Proverbs 23

Shan

← Chapter 22 Jump to: Chapter 24 →

1မိူဝ်ႈဢၼ်မႂ်းၼင်ႈလႄႈ ၵိၼ်လူၺ်ႈၵၼ်တင်းၶုၼ်ယူႇၼၼ်ႉၸိုင်၊ ၶႆႈၸႂ်ဝူၼ်ႉၸႂ်လူၺ်ႈဢၼ်မီးယူႇၵႃႈတီႈၽၢႆႇၼႃႈမႂ်းၼၼ်ႉ လီလီငၢမ်းငၢမ်းတႃႉ။-

2လွင်ႈမၼ်းၸမ်ႉ ပေႃးမႂ်းပဵၼ်ၵေႃႉဢၼ်ၸၢင်ႈၵိၼ်ပူၼ်ႉၵိၼ်လိူဝ်ၸိုင်၊ မႂ်းဢဝ်မိတ်ႈငႃၵူင်ၶေႃးမႂ်းယူႇဢေႃႈ။-

3ယႃႇပေမီးဢလူဝ်ႇၶႂ်ႈလႆႈ တၢင်းၵိၼ်ယွႆႈဢၼ်ဝၢၼ်ဢၼ်မၼ်းၶုၼ်ၼၼ်ႉ။ ပဵၼ်တၢင်းၵိၼ်ဢၼ်ၸၢင်ႈပႅတ်ႉၸၢင်ႈလႅၼ်ဢေႃႈ။-

4ယႃႇပေႁႂ်ႈတူဝ်ၸဝ်ႈၵဝ်ႇ လႆႈႁိူဝ်ႉလႆႈၼူၼ်း ႁႂ်ႈလႆႈမၢၵ်ႈလႆႈမီး။ ယႃႇပေဢိင်ပိုင်ႈၺၢၼ်ႇတူဝ်ၸဝ်ႈၵဝ်ႇ။-

5ထုၵ်ႇလီဢဝ်တၢင်းဢၼ်ၸၢင်ႈမၢၵ်ႈၸၢင်ႈမီးၼၼ်ႉ ဝႆႉသိုဝ်ႈၼႃႈတႂ်ႈတႃမႂ်းယူႇႁိုဝ်။ ဢၼ်ၸိူဝ်းၼၼ်ႉ ၸၢင်ႈႁူင်ႈၸၢင်ႈႁၢႆၵႂႃႇဢေႃႈ။ ဢၼ်ၸိူဝ်းၼၼ်ႉ ၸၢင်ႈၵီႈပိၵ်ႇၶဝ်သေလႄႈ မိၼ်ၵႂႃႇမိူၼ်ၸိူဝ်ႉၼင်ႇဢၼ် ၼူၵ်ႉလၢင်းတႃႉၶမ်းၸၢင်ႈမိၼ်ၵႂႃႇ ၵႃႈၼိူဝ်ၵၢင်ႁၢဝ်ၼၼ်ႉ ဢမၢၼ်ႇၶၼ်ပဵၼ်ဢေႃႈ။-

6ယႃႇပေၵိၼ်တၢင်းၵိၼ်တၢင်းၶူပ်း ၵေႃႉဢၼ်မီးတႃႁၢႆႉတႃမိူၵ်ႈၼၼ်ႉ။ ယႃႇပေမီးဢလူဝ်ႇၶႂ်ႈလႆႈ တၢင်းၵိၼ်ယွႆႈဢၼ်ဝၢၼ်ဢၼ်မၼ်းမၼ်း။-

7မၼ်းၼၼ်ႉ ပဵၼ်ၵႃႈၼင်ႇဢၼ်ၸႂ်မၼ်းထၢင်ႇဢေႃႈ။ ပိၵ်ႉသမ်ႉမၼ်းလၢတ်ႈတီႈမႂ်းလႄႈဝႃႈ၊ ၵိၼ်တႃႉ၊ သူတ်ႉတႃႉ၊ ဝႃႈၼင်ႇၼႆသေၵေႃႈ ၸႂ်ၸေႇတၼႃႇမၼ်းဢမ်ႇမီးတီႈမႂ်း။-

8တၢင်းၵိၼ်ဢၼ်မႂ်းၵိၼ်ၼၼ်ႉၸိုင် မႂ်းသမ်ႉတၵ်းလႆႈၶိုၼ်းႁၢၵ်ႈဢွၵ်ႇလႄႈ ၵႂၢမ်းလီၵႂၢမ်းဝၢၼ်မႂ်းၼၼ်ႉၵေႃႈ တၵ်းမၢၵ်ႇမိူဝ်ၵႂႃႇဢေႃႈ။-

9ယႃႇပေလၢတ်ႈၵႂၢမ်းႁႂ်ႈၵေႃႉဢၼ်မိူၵ်ႈၼၼ်ႉ လႆႈငိၼ်း။ မၼ်းတၵ်းႁဵတ်းဢမ်ႇပေႃးၼင်ႇႁိုဝ် တီႈပိင်ႇၺႃႇဢၼ်ပႃးၼႂ်းၵႂၢမ်းမႂ်းၼၼ်ႉဢေႃႈ။-

10ယႃႇပေၶၢႆႉသဝ်လၵ်းဢၼ်မၢတ်ႈတွင်းၵႂၢၵ်ႈလိၼ် ဢၼ်ပၵ်းဝႆႉမိူဝ်ႈၵွၼ်ႇဢွၼ်ၼႆႉၼၼ်ႉ။ ယႃႇပေသိမ်းဢဝ်တူင်ႈႁႆႊတူင်ႈၼႃးၶဝ်ၸိူဝ်းဢၼ်ၽၢၼ်ပေႃႈၽၢၼ်မႄႈၼၼ်ႉ။-

11လွင်ႈမၼ်းၸမ်ႉ ၸဝ်ႈဢၼ်ထုတ်ႇဢဝ်ၶဝ်ၼၼ်ႉ တၼ်းၶူဝ်းယႂ်ႇလႄႈ၊ တၵ်းပႂ်ႉဢမူႉၶဝ်ယူႇၽၢႆႇၼိုင်ႈတင်းမႂ်းဢေႃႈ။-

12ဢဝ်ႁူဝ်ၸႂ်မႂ်းၸပ်းၸွႆး တၢင်းဢၼ်သင်ႇသွၼ်သုင်းမႃႉပၼ်လႄႈ ဝၢႆႇႁူမႂ်းၸူးၵႂၢမ်းပိင်ႇၺႃႇတၢင်းဢၼ်ႁူႉဢၼ်ၸႅင်ႈၼၼ်ႉတႃႉ။-

13ယင်းဢမ်ႇသင်ႇသွၼ်သုင်းမႃႉပၼ်တီႈလုၵ်ႈဢွၼ်ႇလႄႈယႃႇပေယူႇ။ ပိၵ်ႉသမ်ႉဢဝ်ၶွၼ်ႉဝၢႆ ပေႃႉယႅၼ်ႉမၼ်းသေၵေႃႈမၼ်းဢမ်ႇတၢႆ။-

14မႂ်းတၵ်းလႆႈဢဝ်ၶွၼ်ႉဝၢႆ ပေႃႉယႅၼ်ႉမၼ်းလႄႈ၊ ၵႄႇသႄႇၼုၵ်ႈဢဝ်ဢသၢၵ်ႈဝီႉၺိၺ်ႇမၼ်း လွတ်ႈသေၵႃႈၼႂ်းမိူင်းမရၼႃႉဢေႃႈ။

15လုၵ်ႈၸၢႆးၵဝ်ဢိူၺ်း၊ ပေႃးႁူဝ်ၸႂ်မႂ်းမီးပိင်ႇၺႃႇၸိုင်၊ ႁူဝ်ၸႂ်ၵဝ်ဢၼ်ဝႃႈ တူဝ်ၵဝ်ၼႆႉတၵ်းၸူမ်းသိူဝ်းဢေႃႈ။-

16မၢၵ်ႇလၼ်းၵဝ်တၵ်းသႂၢင်ႇသိူဝ်း ၼႂ်းမိူဝ်ႈဢၼ်သူပ်းမႂ်းလၢတ်ႈၵႂၢမ်း ဢၼ်သိုဝ်ႈလီယူဝ်းလီၼၼ်ႉဢေႃႈ။-

17ယႃႇပေမီးၸႂ်ဢၼ်သီႈၵေႉႁေႈတႃၶဝ်ၸိူဝ်းဢၼ်မီးဢပႅတ်ႈၼၼ်ႉ။ ႁႂ်ႈမီးသၽေႃးဢၼ်ၵူဝ်ႁႄထႃႇဝရႃႉၽြႃးယူႇ တင်းဝၼ်းတင်းဝၼ်းတႃႉ။-

18ၶိင်ႇမိူဝ်ႈဢၼ်တႅပ်းတတ်းဢမူႉၼၼ်ႉ တၵ်းႁွတ်ႈထိုင်ဢမၢၼ်ႇၶၼ်ပဵၼ်လႄႈ လွင်ႈတၢင်းဢၼ်မႂ်းမုင်ႈထႃႈမွင်းထႃႈၼၼ်ႉ ဢမ်ႇလႆႈလူႉ။-

19လုၵ်ႈၸၢႆးၵဝ်ဢိူၺ်း၊ ထွမ်ႇဢဝ်ၵႂၢမ်းၵဝ်လႄႈ မီးပိင်ႇၺႃႇသေလႄႈ ႁႂ်ႈႁူဝ်ၸႂ်မႂ်း ၸွမ်းၵႃႈၼႂ်းသဵၼ်ႈတၢင်းၼၼ်ႉတႃႉ။-

20ယႃႇပေႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ်ၸိူဝ်းဢၼ် ၵိၼ်ၼမ်ႉၸပိတ်ႈပူၼ်ႉလိူဝ် ဢိၵ်ႇတင်းၶဝ်ၸိူဝ်းဢၼ် ၵိၼ်ၼိူဝ်ႉပူၼ်ႉလိူဝ်ၼၼ်ႉ။-

21ၵေႃႉဢၼ် ၵိၼ်ၼမ်ႉၸပိတ်ႈပူၼ်ႉလိူဝ် ဢိၵ်ႇတင်းၵေႃႉဢၼ်ၵိၼ်တၢင်းၵိၼ်ပူၼ်ႉလိူဝ်ၼၼ်ႉ တၵ်းႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်လႄႈ သၽေႃးဢၼ်ၼွၼ်းပူၼ်ႉၼွၼ်းလိူဝ်ၼၼ်ႉ ၸၢင်ႈလႆႈဢဝ်ၽႃႈယွၵ်းၽႃႈယႅၵ်းႁူမ်ႇဢေႃႈ။-

22ထွမ်ႇဢဝ်ၵႂၢမ်းပေႃႈမႂ်း ဢၼ်ၵိူတ်ႇလဵင်ႉမႂ်းမႃးၼၼ်ႉတႃႉ။ ယႃႇပေႁဵတ်းဢမ်ႇပေႃးၼင်ႇႁိုဝ် တီႈမႄႈမႂ်းဢၼ်ဢသၢၵ်ႈယႂ်ႇၼၼ်ႉ။-

23သိုဝ်ႉဢဝ်သမ်ႇမႃႇတြႃးတႃႉ။ ယႃႇပေၶၢႆ။ သိုဝ်ႉဢဝ်ပိင်ႇၺႃႇဢိၵ်ႇတင်း တၢင်းဢၼ်သင်ႇသွၼ်သုင်းမႃႉဢေႃးဝႃႇတႃႉပၼ် တင်းၺၢၼ်ႇတႃႉ။-

24ၵေႃႉဢၼ်ပဵၼ်ပေႃႈၵေႃႉဢၼ်သိုဝ်ႈတေႃႇၼၼ်ႉ တၵ်းသိူဝ်းပျေႃႇၼႃႇလူင်လၢင်လႄႈ ၵေႃႉဢၼ်ၵိူတ်ႇလဵင်ႉလုၵ်ႈဢၼ်မီးပိင်ႇၺႃႇမႃးၼၼ်ႉ တၵ်းၸူမ်းသိူဝ်းၵွပ်ႈပိူဝ်ႈလုၵ်ႈၼၼ်ႉဢေႃႈ။-

25ပေႃႈမႄႈမႂ်း တၵ်းၸူမ်းသိူဝ်းလႄႈ ၵေႃႉဢၼ်ၵိူတ်ႇလဵင်ႉမႂ်းမႃးၼၼ်ႉ တၵ်းသႂၢင်ႇသိူဝ်းဢေႃႈ။-

26လုၵ်ႈၸၢႆးၵဝ်ဢိူၺ်း၊ ဢဝ်ႁူဝ်ၸႂ်မႂ်းဢၢပ်ႈပၼ်တီႈၵဝ်တႃႉ။ ႁႂ်ႈမၢၵ်ႇတႃမႂ်းတူၺ်းမၢတ်ႈ သဵၼ်ႈတၢင်းဢၼ်ၵဝ်ၵႂႃႇၼၼ်ႉသေၵမ်းလူၺ်ႈ။-

27မႄႈမွၵ်ႇယႃႈ ပဵၼ်ၸိူဝ်ႉၼင်ႇႁွင်ႈၼင်ႇၶူးဢၼ်လိုၵ်ႉၼႃႇၼၼ်ႉလႄႈ မႄႈယိင်းလေႃပဵၼ်ၸိူဝ်ႉၼင်ႇၶုမ်ၼင်ႇလုၵ်းဢၼ်ၵိတ်ႇဢၼ်ၵႅပ်ႈၼၼ်ႉဢေႃႈ။-

28မၼ်းၸၢင်ႈလွမ်တူၺ်းယူႇ မိူၼ်ၸိူဝ်ႉၼင်ႇၸူၼ်ၼၼ်ႉလႄႈ ၸၢင်ႈႁဵတ်းႁႂ်ႈၵူၼ်းၸၢႆး ဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉ ယႂ်ႇၽႄႈၼမ်ၵိုၼ်းမႃးဢေႃႈ။

29ၽူႈလႂ်မီးတၢင်းဢၼ်မႆႈၸႂ်ယၢပ်ႇၸႂ်။ ၽူႈလႂ်မီးတုၵ်ႉၶႃႉတၢင်းၽၢၼ်။ ၽူႈလႂ်မီးတၢင်းဢၼ်ၽိတ်းၵၼ်။ ၽူႈလႂ်မီးတၢင်းဢၼ်ၶႆႈၸႂ်ဝူၼ်ႉၸႂ်။ ၽူႈလႂ်ယင်းဢမ်ႇမီးလွင်ႈမၼ်းလႄႈ မီးတၢင်းဢၼ်တိူဝ်ႉဢၼ်မၢတ်ႇ။ ၽူႈလႂ်မီးတၢင်းဢၼ်မၢၵ်ႇတႃလႅင် ဝႃႈၼႆၸမ်ႉ၊-

30ပဵၼ်ၶဝ်ၸိူဝ်းဢၼ်ၵိၼ်ၼမ်ႉၸပိတ်ႈယူႇႁိုင်ၼႃႇ တင်းၶဝ်ၸိူဝ်းဢၼ်ၸၢင်ႈႁႃဢဝ်ၼမ်ႉၸပိတ်ႈ ဢၼ်လေႃးၵၼ်တင်းယႃႈယႃၼၼ်ႉဢေႃႈ။-

31ယႃႇပေလူပေတူၺ်း ၼမ်ႉၸပိတ်ႈဢၼ်လႅင်ဝႆႉဢၼ်ငဝ်းဢရွင်ႇလုၵ်ႉႁိူဝ်ႈဝႆႉယူႇ ၵႃႈၼႂ်းၵွၵ်းဢၼ်ဢိုၼ်ၶဝ်ႈၵႂႃႇ ဝၢၼ်လီၸဵမ်းလီၼၼ်ႉ။-

32ၵမ်းလိုၼ်းသုတ်းၼၼ်ႉ၊ ၸၢင်ႈၶူပ်းမိူၼ်ၸိူဝ်ႉၼင်ႇငူးလႄႈ ၸၢင်ႈတွတ်ႇမိူၼ်ၸိူဝ်ႉၼင်ႇငူးႁၢႆႉဢေႃႈ။-

33မၢၵ်ႇတႃမႂ်းတၵ်းလူတူၺ်းမႄႈယိင်းလေႃလႄႈ ႁူဝ်ၸႂ်မႂ်းၵေႃႈတၵ်းမွၵ်ႇလၢတ်ႈၵႂၢမ်းဢၼ်ၵူတ်ႉဢၼ်ငေႃးဢေႃႈ။-

34မႂ်းတၵ်းပဵၼ်ၸိူဝ်ႉၼင်ႇ ၵေႃႉဢၼ်ၼွၼ်းၵႃႈၼႂ်းၵၢင်ပၢင်ႇလၢႆႇ ဢိၵ်ႇတင်းၵေႃႉဢၼ်ၼွၼ်းၵႃႈၼိူဝ်ႁူဝ်သဝ်လၢင်းယၢၼ်းႁိူဝ်းသၢင်းၽေႃးၼၼ်ႉ ဢမၢၼ်ႇၶၼ်ပဵၼ်ဢေႃႈ။-

35မႂ်းတၵ်းလၢတ်ႈလႄႈဝႃႈ၊ ၶဝ်ပေႃႉယႅၼ်ႉၵဝ်ယဝ်ႉ။ ၵူၺ်းၵႃႈ ၵဝ်ဢမ်ႇၸဵပ်း။ ၶဝ်တမ်သႂ်ႇတႅင်းသႂ်ႇၵဝ်ယဝ်ႉ။ ၵူၺ်းၵႃႈ ၵဝ်ဢမ်ႇႁူႉ။ ၵဝ်တၵ်းတိုၼ်ႇမႃးမိူဝ်ႈလႂ် ၵဝ်သမ်ႉတၵ်းႁႃထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။

← Chapter 22 Jump to: Chapter 24 →