Proverbs 17

Shan

← Chapter 16 Jump to: Chapter 18 →

1တႃႇဢူမ်ၼိုင်ႈၵမ်းၼိုင်ႈ ဢၼ်ပဵၼ်ဢၼ်ႁဵဝ်ႇဢၼ်ႁႅင်ႈ ဢၼ်ပႃးတၢင်းၼိမ်ၼၼ်ႉ ယဵင်ႈၶႅၼ်းလီၼႃႇသေ ႁိူၼ်းဢၼ်တဵမ်ဝႆႉတင်းယိတ်ႈဢၼ်ပုၵ်ႈၸေႃႇ ဢၼ်ပႃးတၢင်းဢၼ်ၽိတ်းၵၼ်ၼၼ်ႉဢေႃႈ။-

2ၶႃႈဢၼ်မီးပိင်ႇၺႃႇၼၼ်ႉ ၸၢင်ႈလႆႈဢုပ်ႉၵႃႈၼိူဝ်လုၵ်ႈၸၢႆး ဢၼ်ႁဵတ်းတၢင်းဢၼ်လီဢူၵ်းလီဢၢႆၼၼ်ႉလႄႈ ၶၢမ်ႇဢဝ်ဢမူၺ်ႇ လူၺ်ႈၵၼ်တင်းပီႈၸၢႆးၼွင်ႉၸၢႆးတင်းလၢႆဢေႃႈ။-

3မိူင်ႈပဵၼ်ပုၼ်ႈဢၼ်တၵ်းၸႅတ်ႈငိုၼ်းၶႃႇငိုၼ်းလႄႈ မုၵ်ႉၽႆးပဵၼ်ပုၼ်ႈဢၼ်တၵ်းၸႅတ်ႈၶမ်းၶႃႇၶမ်းလႄႈ ႁူဝ်ၸႂ်ၸမ်ႉ၊ ထႃႇဝရႃႉၽြႃးၸႅတ်ႈၶႃႇဢေႃႈ။-

4ၵေႃႉဢၼ်ႁဵတ်းဢၼ်ဢမ်ႇတြႃးၼၼ်ႉ ၸၢင်ႈဝၢႆႇႁူၸူးသီႇသူပ်း ဢၼ်လၢတ်ႈလူၺ်ႈ လွင်ႈတၢင်းဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉလႄႈ ၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၵေႃႈ ၸၢင်ႈထွမ်ႇဢဝ်လိၼ်ႉဢၼ်လၢတ်ႈလူၺ်ႈ လွင်ႈတၢင်းဢၼ်ယႃႉဢၼ်ယူၵ်ႉၼၼ်ႉဢေႃႈ။-

5ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ် ၵႃႈတီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ သႄႉသွမ်းၽြႃးဢၼ်ၽၢၼ်ႇသၢင်းႁဵတ်းပဵၼ်မၼ်းလႄႈ ၵေႃႉဢၼ်ၸူမ်းသိူဝ်းၵွပ်ႈပိူဝ်ႈဢၼ်ၽေးႁွတ်ႈထိုင်တီႈပိူၼ်ႈၼၼ်ႉၵေႃႈ၊ ဢမ်ႇလႆႈၵၢင်းလႆႈလွတ်ႈတင်းတၢမ်ႇဢပႅတ်ႈ။-

6လၢၼ်လိၼ်ပဵၼ်သရၽူႇၶဝ်ၸိူဝ်းဢၼ်ဢသၢၵ်ႈယႂ်ႇၼၼ်ႉလႄႈ မုၼ်ၽုင်းလုၵ်ႈလၢင်းၸမ်ႉ၊ ပဵၼ်ပေႃႈၶဝ်ဢေႃႈ။-

7ၵႂၢမ်းဢၼ်မျၢတ်ႈၼၼ်ႉ ဢမ်ႇထုၵ်ႇဢမ်ႇၵိုင်ႇၵၼ် တင်းၵေႃႉဢၼ်မိူၵ်ႈၼၼ်ႉလႄႈ လိူဝ်သေၼၼ်ႉဢမ်ႇၵႃး၊ ၵႂၢမ်းမူႉသႃႇဢမ်ႇထုၵ်ႇဢမ်ႇၵိုင်ႇၵၼ်တင်းၸဝ်ႈတင်းၶုၼ်။-

8လၢၵ်ႈသွင်ႇပဵၼ်ၸိူဝ်ႉၼင်ႇသႅင်လီသႅင်မျၢတ်ႈ သိုဝ်ႈၼႃႈတႂ်ႈတႃၵေႃႉဢၼ်ၶၢမ်ႇဢဝ်မၼ်းၼၼ်ႉလႄႈ ၸၢင်ႈပႄႉၸၢင်ႈၼႅင်ႇ ၵႃႈတီႈၵႃႈဢၼ်ဝၢႆႇၼႃႈၵႂႃႇၸူးၼၼ်ႉဢေႃႈ။-

9ၵေႃႉဢၼ်ႁူမ်ႇငမ်းတၢင်းဢၼ်ပိူၼ်ႈၽိတ်းပိူင်ႈၼၼ်ႉဝႆႉၼၼ်ႉ ပွင်ႁဵတ်းမႅတ်ႈတႃႇလႄႈ ၵေႃႉဢၼ်ဢဝ်လွင်ႈတၢင်းသေၸိူဝ်ႉသေပိူင် ၶိုၼ်းမွၵ်ႇလၢတ်ႈၼၼ်ႉၸမ်ႉ၊ ႁႂ်ႈၵေႃႉသေႈၵၼ်ၽၢတ်ႇၽႄၵၼ်ဢေႃႈ။-

10တၢင်းဢၼ်သင်ႇသွၼ်သုင်းမႃႉပၼ်ၼၼ်ႉ ၸၢင်ႈပဵၼ်တီႈဢၼ်သႂ်ႇၸႂ်သႂၢင်းၸႂ် တီႈၵေႃႉဢၼ်မီးပိင်ႇၺႃႇၼၼ်ႉ ၼႃႇသေ တၢင်းဢၼ်ပၼ်ႁွႆးတၢမ်ႇပၢၵ်ႇၼိုင်ႈၼၼ်ႉ တီႈၵေႃႉဢၼ်မိူၵ်ႈၼၼ်ႉဢေႃႈ။-

11ၵေႃႉဢၼ်ဢမ်ႇတြႃးၼၼ်ႉ ၸၢင်ႈႁႃဢဝ် လွင်ႈတၢင်းဢၼ်ပုင်ႇၵၢၼ်ႇၵူၺ်းဢေႃႈ။ ပိူဝ်ႈၼႆလႄႈ ၸင်ႇလႆႈပွႆႇၸႂ်ႉတမၢၼ်ႇ ဢၼ်ႁၢဝ်ႈၵျၢမ်းၼႃႇၼၼ်ႉ ၸူးတီႈမၼ်းဢေႃႈ။-

12တၢင်းဢၼ်ထူပ်းၵၼ်တင်းမီမႄႈ ဢၼ်ပိူၼ်ႈႁိမ်ဢဝ်လုၵ်ႈဢွၼ်ႇမၼ်းယဝ်ႉၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်ထူပ်းၵၼ်တင်းၵူၼ်းမိူၵ်ႈ ဢၼ်မီးတၢင်းဢၼ်ယင်းတိုၵ်ႉၸႂ်မိူၵ်ႈၸႂ်လမ်ယူႇၼၼ်ႉဢေႃႈ။-

13ၽူႈလႂ်သေဢမ်ႇဝႃႈ၊ ၵေႃႉဢၼ်ယင်းဢမ်ႇႁူႉၵျေးၸူးလႄႈ တွပ်ႇတႅၼ်းပၼ်ဢၼ်ဢမ်ႇလီဢမ်ႇငၢမ်းၼၼ်ႉ၊ ႁိူၼ်းၵေႃႉၼၼ်ႉ ဢမ်ႇၵၢင်းဢမ်ႇလွတ်ႈတင်း တၢင်းဢၼ်ဢမ်ႇလီဢမ်ႇငၢမ်း။-

14တၢင်းဢၼ်ၸႃႉၽိတ်းၵၼ်ပဵၼ်ၸိူဝ်ႉၼင်ႇဢၼ် တႅၼ်ႈၼမ်ႉၼွင်ၸႃႉလူင်ႉၸႃႉပွင်ႇၼၼ်ႉလႄႈ၊ ၸူဝ်ႈဢၼ်ဢမ်ႇပႆႇတၼ်းၽိတ်းၵၼ်ၼၼ်ႉၸိုင်၊ ဝႄႈပႅတ်ႈတၢင်းဢၼ်ၽိတ်းၵၼ်ၼၼ်ႉတႃႉ။-

15ၵေႃႉဢၼ်ပွႆႇၶဝ်ၸိူဝ်းဢၼ်ဢမ်ႇတြႃး လွတ်ႈသေၵႃႈၼႂ်းဢပႅတ်ႈ ဢိၵ်ႇတင်းၵေႃႉဢၼ်ၸီႇယၢင်ႇဢပႅတ်ႈ တီႈၶဝ်ၸိူဝ်းဢၼ်သိုဝ်ႈတေႃႇၼၼ်ႉ၊ တင်းသွင်ၵေႃႉၼႆႉ ပဵၼ်ဢၼ်ထႃႇဝရႃႉၽြႃးလီႁင်ႈဢဵတ်ႇသဵတ်ႇဢေႃႈ။

16ၵွပ်ႈပိူဝ်ႈဢၼ်ၵေႃႉမိူၵ်ႈ ဢမ်ႇမီးၺၢၼ်ႇလႄႈႁဵတ်းႁူဝ်လႄႈ ဢဝ်ၵႃႈၶၼ်ပိင်ႇၺႃႇလႆႈမီးယူႇ ၵႃႈၼႂ်းမိုဝ်းမၼ်းၼၼ်ႉ ႁႂ်ႈမၼ်းလႆႈပိင်ႇၺႃႇၼင်ႇႁိုဝ်။-

17ၵေႃႉသေႈၸၢင်ႈႁၵ်ႉယူႇၵူႈၶိင်ႇၵူႈမိူဝ်ႈလႄႈ ပီႈၼွင်ႉၸမ်ႉ၊ မီးတၢင်းဢၼ်ၵိူတ်ႇလဵင်ႉဝႆႉ ပုၼ်ႈၶိင်ႇမိူဝ်ႈဢၼ်တုၵ်ႉၶႃႉ ႁွတ်ႈထိုင်ၼၼ်ႉဢေႃႈ။-

18ၵေႃႉဢၼ်ဢမ်ႇမီးၺၢၼ်ႇၼၼ်ႉ ၸၢင်ႈတူပ်းမိုဝ်းၵၼ်သေလႄႈ ႁပ်ႉတုင်းဢဝ်ၵႃႈတီႈၽၢႆႇၼႃႈၵေႃႉသေႈမၼ်းဢေႃႈ။-

19ၵေႃႉဢၼ်ထုၵ်ႇၸႂ်ၵျိူၵ်ႈၸႂ်တၢင်းဢၼ်ၽိတ်းၵၼ်ၼၼ်ႉ ၸၢင်ႈထုၵ်ႇၸႂ်ၵျိူၵ်ႈၸႂ်တၢင်းဢၼ်ပူၼ်ႉလိူဝ်လႄႈ ၵေႃႉဢၼ်ႁဵတ်းၽၵ်းတူမၼ်းသုင်ၼၼ်ႉ ၸၢင်ႈႁႃဢဝ်တၢင်းလူႉတၢင်းလႅဝ်ဢေႃႈ။-

20ၵေႃႉဢၼ်ၸႂ်ၵူတ်ႉၸႂ်ငေႃးၼၼ်ႉ ဢမ်ႇၸၢင်ႈလႆႈထူပ်းဢၵျူဝ်းဢၼ်လီလႄႈ ၵေႃႉဢၼ်မီးလိၼ်ႉ ဢၼ်ၸၢင်ႈလၢတ်ႈတႂ်ႈလၢတ်ႈၼိူဝ်ယူႇၼၼ်ႉ ၸၢင်ႈထူပ်းၽေးဢူႉပၢတ်ႈဢေႃႈ။-

21ၵူၼ်းဢၼ်ႁႂ်ႈၵေႃႉဢၼ်မိူၵ်ႈၵိူတ်ႇလဵင်ႉမႃးၼၼ်ႉ ၸၢင်ႈႁႂ်ႈတူဝ်ၸဝ်ႈၵဝ်ႇယၢပ်ႇၸႂ်ယုင်ႈၸႂ်လႄႈ ပေႃႈၵေႃႉဢၼ်မိူၵ်ႈၼၼ်ႉ ဢမ်ႇမီးလွင်ႈဢၼ်လီၸူမ်းလီသိူဝ်း။-

22ၸႂ်ဢၼ်ၸူမ်းသိူဝ်းၼၼ်ႉ ၸၢင်ႈႁႂ်ႈယူႇလီၵိၼ်ဝၢၼ်လႄႈ၊ ၸႂ်ဢၼ်တႅၵ်ႇလႅဝ်ၼၼ်ႉၸမ်ႉ၊ ၸၢင်ႈႁႂ်ႈလုပ်ႇတင်းလၢႆ ႁႅင်ႈႁွင်ၵႂႃႇဢေႃႈ။-

23ၵေႃႉဢၼ်ဢမ်ႇတြႃးၼၼ်ႉ ၸၢင်ႈၸူၵ်းဢဝ်လၢၵ်ႈသွင်ႇတၼ်းသူဝ်း ၵႃႈၼႂ်းထွင်းသိူဝ်ႈ ၵႃႈတီႈႁူဝ်ဢူၵ်းပိူၼ်ႈ ႁႂ်ႈလႆႈယႃႉသဵၼ်ႈတၢင်းတြႃးပႅတ်ႈဢေႃႈ။-

24ပိင်ႇၺႃႇမီးယူႇသိုဝ်ႈၼႃႈတႂ်ႈတႃၵေႃႉဢၼ်မီးၺၢၼ်ႇၼၼ်ႉလႄႈ မၢၵ်ႇတႃၵေႃႉဢၼ်မိူၵ်ႈၼၼ်ႉၸမ်ႉ၊ ၸၢင်ႈလႄႇလဵပ်ႈလူတူၺ်း တေႃႇထိုင်ႁွတ်ႈတီႈသုတ်းလိၼ်မိူင်းဢေႃႈ။-

25လုၵ်ႈၸၢႆးဢၼ်မိူၵ်ႈၸမ်ႉ၊ ပဵၼ်လွင်ႈဢၼ်ပေႃႈမၼ်းမႆႈၸႂ်ယၢပ်ႇၸႂ်၊ လွင်ႈဢၼ်မႄႈမၼ်းဢၼ်ၵိူတ်ႇလဵင်ႉမၼ်းၼၼ်ႉ ၶီၸႂ်ၶူမ်ၸႂ်ဢေႃႈ။-

26ဢမ်ႇလီပၼ်တၢမ်ႇဢပႅတ်ႈ တီႈၵေႃႉဢၼ်သိုဝ်ႈတေႃႇၼၼ်ႉလႄႈ ၶုၼ်ဢၼ်ၸီႇယၢင်ႇၸွမ်းၼင်ႇတြႃးၼၼ်ႉၵေႃႈ ဢမ်ႇလီတိူဝ်ႉလီထုၵ်ႇ။-

27ၵေႃႉဢၼ်ၸၢင်ႈၵမ်ၸၢင်ႈၶျုၵ်ႈ ၵႂၢမ်းမၼ်းယူႇၼၼ်ႉ ပျေႉၸုမ်ႇဝႆႉတင်းတၢင်းဢၼ်ႁူႉဢၼ်ၸႅင်ႈလႄႈ ၵေႃႉဢၼ်ၸၢင်ႈမီးၸႂ်ဢၼ်မၼ်ႈၶိူင်ႇ ၵတ်းလီယဵၼ်လီၼၼ်ႉ ပဵၼ်ၵေႃႉဢၼ်ၺၢၼ်ႇလီဢေႃႈ။-

28ၵေႃႉဢၼ်မိူၵ်ႈၼၼ်ႉ၊ ပေႃးယူႇတဵတ်ႇတဵတ်ႇယဵၼ်ယဵၼ်ယူႇၸိုင်၊ ပိူၼ်ႈမၢတ်ႈပဵၼ်ၵေႃႉဢၼ်မီးပိင်ႇၺႃႇလႄႈ ၵေႃႉဢၼ်ဢမ်ႇဢႃႈပၢၵ်ႇမၼ်းလႄႈ ယူႇၼၼ်ႉၵေႃႈ ပိူၼ်ႈထၢင်ႇမၼ်းပဵၼ် ၵေႃႉဢၼ်ၺၢၼ်ႇလီဢေႃႈ။

← Chapter 16 Jump to: Chapter 18 →