Proverbs 5

Shan

← Chapter 4 Jump to: Chapter 6 →

1လုၵ်ႈၸၢႆးၵဝ်ဢိူၺ်း၊ ထွမ်ႇဢဝ်ပိင်ႇၺႃႇၵဝ်လႄႈ ဝၢႆႇႁူၸူးၺၢၼ်ႇၵဝ်၊-

2ႁႂ်ႈမႂ်းလႆႈမီးသမ်ႇမႃႇသတီႉလႄႈ ႁႂ်ႈသီႇသူပ်းမႂ်းလႆႈပႂ်ႉ တၢင်းဢၼ်ႁူႉဢၼ်ၸႅင်ႈၼၼ်ႉယူႇတႃႉ။-

3လွင်ႈမၼ်းၸမ်ႉ သီႇသူပ်းမႄႈယိင်းလေႃၼၼ်ႉ ၸၢင်ႈႁူဝ်ႈယွတ်ႇဢွၵ်ႇ ၼမ်ႉႁူင်းၽိုင်ႈလႄႈ သူပ်းမၼ်းၼၼ်ႉ မိုၼ်ႈၼႃႇသေၼမ်ႉမၼ်းဢေႃႈ။-

4ၵူၺ်းၵႃႈ တီႈသုတ်းမၼ်း ၶူမ်မိူၼ်ၸိူဝ်ႉၼင်ႇမႂ်ယႃႈၶူမ်လႄႈ ၽၢႆပဵင်းထၢၼ်ႇလၢပ်ႇသၢၼ်ႇလျၢၵ်ႉ ဢၼ်မီးၶူမ်းသွင်ၽၢႆႇၼၼ်ႉဢေႃႈ။-

5တိၼ်မၼ်းလူင်းၸူးၵႃႈတီႈတၢင်းတၢႆယူႇလႄႈ၊ ယၢင်ႈတိၼ်မၼ်းႁွတ်ႈထိုင် ၵႃႈတီႈမိူင်းမရၼႃႉပုၼ်ႉဢေႃႈ။-

6ၼင်ႇႁိုဝ်မၼ်းတၵ်းဢမ်ႇၶႆႈၸႂ်လူၺ်ႈသဵၼ်ႈတၢင်းဢသၢၵ်ႈၼၼ်ႉ လီလီငၢမ်းငၢမ်းၸိုင်၊ ထုင်းၸၢမ်ႇထုင်းၽိင်ႈမၼ်းၼၼ်ႉ ၶၢႆႉပုတ်ႈၵႂႃႇယူႇတိၵ်းတိၵ်းလႄႈ၊ မၼ်းဢမ်ႇႁူႉဢမ်ႇႁၼ်။

7ပိူဝ်ႈၼႆလႄႈ လုၵ်ႈၸၢႆးၵဝ်တင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇဢဝ်ၵႂၢမ်းၵဝ်တႃႉ။ ယႃႇပေဝႄႈပိူင်ႈသေၵႂၢမ်းဢၼ်ဢွၵ်ႇသူပ်းၵဝ်ၸိူဝ်းၼၼ်ႉ။-

8ၶၢႆႉသဵၼ်ႈတၢင်းမႂ်းဝႆႉ တီႈဢၼ်ၵႆမႄႈယိင်းၸိူဝ်ႉၼင်ႇၼၼ်ၼၼ်ႉတႃႉ။ ယႃႇပေၵႂႃႇၵႂ်ႈၵႂႃႇၵၢႆ ၵႃႈတီႈၽၵ်းတူႁိူၼ်းမၼ်းၼၼ်ႉ။-

9ပေႃးဢမ်ႇၼၼ် မႂ်းတၵ်းလႆႈဢဝ်မုၼ်သရေႇမႂ်း ဢၢပ်ႈပၼ်တီႈပိူၼ်ႈလႄႈ ဢဝ်ဢသၢၵ်ႈမႂ်းဢၢပ်ႈပၼ်တီႈၶဝ်ၸိူဝ်းဢၼ် ႁၢဝ်ႈၵျၢမ်းၼႃႇၼၼ်ႉဢေႃႈ။-

10ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တၵ်းလႆႈပျေႉၸုမ်ႇတဵမ်ဝႆႉ တင်းၸေးၸိမ်ႇမႂ်းလႄႈ ဢုၵ်ႉၸႃႇဢၼ်မႂ်းႁဵတ်းလႄႈလႆႈၼၼ်ႉ တၵ်းႁွတ်ႈထိုင် ၵႃႈၼႂ်းႁိူၼ်းၵူၼ်းတၢင်ႇၸိူဝ်ႉတၢင်ႇမဵဝ်းဢေႃႈ။-

11ၵႃႈတီႈၵမ်းလိုၼ်းသုတ်းမႂ်းၼၼ်ႉ၊ မိူဝ်ႈဢၼ်ၼိူဝ်ႉၼင်မႂ်း ဢိၵ်ႇတင်းတူဝ်ၵႃႇယႃႉမႂ်း ၽင်ႉဢူႉလူႉလႅဝ်ၵႂႃႇယဝ်ႉၼၼ်ႉၸိုင်၊ မႂ်းတၵ်းလႆႈပွင်ႉၶၢင်းပွင်ႉမိူၼ်ႇဢေႃႈ။-

12ၵမ်းၼၼ်ႉ မႂ်းတၵ်းလၢတ်ႈလႄႈဝႃႈ၊ ၵဝ်ငိၼ်းၸင်း တၢင်းဢၼ်သင်ႇသွၼ်ပၼ်ၼၼ်ႉလႄႈ ႁူဝ်ၸႂ်ၵဝ်ႁဵတ်းဢမ်ႇပေႃးၼင်ႇႁိုဝ် တီႈတၢင်းဢၼ်သုင်းမႃႉၼၼ်ႉယဝ်ႉလူင်ပႄႇ။-

13ၵဝ်ယင်းဢမ်ႇထွမ်ႇဢဝ်သဵင်သြႃႇၵဝ်တင်းလၢႆ၊ ယင်းဢမ်ႇဝၢႆႇႁူၸူး ၵႂၢမ်းၶဝ်ၸိူဝ်းဢၼ်သင်ႇသွၼ်ပၼ် တီႈၵဝ်ၼၼ်ႉလႄႈ ယူႇမႃးယဝ်ႉလူင်ပႄႇ။-

14ၵဝ်ႁဵတ်းထၼ်ႈပေႃး ငႃတၵ်းႁွတ်ႈထိုင်ၵႃႈၼႂ်းတူႉၸရိူၵ်ႈ တင်းသဵင်ႈတင်းမူတ်း ၵႃႈၼႂ်းၵၢင်ပရဵၵ်ႈသၢတ်ႈ ဢိၵ်ႇတင်းမုၵ်ႉၸိူဝ်းဢၼ်ၸူႉတုမ်ၼၼ်ႉမႃးယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

15ဢဝ်ၼမ်ႉၵႃႈတီႈၼမ်ႉၼွင်မႂ်းၼၼ်ႉ သုင်းသွင်ႇလႄႈ ၵိၼ်ၼမ်ႉ ဢၼ်လႆဢွၵ်ႇမႃးၵႃႈၼႂ်းၼမ်ႉမေႃႇမႂ်းၼၼ်ႉတႃႉ။-

16ၼမ်ႉဢွၵ်ႇႁူးမႂ်းၸိူဝ်းၼၼ်ႉ တၵ်းလႆႈၽႄၵၼ်ၵႂႃႇတၢင်ႇတီႈတၢင်ႇလႅၼ်သေလႄႈ ပဵၼ်ၼမ်ႉႁွင်ႈၼမ်ႉၵႄး ဢၼ်လႆယူႇၵႃႈၼႂ်းသဵၼ်ႈတၢင်းႁိုဝ်။-

17ႁႂ်ႈၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၵေႃႉလဵဝ်ၵူၺ်းတႃႉ။ ယႃႇပေႁႂ်ႈလႆႈၸၢပ်ႈသႅင်ႇ ၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်း လူၺ်ႈၵၼ်တင်းမႂ်း။-

18ႁႂ်ႈၼမ်ႉဢွၵ်ႇႁူးမႂ်း မီးမင်ႇၵလႃႇလႄႈ မူၼ်ႈပျေႃႇလူၺ်ႈၵၼ်တင်းမေးမႂ်း ဢၼ်ႁူမ်ႈပွင်းၵၼ်တင်းမႂ်းၸဵမ်မိူဝ်ႈဢၼ် ဢသၢၵ်ႈမႂ်းယင်းလဵၵ်ႉယင်းၼုမ်ႇၼၼ်ႉၵူၺ်းတႃႉ။-

19ႁႂ်ႈမၼ်းၼၼ်ႉ ပဵၼ်ၸိူဝ်ႉၼင်ႇၵႂၢင်တူဝ်မႄႈ ဢၼ်ၸၢင်ႈႁၵ်ႉႁူမ် ဢိၵ်ႇတင်းၸၢတ်ႇၶၢႆးတူဝ်မႄႈ ဢၼ်လီၸူမ်းတွၼ်ႈၼၼ်ႉတႃႉ။ ႁႂ်ႈၼူမ်းမၼ်းၸိူဝ်းၼၼ်ႉ ပေႇၸႂ်ဢလူဝ်ႇသၢၼ်ႇတႃႉမႂ်းယူႇ ၵူႈၶိင်ႇၵူႈမိူဝ်ႈလႄႈ မဝ်းမိင်းလိုမ်းတူဝ်ယူႇ လူၺ်ႈၵၼ်တင်းၸႂ်ဢၼ်ႁၵ်ႉဢၼ်ပႅင်းမၼ်းယူႇၼၼ်ႉတႃႉ။-

20လုၵ်ႈၸၢႆးၵဝ်ဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းမဝ်းမိင်းလိုမ်းတူဝ်ယူႇ လူၺ်ႈၵၼ်တင်းမႄႈယိင်းလေႃလႄႈ ၵွတ်ႇဢုမ်ႈႁူဝ်ဢူၵ်းမႄႈမွၵ်ႇယႃႈယူႇၼင်ႇႁိုဝ်။-

21သဵၼ်ႈတၢင်းဢၼ်ၵူၼ်းၵႂႃႇမႃးၵႃႈမီးၼၼ်ႉ မီးသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ၊ မၼ်းၸဝ်ႈၶႆႈၸႂ်လူၺ်ႈလွင်ႈ ႁွႆးတၢင်းဢၼ်မၼ်းၵႂႃႇမႃး ၵႃႈမီးၼၼ်ႉယူႇဢေႃႈ။-

22ၵေႃႉဢၼ်ဢမ်ႇတြႃးၼၼ်ႉၸမ်ႉ၊ တူႉၸရိူၵ်ႈဢပႅတ်ႈဢၼ်မၼ်းႁဵတ်းၸိူဝ်းၼၼ်ႉ တၵ်းတီႉလႆႈမၼ်းလႄႈ၊ မၼ်းတၵ်းလႆႈၶၢမ်ႇတၢင်းဢၼ် သဵၼ်ႈၸိူၵ်ႈဢပႅတ်ႈမၼ်းတင်းလၢႆ မတ်ႉၽုၵ်ႇမၼ်းဢေႃႈ။-

23မၼ်းၼၼ်ႉ ယင်းဢမ်ႇလႆႈၶၢမ်ႇတၢင်းဢၼ်သင်ႇပၼ်သွၼ်ပၼ်လႄႈ တၵ်းလႆႈတၢႆၵႂႃႇလႄႈ တၵ်းလႆႈမဝ်းမိင်းလိုမ်းတူဝ်ယူႇ ၵွပ်ႈပိူဝ်ႈတၢင်းဢၼ်မိူၵ်ႈမၼ်းၼၼ်ႉ ယႂ်ႇၼႃႇလူင်လၢင်ၼၼ်ႉဢေႃႈ။

← Chapter 4 Jump to: Chapter 6 →