Proverbs 12

Shan

← Chapter 11 Jump to: Chapter 13 →

1ၵေႃႉဢၼ်ႁၵ်ႉတၢင်းဢၼ်သင်ႇသွၼ်ပၼ်ၼၼ်ႉ ႁၵ်ႉတၢင်းဢၼ်ႁူႉဢၼ်ၸႅင်ႈၼၼ်ႉလႄႈ၊ ၵေႃႉဢၼ်ၸင်းတၢင်းဢၼ်သုင်းမႃႉပၼ်ၼၼ်ႉ မီးသၽေႃးတရိၵ်ႈသၢၼ်ႇဢေႃႈ။-

2ၵေႃႉဢၼ်လီဢၼ်ငၢမ်းၼၼ်ႉ ၸၢင်ႈလႆႈၼႃႈလႆႈတႃ တီႈထႃႇဝရႃႉၽြႃးလႄႈ၊ ၵေႃႉဢၼ်ၵျၢမ်ႇပွင်တၢင်းၵျၢမ်ႇတၢင်းပွင်ဢမ်ႇလီၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်မၼ်းၸဝ်ႈ ၸီႇယၢင်ႇဢပႅတ်ႈပၼ်ဢေႃႈ။-

3ၵူၼ်းတၵ်းဢမ်ႇႁွတ်ႈထိုင်တၢင်းဢၼ်မၼ်ႈၶိူင်ႇ ၵွပ်ႈပိူဝ်ႈတူႉၸရိူၵ်ႈလႄႈ ႁၢၵ်ႈၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ယင်းဢမ်ႇၶၢႆႉတီႈလႄႈ တၵ်းလႆႈယူႇသေႇသေႇဢေႃႈ။-

4မႄႈယိင်းဢၼ်မီးသီႇလႃႉၼၼ်ႉ ပဵၼ်ပၢၼ်းၵုမ်းသရၽူႇတီႈၽူဝ်မၼ်းလႄႈ မႄႈယိင်းဢၼ်ၸၢင်ႈႁႂ်ႈဢူၵ်းႁႂ်ႈဢၢႆၼၼ်ႉၸမ်ႉ၊ ပဵၼ်ၸိူဝ်ႉၼင်ႇတၢင်းဢၼ်ၽင်ႉဢူႉ တီႈလုပ်ႇၽူဝ်မၼ်းဢေႃႈ။-

5တၢင်းၵျၢမ်ႇတၢင်းပွင် ၶဝ်ၸိူဝ်းဢၼ်သိုဝ်ႈတေႃႇၼၼ်ႉ သိုဝ်ႈလီယူဝ်းလီလႄႈ တၢင်းၵျၢမ်ႇတၢင်းပွင် ဢၼ်ၶဝ်ၸိူဝ်းဢၼ် ဢမ်ႇတြႃးၼၼ်ႉပၼ်ၼၼ်ႉၸမ်ႉ၊ ပဵၼ်မူႉသႃႇဢေႃႈ။-

6ၵႂၢမ်းၶဝ်ၸိူဝ်းဢၼ်ဢမ်ႇတြႃးၼၼ်ႉ ပႂ်ႉလွမ်ပႂ်ႉတူၺ်းယူႇ ႁႂ်ႈလႆႈထွၵ်ႇလိူတ်ႈပိူၼ်ႈပႅတ်ႈလႄႈ သူပ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈၵႄႇသႄႇၼုၵ်ႈဢဝ်ပိူၼ်ႈဢေႃႈ။-

7ၶဝ်ၸိူဝ်းဢၼ်ဢမ်ႇတြႃးၼၼ်ႉလူမ်ႉပင်းၵႂႃႇလႄႈ ဢမ်ႇမီးယဝ်ႉ။ ႁိူၼ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈမီးတၢင်းဢၼ်တႄႇယူႇဢေႃႈ။-

8ၵူၼ်းတၵ်းလႆႈၶၢမ်ႇတၢင်းဢၼ်ယွင်ႈယေႃး ၸွမ်းၵႃႈၼင်ႇဢၼ်မၼ်းမီးပိင်ႇၺႃႇၺၢၼ်ႇၼၼ်ႉလႄႈ၊ ၵေႃႉဢၼ်သၽေႃးၵူတ်ႉငေႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်ဢေႃႈ။-

9ၵေႃႉဢၼ်ယင်းဢမ်ႇမီးသရေႇလႄႈ မီးၵူၼ်းၸႂ်ႉၵူၼ်းသွႆၼၼ်ႉ ယဵင်ႈၶႅၼ်းလီၼႃႇသေၵေႃႉဢၼ်ယင်းဢမ်ႇမီးတၢင်းၵိၼ်တၢင်းၶူပ်းလႄႈ ဢုပ်ႇဢၢတ်ႇယူႇၼၼ်ႉဢေႃႈ။-

10ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈသေလၢႆဢသၢၵ်ႈတရိၵ်ႈသၢၼ်ႇ တူဝ်ၸဝ်ႈၵဝ်ႇလႄႈ တၢင်းဢၼ်ၵေႃႉဢၼ်ဢမ်ႇတြႃးၼၼ်ႉ မီးၵရူႉၼႃႇၼၼ်ႉၸမ်ႉ၊ ပဵၼ်ဢၼ်ႁၢဝ်ႈၵျၢမ်းၼႃႇလူင်လၢင်ဢေႃႈ။-

11ၵေႃႉဢၼ်ႁဵတ်းႁႆႊႁဵတ်းၼႃးၼၼ်ႉ တၵ်းမီးတၢင်းၵိၼ်တၢင်းၶူပ်းလိူင်ႇၼႃႇလႄႈ ၵေႃႉဢၼ်ၸွမ်းလင်ၶဝ်ၸိူဝ်းဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ၼၼ်ႉၸမ်ႉ၊ ဢမ်ႇမီးၺၢၼ်ႇလႃးလႃး။-

12ၵေႃႉဢၼ်ဢမ်ႇတြႃးၼၼ်ႉ မီးဢလူဝ်ႇၶႂ်ႈလႆႈတူင်ႇႁႅဝ်ႉတူင်ႇၶိုမ်း ဢၼ်ၵူၼ်းႁၢႆႉၵူၼ်းမိူၵ်ႈၶဝ် သုင်းသွင်ႇၼၼ်ႉလႄႈ ႁၢၵ်ႈၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈမၢၵ်ႇမၢၵ်ႇယူႇဢေႃႈ။-

13ၼႂ်းတၢင်းဢၼ်သူပ်းပူၼ်ႉလိူဝ်ၼၼ်ႉ မီးတူင်ႇႁႅဝ်ႉတူင်ႇၶိုမ်း ပုၼ်ႈၵေႃႉဢၼ်ႁၢႆႉမိူၵ်ႈၼၼ်ႉလႄႈ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈလွတ်ႈဢွၵ်ႇသေ ၵႃႈၼႂ်းဢမူႉတၢင်းဢၼ်ယၢပ်ႇဢၼ်ၽိုတ်ႇဢေႃႈ။-

14ၵူၼ်းတၵ်းဢိမ်ႇတဵမ်ဝႆႉတင်း တၢင်းဢၼ်လီဢၼ်ငၢမ်း ၵွပ်ႈပိူဝ်ႈမၢၵ်ႇဢၼ်သီႇသူပ်းမၼ်း မၢၵ်ႇၼၼ်ႉလႄႈ ဢၵျူဝ်းတၢင်းဢၼ် မိုဝ်းၵူၼ်းႁဵတ်းၼၼ်ႉၵေႃႈ လႆႈၶိုၼ်းမႃးၸူးၵႃႈတီႈမၼ်းဢေႃႈ။

15သဵၼ်ႈတၢင်းဢၼ်ၵေႃႉဢၼ်မိူၵ်ႈၼၼ်ႉၸွမ်းၼၼ်ႉ ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈ သိုဝ်ႈၼႃႈတႂ်ႈတႃမၼ်းလႄႈ ၵေႃႉဢၼ်ထွမ်ႇဢဝ်ၵႂၢမ်းဢၼ် ပၼ်တၢင်းၵျၢမ်ႇတၢင်းပွင်ၼၼ်ႉၸမ်ႉ၊ မီးပိင်ႇၺႃႇဢေႃႈ။-

16တေႃးသႃႉတၢင်းၸႂ်မႆႈၶႆႈၸႃႉၵေႃႉဢၼ်မိူၵ်ႈၼၼ်ႉ ၸၢင်ႈႁႂ်ႈပိူၼ်ႈႁူႉၵမ်းလဵဝ်လႄႈ ၵေႃႉဢၼ်မီးပိင်ႇၺႃႇသတီႉၼၼ်ႉၸမ်ႉ၊ ၸၢင်ႈႁူမ်ႇငမ်းလွင်ႈတၢင်းဢၼ်လီဢူၵ်းလီဢၢႆဝႆႉဢေႃႈ။-

17ၵေႃႉဢၼ်လၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈၼၼ်ႉ ၼႄပျႃးတြႃးတၢင်းဢၼ်သိုဝ်ႈတေႃႇလႄႈ ၵေႃႉဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉၸမ်ႉ၊ ၸၢင်ႈၼႄပျႃးတြႃးမူႉသႃႇဢေႃႈ။-

18ၵူၼ်းဢၼ်ၸၢင်ႈလၢတ်ႈၵႂၢမ်း မိူၼ်ၸိူဝ်ႉၼင်ႇ ဢၼ်ဢဝ်လၢပ်ႇဢဝ်လႅဝ်းတႅင်းသႂ်ႇၼၼ်ႉ မီးၵမ်ႈၽွင်ႈလႄႈ လိၼ်ႉၶဝ်ၸိူဝ်းဢၼ်မီးပိင်ႇၺႃႇၼၼ်ႉၸမ်ႉ၊ ၸၢင်ႈႁႂ်ႈတၢင်းၶႆႈတၢင်းပဵၼ်ႁၢႆဢေႃႈ။-

19သီႇသူပ်းသဵတ်ႈၸႃႇၸိုင်၊ တႄႇယူႇတႃႇသေႇဢမ်ႇထၢတ်ႇလႄႈ လိၼ်ႉမူႉသႃႇၸမ်ႉ၊ တႄႇယူႇၸူဝ်ႈၽႅပ်ႉတႃၼိုင်ႈၵူၺ်းဢေႃႈ။-

20သၽေႃးဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉ မီးယူႇၵႃႈၼႂ်းၸႂ်ၶဝ်ၸိူဝ်းဢၼ်ၵျၢမ်ႇပွင် တၢင်းၵမ်တၢင်းၵျၢင်ႉ ဢၼ်ဢမ်ႇလီၼၼ်ႉလႄႈ တီႈၶဝ်ၸိူဝ်းဢၼ်ပၼ်တၢင်းၵျၢမ်ႇတၢင်းပွင် ႁႂ်ႈတၢင်းဢၼ်ၽိတ်းၵၼ် ထၢတ်ႇယဵၼ်ၼၼ်ႉၸမ်ႉ၊ မီးလွင်ႈဢၼ်လီၸူမ်းလီသိူဝ်းဢေႃႈ။-

21တီႈၵေႃႉဢၼ်တြႃးၼၼ်ႉ၊ ဢႃႉမင်ႇၵလႃႇဢမ်ႇလႆႈႁွတ်ႈလႆႈထိုင်လႄႈ၊ ၵေႃႉဢၼ်ဢမ်ႇတြႃးၼၼ်ႉၸမ်ႉ၊ တၵ်းလႆႈပျေႉၸုမ်ႇတဵမ်ဝႆႉတင်းဢႃႉမင်ႇၵလႃႇဢေႃႈ။-

22သီႇသူပ်းဢၼ်သုင်းသွင်ႇမူႉသႃႇၼၼ်ႉ ပဵၼ်တီႈဢၼ် ထႃႇဝရႃႉၽြႃးလီႁင်ႈဢဵတ်ႇသဵတ်ႇလႄႈ ၶဝ်ၸိူဝ်းဢၼ်ပႂ်ႉၸွမ်းသဵတ်ႈၸႃႇတြႃးၼၼ်ႉၸမ်ႉ၊ ပဵၼ်တီႈဢၼ် မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ဢေႃႈ။-

23ၵေႃႉဢၼ်မီးပိင်ႇၺႃႇသတီႉၼၼ်ႉ ၸၢင်ႈသိူင်ႇမႅပ်ႉလွင်ႈတၢင်းဢၼ်တူဝ်ၸဝ်ႈၵဝ်ႇႁူႉၼၼ်ႉဝႆႉလႄႈ ႁူဝ်ၸႂ်ၵေႃႉဢၼ်မိူၵ်ႈၼၼ်ႉၸမ်ႉ၊ ၸၢင်ႈၽုၺ်ႇဢွၵ်ႇၼႄပျႃး သၽေႃးဢၼ်မၼ်းမိူၵ်ႈၼၼ်ႉဢေႃႈ။-

24မိုဝ်းၵေႃႉဢၼ်မီးဝီႉရီႉယႃႉၵႆႉၶၵ်းၼၼ်ႉ ၸၢင်ႈလႆႈဢုပ်ႉပိူင်ႇလႄႈ ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉၸမ်ႉ၊ လႆႈပၼ်ၶွၼ်ႇပၼ်ၸဵင်ဢေႃႈ။-

25တၢင်းဢၼ်ၵူၼ်းၸႂ်လဵၵ်ႉၸႂ်ဢူၼ်ႈၼၼ်ႉ ၸၢင်ႈႁႂ်ႈႁဵဝ်ႇၸွပ်ႈလႄႈ ၵႂၢမ်းဢၼ်လီဢၼ်ငၢမ်းၸမ်ႉ၊ ၸၢင်ႈႁႂ်ႈၸူမ်းႁႂ်ႈသိူဝ်းဢေႃႈ။-

26ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈၼႄပျႃးသဵၼ်ႈတၢင်းတီႈၵေႃႉတီႈသေႈမၼ်းလႄႈ သဵၼ်ႈတၢင်းဢၼ်ၵေႃႉဢၼ်ဢမ်ႇတြႃးၼၼ်ႉၸွမ်းၼၼ်ႉၸမ်ႉ၊ ၸၢင်ႈပႅတ်ႉၸၢင်ႈလႅၼ်ပိူၼ်ႈဢေႃႈ။-

27ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ဢမ်ႇလႆႈဢဝ်တူဝ် ဢၼ်မၼ်းႁဵတ်းမူးသိူဝ်းလႄႈတီႉလႆႈၼၼ်ႉ ပိင်ႈၵိၼ်ႁၢင်းၵိၼ်လႄႈ ဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ်တီႈၵူၼ်းၸမ်ႉ၊ ပဵၼ်ၵေႃႉဢၼ်မီးဝီႉရီႉယႃႉၵႆႉၶၵ်းၼၼ်ႉဢေႃႈ။-

28ၵႃႈၼႂ်းသဵၼ်ႈတၢင်း တြႃးတၢင်းဢၼ်သိုဝ်ႈတေႃႇၼၼ်ႉ ဢသၢၵ်ႈၵတ်းယဵၼ်ၶျၢမ်းသႃႇလႄႈ ၵႃႈၼႂ်းႁွႆးတၢင်းမၼ်းၼၼ်ႉ ဢမ်ႇမီးၽေးတၢင်းတၢႆ။

← Chapter 11 Jump to: Chapter 13 →