-

8ပိင်ႇၺႃႇၵေႃႉဢၼ်မီးပိင်ႇၺႃႇသတီႉၼၼ်ႉ ပဵၼ်တၢင်းဢၼ်ႁူႉသဵၼ်ႈတၢင်း ဢၼ်မၼ်းလႆႈၵႂႃႇယူႇၼၼ်ႉလႄႈ တၢင်းဢၼ်မိူၵ်ႈၶဝ်ၸိူဝ်းဢၼ်မိူၵ်ႈၼၼ်ႉၸမ်ႉ၊ ပဵၼ်ပရီႉယႄႇဢေႃႈ။-

9ယိတ်ႈၽေႇတူႉၸရိူၵ်ႈ ႁဵတ်းဢမ်ႇပေႃးၼင်ႇႁိုဝ်တီႈၶဝ်ၸိူဝ်းဢၼ်မိူၵ်ႈၼၼ်ႉလႄႈ တီႈၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉၸမ်ႉ၊ မီးတၢင်းဢၼ်မၼ်းၸဝ်ႈႁပ်ႉတုင်းဢဝ်ဢေႃႈ။-

10ႁူဝ်ၸႂ်ႁူႉၸႅင်ႈတုၵ်ႉၶႃႉတူဝ်ၸဝ်ႈၵဝ်ႇယူႇလႄႈ ပိူၼ်ႈတၢင်ႇၵေႃႉဢမ်ႇၸၢပ်ႈသႅင်ႇၵၼ်တင်း တၢင်းဢၼ်မၼ်းၸူမ်းသိူဝ်းၼၼ်ႉ။-

11ႁိူၼ်းၵေႃႉဢၼ်ဢမ်ႇတြႃးၼၼ်ႉ ၸၢင်ႈလူမ်ႉပင်းၵႂႃႇလႄႈ၊ မူဝ်းၵႃႇၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈၵီႈလီတင်ႈလီယူႇဢေႃႈ။

12မီးသဵၼ်ႈတၢင်းဢၼ်ၵူၼ်းထၢင်ႇပဵၼ် ဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉလႄႈ တီႈသုတ်းမၼ်းပဵၼ်သဵၼ်ႈတၢင်းဢၼ် ၸၢပ်ႈသႅင်ႇၵၼ်တင်းတၢင်းတၢႆၸိူဝ်းၼၼ်ႉဢေႃႈ။-

13တေႃႈၵႃႈမိူဝ်ႈဢၼ်ၵူၼ်းယင်းတိုၵ်ႉၶူဝ်ယူႇၼၼ်ႉ၊ မီးႁူဝ်ၸႂ်ဢၼ်ၸဵပ်းယူႇလႄႈ တီႈသုတ်းတၢင်းဢၼ်ၶူဝ်ႁိုဝ်ႉသႂၢင်ႇသိူဝ်းၼၼ်ႉ ၸၢင်ႈပဵၼ်တၢင်းဢၼ်မႆႈၸႂ်ၶီၸႂ်ဢေႃႈ။

14ၵေႃႉဢၼ်ႁူဝ်ၸႂ်ၽွၵ်ႈပျၢၼ်ႇၶိုၼ်းၼၼ်ႉ တၵ်းဢိမ်ႇတဵမ်ဝႆႉ တင်းသဵၼ်ႈတၢင်းမၼ်းတင်းလၢႆလႄႈ ၵေႃႉဢၼ်လီဢၼ်ငၢမ်းၼၼ်ႉ တၵ်းယူႇၵႃႈတီႈဢၼ်ၵႆၵၼ်တင်းမၼ်းၼၼ်ႉဢေႃႈ။-

15ၵေႃႉဢၼ်ငိူဝ်ႈဢၼ်ငႃႉၼၼ်ႉ ၸၢင်ႈယုမ်ႇၵႂၢမ်းၵႃႈဢၼ်ပိူၼ်ႈလၢတ်ႈၼၼ်ႉလႄႈ ၵေႃႉဢၼ်မီးပိင်ႇၺႃႇသတီႉၼၼ်ႉၸမ်ႉ၊ ၸၢင်ႈလူတူၺ်းသဵၼ်ႈတၢင်းဢၼ်မၼ်းၵႂႃႇၼၼ်ႉ ၸေးၸေးၸွတ်ႇၸွတ်ႇဢေႃႈ။-

16ၵေႃႉဢၼ်မီးပိင်ႇၺႃႇၼၼ်ႉ ၸၢင်ႈၵူဝ်ႁႄလႄႈ ဝႄႈပႅတ်ႈတူႉၸရိူၵ်ႈဢေႃႈ။ ၵေႃႉဢၼ်မိူၵ်ႈၼၼ်ႉၸမ်ႉ၊ မႃႇၼႃႉယႂ်ႇလႄႈႁတ်းႁၢၼ်ဢေႃႈ။

17ၵေႃႉဢၼ်ၸႂ်ပွတ်းၸႂ်လွတ်းၼၼ်ႉ ၸၢင်ႈႁဵတ်းတၢင်းဢၼ်မိူၵ်ႈၼႃႇလႄႈ ၵေႃႉဢၼ်ၵျၢမ်ႇပွင် တၢင်းၵျၢမ်ႇတၢင်းပွင်ဢၼ်ဢမ်ႇလီၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ပိူၼ်ႈၸင်းဢေႃႈ။-

18ၵေႃႉဢၼ်ငိူဝ်ႈဢၼ်ငႃႉၼၼ်ႉ ၸၢင်ႈလႆႈၶၢမ်ႇဢမူၺ်ႇတၢင်းဢၼ်မိူၵ်ႈလႄႈ ၵေႃႉဢၼ်မီးပိင်ႇၺႃႇသတီႉၼၼ်ႉၸမ်ႉ၊ ၸၢင်ႈလႆႈတိုဝ်းသရၽူႇတၢင်းဢၼ်ႁူႉၸႅင်ႈဢေႃႈ။-

19ၶဝ်ၸိူဝ်းဢၼ်ႁၢႆႉမိူၵ်ႈၼၼ်ႉ ၸၢင်ႈၶုပ်ႉမူပ်ႇၵူမ်ႈႁူဝ် ၵႃႈတီႈၽၢႆႇၼႃႈၶဝ်ၸိူဝ်းဢၼ်လီဢၼ်ငၢမ်းလႄႈ ၶဝ်ၸိူဝ်းဢၼ်ဢမ်ႇတြႃးၼၼ်ႉၸၢင်ႈၶုပ်ႉမူပ်ႇၵူမ်ႈႁူဝ် ၵႃႈတီႈႁူးၽၵ်းတူႁိူၼ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉဢေႃႈ။-

20ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ၸၢင်ႈလႆႈၶၢမ်ႇ တၢင်းဢၼ်ၵူၼ်းႁိူၼ်းၸမ်ၵၼ်တင်းမၼ်းၸင်းလႄႈ ၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီးၼၼ်ႉၸမ်ႉ၊ မီးၵေႃႉဢၼ်ႁၵ်ႉပႅင်းၶဝ်ၼမ်ၼႃႇဢေႃႈ။-

21ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ် တီႈၵူၼ်းႁိူၼ်းၸမ်ၵၼ်တင်းမၼ်းၼၼ်ႉ မီးဢပႅတ်ႈလႄႈ ၵေႃႉဢၼ်ဢဵတ်းလူၵေႃႉဢၼ်ယၢၵ်ႈဢၼ်ၽၢၼ်ၼၼ်ႉၸမ်ႉ၊ မီးမင်ႇၵလႃႇဢေႃႈ။-

22ၶဝ်ၸိူဝ်းဢၼ်ၸၢင်ႈၵျၢမ်ႇၸၢင်ႈပွင် လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉ ၸၢင်ႈၽိတ်းၸၢင်ႈပိူင်ႈ ဢမ်ႇၸႂ်ႈႁိုဝ်။ ၵူၺ်းၵႃႈ ၵရူႉၼႃႇဢိၵ်ႇတင်းသဵတ်ႈၸႃႇ တၵ်းမီးတီႈၶဝ်ၸိူဝ်းဢၼ် ၸၢင်ႈၵျၢမ်ႇၸၢင်ႈပွင် တၵ်းႁဵတ်းၵျေးၸူးၼၼ်ႉဢေႃႈ။-

23ၼႂ်းတၢင်းဢၼ်ၵျူဝ်းၸႃးလႄႈ သၢင်ႈႁဵတ်းၵူႈၸိူဝ်ႉၵူႈပိူင်ၼၼ်ႉ မီးဢၵျူဝ်းလႄႈ တၢင်းဢၼ်သူပ်းၼမ်ၵႂၢမ်းၼမ်ၼၼ်ႉၸမ်ႉ၊ ပဵၼ်တၢင်းယၢၵ်ႈတၢင်းၽၢၼ်ၵူၺ်းဢေႃႈ။-

24ၸေးၸိမ်ႇဢုၵ်ႉၸႃႇၶဝ်ၸိူဝ်းဢၼ်မီးပိင်ႇၺႃႇၼၼ်ႉ ပဵၼ်သရၽူႇၶဝ်လႄႈ တၢင်းဢၼ်မိူၵ်ႈၶဝ်ၸိူဝ်းဢၼ်မိူၵ်ႈၼၼ်ႉ ပဵၼ်ဢၼ်မိူၵ်ႈလွၼ်ႉလွၼ်ႉၵူၺ်းဢေႃႈ။-

25ၵေႃႉဢၼ်ၶၢမ်ႇသၢၵ်ႈသေႇ ဢၼ်မၢၼ်ႇဢၼ်မႅၼ်ႈၼၼ်ႉ ၸၢင်ႈၵႄႇသႄႇဢဝ်ဢသၢၵ်ႈပိူၼ်ႈလွတ်ႈလႄႈ ၵေႃႉဢၼ်ထူၺ်ႈၸႂ်ဢွၵ်ႇမူႉသႃႇၼၼ်ႉၸမ်ႉ၊ ၸၢင်ႈႁႂ်ႈတၢင်းဢၼ်ပႅတ်ႉဢၼ်လႅၼ်ပဵၼ်မႃးဢေႃႈ။-

26ၵႃႈၼႂ်းတၢင်းဢၼ်ၵူဝ်ႁႄထႃႇဝရႃႉၽြႃးၼၼ်ႉ၊ ၸၢင်ႈမီးဢၶႂၢင်ႉတၢင်းဢၼ် ဢိင်ပိုင်ႈဢၼ်ႁႅင်းယႂ်ႇၼႃႇလႄႈ လုၵ်ႈၸၢႆးမၼ်းၸဝ်ႈတင်းလၢႆ တၵ်းလႆႈတီႈဢၼ်သွၼ်ႈပိုင်ႈဢေႃႈ။-

27တၢင်းဢၼ်ၵူဝ်ႁႄထႃႇဝရႃႉၽြႃးၼၼ်ႉ ပဵၼ်ၼမ်ႉဢွၵ်ႇႁူးဢသၢၵ်ႈ ဢၼ်ဝႄႈပိူင်ႈသေတူင်ႇႁႅဝ်ႉတူင်ႇၶိုမ်းတၢင်းတၢႆဢေႃႈ။-

28ၼႂ်းတၢင်းဢၼ်ၵူၼ်းဝၢၼ်ႈၵူၼ်းမိူင်းၼမ်ၼႃႇၼၼ်ႉ ၶုၼ်ႁေႃၶမ်းမီးမုၼ်မီးၽုင်းလႄႈ ၼႂ်းတၢင်းဢၼ်ၵူၼ်းဝၢၼ်ႈၵူၼ်းမိူင်းၵေႇမၢင်ၼၼ်ႉၸမ်ႉ၊ ၶုၼ်မီးတၢင်းဢၼ်ဢၵျူဝ်းၵေႇမၢင်ဢေႃႈ။-

29ၵေႃႉဢၼ်ၸႂ်ယႂ်ႇၸႂ်ယၢဝ်းၼၼ်ႉ ပိင်ႇၺႃႇယႂ်ႇလႄႈ ၵေႃႉဢၼ်ၸႂ်ပွတ်းၸႂ်လွတ်းၼၼ်ႉၸမ်ႉ၊ ယုၵ်ႉယွင်ႈတၢင်းဢၼ်မိူၵ်ႈဝႆႉ တီႈသုင်ဢေႃႈ။-

30ႁူဝ်ၸႂ်ဢၼ်ယူႇလီ ဢမ်ႇမီးတၢင်းၶႆႈတၢင်းပဵၼ်ၼၼ်ႉ ပဵၼ်လွင်ႈဢၼ်ႁႂ်ႈတူဝ်ၵႃႇယႃႉ ဢသၢၵ်ႈလိပ်းယူႇလႄႈ သၽေႃးဢၼ်သီႈၵေႉႁေႈတႃၼၼ်ႉၸမ်ႉ၊ ပဵၼ်လွင်ႈဢၼ်လုပ်ႇၽင်ႉဢူႉဢေႃႈ။-

31ၵေႃႉဢၼ်ၼိၵ်ႈၸၢၵ်ႈငႅၼ်းသႄးၵူၼ်းယၢၵ်ႈၵူၼ်းၽၢၼ်ၼၼ်ႉ သႄႉသွမ်းၽြႃးဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉလႄႈ ၵေႃႉဢၼ်မၼ်းၸဝ်ႈ ၸၢင်ႈဢဵတ်းလူၵူၼ်း ဢၼ်ၸုတ်ႈဢၼ်လုတ်ႈၼၼ်ႉၸမ်ႉ၊ ရူဝ်ႇသေႇၵူဝ်ယမ်ဢေႃႈ။-

32ၵေႃႉဢၼ်ဢမ်ႇတြႃးၼၼ်ႉ လႆႈၶၢမ်ႇတၢင်းဢၼ်ဢဝ်လူမ်ႉပႅတ်ႈ ၼႂ်းမိူဝ်ႈဢၼ်မၼ်းယင်းတိုၵ်ႉ ႁဵတ်းဢၼ်ဢမ်ႇတြႃးယူႇၼၼ်ႉလႄႈ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ မီးတီႈဢၼ်မုင်ႈထႃႈမွင်းထႃႈ ၼႂ်းမိူဝ်ႈဢၼ်မၼ်းတၢႆယူႇၼၼ်ႉဢေႃႈ။-

33ပိင်ႇၺႃႇၸၢင်ႈၵိင်းဝၢပ်ႈယူႇ ၵႃႈၼႂ်းႁူဝ်ၸႂ်ၵေႃႉဢၼ်မီးၺၢၼ်ႇၼၼ်ႉလႄႈ လွင်ႈတၢင်းဢၼ်မီးယူႇ ၵႃႈၼႂ်းၶဝ် ၸိူဝ်းဢၼ်မိူၵ်ႈၼၼ်ႉၸမ်ႉ၊ ၸၢင်ႈပေႃႇၸၢင်ႈဢွၵ်ႇဢေႃႈ။-

34တၢင်းဢၼ်သိုဝ်ႈတေႃႇ ၸၢင်ႈယုၵ်ႉယွင်ႈ ၵူၼ်းဝၢၼ်ႈၵူၼ်းမိူင်းတင်းလၢႆလႄႈ ဢပႅတ်ႈတူႉၸရိူၵ်ႈၸမ်ႉ၊ ၸၢင်ႈဢဝ်ၵူၼ်းဝၢၼ်ႈၵူၼ်းမိူင်းတင်းလၢႆ ၶျႃးတူၵ်းတီႈတႅမ်ႇဢေႃႈ။-

35ၵျေးၸူးၶုၼ်ႁေႃၶမ်း ၸၢင်ႈမီးၵႃႈၼိူဝ်ၶႃႈဢၼ်မီးပိင်ႇၺႃႇၼၼ်ႉလႄႈ တၢင်းၸႂ်မႆႈၶႆႈၸႃႉမၼ်းၸဝ်ႈၸမ်ႉ၊ ၸၢင်ႈမီးၵႃႈၼိူဝ်ၶႃႈဢၼ်ၸၢင်ႈႁႂ်ႈဢူၵ်းႁႂ်ႈဢၢႆၼၼ်ႉဢေႃႈ။

← Chapter 13 Jump to: Chapter 15 →